सर्लाही । सर्लाहीको कविलासीमा मोटरसाइकल दुर्घटना हुँदा चालकको ज्यान गएको छ । अर्का एकजना घाइते भएका छन् । सोमवार मलंगवा–नवलपुर सडक खण्डअन्तर्गत कविलासी नगरपालिका–१०, सलेमपुरमा प्रदेश २–०३–०१८ प ९६८३ नम्बरको मोटरसाइकल अनियन्त्रित भएर दुर्घटनामा परेको हो ।
दुर्घटनामा मोटरसाइकल चालक मलंगवा नगरपालिका–३, निवासी २७ वर्षीय तौखिन मिकरानीको मृत्यु भएको प्रहरीले जनाएकाे छ । दुर्घटना लगत्तै मिकरानीलाई उद्धार गरी प्रादेशिक अस्पताल मलंगवा पुर्याइए पनि चिकित्सकले मृत घोषणा गरेका थिए ।
मोटरसाइकलमा सवार सोही स्थानका २६ वर्षका मकबुल लहरी सफी गम्भीर घाइते भएका छन् । उनलाई प्रादेशिक अस्पताल मलंगवामा सामान्य उपचारपश्चात थप उपचारका लागि वीरगन्ज रेफर गरिएको अस्पताल स्रोतले जनाएको छ ।
तीव्र गतिमा रहेको मोटरसाइकल सडक छेउमा रहेको बिजुलीको पोलमा ठोकिएर दुर्घटना भएकाे प्रत्यक्षदर्शीले बताएकाे प्रहरीकाे भनाइ छ । मिकरानीको शव परीक्षणका लागि प्रादेशिक अस्पतालमै राखिएको र घटनाको अनुसन्धान भइरहेको जिल्ला प्रहरी कार्यालय सर्लाहीका प्रवक्ता प्रहरी नायव उपरीक्षक माधवप्रसाद बुढाथोकीले जानकारी दिए ।
