काठमाडौं । उदयीमान मोडल गरिमा शर्मा केही समयअघि गायक दुर्गेश थापासँग टीकटक लाइभमा आइन् । लाइभमा यी दुईबीच भएको कुराकानीको एउटा टुक्रा सामाजिक सञ्जालमा भाइरल बनाइयो ।
भाइरल भएको क्लीपमा दुर्गेश र गरिमाको संवाद सुन्दा उनीहरुबीचको लामो प्रेम सम्वन्ध भर्खरै टुटेको छनक मिल्छ । यसले धेरै दर्शकलाई आश्चर्यमा पारिरहेको थियो, किनकी दुर्गेश एक विवाहित पुरुष हुन् । उनीहरु प्रेम सम्वन्धमा रहेको चर्चा कहिल्यै थिएन ।
यसैबीच घटनाले नयाँ मोड लियो, जब विवादास्पद टेलिभिजन कार्यक्रम रजतपटले यो भिडियो क्लीपलाई ‘समाचार’ नै बनाइदियो । उक्त संवादको वास्तविकता नखोजिकन विवाहित पुरुषसँग प्रेम सम्वन्धमा रहेको भनेर गरिमामाथि रजतपटले लान्छना लगाएको छ । कार्यक्रम प्रस्तोता प्रकाश सुबेदीले ‘बिनाशकाले विपरित बुद्धि’ भनेर टिप्पणीसमेत गरेका छन् ।
रजतपट कार्यक्रममा यसरी ‘रिपोर्ट’ प्रकाशित भएपछि गरिमा आक्रोशित बनेकी छन् । भ्रामक समाचार प्रशारण गरेर आफ्नो चरित्रहत्या गरेको भन्दै उनी हिजो राति टिकटकमा रुँदै लाइभ आइन् । उनले रजतपट कार्यक्रम र प्रस्तोताविरुद्ध कानूनी कारवाहीमा जाने चेतावनी पनि दिएकी छन् ।
भएको के हो ?
दुर्गेश र गरिमाले टीकटक लाइभमा आएर उरन्ठेउलो हर्कत गरेका थिए । दुर्गेशले आफूहरु भर्खरै ब्रेकअप भएका प्रेमीप्रेमीकाको रुपमा अभिनय गर्ने प्रस्ताव गरिमालाई राखे र गरिमाले पनि स्वीकारिन् । अभिनयका नाममा दुर्गेशले गरिमालाई तथानाम गाली गरेका थिए । टिकटकबाटै उदाएकी गरिमाले यो फुटेज टीकटकमा सजिलै दुरुपयोग हुन सक्छ भन्ने हेक्का गरिनन् ।
नभन्दै अगाडिको पृष्ठभूमि हटाएर उनीहरुले ‘एक्स लभर्स’ का रुपमा गरेको संवादको फुटेज टिकटकमा भाइरल भयो । यही फुटेज हेरेर प्रकाश सुबेदीले रिपोर्ट बनाए । टिकटकमा आएको १५ सेकेन्डको भिडियोलाई मात्रै आधार बनाएर यसरी राष्ट्रिय टेलिभिजनमा समाचार प्रशारण गर्नु हास्यास्पद मात्र नभइ आपत्तिजनक समेत थियो ।
विगतमा पनि पटक–पटक नायिकाहरुको चरित्रहत्या गरेको आरोप प्रकाश सुबेदीले खेप्दै आएका थिए । केही समयअघि मात्रै नायिका शिल्पा पोखरेलको चरित्रहत्या गरेको आरोपमा एपीवान टेलिभिजनले उनको कार्यक्रमलाई निलम्बन गरिदिएको थियो । तर, अझै पनि उनले सुध्रिने संकेत देखाएका छैनन् ।
गरिमाले सामाजिक सञ्जालमा स्टाटस लेखेर आफूले सत्यतत्य जानकारी गराउँदा गराउँदै पनि बदनियतपूर्वक समाचार बजाइएको गुनासो गरेकी छन् । न्यायका निम्ति सम्वन्धित निकायसँग पुग्न बाध्य भएको भन्दै उनले दर्शकलाई भ्रममा नपर्न अनुरोध गरेकी छन् ।
तर यो घटनामा दर्शकले दुर्गेश र गरिमामाथि पनि गाली वर्षाइरहेका छन् । टिकटक लाइभमा आएर रमाइलो गर्ने नाममा उछृंखल क्रियाकलाप गर्दा उनीहरु आफैं फस्न पुगेको कतिपयको टिप्पणी छ ।
उनीहरुको गल्ति आफ्नो ठाउँमा होला । तर, कुनै आधिकारिकता बिनाको भ्रामक रिपोर्ट प्रशारण गर्दा ‘चिप्ल्याउने अंकल’ का रुपमा चिनिएका प्रकाश सुबेदी फेरि एकपटक आफैं चिप्लिएका छन् ।
@garimasharma_official
THANK YOU EVERYONE FOR THIS BEAUTIFUL GIFT 😊 विशेष tHANK YOU AP1 TV , I OWE YOU FOR THIS EPISODE 🙏 ##JUSTICENEEDED
