काठमाडौं । आफ्नो दलीय विवरण एमालेमा होइन नेकपा एसमा अद्यावधिक गराइ पाउँ भन्दै सर्वोच्च अदालत गएका प्रतिनिधिसभा सदस्य सोम प्रसाद पाण्डे र राष्ट्रियसभा सदस्य शारदादेवी भट्टको रिटमाथि आज सुनुवाइ हुँदैछ ।
न्यायाधीश आनन्दमोहन भट्टराईको एकल इजलासमा पाण्डे र भट्टको रिटको सुनुवाइ हुन लागेको हो । यसअघि बुधबार न्यायाधीश अनिल सिन्हाको इजलासमा परे पनि हेर्न नभ्याइएको थियो ।
पाण्डे र भट्टको तर्फबाट मंगलबार सर्वोच्चमा रिट परेको थियो । एमाले विभाजनको बेला शुरूमा निवेदनमा हस्ताक्षर नगरेका पाण्डे र भट्ट सनाखतको बेला निर्वाचन आयोग गएका थिए । तर, आयोगले उनीहरूको सनाखत नलिइ निर्णयमा भने उनीहरूको निवेदनलाई नोटिसमा राखेको थियो ।
रिट निवेदनमा पाण्डे र भट्टले आफूहरूले नेकपा एसमा सनाखत गर्न खोज्दा आयोगले नदिएको भन्दै आफूहरूको विवरण नेकपा एसमा अद्यावधिक गराउन आदेश माग गरेका छन् ।
पाण्डे नेकपा एसका अध्यक्ष माधव नेपालका सम्धी हुन् । उनी अन्तिम घडीसम्म एमाले एकताको पक्षमा लागेका थिए । उनी एमाले केन्द्रीय सदस्यसमेत हुन् ।
