काठमाडौं । आर्थिक कारोबारमा विवाद भएपछि तीनजनाको हत्या आरोपीलाई प्रहरीले सार्वजनिक गरेको छ । हत्या गरी गाडेको आरोप लागेका तीनजनालाई प्रहरीले सार्वजनिक गरेको हो ।
मोरङ जिल्ला प्रहरी कार्यालयले शुक्रबार पत्रकार सम्मेलन गर्दै उनीहरुलाई सार्वजनिक गरेको हो । पक्राउ पर्नेहरूमा सिरहाको सिरहा नगरपालिका- २१ निवासी ३१ वर्षीय अनिलकुमार मण्डल, मोरङको जहदा गाउँपालिका- ४ बस्ने दिनानाथ सोनार र धनपालथान गाउँपालिकाका बस्ने नजिर आलम छन् ।
अनिलको योजनामा ४८ वर्षीय राजेन्द्र श्रेष्ठ, ३२ वर्षीय शम्भु चौधरी र मोहन लिम्बुको हत्या भएको प्रहरीको दाबी छ।
श्रेष्ठ र चौधरीको शव मोरङको धनपालथाम गाउँपालिका- ७ मा भेटिएको थियो । उखुबारीमा गाडिएको अवस्थामा माघ १३ र १४ गते उत्खनन् भएको थियो। बेपत्ता रहेका ६२ वर्षीय लिम्बुको बिहीबार ललितपुर महानगरपालिका- १२ ठेँचोमा गाडिएको अवस्थाको शव उत्खनन् भएको हो।
प्रहरीका अनुसार सुरूमा लिम्बु र त्यसपछि श्रेष्ठ र चौधरीको हत्या भएको थियो। प्रारम्भिक अनुसन्धानका क्रममा अनिलले लिम्बुको गत मंसिर २८ गते हत्या गरेर गाडेको बयान दिएको मोरङ प्रहरी प्रमुख जनार्दन जिसीले बताए।
अनुसन्धानका क्रममा श्रेष्ठ, चौधरी र मण्डल मंसिर २९ गते सँगसँगै विराटनगर पुगेको खुलेको थियो ।
अनिलको जग्गा प्लटिङदेखि हाइड्रोसम्ममा लगानी रहेको पाइएको छ। ‘आर्थिक व्यवहारमा समस्या भएपछि उनीहरुको हत्या भएको देखिन्छ’, अनुसन्धान अधिकारी भन्छन्। एसपी जिसीले घटनामा संलग्न अन्यबारे अनुसन्धान भइरहेको बताए।
