Tag: जनकपुर

जनकपुरधाम । साताव्यापी सिता-राम विवाह पञ्चमी मेला सुरु हुन एक दिन बाँकी रहेको बेला जनकपुरधाम फोहोरले दुर्गन्धित बनेको छ । जानकी मन्दिर क्षेत्र, रामानन्द चोकदेखि मन्दिर जाने मुख्यबाटो, पीडारी चोक, मुरली चोक, जनक चोकसहितका सडकमा अत्रतत्र फोहोर थुप्रिएको देखिन्छ ।

सरसफाई कर्मचारीले सडकमा झाडु लगाएर फोहोर थुपारेका छन् । तर थुपारिएको फोहोर उप-महानगरपालिकाले व्यवस्थापन नगरेका कारण दुर्गन्ध फैलिएको छ । जनकपुरधाममा बजार क्षेत्रमा दैनिक २५ देखि ३० ट्याक्टर फोहोर निस्किने गर्दछ । अहिलेसम्म उपमहानगरपालिकाले ल्याण्डफिल साइट निर्माण गर्न सकेको छैन । जसका कारण फोहोर व्यवस्थापन चुनौती बनेको छ ।

कार्याकाल सकिन लाग्दा पनि मेयर लालकिशोर साहले फोहोर व्यवस्थापनको स्थायी समाधान गर्न नसकेकाले वडाध्यक्षहरु नै उनको आलोचना गरिरहेका छन् । फोहोर व्यवस्थापन गर्न चासो नदेखाएको भन्दै वडा ७ का अध्यक्ष जानकीराम साह, वडा ३ का अध्यक्ष दिपेन्द्र साह, वडा ४ का अध्यक्ष सुदर्शन सिंह लगायतका २५ जनप्रतिनिधि अहिले पनि आन्दोलित छन् ।

उनीहरुले गत मंगलवार मेयर साहको कार्यकक्षमा तालाबन्दी गरेका थिए । त्यसपछि दुई दिन अगाडीमात्र सरसफाइमा ध्यान नदिएको र भ्रष्टाचारमा डुबेको आरोप लगाउदै उनीहरु काठमाडौं पुगेर मेयर साह विरुद्ध प्रदर्शन गरे ।

मेयर साह भने सरसफाइ व्यबस्थापनको स्थायी समाधान गर्नुको साटो दबाब दिने जनप्रतिनिधिविरूद्ध कर्मचारीलाई उस्काएर प्रतिकार आन्दोलन गर्न लगाएका छन् ।

जनकपुरधामलाई नर्क बनाएको भन्दै यूवा अभियानी र वडाध्यक्षहरु स्वंयम पनि बजारको फोहोर उठाएर मेयर साहको घर अगाडी र कार्यालयको गेटमा थुपारेका थिए । फोहरमैला व्यवस्थापनमा मेयर साह असफल देखिएको वडाध्यक्ष दिपेन्द्र साह बताउँछन् ।

विवाह पञ्चमीका बेला पनि फोहोर नउठेपछि जानकी मन्दिरका सहायक महन्थ रोषण दासले दुःख व्यक्त गरेका छन् । उनले भने, ‘अब हामी आफैं सरसफाईका लागि निस्किन्छौं । भोलि विहान बृहत सरसफाई कार्यक्रम राखेका छौं ।’

सरसफाइ कार्यक्रममा सहभागी हुन नगरबासी, सुरक्षाकर्मी, विद्यार्थी, व्यावसायी सबैलाई आह्वान गरेको उनको भनाई छ । यसवर्ष विवाह पञ्चमी म‌सीर २२ गते परेकाे छ ।

जनकपुरधाम । छठ मनाउने विषयमा जनकपुरधाम उपमहानगरपालिका-२० रूपैठामा भएको विवाद साम्य पार्न त्यहाँका हिन्दू र मुस्लिम समुदायबीच सात बुँदे सहमति भएको छ ।

जिल्ला प्रशासन कार्यालय धनुषामा प्रमुख जिल्ला अधिकारी बन्धुप्रसाद बास्तोलाको उपस्थितिमा दुवै समुदाय विवाद अन्त्यका लागि राजी भएका हुन् । सहमतिको बुँदामा तेलिया पोखरीको स्वामित्व र संरक्षण जनकपुरधाम उपमहानगरपालिकाले गर्ने, हिन्दूको छठ र मुस्लिमको दाहाजस्ता पर्वमा सुरक्षा निकायलाई पूर्वजानकारी दिई पोखरीमा थप माटो नझारी मनाउने, दुवै समुदायले एक-अर्काको धर्म कर्म, रितिरिवाज परम्पराको उच्च सम्मान गर्ने विषयमा दुबै पक्ष सहमति जनाएका छन् ।

यस्तै पोखरीमा झण्डालगायतका कुनै पनि संकेत चिन्हहरू नराख्ने, मुस्लिम समूदायले हाल राखेको झण्डालाई त्यहाँबाट व्यवस्थापन गर्ने व्यवस्था मुस्लिम समूदायले मिलाउने र अब उप्रान्त दुवै पक्षले सोसल मिडिया वा अन्य कुनै पनि माध्यमबाट धार्मिक साम्प्रदायिक सद्भाव बिगार्ने गरी भनाइ/ विचार नराख्ने सहमति भएको छ ।

पोखरीको विवाद समाधान गरी धार्मिक साम्प्रदायिक सद्भाव कायम गर्न र त्यस क्षेत्रको विकास निर्माणमा सहयोग पुयाउन जनकपुर उप-महानगरपालिकाका उपमेयर रिता मिश्रको संयोजकत्वमा समिति बनाइएको छ । समितिको सदस्यमा हिन्दू समुदाय तर्फबाट रामस्वरूप महतो, उमेश दास, महेन्द्र साह र कमलेश साह छन् भने मुस्लिम समुदायबाट मो. हैदर अली, मो. जाविर राइन, मो. मोति (भोला) कवारी र मो. हमिद कवाडी पनि सदस्य छन् ।

दुवै समुदायबीच तनाब उत्पन्न भएपछि प्रशासनले विगत दुई दिनदेखि सो क्षेत्रमा प्रशासनले निशेधाज्ञा जारी राखेको छ । सहमतिपश्चात पनि कुनै गलत क्रियाकला वा धार्मिक आस्थाविपरीतको क्रियाकलाप गर्ने जोसुकैलाई कारवाही गर्ने सीडीओ बास्तोलाले बताए ।

जनकपुरधाम । नेपालीहरुको ठूलोमध्येको चाड तिहारको पूर्वसन्ध्यामा पनि फोहोर नउठेपछि जनकपुरधाम उपमहानगरपालिकाका वडाध्यक्षहरु आन्दोलित बनेका छन् ।

पटक–पटक फोहोर व्यवस्थापन गर्न ध्यानकर्षण गराए पनि चासो नदेखाएको भन्दै वडाध्यक्षहरुले आज बिहान आन्दोलनस्वरुप मेयर लालकिशोर साहको घर अगाडि फोहोर थुपारेका हुन् ।

वडा नम्बर ७ का वडाध्यक्ष जानकीराम साहले आफैं ट्याक्टर चलाएर फोहोर थुपार्न मेयर साहको घरमा पुगेका थिए ।

उनको साथमा वडाध्यक्षहरु दिपेन्द्र साह, सुदर्शन सिंह र शत्रुधन साह पनि थिए । जनकपुरधाम उपमहानगरको कार्यालयमा फोहोर फाल्न पुगेका उनीहरुलाई प्रहरीले रोकेपछि मेयर साहको घर अगाडि थुपारेका हुन् ।

उपमहानगरपालिका कार्यालयमा फोहोर थुपार्न नदिएपछि वडाध्यक्षहरु सडकमै ट्याक्टर तेर्साएर धर्ना बसेका थिए ।

सडकमा धर्ना बसेका वडाध्यक्ष दिपेन्द्र साहले तिहारका बेला पनि फोहोर नउठाएपछि मेयरविरुद्ध आन्दोलन गर्नुपरेको सुनाए । उनले भने, ‘वडाबासीले फोन गरेर हैरान पारेका छन् । फोनले सुत्न पाएको छैन । बाध्य भएर आफैं आन्दोलन गर्न सडकमा आउनुपर्यो ।’

अर्का वडाध्यक्ष शत्रुधन साहले मेयरको बदमासीका कारण जनकपुरधाम कुरुप बनेको गुनासो गरे । उनले भने, ‘जनकपुरधाम एउटा धार्मिक केन्द्र हो । तर यहाँ आउनेहरु फोहोर देखेर तर्सिन्छन् । अहिले दीपावली र छठ नजिकै आइसक्यो । तर पनि मेयरले फोहोर उठान चासो देखाएका छैन ।’

निर्वाचित भएको ४ वर्ष बित्दा पनि मेयर साहले डम्पिङ साइट बनाउन नसकेको वडाध्यक्ष जानकीराम साहले गुनासो गरे । उनका अनुसार डम्पिङ साइट निर्माणका लागि आएको ४८ करोड रुपैयाँ फ्रिज भएको छ ।

वडाध्यक्ष साहले फोहोर उठाउन चासो नदेखाए मेयर साहलाई कालोमोसो दल्ने चेतावनी दिएका छन् । उनले भने, ‘सुरक्षा निकाय, प्रशासन र जनप्रतिनिधिको संयुक्त बैठक हुनुपर्छ । त्यस बैठकमा मेयर साहले फोहोर व्यवस्थापनको दीर्घकालीन समाधान गर्ने प्रतिवद्धता जनाउनुपर्छ, होइन भने हामी आन्दोलन जारी राख्छौं ।’

यसअघि पनि पटक–पटक फोहोर व्यवस्थापनको विषयमा आन्दोलन भएको छ । केही दिनअघि मात्र स्थानीय युवाहरुले पनि मेयर साहको घर अगाडि फोहोर थुपारेका थिए । तर मेयरले फोहोर व्यवस्थापन गर्नेतर्फ कुनै चासो देखाएका छैनन् ।
अहिले मेयर साह काठमाडौंमा र प्रमुख प्रशाशकीय अधिकृत बिनोद कुमार खड्का पनि विदामा छन् ।

जनकपुरधाम । डा. सीके राउत नेतृत्वको जनमत पार्टीको केन्द्रीय सचिवालय समितिको विस्तारित बैठक शुरू भएको छ ।

जनकपुरधामस्थित न्यू चन्दन होटलमा केन्द्रीय सचिवालय समितिको बैठक शुरू भएको पार्टीका उपमहासचिव ई. ईन्द्रजीत यादवले जानकारी दिए ।

भोलिसम्म चल्ने बैठकमा संगठन विस्तार र आगामी निर्वाचन रणनीतिबारे छलफल हुने बताइएको छ ।

बैठकमा निर्वाचित केन्द्रीय समितिका पदाधिकारी, मोर्चाका प्रमुखहरू, जिल्ला समन्वय समितिका पदाधिकारीसहित २ जना जनाको सहभागिता छ ।

जनकपुरधाम । संयुक्त लोकतान्त्रिक गठबन्धनले जनकपुरमा सर्वोच्च अदालतले गरेको संसद पुन:स्थापनाको फैसलाको स्वागतमा र्याली निकालेको छ ।

नेपाली काँग्रेस, नेकपा एमाले माधव समूह, नेकपा माओवादी केन्द्र र जसपाले सर्वोच्चको फैसलाको स्वागतमा र्याली निकाल्नुका साथै मैनबत्ती प्रज्वलन गरेको हो । रेल्वे स्टेशनबाट निकालेको र्‍यालीले जनकचोकमा पुगेर मैनवत्ती प्रज्वलन गरिएको छ ।

र्‍यालीमा गठबन्धनका नेता कार्यकर्ताहरुले आजलाई होइन् भोलीलाई, देश निकाल ओलीलाई, लोकतन्त्र जिन्दावाद, केपी ओली मुर्दावाद जस्ता नारा लगाए ।

यूवा संघका कार्यकर्ताले प्रधानन्यायाधीशको पुत्ला जलाए

नेकपा एमालेका राष्ट्रिय यूवा संघका कार्यकर्ताहरुले जनकपुरमा सर्वोच्च अदालतका प्रधानन्यायाधीश चोलेन्द्र शमसेर राणाको पुत्ला जलाएका छन् ।

संसद पुन:स्थापनाको फैसलालाई असंवैधानिक भन्दै प्रधानन्यायधीश राणको पुत्ला जनकपुरको मिल्स एरियामा यूवा संघका कार्यकर्ताहरुले जलाएका हुन् । उनीहरुले प्रधानमन्त्री केपीशर्मा ओलीको पक्षमा र सर्वोच्च अदालतका प्रधानन्यायाधीश राणको विपक्षमा नाराबाजी समेत गरेका छन् ।

संसद पुन:स्थापनाको फैसला आउनुअघि यूवा संघका कार्यकर्ताले जनकपुरमा मोटरसाइकल र्‍याली निकालेका थिए । लगत्तै फैसला आएपछि उनीहरुले जनकपुरको पिडारी चोकमा टायर बालेर प्रदर्शन गरे ।

जनकपुरधाम । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ सर्वोच्च अदालतले नेपाली कांग्रेसका सभापति शेरबहादुर देउवालाई प्रधानमन्त्री बनाउन परमादेश जारी गर्ने दावी गरेका छन् ।

पार्टीका केन्द्रीय सदस्य महादेव यादवप्रति श्रद्धाञ्जली अर्पण गर्न जनकपुरधाम आइपुगेका प्रचण्डले सर्वोच्चले आफूहरूको पक्षमा फैसला गर्ने ठोकुवा गरे । उनले सर्वोच्चको आदेशबाट प्रतिनिधिधिसभा पुन:स्थापना हुने र देउवा प्रधानमन्त्री बन्नेमा विश्वस्त रहेको बताए ।

प्रचण्डले प्रधानमन्त्री ओलीले सर्वोच्च अदालतलाई दबाब दिएर निरंकुश बन्दै गएको आरोप लगाए । उनले भने, ‘ओली जनताको नजरमा निरंकुश र लोकतन्त्र विरोधी तत्वको रुपमा उजागर भइसक्यो ।’

यसअघि मन्त्रिपरिषद् विस्तारको निर्णय बदर गर्ने सर्वोच्चको फैसलाको पूर्वसन्ध्यामा पनि प्रचण्डले धादिङमा अदालतको फैसलाको पूर्वानुमान गरेका थिए । प्रधानमन्त्री ओलीले त्यसलाई ‘स्याल कराउनु र कुखुरो हराउनु’को संज्ञा दिएका थिए ।

जनकपुरधाम । नेकपा एमालेको राष्ट्रिय युवा संघ नेपालले प्रदेश २ को अस्थायी राजधानी जनकपुरमा शक्ति प्रदर्शन गरेको छ ।

शक्ति प्रदर्शनका क्रममा यूवा संघका कार्यकर्ताहरुले प्रधानमन्त्री केपी शर्मा ओलीको पक्षमा र जसपा अध्यक्ष उपेन्द्र यादवसहित विपक्षी गठन्धनका नेताहरुको विरुद्धमा नाराबाजी गरे । उनीहरुले ‘अघि बढ्नुस् केपी बा, हामी साथ दिन तयार छौं’ लगायतका नारा लगाएका थिए ।

प्रदर्शनमा सहभागी सयौं कार्यकर्तामध्ये अधिकांशले बाँसको लाठी बोकेका थिए । जनकचोक पुगेर उनीहरुले विपक्षी नेताहरु उपेन्द्र यादव, पुष्पकमल दाहाल ‘प्रचण्ड’ र शेरबहादुर देउवको पुत्ला समेत दहन गरे ।

जनकपुरमा केहिदिन अगाडी विपक्षी गठन्धनका विद्यार्थीहरुले सरकारविरुद्ध गरेको आन्दोलनको प्रतिकारमा युवा संघका कार्यकर्ताहरु उत्रेका थिए ।

जनकपुरधाम । कोभिड अस्पतालमा गरेको लगानी र कर्मचारी भर्ना प्रक्रिया सार्वजनिक गर्नुपर्ने माग राख्दै प्रदेश २ का मुख्यमन्त्री लालबाबु राउतविरुद्ध जनकपुरका युवाहरुले प्रदर्शन गरेका छन् ।

जनकपुरस्थित मधेस भवनमा रहेको मुख्यमन्त्री तथा मन्त्रिपरिषद् कार्यालय अगाडी युवा संघ नेपालसँग आवद्ध मुन्जय राउत नेतृत्वमा युवाहरुले प्रदर्शन गरेका हुन् । कोभिड विशेष अस्पतालमा व्यापक भ्रष्टाचार भएको र कर्मचारी पनि कानून विपरित भर्ना गरेकाले प्रदर्शन गरेको उनीहरुले बताएका छन् ।

प्रदर्शनको नेतृत्व गरेका राउतले भने, ‘कोभिड अस्पतालमा ९ करोड लगानी गरेको कुरा बाहिर आएको छ । यसमा व्यापक भ्रष्टाचार भएको देखिन्छ । कुनै प्रक्रिया पुरा नगरी आफ्ना पकेटका मान्छेलाई कर्मचारी भर्ना गरेकाले प्रदर्शन गरेका हौं ।’

युवाहरुले यसअघि कोभिड अस्पतालमै पुगेर खर्च रकम र कर्मचारी भर्ना प्रक्रिया सार्वजनिक गर्न माग गरेका थिए । तर त्यहाँका कर्मचारीहरुले सार्वजनिक गर्न मानेनन् । त्यसपछि उनीहरु मुख्यमन्त्री राउतविरुद्ध प्रदर्शनमा उत्रेका हुन् ।

तीन दिनभित्र अस्पतालमा लगानी गरेको रकम र कर्मचारीको विवरण तथा भर्ना प्रक्रिया सार्वजनिक नगरे कडा आन्दोलन गर्ने युवाहरुले चेतावनी दिएका छन् ।

जनकपुरधाम । प्रहरी र प्रदर्शनकारीबीचको झडपमा प्रचण्ड–माधव नेपाल समूहका नेता रामचन्द्र झा घाइते भएपछि नेता मात्रिका यादव सडकमा निस्किएका छन् । यादवको नेतृत्वमा प्रदर्शनकारीहरुले जबर्जस्ती बजार पसल बन्द गराइरहेका छन् ।

प्रदर्शनकारीले ठूला–ठूला भाटा बोकेर स्थानीयलाई बजार पसल बन्द गर्न दबाब दिइरहेका छन् ।

केही समयअघि जनक चोकमा बन्दकर्ता र सुरक्षाकर्मीबीच भएको झडपमा नेता झा घाइते भएका हुन् । घाइते झाको टाउकोमा चोट लागेको छ । उनको प्रादेशिक अस्पताल जनकपुरमा उपचार भइरहेको छ ।

झडपपछि प्रदर्शनकारी झन् आक्रामक ढंगमा प्रस्तुत भएका छन् ।

केहीबेर अघि स्थिति नियन्त्रणमा लिन प्रहरीले केही सेल अश्रुग्याँस प्रहारसँगै हवाई फायर समेत गरेको थियो ।