चितवन । नेकपा एमालेको १०औं राष्ट्रिय महाधिवेशनअन्तर्गत निर्वाचन कार्यक्रम संशोधन गरिएको छ । निर्वाचन आयोगले केन्द्रीय कमिटी,अनुशासन आयोग र केन्द्रीय लेखा आयोगका पदाधिकारी तथा सदस्यहरूको निर्वाचन प्रयोजनका लागि नयाँ कार्यतालिका सार्वजनिक गरेको हो ।
नयाँ तालिकाअनुसार उम्मेदवार अन्तिम नामावली प्रकाशन अहिले ३ बजेसम्मलाई छ । मतदानको समय आज राति ९ देखि सोमबार बिहान १ बजेसम्म निर्धारण गरिएको छ । यसअघि मतदानको समय बिहान ३ बजेबाट २ घण्टा घटाइएको हो ।
काठमाडौं । एमाले महाधिवेशनमा सहमतिका लागि केपी शर्मा ओलीले प्रस्ताव गरेका ३०१ जनाको केन्द्रीय सदस्य सूचीमा विशाल भट्टराई परेका छैनन् ।
प्रतिनिधिसभाका प्रमुख सचेतकसमेत रहेका भट्टराईलाई ओलीसहितका नेताहरूले प्रदेश अध्यक्ष बनाउन तयार भएको बताइएको छ ।
पदाधिकारीमा आकांक्षा देखाएका भट्टराईले उम्मेदवारी पनि दिएका छैनन् । नेताहरूसँगको कुराकानीपछि उनी प्रदेश अध्यक्ष बस्न तयार भएको एक नेताले बताए ।
चितवन । नेकपा एमालेका अध्यक्ष केपी ओलीले सहमतिका लागि सार्वजनिक गरेको केन्द्रीय कमिटीको सूचीमा गायिका तथा सञ्चारकर्मी कोमल वलीदेखि उद्योगपति मोती दुगडसम्म अटाएका छन् ।
आइतबार मध्यरात ओलीद्वारा सार्वजनिक केन्द्रीय कमिटीका ३०१ जनाको सूचीमा वलीको नाम खुला महिला समूहमा छ । मोती दुगडको नाम भने खुला जनजाति सूचीमा छ । दुगड एमालेलाई थापाथलीमा केन्द्रीय कार्यालय भवन मिलाइदिने व्यापारी हुन् ।
सूचीमा महासचिवमा निर्विरोध निर्वाचित भएका शंकर पोखरेलकी पत्नी सुजिता शाक्य पनि अटाएकी छन् । अनेरास्ववियूका पूर्वअध्यक्ष नवीना लामादेखि वर्तमान अध्यक्ष सुनिता बरालसम्मको नाम परेको छ ।
काठमाडौं महानगरपालिकाका पूर्वमेयर केशव स्थापितदेखि वर्तमान मेयर विद्यासुन्दर शाक्यसमेत अटाएका छन् । पत्रकार पृष्ठभूमिका सूर्य थापा र विष्णु रिजाल केन्द्रीय सदस्यमा परेका छन् । अर्का आकांक्षीद्वय गगन विष्ट र राजेन्द्र अर्याल भने सूचीमा छैनन् ।
काठमाडौं । नेकपा एमालेमा पाँचजना पदाधिकारी निर्विरोध भएका छन् ।
बिहान १० बजेसम्म उम्मेदवारी मनोनयन दर्ताको समयमा वरिष्ठ उपाध्यक्ष, महासचिव र उपमहासचिवमा उम्मेदारी दर्ता नपरेपछि पाँच पदाधिकारी निर्विरोध भएका हुन् ।
निर्विरोध निर्वाचित हुनेहरूमा वरिष्ठ उपाध्यक्ष ईश्वर पोखरेल, महासचिव शंकर पोखरेल र उपमहासचिवमा प्रदीप ज्ञवाली, पृथ्वीसुब्बा गुरुङ र विष्णु रिमाल छन् ।
अध्यक्ष केपी ओलीले सोमबार बिहान प्रस्ताव गरेको पदाधिकारीको सूचीमा अन्यको उम्मेदवारी दर्ता भए पनि वरिष्ठ उपाध्यक्ष, महासचिव र उपमहासचिवमा अन्यको दाबी नपरेपछि स्वतः निर्विरोध भएका हुन् ।
निर्वाचन आयोगले औपचारिक घोषणा भने गरिसकेको छैन ।
काठमाडौं । उमेरहदका कारण नेकपा एमालेका चारजना पुराना नेताहरू पार्टीको नेतृत्वबाट बाहिरिएका छन् । बाहिरिनेमा अमृतकुमार बोहरा, डोरमणी पौडेल, सत्यनारायण मण्डल र महेन्द्रबहादुर पाण्डे रहेका छन् ।
एमालेको विधानअनुसार ७० वर्ष नाघेको व्यक्तिले पार्टीको कार्यकारी पदमा बस्न पाउँदैनन् । उनीहरूलाई अन्य राजकीय पदहरूमा जान भने विधानले रोक्दैन ।
एमालेका पुराना नेता बोहरा पार्टी अनुशासन आयोगका अध्यक्ष थिए । उनी उमेरले ७३ वर्ष पुगेका उनले पार्टी नेतृत्वबाट अवकाश पाएका छन् । यसैगरी मण्डल, पौडेल र पाण्डे पनि ७१ वर्ष पुगेका छन् । मण्डल एमाले स्थायी समिति सदस्य र प्रदेश २ का इन्चार्ज थिए । वागमती प्रदेशका पूर्वमुख्यमन्त्री पौडेल केन्द्रीय सदस्य थिए । यस्तै पाण्डे चीनका लागि राजदूत नियुक्त भएका थिए । उनलाई देउवा नेतृत्वको सरकारले फिर्ता बोलाएको थियो ।
उमेरहदका कारण पार्टी नेतृत्वबाट बाहिरिएका नेताहरुले भविष्यमा पार्टीको सल्लाहकार वा विभन्न मञ्चहरुमा बसेर योगदान दिन सक्नेछन् । यसैगरि सरकारका विभिन्न राजनीतिक वा संवैधानिक नियुक्तहरूमा पनि उनीहरुलाई समेटिन सक्छ । एमालेभित्र उनीहरूको सक्रिय राजनीतमा भने पूर्णविराम लागेको छ ।
चितवन । नेकपा एमालेको महासचिव पदका लागि कसैको पनि उम्मेदवारी नपरे पछि शंकर पोखरेल निर्विरोध हुने भएका छन् । बिहान १० बजेको समयसीमाभित्र पोखरेलको मात्र उम्मेदवारी दर्ता भएको हो ।
अध्यक्ष केपी शर्मा ओलीले आइतबार प्रस्ताव गरेको पदाधिकारीसहित ३ सय १ जनाको केन्द्रीय कमिटी सूचीको अन्य पदमा दाबेदारी परे पनि महासचिवमा नपरेपछि पोखरेल सर्वसम्मत महासचिव हुने भएका हुन् । पोखरेललाई बधाई तथा शुभकामना साट्ने कार्यकर्ताको भीड लागेको छ ।
निर्वाचन आयोगले औपचारिक घोषणा गर्न भने बाँकी छ ।
चितवन । नेकपा एमालेको १० औं महाधिवेशनले अध्यक्ष केपी शर्मा ओलीबाट प्रस्ताव भएको केन्द्रीय सदस्यको सूची अनुमोदन गरेको छ ।
सोमबार विहान पौने १ बजे महाधिवेशनको बन्दसत्रमा अध्यक्ष ओलीले प्रस्ताव गरेको सूची अनुमोदन भएको हो ।
केही नेताहरुले आफू छुटेको भन्द विरोध गरेकोपनि ओलीले उनीहरुलाई सल्लाहकारमा लैजाने आश्वासन ओलीले दिएका छन् ।
शनिबारको बन्दसत्रले अध्यक्ष अोलीलाई पदाधिकारी र केन्द्रीय सदस्य मनोनयनको अधिकार दिएको थियो । सोही अनुसार ओलीले सदस्यहरुको सूची तयार गरेर प्रस्ताव गरेका हुन् ।
काठमाडौं । नेकपा एमालेका नयाँ केन्द्रीय समितिका लागि प्रारम्भिक सूची तयार भएको छ । होटल सफारीमा उपमहासचिव विष्णु पौडेलले सूची प्रिन्ट गरेर लगेका थिए । बन्द सत्र भने अझै सुरू भएको छैन ।
होटेल सेभेन स्टारमा बन्दसत्र स्थल भए पनि अध्यक्ष ओली र उनको कोर टिम भने होटेल सफारीमा होमवर्क गरिरहेको छ । ओलीसहित नेताहरू विष्णु पौडेल, शंकर पोखरेल, प्रदीप ज्ञवाली, पृथ्वीसुब्बा गुरुङ, विष्णु रिमाललगायतका नेताहरू होटेल सफारी पार्कमै छन् । यही टिमले सूची तयार पारेको हो ।
पौडेल उक्त सूची बोकेर होटेलको तल्लो तलामा आएका थिए । त्यहाँ उनले सूची प्रिन्ट गर्दै पत्रकारसँग अनौपचारिक कुराकानी गरे । पार्टीमा भएको सहमतिबारे जानकारी भने दिएनन् ।
पौडेलले यतिमात्र भने, ‘सबै राम्रो भइरहेको छ, राम्रो हुनेछ ।’
स्रोतका अनुसार पौडेलले सूची प्रिन्ट गरेर लगेपछि ओलीले फाइनल रुजु गर्ने छन् । बन्द सत्र चाँडै सुरु हुने बताइएको छ । होटेल सफारीमा रहेका पृथ्वीसुब्बा गुरुङले पनि अब चाँडै महाधिवशेन सकिने बताएका छन् ।
चितवन । नेकपा एमालेको बन्दसत्र चलिरहँदा नेृतृत्व सहमतिको प्रयासमा छ । लगभग ९० प्रतिशत सहमति भएको भन्दै नेताहरूले आजै टुंगो लगाउने बताएका छन् ।
बन्दसत्रमा जानुअघि पार्टीको डकुमेण्ट प्रिन्ट गर्न आएका विष्णु पौडेललाई पत्रकारले घेरे । हँसिलो मुद्रामा पेस भएका पौडेलले पत्रकारको राजनीतिक प्रश्नमा हल्काफुल्का जवाफ दिएर टारे । ‘सबै राम्रो भइरा’छ, राम्रो हुन्छ, राम्रो हुनेवाला छ ‘, उनले भने ।
प्रिन्ट गरेको डकुमेन्टको जिज्ञासामा पौडेलले भने, ‘मिडियालाई पहिले सुनायो भने प्रतिनिधिले हाम्रो कुरा सुन्नुपर्थ्यो भन्ने हुन्छ नि ।’ सहमति भइसकेको हो हँसिलो देखिनुभाको छ नि भन्ने पत्रकारको प्रश्नमा उनले भने, ‘मेरो अनुहार हँसिलो नभा’ को कहिल्यै देख्नुभएको छ ?’
अर्का नेता पृथ्वीसुब्बा गुरुङले ९० प्रतिशत सहमति भइसकेको बताए । आजै बन्दसत्रबाट टुंगो लगाइने भन्दै गुरुङले भने, ‘ भीम रावलबारे सहमति भएको छैन । त्यो भएपछि शतप्रतिशत पुग्छ ।’
अध्यक्ष ओली परामर्शमा रहेकाले सकिएपछि बन्दसत्र सुरू हुने नेताहरूले बताएका छन् ।
चितवन । एमाले अध्यक्षमा उम्मेदवारी घोषणा गरेका भीम रावलले आफ्नो दाबी कायमै रहेको बताएका छन् ।
केही बेरअघि बन्दसत्रस्थल पुगेका नेता रावल पुन: कोठा फर्किएका छन् । आफू बसेको होटलमा निकटस्थ कार्यकर्तासँग उनी छलफलमा रहेको स्रोतले बतायो । अहिलेसम्म संस्थापन पक्षसँग कुनै छलफल नभएको उनीनिकट एक नेताले नेपाल प्रेसलाई बताए ।
अध्यक्ष केपी शर्मा ओली भने परामर्शमै छन् । बन्दसत्रअघि ओली-रावल भेट गराउन केही नेता लागि परेका थिए ।
काठमाडौं । एमाले महाधिवेशनको बन्दसत्रमा नेताहरू प्रवेश गर्ने क्रम सुरु भएको छ । अध्यक्ष केपी शर्मा ओली भने परामर्शमै छन् । उपाध्यक्ष भीम रावल बन्दसत्र हलमा प्रवेश गरेका छन् । बन्दसत्रअघि ओलीसँग भेटघाटका लागि पहल गरिए पनि सम्भव नभएको बुझिएको छ ।
महासचिव ईश्वर पोखरेल अध्यक्ष ओलीसँग भेटघाट गरेर फर्केका छन् । उनी पनि बन्दसत्रमा प्रवेश गर्दैछन् । पोखरेलले पत्रकारसँग खासै प्रतिक्रिया दिन चाहेनन् ।
युवा नेता महेश बस्नेत भने ओलीसँग भेट्न हिँडेका छन् । ओलीको परामर्श लम्बिँदा बन्दसत्र सुरु हुन ढिलाइ भएको छ ।
सौराहा । नेकपा एमालेको जारी महाधिवेशनमा एमालेले कर्णालीलाई एक पदाधिकारी दिनु पर्ने माग राख्दै राष्ट्रिय युवा संघका सचिवालय सदस्य एवं सुर्खेत जिल्ला अध्यक्ष कमल खड्का जुनिसहितको टोली सौराहा आएको छ ।
‘हामी नीति निर्माण गर्ने तहमा हालसम्म पुग्न सकेका छैनौं । पार्टी नेतृत्वलाई दबाब दिन ब्यानरसहित यहाँ आएका हौं’, जुनि भन्छन, ‘कर्णालीलाई सम्मान गर्ने अपेक्षा छ ।’
केन्द्रीय सचिवालय सदस्य किरण सापकोटा पनि सौराहा आइपुगेका छन् । उनी फरक क्षमताका हुन् । ‘हामीलाई अरु धेरै चाहिएको छैन । यामलाल कंडेललाइ सचिव बनाइ दिए हुन्छ । देशभरका प्रतिनिधिसँग कर्णालीलाई न्यायका लागि अनुरोध गर्छौं ।’
नेता कंडेल कर्णालीबाट पदाधिकारीका एक्ला दाबेदार हुन ।
चितवन । नेकपा एमालेको चितवनमा जारी १०औं महाधिवेशनको बन्दसत्र परिसरबाट अध्यक्षका दाबेदार भीम रावलको पर्चा खोसिएको छ । आचारसंहिताविपरीत भएको भन्दै रावलको पर्चा खोसिएको जनाइएको छ ।
रावल पक्षधरले ‘मेरो उम्मेदवारी किन ?’ लेखिएको पर्चा बन्दसत्र हलको गेटमै पुगेर बाँडिरहेका थिए । हातमा बोकेर बन्दसत्र हुने हल भित्र छिर्न लागेका कार्यकर्ताको साथबाट स्वयंसेवकले पर्चा खोसेका हुन् ।
एमालेले महाधिवेशनमा चार बाइ चार इन्चभन्दा बढीका प्रसारसामग्री प्रयोग गर्न नपाइने आचारसंहिता बनाएको छ ।
बन्दसत्रको दोस्रो दिन आज सर्वसम्मत नेतृत्व चयन गर्नेबारे छलफल भइरहेको छ । हिजो बन्दसत्र हलले अध्यक्ष केपी शर्मा ओलीलाई पदाधिकारी र सदस्य तोक्ने सर्वाधिकार दिएको थियो ।
उक्त निर्णयप्रति रावलले आपत्ति जनाइरहेका छन् । रावलले अहिलेसम्म आफ्नो उम्मेदवारी कायम रहेको बताएका छन् ।
चितवन । नेकपा एमालेको नयाँ नेतृत्वका लागि अन्तिम कसरत भइरहँदा चुनाव हुने सम्भावना टर्दै गएको छ । बन्दसत्रले सबै अधिकार अध्यक्ष केपी शर्मा ओलीलाई प्रदान गरेसँगै निर्वाचन नगरी नेतृत्व घोषणा गर्ने तयारी भएको हो ।
हिजोको बन्द सत्रले अध्यक्ष ओलीलाई केन्द्रीय समिति र पदाधिकारीका लागि नाम प्रस्ताव गर्ने जिम्मेवारी सुम्पिएको थियो । त्यसअनुसार ओलीले आफू निकटस्थहरुसँग परामर्शमा सूची बनाउने र बन्दसत्रमा पढेर सुनाउने तयारी गरिएको छ । अध्यक्षले
हलमा नाम घोषणा गरेपछि प्रतिनिधीले ध्वनी मतबाट त्यसलाई सदर गर्ने संस्थापन पक्षका नेताहरु बताउँछन् ।
एमाले केन्द्रीय कार्यालय सचिव शेरबहादुर तामाङले संसदमाजस्तै ‘हुन्छ’ र ‘हुन्न’ भनेर प्रस्ताव लैजाने र हलले ताली पिटेर अनुमोदन गर्ने बताए । महाधिवेशन प्रतिनिधिहरुमा अधिकांस ओलीकै प्राधिकारको पक्षमा छन् । त्यसैले उनले नाम घोषणा गर्दा बदर हुने सम्भावना नगण्य देखिएको छ ।
भीम रावलले अध्यक्षमा दावेदारी प्रस्तुत गरिरहेका छन् । कसैले उम्मेदवारी दिन चाहेमा निर्वाचन प्रक्रियामा जाने पार्टीको निर्वाचन आयोगले बताइरहेको छ । तर, पार्टी संस्थापनले भने कसैले उम्मेदावरी दिएमा त्यसलाई पनि ध्वनीमतबाटै टुंग्याउने रणनीति बनाएको बुझिएको छ । यस्तोमा रावलका पक्षमा बहुमत प्रतिनिधि नपुगेको भन्दै ओलीलाई सर्वसम्मत अध्यक्ष घोषणा गर्ने सम्भावना पनि छ ।
यतिबेला सबै नेता तथा कार्यकर्ता ओलीबाट आउने सूचीको पर्खाइमा छन् । अहिलेसम्मको परिदृश्य हेर्दा वरिष्ठ उपाध्यक्षमा ईश्वर पोखरेल र महासचिवमा विष्णु पौडेललाई ओलीले अघि सार्ने देखिएको छ । अन्य पदाधिकारीबारे अझै प्रष्ट खाका आइसकेको छैन ।
पार्टीभित्र एकल वर्चश्व भएकाले ओलीलाई आफ्ना नीति, विचार र निर्णय अनुमोदनका लागि समस्या छैन । हिजोको बन्द सत्रले सर्वाधिकार दिएपछि उनी थप शक्तिशाली भएका छन् । अब सबै नेताहरु नेतृत्वमा समेटिनका लागि ओलीमै निर्भर छन् ।
पदाधिकारी र केन्द्रीय सदस्य बन्न चाहेका धेरै नेताहरु अझै पनि अलमलमा देखिएका छन् । आफू पार्टीको कुन कमिटी र पदाधिकारीमा परिने हो भन्ने व्यग्रता उनीहरुलाई छ ।
केन्द्रीय कमिटीमा दोहोरिन चाहेका एक सदस्यले भने, ‘को मान्छे कसरी समेटिन्छ भन्ने केही पनि थाहा छैन । अध्यक्षले चाहे केन्द्रीय कमिटीमा परिएला । हेरौं अध्यक्षले के ल्याउनुहुन्छ ।’
महाधिवेशन स्थलामा भेटिएका यस्ता धेरै नेताहरु छन्, जसलाई आफू के हुन्छु भन्ने थाहा छैन् । ओलीले समेट्लान कि नसमेट्लान भन्ने प्रतीक्षा धेरैमा छ ।
एमालेले १९ पदाधिकारी, ३०१ केन्द्रीय सदस्य र तीन आयोगका पदाधिकारी र सदस्य महाधिवेशनबाट चुन्नुपर्ने छ ।
चितवन । एमालेको दशौं महाधिवेशन आज समापन गर्ने तयारी भइरहेको छ, तर, नेतृत्व छनोटको मुख्य विषय निरुपण हुन बाँकी नै छ । महाधिवेशन हलले साविक अध्यक्ष केपी शर्मा ओलीलाई पदाधिकारी र केन्द्रीय समितिको सर्वसम्मत नाम प्रस्ताव गर्न म्यान्डेट दिए पनि निर्वाचनको सम्भावना टरेको छैन ।
पार्टी विभाजनका बेला माधव नेपालको साथ छाडेर एमालेमा रहेका ‘१० भाइ’लाई समेट्ने विषयमा ओलीको छनोटपूर्ण रणनीतिका कारण सर्वसम्मत नेतृत्व जटिल बनेको हो । १० भाइमध्ये अध्यक्षका भीम रावल र घनश्याम भुसालको व्यवस्थापनप्रति ओली सकारात्मक छैनन् । पछिल्लाे अवस्थामा भुसाललाई साविककै उपमहासचिव पद दिन तयार रहेको भए पनि रावललाई भने उनले पदाधिकारीमा समेट्न नचाहेको स्रोतको दावी छ ।
विधान महाधिवेशनले एक जना मात्रै उपमहासचिव रहने व्यवस्था गरेको थियो । नेता व्यवस्थापन गर्न केन्द्रीय कमिटीको अन्तिम बैठकले दुई उपमहासचिव थप गर्ने निर्णय लियो । शनिवार उक्त निर्णय महाधिवेशनको बन्द सत्रले पारित गरिसकेको छ । तर, उपाध्यक्ष पद पाँचबाट सात बनाउँदा पनि रावल समेटिने सम्भावना कम देखिएको छ ।
‘रावल कामरेडले अध्यक्षमा उम्मेदवारी दिएपछि एकपल्ट पनि अध्यक्षज्यूले संवाद गर्न खोज्नु भएन,’ रावल निकट एक नेताले भने, ‘उहाँ कुनै पनि हालतमा रावललाई पदाधिकारीमा ल्याउने पक्षमा हुनुहुन्न ।’
निर्वाचन हुने अवस्थामा रावलले अध्यक्षमा उम्मेदवारी दिए ओलीले व्यवस्थापन गर्न नसकेका अरू नेताहरूले पनि उम्मेदवारी दिने तयारी गरेका थिए । तर, शनिवार नाम प्रस्ताव गर्ने जिम्मा महाधिवेशन हलले ओलीलाई दिएपछि रावललाई थप संकट परेको हो ।
केही नेताका अनुसार केन्द्रीय कमिटीको बैठकबाटै उक्त अधिकार ओलीलाई दिने तयारी गरिएको थियो । तर, केन्द्रीय कमिटीभन्दा बढी शक्तिशाली महाधिवेशन हुने भएको हुँदा ओलीले दोस्रो बाटो रोजेका हुन् । यसरी अधिकार प्रत्यायोजन गरिएपछि रावल थप रुष्ट बनेका छन् । उनले पार्टीले अलोकतान्त्रिक बाटो लिएको भन्दै आक्रोश व्यक्त गरेका थिए ।
‘विधान मिचेर कसैलाई अधिकार दिन मिल्दैन,’ उनले फरक मत राख्दै भनेका थिए, ‘मेरो उम्मेदवारी थियो, छ र रहने छ ।’
उपाध्यक्ष रावल ब्याक नभएपछि पदाधिकारीमा सर्वसम्मत हुने सम्भावना क्षीण छ । तर, ओली निकटका केही नेताहरूले भने हलबाटै पदाधिकारी सर्वसम्मत हुनुपर्नेमा जोड दिँदै आएका छन् ।
संस्थापन पक्षका नेता शेरबहादुर तामाङ रावल उम्मेदवार बने पनि चुनाव नहुने बताउँछन् ।
उनले भने, ‘भीम रावलजी उम्मेदवार हुनुभयो उहाँको पक्षमा कति हुनुहुन्छ हात उठाउनु होस् भन्ने, अनि केपी ओलीको पक्षमा कति हुनुहुन्छ भनेर टुङ्ग्याउने हो । अरू कुनै पनि सिटमा चुनाव हुँदैन । हामी १० मिनेटमा सबै सक्छौं ।’
त्यसो त रावल पक्षलाई पनि निर्वाचन लड्दा जितिन्छ भन्ने कुरामा विश्वास छैन । केपी ओलीबाटै वरिष्ठ उपाध्यक्षको प्रस्ताव आए आफूहरुले रावललाई मनाउन प्रयास गर्ने उनी निकट एक नेताले बताए ।
‘हामीले यो अवस्थामा चुनाव जित्दैनौं,’ उनी टिकट रहेका एक नेताले भने, ‘कमजोर अवस्थामा निर्वाचन लड्नुभन्दा सहमतिमा जानु उपयुक्त हुन्छ । उहाँ (भीम रावललाई) वरिष्ठ उपाध्यक्ष दिने भए हामी पनि मनाउने थियौं ।’
तर, ओली रावललाई वरिष्ठ उपाध्यक्ष दिन तयार देखिएका छैनन् । एक मात्र वरिष्ठ नेताको पदमा ईश्वर पोख्रेल र सुभाषचन्द्र नेंम्वाङको दाबी रहेको छ । शनिवार राति नेपाल प्रेससँग कुरा गर्दै नेम्वाङले आफू सहमतिको बाधक नबन्ने बताएका छन् ।
ओलीलाई तीव्र दबाब आए रावललाई उपाध्यक्षसम्म राखिन सक्ने स्रोत बताउँछ । तर, ओली स्वयम् भने रावल इतरको पदाधिकारी टिम बनाउन चाहन्छन् । यस्तो अवस्थामा रामबहादुर थापा बादल र अष्टलक्ष्मी शाक्य उपाध्यक्ष हुने करिब पक्का छ । युवराज ज्ञवालीलाई अनुशासन आयोगको अध्यक्ष बनाउने, महासचिवमा नअटाएका एक जनालाई उपाध्यक्ष बनाउने र नवौं महाधिवेशनमा झिनो मतले महासचिवमा पराजित सुरेन्द्र पाण्डेलाई पनि उपाध्यक्ष बनाउने सम्भावना बढेको स्रोतको दाबी छ ।
एमाले अध्यक्ष ओली र उपाध्यक्ष रावलको सम्बन्धमा दरार आएको धेरै भएको छैन । नवौं महाधिवेशनमा रावल माधव नेपाल समूहबाट उपाध्यक्षमा निर्वाचित भए पनि त्यसपश्चात ओलीसँग निकटमै रहेर काम गरेका थिए । प्रतिनिधिसभा, प्रदेशसभा तथा स्थानीय तहमा सुदूरपश्चिम प्रदेशमा रावलले उठाएका अधिकांश उम्मेदवारले टिकट पाए । त्यो बेलासम्म रावल ओलीका विश्वासपात्र झैं देखिएका थिए ।
तत्कालीन एमाले सुदूरपश्चिम संयोजक रहेका रावलले सुदूरपश्चिम प्रदेशमा आफू निकटका नेताहरूलाई प्रत्यक्षमा भन्दा बढी समानुपातिकमा व्यवस्थापन गरे । तत्कालीन प्रदेश सहसंयोजक रहेका कर्ण थापालाई समानुपातिकको पहिलो नम्बरमा राखिए पनि प्रत्यक्षमा महिला उम्मेदवार नहुँदा सुदूरपश्चिममा आठजना समानुपातिक उम्मेदवारले प्रदेशसभामा पाइला टेके ।
ओली र रावलको टकराव सुदूरपश्चिम सरकार सञ्चालनबाट बढ्दै गयो । केन्द्रमा पनि आफ्नै सरकारको विरोध मात्रै गर्ने गरेको आरोप झेलेका रावललाई सुदूरपश्चिममा ओली समूहलाई कमजोर पारेको, केन्द्रको निर्देशन नमानेको आरोप बढ्दै गयो ।
सुदूरपश्चिम प्रदेशमा ५३ जना प्रदेश सभा सदस्य हुन् । त्यसमा सभामुख सहित २५ जना एमालेका सांसद थिए । जसपाका दुई पनि एमाले ओली निकट रहेका थिए । माओवादीलाई दिएको समर्थन फिर्ता गर्ने र आफ्नै नेतृत्वमा सरकार बनाउने भनेको केन्द्रीय सर्कुलर उलंघन गर्न लगाएको, माओवादीको सरकारलाई सहयोग गरेको र एमाले ओली पक्षका सांसदहरुलाई कारबाही गरेको बिषयले पनि ओली–रावलको दुरी बढाउनमा काम गर्यो । रावलकै निर्देशनमा नेकपा प्रदेशको खातामा रहेको लाखौं रकम झिकेको आरोप पनि लाग्यो ।
त्यसताका ओली र रावलको ‘वाक युद्ध’ नै चलेको थियो । धनगढीमा ओलीले रावललाई ‘अछामको केटो’ भन्दा त्यही ठाउँमा आयोजना गरेको कार्यक्रममा रावलले ओलीलाई ‘झापाको केटो’ भनेका थिए ।
यता केन्द्रमा माधव नेपाललाई बलियो साथ दिएर आफ्नै सरकार ढलाउन लागिपरेको भन्दै ओली चिढिएका थिए । अन्तिम समयमा रावल एमालेमा रहे पनि ओलीसँग भने निकट हुन सकेनन् ।
‘कयौंपटक भेट भयो, कुरा पनि भए तर, पहिलाको जस्तो सम्वन्ध हुन सकेन,’ रावल निकट एक नेताले भने, ‘अहिले त उहाँहरू प्रतिस्पर्धी नै हुनुभयो ।’
चितवन । नेकपा (एमाले) को १० औं महाधिवेशनको दोस्रो दिन बन्द सत्रको दिन थियो ।
तोकिएको भन्दा ५ घण्टा ढिलो गरी सुरू भएकव बन्दसत्रको धेरैजसो समय विदेशी पाहुनाको शुभकामनामै बित्यो । बन्दसत्रको साँझतिरको समय भने निर्णायक रह्यो । हिजोको केन्द्रीय कमिटीबाट विधान संशोधन गर्न गरिएको निर्णयलाई बन्द सत्रले अनुमोदन गरेको थियो ।
साथै पदाधिकारी र केन्द्रीय सदस्य छनोटको अधिकार ओलीलाई सुम्पिने प्रस्ताव अघि बढ्यो । यसमा महासचिव ईश्वर पोखरेल र उपमहासचिव विष्णु पौडेलको सहकार्य गजब देखियो । त्यो प्रस्तावलाई हलले पारित गर्यो ।
यो निर्णयविरुद्ध आपत्ति जनाउँदै उपाध्यक्ष भीम रावलले फरक मत राखे । अध्यक्ष ओलीले विष्णु पौडेलले राखेको प्रस्तावको प्रतिरक्षा गरे ।
यो सहकार्यले बरिष्ठ उपाध्यक्षमा पोखरेललाई नै ओलीले अघि सार्ने संकेत मिलेको केही नेताले बताएका छन् ।
सहमतिअबन्दा आफू बाधक नबन्ने सुवास नेम्वाङको अभिव्यक्तिले पनि उनी दाबीबाट पछि हटेको र पोखरेललाई बरिष्ठ उपाध्यक्ष छोडिदिएको संकेत मिलेको छ ।
बन्द सत्रमा देखिएको दृश्यले महासचिवमा विष्णु पौडेललाई ओलीले अघि सारेको संकेत मिल्थ्यो । यद्यपि यसबारे अझै एकिनसाथ भन्ने सकिने अवस्था छैन ।
बरिष्ठ उपाध्यक्षमाथि आफ्नै समूहका दुई नेताको दाबीले ओलीलाई अप्ठ्यारो पारेको थियो । अब त्यो सकस हटेपछि महासचिवको विषयमा ओलीको ध्यान केन्द्रित हुनेछ । त्यही गाँठो फुकाउन पौडेल र शंकर पोखरेलबीच आजै रातिसम्म वार्ता गराउन लागिएको स्रोतले नेपाल प्रेसलाई जानकारी दियो ।
वार्ताबाट महासचिव र अर्को कुनै पदमा एक-अर्कालाई व्यवस्थापन गर्ने सहमति बन्नेछ । महासचिवमाथिको आजै विवाद टुंग्याएर भोलि नै पदाधिकारी घोषणा गर्ने तयारी ओलीको छ ।
चितवन । नेकपा एमालेको १०औं महाधिवेशनअन्तर्गत जारी आजको बन्दसत्रले पदाधिकारीदेखि केन्द्रीय सदस्यसम्म छान्ने अधिकार अध्यक्ष केपी ओलीलाई दिएको छ ।
विष्णु पौडेलको त्यस प्रस्तावमा हलले समर्थन जनाएको थियो ।
बन्दसत्रले अध्यक्ष ओलीलाई दिएको उक्त अधिकारप्रति उपाध्यक्ष भीम रावलले भने आपत्ति जनाएका छन् । उनले राष्ट्रिय महाधिवेशनबाट केन्द्रीय कमिटी निर्माण गर्ने विधानको व्यवस्थाविपरीतको निर्णय भएको भन्दै फरक मत राखेका हुन् ।
अध्यक्ष केपी शर्मा ओलीलाई अधिकार प्रत्यायोजन र भीम रावलको फरक मतप्रति हामीले केही नेतासँग प्रतिक्रिया लिएका छौं ।
कसले के भने उनीहरूकै शब्दमा :
म पार्टी फुटको पक्षमा हिजो पनि थिइन, आज पनि छैन र भोलि पनि हुने छैन । नेकपा एमाले हामीले दु:ख गरेर त्याग गरेका बनाएको पार्टी हो यसलाई जोगाउनु पर्छ बनाउनु पर्छ । फरक मत भीम रावलले मात्रै होइन सबैले राख्न पाउँछ । सबैको अधिकार छ । विधानले सबैलाई त्यो अधिकार दिएको छ ।
सर्वसम्मतरूपले वा निर्वाचनको माध्यमबाट जसरी भए पनि नेतृत्व चयन हुन्छ । जहाँ-जहाँ सहमति हुँदै गयो त्यसलाई पास गर्दै गयो जहाँ सहमति भएन त्यसमा चुनाव गर्ने विधि विभिन्न प्रकारमा छन् । आम कार्यकर्ताहरूको भावना सर्वसम्मत नेतृत्व चयन गर्ने र विवाद नगर्ने भन्नेछ । तर, कसैले उम्मेदवारी दिन्छु भनेपछि नदिनुस् भन्न पाइँदैन ।
विधान प्रस्तावको औपचारिक प्रस्ताव टेबल भएको हो । त्यो सर्वसम्मत रूपले पारित भएको हो ।
हामी निर्वाचन विधिमा जान सक्छौं । उहाँले (भीम रावलले) उम्मेदवारी दिन्छु भनेपछि मात्रै थाहा हुन्छ । कानून त हामी हुन्छ र हुन्नँ भनेर पारित गर्छौं । यहाँ पनि ताली पिटेर सक्छौँ ।
भीम रावलजी उम्मेदवार हुनुभयो उहाँको पक्षमा कति हुनुहुन्छ हात उठाउनु होस् भन्ने अनि केपी ओलीको पक्षमा कति हुनुहुन्छ भन्ने अति टुंग्याउने हो ।
अरू कुनै पनि सिटमा चुनाव हुँदैन । सर्वसम्मत विधि पनि निर्वाचन हो । हामी १० मिनेटमा सबै सक्छौँ ।
आजको निर्णय लोकतान्त्रिक अध्यासभित्रै पर्ने उत्तम अभ्यासमध्ये एक हो । सहमति नहुने अवस्थामा विधानले दिएको प्रक्रिया र विधिमा गएर अघि बढिन्छ । यो चुनाव नै हुनुपर्छ वा सहमति हुनुहुँदैन भन्ने कुरा होइन ।
उहाँले आफ्नो कुरा राख्नुभएको छ । चित्त नबुझ्ने अवस्थामा सबै कुरामा सहमतिमै जानुपर्छ भन्ने होइन । तर, अहिलेको अवस्थामा सहमति हुन राम्रो हो । यदि भएन भने निर्वाचन हुने कुरा सामान्य हो । भोलि मनोनयन दर्ता हुन्छ त्यसपछि मात्रै थाहा हुन्छ कसरी र कुन पदमा सहमति वा निर्वाचन हुन्छ भन्ने कुरा । भोलि साँझसम्म पदाधिकारी र केन्द्रीय सदस्यको आकार बाहिर आउने सम्भावना हामीले देखेका छौँ ।
धेरै नेताहरूको विषयमा छलफल गरेर मलाई लाग्छ यो विषय टुंगो लागिसकेको हुनुपर्छ । एकाध नेताहरूलाई केपी ओलीको भाषा, निर्णय मन नपर्न सक्छ । तर, त्यो मन नपराउने व्यक्तिले मन नपराउँदैमा यो महाधिवेशनको सर्वसम्मत नेतृत्व चयन गर्ने विषयलाई केही फरक पार्दैन ।
सर्वसम्मत नेतृत्व चयन गर्ने कुरा सम्पूर्ण प्रतिनिधीहरुको माग हो । मुलुकको आवश्यकता र माग पनि त्यही हो । त्यस कारण हामी यसमा विवाद गर्न आवश्यक छैन । भोलि नेकपा एमालेले सबै पदमा सर्वसम्मत नेतृत्व पाउँछ ।
अहिलेको नेकपा एमालेलाई सबै तर्फबाट घेराबन्दी गरिएको छ । यस्तो बेलामा हामीले स्थानीय तहबाटै सर्वसम्मत गर्दै ल्यायौँ ।
महाधिवेशनमा पनि हामी सर्वसम्मत गर्नुपर्छ । अहिलेको आवश्यकता भनेको सर्वसम्मत हो भन्दा हिजै हामीले केन्द्रीय कमिटीमा अध्यक्षलाई अधिकार दिने भनेका थियौँ ।
अध्यक्षले नै आज हलबाट लिने भन्नुभएको थियो । सबै साथीहरूले अध्यक्षलाई अधिकार दिइसक्नु भएको छ ।
एक जना दुई जनाले विरोध गर्दैमा केही हुँदैन । हलभन्दा विपरीत कोही हुन सक्दैनन् । भोलि एमालेले नयाँ नेतृत्व पाउँछ । ९९ प्रतिशत सर्वसम्मत हुन्छ जस्तो लाग्छ मलाई सबै पदमा ।
भीम रावललाई उपाध्यक्षमै राखेर व्यवस्थापन गर्ने भनिएकै छ ।
चितवन । नेकपा एमालेकाे १० औं महाधिवेशनले नयाँ नेतृत्व चयन गर्नेछ ।
शुक्रबारबाट सुरु भएको महाधिवेशनमा सहमतिबाट नै नेतृत्व चयनका लागि प्रयास भइरहेको छ । तर निर्वाचन समितिले सहमति नजुटे चुनावी प्रक्रियाबाट नेतृत्व चयन गर्न आफ्नो तयारी पनि जारी राखेको छ ।
समितिले निर्वाचनका लागि मतदान बुथ तयार गरिसकेको छ । तयार भएको बुथमा एकैपटक ९२ जनासम्मले मतदान गर्न पाउनेछन् । एकजनालाई मतदान गर्न २० देखि २५ मिनेट लाग्ने बताइएको छ ।
तस्बिरहरू : उमेश कार्की
चितवन । नेकपा एमालेको जारी महाधिवेशनको बन्दसत्रमा प्रतिनिधिले विद्युतीय मेसिनबाट नमूना मतदानको अभ्यास थालेका छन् ।
सहमतिको प्रयास भइरहेको नेताहरूले बताइरहेका छन् । तर, उम्मेदवारीको घोषणासँगै आकांक्षीहरूले भोट माग्न थालेपछि निर्वाचनको सम्भावना पनि उत्तिकै छ । युवा वैज्ञानिकद्वय राम-लक्ष्मणले बनाएको विद्युतीय मतदान मेसिनमा प्रतिनिधिले नमूना मतदान गरेका हुन् ।
मेसिनको प्रयोगले मतदान, गणना प्रक्रिया सहज र छिटो हुने भन्दै एमालेले महाधिवेशनमा विद्युतीय मेसिन प्रयोग गर्ने निर्णय गरेको थियो ।
धनुषाका महाधिवेशन प्रतिनिधि तेजनारायण यादवले महाधिवेशन प्रविधिमैत्री भएकोमा खुसी जनाए ।
तस्बिरहरू : शेरबहादुर थापा ।
चितवन । नेकपा एमालेको जारी महाधिवेशनमा उम्मेदवारी घोषणासँगै आफूलाई जिताउन लबिङ बढ्न थालेको छ ।
बन्दसत्र सुरू हुनै लाग्दा कर्णाली प्रदेशबाट आकांक्षी बढेका छन् । कर्णालीबाट हाल ११ केन्द्रीय सदस्य छन् । तीबाहेक पदमा खड्का, मिनासिन्ह रखाल, दल रावल, सीपी घर्ती, दानसिङ्ग परियार, हिक्मत विक, गोपाल नेपालीले उम्मेदवारी घोषणा गरेका छन् ।
यीबाहेक, विनोदकुमार शाह, कौशिल्यावती खत्री, ध्रुवकुमार शाही, योगेन्द्र शाही, नागेन्द्र शाही नेश्नल, गगन सुनारले पनि निर्वाचन भएको खण्डमा उम्मेदवारी दिने नेपाल प्रेसलाई बताए ।
‘२३५ बढी महाधिवेशन प्रतिनिधिमा अधिकांश उम्मेदवार बन्ने योजनामा छन । धेरैको रुचि भूगोलकेन्द्रित छ’ नेता पदम माझीले भने, ‘कर्णालीले बढीमा ९ जना केन्द्रीय सदस्य पाउन सक्ला । सबै उम्मेदवार बनेर केन्द्रीय सदस्य बन्ने योजनामा छन् ।’ कर्णालीबाट कम्तीमा एकजना सचिव बनाउनुपर्नेमा आफूहरूको जोड रहने उनले बताए ।
एमाले नेता गोरख बोगटी बरिष्ठताको हिसाबमा कर्णालीबाट यामलाल कंडेललाई कम्तीमा पदाधिकारीमा समेट्नुपर्ने नेताहरूसँग माग राखिएको बताउँछन् ।
एमाले नेता एवं कर्णाली सहसंयोजक यामलाल कंडेलले केन्द्रीय सदस्यका हकमा छलफल नभएको बताए । उनले पदाधिकारी कर्णालीले पाउनुपर्छ भनेर लबिङ भइरहेको बताउँदै सर्वसम्मत नेतृत्व चयनका लागि प्रयास जारी रहेको जनाए ।