Tag: भारत

काठमाडौं । आईसीसी टी–२० विश्व कपको समूह ‘दुई’ अन्तर्गत आइतबार न्युजिल्यान्ड र अफगानिस्तान भिड्दैछन् । एकदिवसीय विश्व कपको उपविजेता न्युजिल्यान्ड र भर्खरै विश्व कपमा लगातार स्थान बनाउन थालेको अफगानिस्तानबीच हुने आजको खेलको रौनक यसको नतिजामा मात्रै सीमित हुनेछैन ।

प्रतियोगिताको उपाधि दाबेदार मानिएको भारतको भाग्यसमेत आज शेख जायद स्टेडियममा हुने यसै खेलमा निहीत रहने छ । विश्व कप सुपर–१२ को पहिलो खेलमा पाकिस्तानविरुद्ध १० विकेटको नतिजामा पराजित भएको भारतले दोस्रो खेलमा न्युजिल्यान्डसँग ८ विकेटको पराजय भोगेको थियो ।

समूह चरणका दुई खेलमा पराजित भइसकेको भारतसामू अहिले अन्य टोलीको नतिजामा निर्भर रहनुबाहेक विकल्प छैन । र, आजको खेलमा यदि न्युजिल्यान्डले अफगानिस्तानलाई पराजित गर्यो भने भारतको सेमिफाइनल प्रवेशको सम्भावना समाप्त हुनेछ ।

तर, अफगानिस्तानले यदि न्युजिल्यान्डलाई पराजित गर्यो भने भारतको आशा जिवितै रहने छ । सुरुआती चार खेलमा सतप्रतिशत नतिजा निकाल्दै पाकिस्तान सेमिफाइलनमा पुगिसकेको छ । यस्तै, समूह ‘एक’ बाट इङ्ल्यान्ड र अस्ट्रेलियाले पनि अन्तिम चारमा स्थान बनाइसकेका छन् ।

आजको खेलमा न्युजिल्यान्ड पराजित भएर भारतले आफ्नो अन्तिम खेलमा सोमबार नामिबियालाई पराजित गर्यो भने नेट रनरेटका आधारमा भारतले सेमिफाइनलमा स्थान बनाउने छ ।

एजेन्सी । सुरुआती दुई खेलमा पराजित भएपछि आलोचित र हतोत्साही बनेको भारतले आईसीसी ट्वान्टी–२० विश्वकपको सुपर १२ अन्तर्गत समूह २ को आफ्नो तेस्रो खेलमा अफगानिस्तानलाई ६६ रनले हराएको छ ।

यो जितले भारतलाई जितको लयमा फर्काउन सहयोग गर्नेछ भने सेमिफाइनल प्रवेशको सम्भावनालाई पनि जिवित राख्नेछ । तर त्यो सम्भावना निकै कम छ ।

टस हारेर पहिले ब्याटिङ गरेको भारतले ओपनरहरु रोहित शर्मा (७४) र केएल राहुल (६९)ले अर्धशतकीय योगदान गरेपछि उत्कृष्ट सुरुआत गरेको थियो । अन्तिम ५ ओभरमा हार्दिक पण्ड्या र ऋषभ पन्तले विष्फोटक इनिङ खेल्दा भारतले २ सय को आंकडा पार गरेको हो ।

हार्दिकले ३५ र ऋषभले २७ अविजित रन बनाएपछि भारतले २१०-२ को योगफल खडा गरेको थियो । दुवैले १३ बलको सामना गरेका थिए ।

२११ रनको विशाल लक्ष्य पछ्याएको अफगानिस्तानले निर्धारित २० ओभरमा ७ विकेट गुमाउँदै १४४ रन मात्र बनायो । अफगानिस्तानका करिम जन्नत ४२ रनमा अविजित रहे । मोहम्मद नाबीले ३५ रन जोडे । भारतका बलर मोहम्मद शामीले सर्वाधिक ३ विकेट लिए । यस्तै रविचन्द्रन आश्विनले २ विकेट हात पारे ।

भारत पहिलो खेलमा पाकिस्तानसँग दोस्रो खेलमा न्युजिल्यान्ड पराजित भएको थियो । शुक्रबार भारतले स्कटल्यान्डसँग खेल्नेछ । अब, सेमिफाइलन यात्रा तय गर्न भारतलाई दुबै खेल जित्नुपर्ने हुन्छ । यति मात्रै हैन अन्य खेलमा समेत भर पर्नुपर्ने हुन्छ ।

सुपर–१२ को समूह–२ बाट सेमिफाइनल पुगिसकेको पाकिस्तानको ४ खेलमा ४ जितका साथ शीर्ष स्थानमा छ । अफगानिस्तान ३ खेलमा २ जित र १ हारसहित दोस्रो स्थानमा छ ।

न्युजिल्यान्ड ३ खेलमा २ जित र १ हार सहित नेटरनरेटको आधारमा तेस्रो स्थानमा छ । नामिबिया ३ खेलमा १ जित र २ हार सहित पाँचौं स्थानमा छ । भारत ३ खेलमा १ जित र २ हारका साथ चौथो स्थानमा छ । स्कटल्यान्ड सुरुवाती ३ खेल नै हारेको छ ।

एजेन्सी । न्युजिल्याण्डसँगको खेलमा पनि पराजय भोगेपछि आईसीसी ट्वान्टी–२० विश्वकपमा भारतको आशा कमजोर हुँदै गएको छ । प्रतियोगिता सुरु हुनुअघिको उपाधि दावेदार भारत पहिलो खेलमा पाकिस्तानसँग हारेको थियो ।

विराट कोहली नेतृत्वको भारतीय टोली आइतबार राती पनि अप्रत्यासित रुपमा कमजोर देखियो । दुवईान न्युजिल्याण्डले १११ रनको सामान्य लक्ष्य ३३ वल अगावै पूरा गरिदियो ।

न्युजिल्याण्डले ब्याटिङतर्फ भारतलाई नियन्त्रणमा राख्नै ११०–७ को योगफलमा सीमित राखेको थियो । भारतले आफ्नो इनिङमा ८ चौका र २ छक्का प्रहार गरेको थियो ।

अलराउण्डर रवीन्द्र जडेजाले सर्बाधिक रन बनाउने क्रममा १९ बलमाद अविजित २६ रनको पारी खेले । न्युजिल्याण्डका बायाँ हाते तीव्र बलर ट्रेन्ट बोल्टले ३ र लेगस्पिनर इश सोधीले २ विकेट लिए ।

जवाफी व्याटिङ गरेको न्युजिल्याण्डका मार्टिन गुप्टिललाई जरप्रित बुमराहले २० रनको स्कोरमा आउट गरे । तर डेरित मिटेलले ३५ बलमा ४९ रनको स्कोर गरे । उनले कप्तान केन विलियमसनसँग मिलेर ७२ रनको साझेदारी गरे । विलियमसन ३३ रनमा अविजित रहे । स्टार खेलाडीले भरिएको भारतमाथिको यो प्रभावशाली विजयपछि न्युजिल्याण्डले पनि विश्वकप सुपर १२ अन्तर्गत समूह २ बाट सेमिफाइनलमा प्रवेशको सम्भावना बढाएको छ ।

यो समूहमा पाकिस्तान ३ जितपछि शीर्ष स्थानमा, अफगानिस्तान ४ अंकसहित दोस्रो स्थानमा छ । न्युजिल्याण्ड र नामिवियाको २–२ अंक हुँदा स्कटल्याण्ड र भारत अंकविहीन छन् ।

 

काठमाडौं । पहिलोपटक साफ च्याम्पियनसीपको उपाधि जित्ने नेपालको सपना हिजो राति भंग भयो । भारतसँग ३–० को पराजयपछि नेपाल उपविजेतामा सिमित बनेको छ । यद्यपि, फाइनलसम्मको यात्रा पनि नेपालका लागि ऐतिहासिक नै हो ।

फुटबलमा भारतसँगको हार नेपालका लागि कुनै नौलो र अनपेक्षित घटना होइन । हिजोको फाइनलमा पनि सातपटकको विजेता भारतलाई नै ‘फेभरेट’ मानिएको थियो । यद्यपि, नेपालले ९० मिनेट मैदानमा जसरी खेल्यो त्यो चाहिँ चिन्ताको विषय बनेको छ । नेपालको खेलमा कुनै पनि समय आक्रामकता झल्किएन । खेल जित्नेभन्दा भारतलाई रोक्ने ध्याउन्नमै देखिए खेलाडीहरु ।

९० मिनेटको खेलमा अधिकांश समय बल नेपालको पोष्ट वरिपरि नाचिरह्यो । भारतीय गोलकिपर अधिकांश समय फुर्सदमा देखिन्थे । खेलअवधिभर भारतको पोष्टमा नेपालले जम्मा एउटा खतरनाक प्रहार गर्यो, त्यो पनि दुई गोल खाइसकेपछि । त्यो डिफेन्डर रोहित चन्दको हेडिङ थियो, जुन टप बारमा लागेर बाहिरिन पुग्यो । त्यसबाहेक नेपालले गोलको गहकिलो मौकासमेत निकाल्न सकेन ।

हिजोको खेल हेर्दा यस्तो प्रतित हुन्थ्यो कि नेपालको भिडन्त भारतसँग नभएर ब्राजिल वा अर्जेन्टिनाजस्ता फुटबल महाशक्तिसँग भइरहको थियो । एकदमै दविएर खेलिरहेका थिए खेलाडीहरु । मानौं प्रशिक्षकले उनीहरुलाई गोल गर्न होइन, गोल रोक्न मात्रै सिकाएर पठाएका थिए ।

भनिन्छ नि खेलमा आक्रमण नै डिफेन्सको सबैभन्दा राम्रो तरिका हो । फुटबलमा यदि तपाईं आक्रमणको प्रयास गर्नुहुन्न भने कुनै न कुनै क्षण त विपक्षीले तपाईंको पोष्टमा बल छिराउँछ नै । नेपालले पहिलो हाफमा जेनतेन भारतलाई रोक्यो । तर, दोस्रो हाफको सुरुमै भारतले एक मिनेटभित्र दुई गोल दागेर नेपालको रक्षात्मक रणनीति चकनाचुर बनाइदियो ।

हिजोका खेलमा नेपालको रणनीतमिाथि प्रश्न उठाउन सकिन्छ । फाइनल प्रतिस्पर्धामा कुनै पनि टिम उपाधिकै लागि भिड्ने हो । चाहे प्रतिस्पर्धी जति बलियो किन नहोस । तर, नेपाली टिमको प्रारम्भिक ११ मा एक मात्र स्ट्राइकर नवयुग श्रेष्ठ थिए । मनिष डाँगी र आयूष घलानजस्ता ‘इन फर्म’ स्ट्राइकरहरुलाई सुरुमै मैदानमा उतारेको भए नेपालको आक्रामक मानसिकता झल्किन सक्थ्यो । तर, उनीहरुलाई दोस्रा हाफका लागि साँच्दा नेपालको अग्रपंति फितलो भयो ।

सम्भवतः प्रशिक्षकले पहिलो हाफमा भारतलाई रोक्ने र दोस्रोमा आक्रमण गर्ने रणनीति लिएका थिए । तर, दोस्रो हाफको सुरुवातमै दुई गोल खाएपछि नेपालको योजना भताभुंग भइहाल्यो । दुई गोल खाइसकेपछिको अवस्थामा खेलमा फर्किन यसै पनि कठिन हुन्छ । त्यसमाथि आफूभन्दा बलियो टोली छ भने त झन् दुरुह हुन्छ । नेपालले कम्तिमा एक गोल फर्काएको भए कागजी नतिजा प्रतिस्पर्धात्मक देखिन्थ्यो । तर सकेन । बरु अन्तिमतिर भारतले नै एक गोल थप्यो ०–३ को एकतर्फी नतिजा निकाल्यो ।

हिजो दुई टिमको खेलस्तर हेर्दा यो नतिजालाई अस्वभाविक मान्न मिल्दैन । नेपालले जस्तो खेल्यो, त्यस्तै नतिजा व्यहोर्यो ।

भारतसँग मनोवैज्ञानिक त्राश

नेपाल र भारतबीचको खेल स्तरमा साह्रै ठूलो अन्तराल छैन । नेपालले चियाउनै नसक्ने प्रतिस्पर्धी होइन भारत । तर, विगतदेखि नै भारतसँग खेल्दा नेपाली टिमको मनोबल आफसेआफ कमजोर हुने गरेको पाइन्छ । कमजोर मनोबलकै कारण नेपाल जितको खोजीभन्दा पनि हार टार्नेमा बढी फोकस हुने गरेको छ ।

नेपालको प्रमुख प्रशिक्षक भएर आएपछि अब्दुल्लाह अल्मुताइरीले नेपाली टिममा धेरै फेरबदल गरे । केही प्रतिभाशाली युवा खेलाडीहरु उनले जन्माए । नेपाली टिमको फिनिसिङमा सुधार देखियो । तर, भारतविरुद्धको कमजोर मानसिकता भने उनले झन् बढाइदिएका छन् ।

साफ समूहचरण अन्तरगत भारतसँगको खेलअघि अब्दुल्लाह अल्मुताइरीले नेपालको जित्ने सम्भावना एक प्रतिशत मात्रै भएको बयान दिएका थिए । हुन त कतिपयले यसलाई उनको ‘माइन्ड गेम’ का रुपमा चर्चा गरे । तर, यस्तो बयानले टिमको मनोबल खस्किने र मनोवैज्ञानिक त्राश पैदा गर्नेतर्फ अल्मुताइरीले ध्यान दिएनन् ।

समूह चरणको खेलमा नेपालले भारतसँग पूर्ण रक्षात्मक रणनीति अपनाएको थियो । नेपाललाई फाइनलमा पुग्नका लागि भारतसँग बराबरी नतिजा पर्याप्त भएकाले त्यसबेला रक्षात्मक खेल्नुलाई तर्कसंगत मान्न सकिएला । तर, फाइनलमा त जितकै लागि खेल्ने हो । फाइनलमा रक्षात्मक खेल्नु भनेको सिधै प्रतिस्पर्धीलाई उपाधि जित्ने बाटो सजिलो बनाइदिनु मात्र हो ।

फिफा र्‍याङ्किङमा नेपालभन्दा भारत ६१ स्थान माथि छ । तर, नेपालले भारतभन्दा माथिल्लो वरियतामा रहेका देशहरुलाई कडा टक्कर दिएका धेरै उदाहरण छन् । हेड–टु–हेडमा नेपालभन्दा भारत धेरै अगाडि भए पनि प्रायजसो खेलहरुमा नेपालले भारतलाई जितका लागि संघर्ष गर्न वाध्य पारेको छ ।

हालै काठमाडौंमा भएका दुई मैत्रीपूर्ण खेलमा पनि नेपाल यति फितलो देखिएको थिएन । एउटा खेलमा त नेपालले अग्रतासमेत लिएको थियो । तर, साफ च्याम्पिसनसीपका दुवै खेलमा नेपालले भारतलाई आफूमाथि हावी हुन दियो । यसले आगामी दिनमा भारतविरुद्ध नेपालको मानसिकता थप कमजोर गराउने निश्चित छ ।

स्मरणीय यो छ कि प्रशिक्षक अल्मुताइरीले नेपाल आउनासाथ गरेको पत्रकार सम्मेलनमा भनेका थिए, अब नेपालले रक्षात्मक खेल्दैन (नो मोर डिफेन्स) । तर, भारतविरुद्ध नेपालको खेल शैलीले अल्मुताइरीको उक्त अभिव्यक्तिको भावलाई न्याय गरेन । अति रक्षात्मक बन्दा नेपालको एउटा सपना टुट्यो ।

खेलाडीको मिहिनेत र प्रशिक्षकको समर्पण

यो प्रतियोगितामा नेपालको समग्र प्रदर्शनलाई पुनरावलोकन गर्दा चाहिँ खुशी हुनुपर्ने ठाउँ धेरै छन् । माल्दिभ्स र श्रीलंकाविरुद्ध नेपालले स्पष्ट जित निकाल्दै उत्कृष्ट सुरुवात गरेको थियो । साफ च्याम्पियनसीपमा नेपालले पहिलोपटक श्रीलंकाविरुद्ध जित हासिल गरेको हो ।

समूह चरणअन्तरगत बंगलादेशविरुद्धको निर्णायक म्याचमा पनि नेपालले राम्रो प्रदर्शन गरेको थियो । गोलका लागि पेनाल्टीको सहारा लिनु परे तापनि खेलमा नेपालले बंगलादेशलाई दवावमा राखेकै हो ।

खेलाडीहरुको कुरा गर्दा फेरि एकपटक किरणकुमार लिम्बुले दर्शकको मन जितेका छन् । हरेक म्याचमा उनले केही खतरनाक आक्रमणहरु विफल तुल्याउन सफल भए । यस्तै मनिष डाँगीले माल्दिभ्सविरुद्ध काउन्टर अट्याकमा गरेको गोललाई कुनै पनि अन्तर्राष्ट्रिय प्रतिस्पर्धामा नेपाली खेलाडीले गरेको उत्कृष्ट गोलको सूचीमा राख्न सकिन्छ ।

श्रीलंकाविरुद्ध आयूष घलानको प्रदर्शन पनि सम्झनलायक छ । उक्त खेलमा एउटा गोल र एउटा असिस्ट गरेका १७ वर्षका यी युवाले भविष्यका लागि आशालाग्दो सम्भावना देखाएका छन् । डिफेन्समा सँधैजस्तो रोहित चन्दले आफूलाई पर्खालका रुपमा उभ्याइरहे । अट्याकिङ मिडफिल्डर अञ्जन विष्ट पनि प्रभावकारी रहे । अन्य खेलाडीहरुले पनि सक्दो प्रयास गरे ।

प्रमुख प्रशिक्षक अब्दुल्लाह अब्लुल्लाह अल्मुताइरीले नेपाली फुटबलप्रति देखाएको लगाव र समर्पण पनि यो प्रतियोगिताको चर्चायोग्य पक्ष रह्यो । टचलाइनमा बस्दा उनको व्यग्रतापूर्ण प्रस्तुतिले धेरै नेपालीहरुको मन पगालेको छ । अत्यधिक व्यग्रताकै कारण उनले दुईपटक पहेँलो कार्ड खान पुगेर फाइनल खेलमा प्रतिवन्धसमेत भोगे । नेपालले गरेको गोलमा अल्मुताइरीको सेलिब्रेसनले सामाजिक सञ्जालमा निकै चर्चा पायो ।

यस प्रतियोगितामार्फत अल्मुताइरीले नेपालीहरुको अथाह माया बटुलेका छन् । तर, साफपछि आफू नेपाली टिममा नरहने घोषणा गरेर उनले सबैलाई खिन्न तुल्याए । आशा छ, उनले आफ्नो निर्णयमा पुनर्विचार गर्नेछन् ।

समग्रमा भारतविरुद्धका दुई म्याचलाई छोड्ने हो भने साफ च्याम्पियनसीपको १३ औं संस्करण नेपालका लागि सुखद नै मान्नुपर्छ ।

तस्विरहरु : एन्फा

 

 

 

 

काठमाडौं । नेपाल र भारतका राष्ट्रिय फुटबल टोलीबीचको दोस्रो मैत्रीपूर्ण खेल आज हुँदैछ । विहीबारको पहिलो खेलमा १–१ गोलको बराबरी खेलेका यी दुई टोलीबीचको खेल दशरथ रंगशालामा आज साँझ साढे ५ बजेदेखि सुरु हुनेछ ।

सरकारले रंगशालाको पूर्ण क्षमताको एक तिहाई दर्शक राख्न अनुमति दिएसँगै विहीबार पनि ५ हजार दर्शकले प्रवेश पाएका थिए । आजको खेलमा पनि एन्फाले ५ हजार १ सय टिकट विक्री गर्ने बताएको छ । भीआईपी प्यारापिटका लागि २ हजार र साधारण प्यारापिटमा १ हजार टिकटशुल्क तोकिएको छ ।

विहीबार अग्रता जोगाउन नसक्दा नेपालले बराबरीमा रोकिनुपरेको थियो । खेलको ३६ औं मिनेटमा अन्जन विष्टले गोल गरेर टिमलाई अग्रता दिलाए पनि दोस्रो हाफको सुरुआतमै अनिरुद्र थापाको गोलमार्फत भारतले बराबरी गरेको थियो ।

आइतबारको खेल नेपाली कप्तान किरण चेम्जोङका लागि ऐतिहासिक हुनेछ । उनले नेपालका लागि सर्वाधिक अन्तर्राष्ट्रिय खेलको कीर्तिमान बनाउनेछन् । यसअघि यो कीर्तिमान पूर्व कप्तान विराज महर्जनको नाममा थियो ।

विहीबारको खेलमा ७३ औं क्याप जितेर किरणले विराजको कीर्तिमान बराबर गरेका थिए । किरणले सन् २००८ मा एएफसी च्यालेन्ज कप अन्तर्गत लाओसविरुद्धको खेलमा राष्ट्रिय टोलीबाट डेब्यू गरेका थिए ।

नेपाल र भारत निकै चिरप्रतिद्धन्द्धीका रुपमा रहेका छन् । नेपालले दक्षिण एशियाली स्तरमा भारतलाई मुख्य प्रतिद्धन्द्धीका रुपमा लिँदै आएको छ । अहिलेसम्म यी दुई टिम २० पटक खेलेका छन् । नेपालले एक खेलमात्र जितेको छ भने ६ खेल बराबरी गरेको छ । बाँकी खेल भारतको पोल्टामा गएको छ ।

यो मैत्रीपूर्ण खेलपछि नेपाली टिम थप तयारीका लागि कतार जानेछ । जहाँ नेपालले दुई साता भन्दा बढीको समय विताएर साफ च्याम्पियनसिपका लागि उतैबाट माल्दिभ्स जानेछ ।

अक्टोबर १ देखि १६ सम्म मालेमा हुने साफ च्याम्पियनसिपमा नेपालले उपाधि जित्ने लक्ष्य राखेको छ । नेपाल अहिलेसम्म साफ च्याम्पियनसिपको सेमिफाइनलबाट माथि जान सकेको छैन ।

एजेन्सी । दोस्रो खेलमा ३ विकेटको रोमान्चक विजयसँगै श्रीलंकाविरुद्धको तीन एकदिवशीय शृंखला भारतले जितेको छ । कोलम्बोमा गएराति सम्पन्न दोस्रो एकदिवशीयमा दीपक चहरले आठौं नम्बरमा ब्याटिङ गरी ६९ रनको अर्धशतकीय योगदान गरेपछि भारतले जित हासिल गरेको हो ।

२ सय ७६ रनको लक्ष्य पछ्याएको भारत १८ ओभरमा ११६-५ को नाजुक स्थितिमा थियो । उसका शीर्ष क्रमका ब्याट्सम्यानहरुले अपेक्षाकृत प्रदर्शन गर्न सकेनन् । अर्धशतक बनाएर खेलिरहेका सूर्यकुमार यादव पनि आउट हुँदा भारत २७ ओभरमा १६०-६ को स्थितिमा पुग्यो । क्रुनाल पण्ड्याले पनि ३५ रनमात्र बनाउन सके ।

तर आठौं विकेटका लागि दीपक चहर र तीब्र बलर भुवनेश्वर कुमारबीच ८२ रनको अविजित साझेदारी भयो र इनिङको ५ बल छँदै भारले खेल जित्यो र शृंखला जित निश्चित ग¥यो । चहरले ८२ बलमा ७ चौका र १ छक्कासहित ६९ रनको अविजित संयमित पारी खेले । कुमारले उनलाई १९ रन बनाएर साथ दिए । श्रीलंकाका वानिन्दु हसरंगाले ३ विकेट लिए पनि अन्तिम ओभरतिर घरेलु बलर निप्रभावी देखिएका थिए ।

यसअघि टसजितेर पहिले ब्याटिङ गरेको श्रीलंकाले ९ विकेटको क्षतिमा मध्यम योगफल बनाएको हो । उसका ओपनर आभिस्का फर्नाण्डोले ५० तथा मध्यक्रमका चरिथ असलंकाले ६५ रनको अर्धशतकीय योगदान गरेका थिए । चामिका करुणारत्नेले पनि ४४ रन बनाए ।

बलिङमा भारतका भुवनेश्वर र युजवेन्द्र चहलले ३-३ विकेट लिए । चहरले बलिङबाट पनि २ विकेट लिएका थिए । उनी खेलकाे म्यान अफ द म्याचसमेत चुनिए ।

शृंखलाको पहिलो खेलमा भारत आइतबार ७ विकेटले विजयी भएको थियो । एक खेल अगावै एकदिवशीय शृंखला जितेको भारतले त्यसपछि तीन खेलको ट्वान्टी-२० शृंखला पनि खेल्नेछ ।

एजेन्सी । पहिलो खेलमा ७ विकेटको आरामदायी जितसहित श्रीलंकाविरुद्धको एकदिवशीय शृंखलामा भारतले १-० को अग्रता लिएको छ ।

कोलम्बोको प्रेमदाशा रंगशालामा घरेलु टोली श्रीलंकाले दिएको २ सय ६३ रनको लक्ष्य ३ विकेटको क्षतिमा पूरा गर्दा शिखर धवनले ८६ रनको कप्तानी पारी खेले ।

शिखरले ९५ बलमा ६ चौका र १ छक्कासहित अवजित प्रदर्शन गर्दा अर्का ओपनर पृथ्वी शले २४ बलमा ४३ रन बनाए । धवनले दोस्रो विकेटका लागि इशान किसानसँग मिलेर ८५ रन तथा तेस्रो विकेटका लागि मनिस पाण्डेसँग ७२ रनको ठोष साझेदारी गर्दै टिमलाई जित दिलाएका हुन् ।

इशानले ४२ बलमा ५९ रनको अर्धशतकीय पारी खेले । मनिसले २६ रन जोडे । सूर्यकुमार यादव ३१ रनमा अविजित रहे ।

इसअघि टस जितेर पहिलो व्यटिङ गरेको घरेलु टोलीले निर्धारित ओभरमा ९ विकेट गुमाएर २ सय ६२ रनको मध्यम योगफल खडा गरेको थियो । श्रीलंकाका लागि पुछारक्रममा व्यटिङमा आएका चामिण्डा करुणरत्नेले अविजित ४३ रन बनाए । अन्यले अपेक्षाकृत रन बनाउन सकेनन् ।

नियमित कप्तान विराट कोहली, उपकप्तान रोहित शर्मा, मुख्य बलर जरप्रित बुमराह लगायतलाई आराम दिँदै दोस्रो रोजाईको टिम पठाएर हेपेको आरोप लागिरहेका बेला श्रीलंकाली टोलीका लागि त्यहि टोली नै पर्याप्त बन्यो । ३ एकदिवशीय र ३ ट्वान्टी-२० खेलको शृंखलाका लागि भारतीय टोली कोलम्बो पुगेको हो ।

एजेन्सी । भारतका अस्पतालहरुले अक्सिजनको अभावकै कारण आफ्ना विमारीहरु मरिरहेको बताएका छन् । किनभने कोरोना संक्रमित र मृतकको आँकडाले दिनदिनै नयाँ कीर्तिमान बनाइरहेका छन् ।

भारतमा पछिल्लो तीन दिनको बीचमा करिव १० लाख मानिस संक्रमित भएका छन् । शनिबार २४ घण्टाको अवधिमा ३ लाख ३६ हजार ७८६ नयाँ संक्रमित फेला परेका छन् ।

दिल्लीको जयपुर गोल्डेन अस्पतालमा शनिबार राती अक्सिजन नपाएर २० जना संक्रमितको निधन भएको अस्पताल प्रशासनले जानकारी दिएको छ । भारत सरकारले भने रेल सेवा र भारतीय वायु सेनालाई आवश्यक उपकरण आपूर्तिका लागि तैनाथ राखिएको बताएको छ ।

शनिबार २४ घण्टाको अवधिमा भारतभर २६ सय २४ जनाको मृत्यु भएको छ । शुक्रबार यो संख्या २२ सय ६३ थियो । विश्व स्वास्थ्य संगठन (डब्लूएचओ)ले भारतको अहिलेको स्थितिलाई ‘महाविनाशकारी अवस्था’को रुपमा चित्रण गरी कोरोनाले कतिसम्म क्षति गर्छ भन्ने उदाहरण बनेको बताएको छ ।

सन् २०२१ को सुरुआतमा भारतले कोरोनालाई परास्त गरेको ठानेको थियो । फेब्रुअरीको मध्यतिर सवा अर्ब जनसंख्या रहेको भारतमा ११ हजार नयाँ संक्रमित देखिएका थिए । भारतले खोप उत्पादन गरी निर्यातसमेत गर्न थालेको थियो । मार्चमा त्यहाँका स्वास्थ्यमन्त्रीले कोरोनाबिरुद्धको लडाईं अन्त्यतिर पुगेको बताएका थिए ।

तर त्यतिबेलै देखि नयाँ कोरोना संक्रमित फेला पर्न थालेका थिए । नयाँ भेरिएन्टको प्रवेश भइसकेपछि पनि त्यहाँ सार्वजनिक समारोह, कुम्भमेला लगायतका गतिविधि रोकिएन । यही महिनाको सुरुआतमा हरिद्वारमा आयोजित कुम्भमेलामा लाखौं तीर्थयात्री सहभागी थिए ।

राजधानी दिल्लीका अस्पतालहरुले आफ्नो सामर्थ्यको अन्तिम अवस्थामा रहेको चेतावनी दिएका छन् । होली फ्यामिली अस्पतालले आईसीयूसहित आफ्ना सबै बेडहरु भरिभराउ रहेको जनाएको छ ।

‘लगभग सबै अस्पताल अन्तिम स्थितिमा छन् । अक्सिजन पाइएन भने हामीले कुनै पनि रोगका विरामीको उपचार गर्नै सक्दैनौं,’ दिल्लीका एक चिकित्सकले बीबीसीसँग भने, ‘अक्सिजन नपाएको अवस्थामा १ मिनेटभित्र ती बिरामीको मृत्यु हुन्छ । भेन्टिलेटरमा रहेका बिरामीलाई उच्च प्रवाहको अक्सिजन जरुरी हुन्छ । उनीहरुले त्यो सुविधा पाएनन् भने अधिकांशले मृत्युवरण गर्न बाध्य हुनेछन् ।’