काठमाडौं । एन्फाको कार्यसमिति बैठकमा सहभागी भएका फुटबल प्रशिक्षक अब्दुल्लाह अल्मुताइरी रिसाएर बीचमै हिँडेका छन् । बैठकमा उनले आफूलाई एन्फाले संरक्षण नगरेको गुनासो गरेका थिए ।
प्रशिक्षक अल्मुताइरीले सामाजिक सञ्जालमार्फत राजीनामा घोषणा गरेपछि एन्फा कार्यसमिति बैठक बसेको हो । त्यसक्रममा प्रशिक्षक अल्मुताइरीलाई पनि बोलाइएको थियो । बैठकका क्रममा वरिष्ठ उपाध्यक्ष पंकजविक्रम नेम्वाङ र दुई पत्रकारले एन्फामा दिइएको निवेदन पढिएको थियो ।
पत्रकारको निवेदन पढ्ने क्रममा अल्मुताइरी आक्रोशित भएर हिँडेको वरिष्ठ उपाध्यक्ष नेम्वाङले बताए ।
‘आफूमाथि दुर्व्यवहार हुँदा एन्फाले संरक्षण नगरेको गुनासो गर्नुभएको थियो’ उनले भने, ‘उहाँको भनाइमा पनि एकरुपता थिएन ।’
नेम्वाङले प्रशिक्षकले अनुशासन तोडेको भन्दै उनको विषयमा एन्फाले बोल्ड निर्णय लिनुपर्ने बताएका छन् । नेम्वाङ पनि बीचमै बैठक छोडेर हिँडेका छन् ।
