काठमाडौं । राष्ट्रपति विद्यादेवी भण्डारीले काठमाडौं उपत्यकाका विभिन्न शक्तिपीठहरूको दर्शन गर्ने भएकी छन् ।
बडादसैँअन्तर्गत महाअष्टमीको दिन पारेर उनले शक्तिपीठहरूको दर्शन गर्न लागेकी हुन् । राष्ट्रपतिले बुधबार अपरान्ह ४ बजेबाट शक्तिपीठहरूको दर्शन गर्ने समय तालिका रहेको छ ।
उनले नक्साल भगवती, गुह्येश्वरी, मैतीदेवी, कालिकास्थान, भद्रकाली, महांकाल, संकटा, नरदेवी इन्द्रायणी र शोभा भगवतीको दर्शन गर्न लागेकी हुन् ।
जनकपुरधाम । राजा जनकको कुल देवीको रूपमा चिनिने राजदेवी मन्दिरसहित जनकपुरधामको विभिन्न स्थानमा खोँइछ भर्नेको भीड लागेको छ ।
विवाहिता महिलाहरुले सप्तमीदेखि नै खोँइछ भरिरहेका छन् । खोँइछ भर्नको लागि हजारौँको संख्यामा महिलाहरू राजदेवी मन्दिरसहित रामानन्द चोक, मुरली चोक, पिडरीया माईस्थानलगायत पुग्छन् । त्यस्तै प्रसाद चढाउनको लागि गएराति ११ बजेदेखि नै लाम छ । राजदेवी मन्दिरमा प्रत्येक वर्ष खोँइछ भर्न महिलाहरुको भीड लाग्छ ।
मिथिलामा छोरीको बिदाईभन्दा पहिले खोँइछ दिने परम्परा छ । जनकपुरमा आज रातिदेखि बलि दिइने भएको छ । त्यसको लागि नेपालसहित भारतको सीमावर्ती क्षेत्रबाट श्रद्धालु भक्तजनहरू बोकाबलीको लागि आएका छन् ।
