महोत्तरी । सेटिङ्गमा जुवा खेलाएको भन्दै यसअघि आलोचना व्यहोरेको महोत्तरीका प्रहरी फेरि अर्को घटनाका कारण चर्चामा रहेको छ ।
जबरजस्ती करणी आरोपी जितु मण्डल फरार थिए । उनलाई प्रहरीले पक्राउ गर्यो । तर पक्राउपछि प्रहरी घेराबाटै उनी फेरि फरार भए । पीडितपक्षले प्रहरीको मिलेमतोमा अभियुक्तलाई भगाइएको आरोप लगाएको छ ।
मण्डलविरुद्ध १० साउन २०७७ रातको ९ बजे जिल्लाको रामगोपालपुरकी एक महिलालाई जबरजस्ती करणी गरेको भन्दै पीडितपक्षले किटानी जाहेरी दिएका थिए । जिल्लाकै औरही नगरपालिका बस्ने २६ वर्षीय जितु मण्डलसहित सोही उमेरका खुस्रे मुखियाले जबरजस्ती करणी गरेको भन्दै प्रहरीमा जाहेरी परेसँगै उनीहरु फरार भएका थिए ।
रातको ९ बजे सौच गर्न निस्किएकी महिलालाई दुईजनाले जबरजस्ती करणी गरेको प्रमाणहरु घटनास्थलबाट बरामद् भएको थियो ।
‘हामी न्यायको लागि सयौंपटक जिल्ला प्रहरी कार्यालय जलेश्वर पुग्यौं तर प्रहरीले खोजी हुँदै छ भन्दै टारेका थिए’, पीडित महिलाका देवरले गुनासो गरे ।
फरार अभियुक्त जितु मण्डल शुक्रबार मामाघर आउने सुइको पाएपछि स्थानीयले प्रहरीलाई खबर गरेका थिए ।
प्रहरीले हत्कडीसहित अभियुक्त भागेको बताएको छ । तर प्रहरी कार्यालमानै रहेको दाबी स्थानीयको छ । पीडित महिलाका देवरले प्रहरीले अभियुक्त मण्डललाई मिलोमतोमा नै भगाएको आरोप लगाएका छन् ।
करणी भएको ठाउँवाट मण्डल र मुखियाको ज्याकेट, मोबाइल समेत बरामद् भएको थियो ।
घटनालाई नजिकबाट नियालेका वडा अध्यक्ष जितेन्द्र चौधरीले प्रहरीको अनुसन्धान शंकाको घेरामा रहेको बताए ।
प्रहरीले भने जाहेरीपछि सुक्ष्म रुपमा अनुसन्धान भइरहेको दाबी गरेको छ । अपराधीलाई सजाय दिलाउन प्रहरीले हदैसम्मको प्रयास गरिरहेको एसपी दिनेश आचार्यले बताए । अभियुक्तलाई भगाइएको वा भागेको विषयमा छानबिन भइरहेको एसपी आचार्यले बताए ।
