Tag: वडाध्यक्ष

सुर्खेत । जाजरकोटको भेरी नगरपालिकाका निमित्त प्रमुख प्रशासकीय अधिकृत र वडाध्यक्षसहित १४ जनालाई प्रहरीले जुवाखालबाट पक्राउ गरेको छ । जुवा खेलिरहेको अवस्थामा आइतबार बिहान करिब ३ बजेतिर उनीहरूलाई नियन्त्रणमा लिइएको हो ।

जाजरकोट सदरमुकामनजिकै गैरीखाली भन्ने ठाउँमा जुवा खेलिरहेका अवस्थामा उनीहरूलाई पक्राउ गरिएको जिल्ला प्रहरी कार्यालय जाजरकोटले जनाएको छ ।

जुवा खालबाट भेरी नगरपालिकाका प्रमुख प्रशासकीय अधिकृत दलबहादुर घर्ती र वडा नम्बर ६ का वडाध्यक्षसमेत रहेका नेपाली कांग्रेस भेरी नगरपालिका सभापति सशी बुढा पनि पक्राउ परेको एक प्रहरी अधिकृतले बताए ।

ती प्रहरी अधिकृतअनुसार उनीहरूको साथबाट दुई लाख नगद पनि बरामद भएको छ । जुवा खेलमा मोबाइल बैकिङको प्रयोग गरेका कारणले थप रकम बरामद नभएको प्रहरीले बतायो । जुवाखालबाट नियन्त्रणमा लिइएका अन्यको नाम भने प्रहरीले सार्वजनिक गरेको छैन ।

– न्यूज कारखानाबाट

सुर्खेत । एक युवकलाई सार्वजनिक स्थानमा कुटपिट गरेको भन्दै जाजरकोटको जुनीचाँदे गाउँपालिका २ का वडाध्यक्ष रामबहादुर नेपालीलाई प्रहरीले पक्राउ गरेको छ । उनीमाथि जिल्ला प्रहरी कार्यालय जाजरकोटले सार्वजनिक मुद्दा लगाउने तयारी गरेको छ ।

साउन १५ गते वडा कार्यालयमा सामाजिक सुरक्षा भत्ता वितरण भइरहेको समयमा वडाध्यक्ष नेपालीकै भतिजा पर्ने सर्पे दमाईले मदिरा सेवन गरी होहल्ला गरेका थिए । वडाध्यक्ष नेपालीले उनलाई नियन्त्रणमा लिएर प्रहरीलाई बुझाएका थिए । तर, नियन्त्रणमा लिने क्रममा बल प्रयोग गरेको भिडियो सामाजिक सञ्जालमा भाइरल भएको छ ।

यो पनि पढ्नुहोस् :

मदिराले मातेका सर्पेलाई वडाध्यक्षले यसरी लिए नियन्त्रणमा (भिडियो)

भिडियो भाइरल भएसँगै वडाध्यक्ष नेपालीलाई जिल्ला प्रहरी कार्यालय जाजरकोटको टोलीले उनलाई नियन्त्रणमा लिएको हो ।

प्रहरी निरीक्षक षडानन्द अधिकारीले नेपाल प्रेससँग भने, ‘भिडियो बाहिरिएसँगै हामीले स्थलगत निरीक्षण पनि गरेका थियौं । सर्पे नेपालीले मापसे गरेको, होहल्ला गरेको र गालीगलौज पनि गरेका रहेछन् । तर अध्यक्ष नेपालीले उनलाई प्रहरीको जिम्मा लगाउनुको साटो आफैले हातपात गरेको, डोरीले बाँधेको देखियो । मदिरा सेवन गरेर कसैले होहल्ला गरेपनि वडा अध्यक्ष नेपालीले आफैं कारवाही गर्ने अधिकार छैन । उहाँले कानून हातमा लिने प्रयास गर्नुभयो ।’

सार्वजनिक स्थानमा त्यस्तो हर्कत गर्न नहुने अधिकारीको भनाइ छ । यद्यपि अहिलेसम्म सर्पेको परिवारले जाहेरी नदिएको उनले बताए ।

‘पीडित परिवार उहाँकै आफन्त रहेछन् । उहाँहरूले जाहेरी दिन मान्नु भएको छैन । उहाँहरुलाई आज सदरमुकाममा बोलाएका छौं । उहाँहरुलाई हामी काउन्सिलिङ गर्छौं । यदि उहाँहरुले जाहेरी दिन मान्नुभएन भने पनि कानूनी प्रक्रिया हामी अगाडी बढाउँछौं,’ अधिकारीले भने ।

सामाजिक सञ्जालमा आएको भिडियोलाई नै आधार मानेर प्रहरीले प्रारम्भिक अनुसन्धान गरिरहेको उनले जानकारी दिए ।

जनकपुरधाम । पर्साको पकहाँ मैनपुर गाउँपालिकाका- १ धोरेका वडाध्यक्षसहित ३ जना खैरो हेरोइनसहित पक्राउ परेका छन् । प्रहरीले ७९ ग्राम खैरो हेरोइनसहित पकहाँ मैनपुर गाउँपालिका- १ का वडाध्यक्ष अमिरिका सहनी पक्राउ  गरेकाे हाे।

वडाध्यक्ष सहनी चढेको ना. १ ब। ३५९५ नम्बरको सरकारी मोटरसाइकल वीरगञ्ज महानगरपालिका- १९ मा आइतबार राति चेकजाँच गर्दा खैरो हेरोइन बरामद भएपछि उनलाई नियन्त्रणमा लिएको पर्सा प्रहरीले जनाएको छ ।

उनको मोटरसाइकलमा पछाडि सवार ५२ वर्षीय रामआदेश सहनी र पछाडि आएका ना ६२ प १९४२ नम्बरको मोटरसाइकलमा सवार सोही गाउँपालिका १ कै ४० वर्षीय बलिष्टर सहनीलाई समेत प्रहरीले पक्राउ गरेको छ ।

पक्राउ परेका वडाध्यक्षसहित तीनैजनामाथि प्रहरीले अनुसन्धान सुरु गरेको छ । वडाध्यक्षसँग पक्राउ परेका सहनीद्वयको संलग्नता रहेको प्रहरीको प्रारम्भिक अनुसन्धानले देखाएको बताइएको छ ।

जनकपुरधाम । सर्लाहीमा जेसिबी चालकले एक वडाध्यक्षकै हत्या गरेका छन् ।

ईश्वरपुर नगरपालिका ३ का वडाध्यक्ष ५५ वर्षीय सुर्यकुमार श्रेष्ठलाई जेसिबीको बकेटले हानेर चालक रबिन भनिने हर्कबहादुर तामाङले हत्या गरेका हुन् ।

हत्या आरोपी हरिपुर नगरपालिका-१ हजारविघा बस्ने ३८ वर्षीय चालक तामाङ र जेसिबी ठेकेदार ईश्वरपुर नगरपालिका ३ कै ३५ वर्षीय प्रेमराज दाहाललाई पक्राउ गरिएको सर्लाहीका एसपी सन्तोष सिंह राठोरले जानकारी दिए । उनले घटना विषयमा अनुसन्धान भइरहेको बताए ।

सर्लाहीका प्रहरी सह-प्रवक्ता प्रहरी निरीक्षक कृष्ण गिरीका अनुसार ईश्वरपुर नगरपालिका-३ मा सार्वजनिक पोखरी खनिदैछ । त्यहाँ पुगेका वडाध्यक्ष श्रेष्ठ, ठेकेदार र चालक एकैठाउँमा बसेर खानपिन गरेका थिए ।

खानपिनकै क्रममा विवाद भएर चालकले जेसिबी स्टार्ट गरी बकेटले वडाध्यक्षको टाउकोमा प्रहार गरी हत्या गरेपछि खाल्डोमा हालेका थिए ।

‘घटना विषयमा थाहा पाएलगत्तै त्यहाँ पुगेर अचेत अवस्थामा रहेका वडाध्यक्ष श्रेष्ठको उद्धार गरी जिल्ला अस्पताल मलंगवा पुर्यायौं’, प्रहरी निरीक्षक गिरीले भने, ‘तर डाक्टरले मृत घोषणा गरे ।’

मृतक वडाध्यक्ष श्रेष्ठको शव अहिले पोष्टमार्टमका लागि मलंगवा अस्पतालमा राखिएको छ । घटनाको मुख्य कारण भने खुल्न सकेका छैन । प्रहरी निरीक्षक गिरीले पक्राउ परेका चालकले गाली गरेपछि विवाद भएको र आवेगमा आएर जेसिबीको बकेटले हानेको बयान दिएका छन् ।

ईश्वरपुर नगरपालिकाका मेयर मनोज कुमार देवकोटाले वडाध्यक्ष श्रेष्ठको हत्याको कारण नखुलेको बताए । उनले भने, ‘घटना राति भएको हो । किन भयो ? कसरी भयो ? केहि थाहा छैन । म बुझ्दैछु ।’