काठमाडौं । सर्वोच्च अदालतमा गोलाप्रथाद्वारा ११ वटा इजलास गठन भएका छन् । पेसी व्यवस्थापन समितिका तर्फबाट बुधबार पहिलोपटक ११ इजलास गठन भएको हो ।
आजका ११ इजलासमा २१७ मुद्दा सुनुवाइका लागि पेसी तोकिएको छ । तीमध्ये २ वटा एकल इजलास छन् । सर्वोच्च अदालतको संशोधित नियमावली अनुसार गोला तानेर इजलास गठनको व्यवस्था गरिएको हो ।
प्रधानन्यायाधीशको राजीनामा मागसहित बेन्च बहिष्कार गरिरहेका न्यायाधीशहरू गोलाप्रथा लागू भएपछि इजलास फर्कन सहमत भएपछि फुलकोर्टले गोलाप्रथाबाट इजलास तोक्ने निर्णय गरेको थियो । असन्तुष्ट न्यायाधीशहरू भने इजलास फर्किसकेका छन् ।
यता नेपाल बार एशोसियनले भने आन्दोलनलाई जारी राखेको छ । बारले जबराको राजीनामा नआएसम्म आन्दोलन नरोक्ने बताउँदै आएको छ ।
नेपाल बारका महासचिव लिलामणि पौडेलका अनुसार आज पनि साढे १२ सम्म अदालत परिसरमा धर्नाको कार्यक्रम छ ।