Tag: सीपी गजुरेल

काठमाडौं । विभिन्न २६ राजनीतिक दल सम्मिलित ‘एमसीसी सम्झौता खारेजी आन्दोलन’ ले असोज २२ गते माइतीघर मण्डलामा प्रदर्शन गर्ने भएको छ ।

आन्दोलनको बैठकले एमसीसी सम्झौता खारेज नहुँदासम्म आन्दोलन चर्काउने निर्णय गरेको सीपी गजुरेलद्वारा जारी विज्ञप्तिमा उल्लेख छ ।

आन्दोलनमा नेकपा (क्रान्तिकारी माओवादी), नेकपा (माले), नेपाल कम्युनिस्ट पार्टी, नेपालका लागि नेपाली, उन्नत लोकतन्त्र पार्टी, देशभक्त जनगणतान्त्रिक मोर्चा, नेकपा (माओवादी केन्द्र समाजवादी) लगायतका दलहरु आवद्ध छन् ।

आन्दोलनले सरकार र नेकपा विप्लव समूहसँग भएको सम्झौताअनुसार नेकपाका सबै कार्यकर्ता तत्काल रिहा गर्न मागसमेत गरेको छ । त्यस्तै माथिल्लो कर्णाली परियोजनाका लागि भारतीय कम्पनीसँग भएको सम्झौता खारेज गरी स्वदेशी लगानीमै बनाउन समेत माग गरिएको छ ।

काठमाडौं । नेकपा माओवादी केन्द्रसहित साना २२ राजनीतिक दलले जनताले अहिले चुनाव नचाहेको भन्दै त्यसलाई खारेज गर्न माग गरेका छन् । कोरोना महामारी बढेको भन्दै उनीहरूले अहिलेको मुख्य प्राथमिकता जनताको जीवन रक्षा भएको उनीहरूको भनाइ छ ।

‘विश्व स्वास्थ्य सङ्गठन र स्वास्थ विशेषज्ञहरुले आगामी मंसिर र पुसमा कोरोना महामारीको तेस्रो लहर आउन सक्ने र त्यो अहिलेको भन्दा पनि बढी क्षति पुर्‍याउने किसिमको हुने चेतावनी दिएकै समयमा कथित संसदीय निर्वाचनको मिति तोकिनुले यसपछाडि ठूलो षड्यन्त्र लुकेको छ भन्ने बुझ्न सकिन्छ,’ २२ दलीय मोर्चाका तर्फबाट सिपी गजुरेलले जारी गरेको अपीलमा भनिएको छ, ‘जनता आफ्नो जीवनरक्षा चाहन्छन्, चुनाव होइन । यतिखेर हाम्रो आवश्यकता जीवनरक्षा हो, संसदीय निर्वाचन होइन ।’

उनीहरूले राष्ट्रपतिले गरेको निर्णय खारेजसमेत माग गरेका छन्। विदेशी शक्तिहरुले नेपालको राष्ट्रिय सार्वभौमिकतामाथि आँच आउने गतिविधि गरिरहेको दावी गर्दै अपीलमा देशभक्त र प्रगतिशील शक्तिलाई एकजुट हुन आह्वान गरिएको छ।

‘हाम्रो देशमा संकट पैदा गराउन मलजल गरी यस्तो स्थितिबाट फाइदा उठाएर विदेशी शक्तिहरुले नेपालको राष्ट्रिय सार्वभौमिकतामाथि आँच आउने गतिविधि गरिरहेको सर्वत्र चर्चा भइरहेको छ,’ अपीलमा भनिएको छ, ‘यस्तो स्थितिमा नेपाल राष्ट्रको सार्वभौमिकता र जनताको जीवन रक्षाका लागि सम्पूर्ण देशभक्त, प्रगतिशील शक्तिहरु र नेपाली जनतालाई एकजुट भएर परिस्थितिअनुसारका विरोधका कार्यक्रममा अघि बढ्न हामी आह्वान गर्दछौं ।