जनकपुरधाम । ईलाका प्रहरी कार्यालय लहान, सिरहाको हिरासतबाट लागुऔषध मुद्दाका एक अभियुक्त फरार भएका छन् । आज बिहान हिरासतको ग्रिल काटेर नवराजपुर गाउँपालिका १ का पशुपति यादव फरार भएका हुन् ।
फरार भएका यादव गत जेठ २० गते लागुऔषधसहित पक्राउ परेका थिए । हिरासतमा रहेका अभियुक्तहरूको सुरक्षार्थ प्रहरी नखटेका कारण उनी सहजै फरार भएको बताइएको छ । ग्रिल कसरी काटेको कुरा खुल्न नसकेको प्रहरीले जनाएको छ ।
घटना विषयमा अनुसन्धान भइरहेको र फरार यादवको खोजी गर्न प्रहरी परिचालन भएको जिल्ला प्रहरी कार्यालयका प्रवक्ता डिएसपी सुवास बुढाथोकीले जानकारी दिए ।