Tag: रुपन्देही

रूपन्देही । काठमाडौदेखि सुर्खेत जाँदै गरेकाे यात्रुबाहक बस रूपन्देहीको देबदहमा दुर्घटना हुँदा २८ जना घाइते भएका छन् ।

ना ७ ख ६०४९ नम्बरको बस देबदह गणेशपुरमा गएराती दुर्घटनामा परेको वडा प्रहरी कार्यालय बुटवलले जानकारी दिएकाे छ ।

उच्च गतिमा रहेको बसले ट्रकलाई ओभरटेक गरी आफ्नाे लेनमा फर्किदै गर्दा अनियन्त्रित भइ सडकदेखि ५ मिटर साइडमा पल्टिएर दुर्घटना भएको प्रहरीले जनाएको छ । सबै घाइते सामान्य रहेको प्रहरीले जनाएको छ ।

रूपन्देही । कोरोना संक्रमणसँगै अस्पताल भर्ना हुने विरामी बढ्न थालेपछि रुपन्देहीको स्वास्थ्य प्रणाली कमजोर भएको छ । कोरोना अस्पताल भरिएको छ भने निजी अस्पताल आमसर्वसाधारणको पहुँचबाहिर छ ।

लुम्बिनी प्रदेश सरकारले कोरोना संक्रमित विरामीको उपचार निजी अस्पतालमा पनि गर्नुपर्ने व्यवस्थासहित अस्पतालले विरामीको अवस्थाअनुसार लिन पाउने शुल्क पनि निर्धारण गरिदिएको छ ।

लुम्विनी प्रदेशका आन्तरिक मामिला स्वास्थ्य तथा जनसंख्या मन्त्री लिला गिरीको अध्यक्षतामा सम्पन्न सरोकारवालाहरुको बैठकले प्रदेशमा रहेका निजी अस्पतालहरुमा कोभिड १९ का संक्रमित बिरामीहरुको उपचार गरे बापत पाउने शुल्क कायम गरेको हो ।

मन्त्रालयका अनुसार कोभिड १९ को संक्रमितको उपचार गरे बापत निजी अस्पतालहरुले अक्सिजनसहितको शय्या प्रयोग गरेबापत ३ हजार ५ सय रुपैयाँ प्रतिदिनका दरले लिन पाउने छन् ।

त्यसैगरी आईसीयू तथा एचडीयू शय्या प्रयोग गरेबापत प्रतिदिन ७ हजार र भेन्टिलेटरसहितको शय्या प्रयोग गर्नु परे प्रतिदिन १५ हजार रुपैयाँ शुल्क कायम गरिएको छ ।

यसरी उपचार गर्ने अस्पतालहरुले सबै बिरामीहरुको उपचारको अभिलेख डिजिटल प्रविधिमा राखी सम्वन्धित कार्यालयहरुमा जानकारी दिनुपर्ने निर्णय भएको मन्त्रालयले जनाएको छ ।

बैठकमा लुम्बिनी प्रदेश सरकारभित्र रहेका सरकारी तथा निजी अस्पताल र मेडिकल कलेजका सन्चालकहरु, लुम्विनी प्रदेशका प्रमुख सचिव भरतमणि सुबेदी, आन्तरिक मामिला तथा कानून मन्त्रालयका सचिव रबिलाल पन्त, स्वास्थ्य तथा जनसंख्या मन्त्रालयका सचिव महादेव पन्त, रुपन्देहीका अस्मान तामाङ, लुम्बिनी प्रादेशिक अस्पतालका प्रमुख मेडिकल सुपेरिटेण्डेन्ट डाक्टर राजेन्द्र खनाललगायतको सहभागिता रहेको थियो ।

आधा घण्टाको अवधिमा तीन संक्रमितको मृत्यु

लुम्बिनी प्रादेशिक अस्पतालले संचालन गरेको कोरोना बिशेष अस्पतालमा आज विहान आधा घण्टाको अवधिमा ३ जना संक्रमितको मृत्यु भएको छ ।

अस्पतालले जानकारी दिएअनुसार बुटवल उपमहानगरपालिका–११ का ३१ वर्षीय पुरुषको राती २ः३० बजे मृत्यु भएको थियो । २ः४५ बजे बुटवल–१४ का ६६ वर्षीय पुरुषको मृत्यु भयो भने ३ बजे मायादेबी–६ का ७२ वर्षीया महिलाको पनि उपचारका क्रममा मृत्यु भएको हो ।

लुम्बिनी प्रादेशिक अस्पतालका प्रवक्ता डा बिष्णु गौतमका अनुसार मृतकमध्ये २ जना बैशाख ११ गते अस्पताल भर्ना भएका थिए भने बुटवल–१४ का संक्रमितलाई ९ गते अस्पताल ल्याइएको थियो ।

यी तीनसहित रुपन्देहीमा मृत्यु हुनेको संख्या १८४ पुगेको छ ।

रूपन्देही । कोरोना सक्रिय संक्रमित १४ सय पार गरेपछि रूपन्देहीमा वैशाख १६ गतेबाट निषेधाज्ञा लगाउन जिल्ला कोभिड-१९ संकट व्यवस्थापन केन्द्रले सिफारिस गरेको छ।

केन्द्रको बैठकले वैशाख १६-२९ गतेसम्म निषेधाज्ञा लगाउने गरी सिफारिस गर्ने निर्णय भएको सहायक प्रमुख जिल्ला अधिकारी विजय पौडेलले जानकारी दिए ।

‘१६ गते बिहान १ बजेदेखि वैशाख २९ गतेसम्म निषेधाज्ञा लगाउने सिफारिस गरिएको छ । यसको औपचारिक निर्णय भने बुधबार हुनेछ ‘, पौडेलले भने ।

उद्योगी व्यवसायी, स्थानीय तह, राजनीतिक दलहरुसँग चरणबद्ध रुपमा छलफल गरेर निष्कर्ष निकालेको उनले बताए ।

निषेधाज्ञा अवधिमा औषधी उपचार र अन्य अत्यावश्यक कामबाहेक घरबाहिर निस्कन नदिइने भएको छ । अति आवश्यक सवारीसाधनलाई मात्र सञ्चालन गर्न दिइने सिफारिस केन्द्रले गरेको छ ।

रुपन्देही । रोजगारीको प्रलोभन देखाएर भारत लैजाँदै गरेका दुई किशोरीको कपिलवस्तुको कृष्णनगर सीमा क्षेत्रबाट उद्दार भएको छ । कपिलवस्तु र दाङका १७ र १८ वर्षका दुइ जना किशोरीलाई आफन्त नेपाल र नेपाल प्रहरीको टोलीले उद्दार गरेको हो ।

नेपालबाट भारत लैजान खोज्दा सोधपुछ गरिएको र उनीहरुले मासु लिन जान लागेको बहाना बनाई सीमा क्षेत्र पार गर्न खोज्दा शंका लागेपछि उनीहरुलाई उद्दार गरिएको आफन्त नेपालका क्षेत्रीय संयोजक केशर विश्वकर्माले नेपाल प्रेसलाई जानकारी दिए ।

‘सीमा क्षेत्रमा हाम्रा साथीले शंकास्पद अवस्थाका किशोरीलाई देखेपछि सोधखोज गरेको र सुरुमा भारतीय बजारमा मासु लिन जान लागेको भनेपछि उनीहरुलाई शंकाको घेरामा राख्नुभयो, पछि उनीहरुलाई लिएर जाँदै गरेका महिलाको मोबाइलमा बारम्बार भारतीय नम्बरबाट कल आएपछि अझ बढी शङ्कास्पद देखिँदै गएकोले अनुसन्धान गर्दै जाँदा उनीहरु बेचिन लागेकाले उद्दार गरेका हौं ।’ विश्वकर्माले भने ।

कपिलवस्तुको बिजयनगर गाउँपालिका पाँच डालपुर बस्ने रेनु सुनारले ती किशोरीलाई भारतको बैंङलोरमा डान्स गराउने उद्देश्यले लैजान लागेको खुल्न आएको छ । सुनारलाई भारतीय नागरिकले बारम्बार फोन सम्पर्क गरी गोरखपुरसम्म लिन आएको पाइएको विश्वकर्माले बताए । उद्दार गरिएका ती किशोरीलाई आफन्त नेपालको सुरक्षित आवास गृहमा राखिएको छ । किशोरीलाई सोधपुछ र अनुसन्धानपछि डान्स बारका लागि दिनको दुइ हजार भारतीय रकम दिने प्रलोभनमा पारी लिन खोजेको देखिएको छ ।

महिलालाई मानव बेचबिखन तथा ओसारपसार ऐन अन्तरगत मुद्दा दर्ता गरी जिल्ला अदालत कपिलवस्तुवाट म्याद थप गरी अनुसन्धान भइरहेको इलाका प्रहरी कार्यालय कृष्णनगरका प्रहरी निरीक्षक (इन्सपेक्टर) सुकदेव पौडेलले नेपाल प्रेसलाई जानकारी दिए । उनका अनुसार सीमा क्षेत्रमा विभिन्न संस्थाको सहकार्यमा मानव बेचबिखन हुने कामलाई रोक्न अनुसन्धानलाई कडाई गरिएको छ ।

बुटवल । रुपन्देहीको सियारी गाउँपालिकाले सार्वजनिक र गुठीका जग्गा संरक्षण शुरु गरेको छ । सबै जग्गाको लगत सङ्कलन गर्दै समुदायको सहकार्यमा ऐतिहासिक र पुरानो गुठीका रुपमा रहेको सियारी गाउँपालिका-३ भैसाखादरस्थित रामजानकी मठमन्दिरको नाममा रहेको जग्गामा केही भूमाफियाले चलखेल गरेपछि पालिकाले समुदायसमेत गुहारेको छ । उक्त जग्गा करिब २०० वर्ष पुरानो इतिहास बोकेको गुठी र मन्दिर क्षेत्र मानिने स्थानीयले जनाएका छन् ।

उक्त वडामा मात्रै गुठी तथा मन्दिरको नाममा करिब ६० बिघा जमिन रहेको बताइएको छ । सोमध्येको जमिनमा मन्दिरका प्रमुख संरक्षक भनिएका रवीन्द्रनाथ वैष्णव (झा)को संलग्नतामा जमिन दुरुपयोग बढ्दै गएको स्थानीय सरकारले सुइको पाएपछि पालिकाले समुदायका अगुवा गुहार्दै काम थालेको छ । उनको भारतको उत्तरप्रदेशस्थित विहारको माधवपुरमा समेत घर रहेको छ । उनको त्यहाँको नागरिकता, आधारकार्ड, मतदाता नामावली र नेपालमा लिएको नागरिकताको प्रमाणपत्रसमेत पालिकाले प्रमाणका रुपमा सङ्कलन गरेको गाउँपालिकाका अध्यक्ष अयोध्या थारुले जानकारी दिए ।

वैष्णव (झा) ले जग्गा संरक्षणका नाममा आफूखुशी गर्ने, लिजमा दिएरसमेत गैरकानूनी काम गरेपछि त्यसलाई रोक्न पालिकाले आफ्नो अधिकारको प्रयोग गरेको थियो । स्थानीय अगुवाले पालिकाले शुरु गरेको संरक्षणलाई स्वागत गर्दै उनीहरुले संरक्षण गरेर जग्गाको सही सदुपयोग हुनुपर्ने, स्थानीय पालिकाको वैधानिक आयस्रोतका रुपमा विकास गर्नुपर्ने पनि माग गरेका छन् ।

पालिकाले एक बिघालाई वार्षिक रु १८ हजार मन्दिर व्यवस्थापन समितिमा बुझाउने गरी गाउँका विपन्नलाई खेती गर्न दिएको छ । करिब २८ बिघा जग्गा समुदायका विपन्न समुदायले वार्षिकरुपमा लिजमा लिएका छन् । उक्त जमिनमध्ये केहीमा खेती भइरहेको छ भने कतिपयमा यस्तै चलअचल सम्पत्ति रहेको छ । मठको जग्गा यकिन गरी जग्गा संरक्षण तथा इतिहास बोकेको रामजानकी मन्दिर संरक्षण गरिने सियारी गाउँपालिका अध्यक्ष थारुले बताए ।

उनले भने, ‘सो मठका महन्त प्रमुख संरक्षक भनिने रवीन्द्रदास वैष्णवले गुठीको सम्पत्तिको दुरुपयोग गरे, मन्दिरको विकास गरेनन् मन्दिरको विकास हुन नसक्दा स्थानीय पनि रुष्ट छन् ।’ राज्यको ऐन-नियमअनुसार मन्दिर तथा मठको जग्गा संरक्षण र विकास गरिने उनले जानकारी दिए ।

धार्मिक पर्यटनको क्षेत्र बन्दै

भैसाखादरमा रहेको रामजानकी मन्दिरलाई लुम्बिनीसँग जोडेर पर्यटकीयस्थलका रुपमा विकास गर्न सकिने गाउँपालिका उपाध्यक्ष अमृता गुरुङले बताइन् । मन्दिरको विकासका लागि बजेट विनियोजन गरिएको र मन्दिरको आवश्यक भौतिक पूर्वाधारको विकास गरिने तथा जग्गा संरक्षणका लागि तारबार लगाइने उनको भनाइ छ ।

मन्दिरमा रहेको जग्गा संरक्षण हुनुपर्ने, मन्दिरको आम्दानी मन्दिरको विकासमा लगाउनुपर्ने, हिसाबकिताब पारदर्शी तरिकाले राख्नुपर्ने, स्थानीय तथा अन्य सबै भक्तजनले पूजापाठ गर्न पाउनुपर्नेलागयतका माग आफूहरुले विगतदेखि नै उठाउँदै आएको स्थानीय सोमै थारु बताउँछन् । जग्गा संरक्षणका लागि वडा-३ का अध्यक्ष घिसन अहिरको संयोजकत्वका ११ सदस्यीय मन्दिर संरक्षण समिति गठन गरिएको छ । मठ तथा मन्दिरको सबै सम्पत्ति संरक्षण र सम्वर्द्धन तथा सञ्चालनका लागि समुदायको समेत अपनत्व हुने गरी विशेष योजना बनाइने भएको छ ।

उक्त समितिको उपाध्यक्षमा बृहस्पति थारु, सचिव सुरेश यादव र सदस्यमा त्रिभवानी थारु, बलिराम यादव, राजेन्द्र यादव, रोशनप्रसाद चौधरी, मञ्जु थारु, महातन यादव र शिवकुमार थारु सदस्य छन् । प्रमुख संरक्षक भनिने वैष्ठव (झा) महन्तले अहिलेसम्म हिसाव पारदर्शी नगरेको मन्दिरको जग्मा भएका काठ जथाभवी कटान गरी बेचबिखन गरेको, मन्दिरको जग्गामा माछापालन गर्न दिएको, गाउँवासीबाट जथाभावी रकम असुली गर्ने गरेको स्थानीयको आरोप छ ।

रासस

रुपन्देही । रुपन्देहीको मायादेवी गाउँपालिका–७, गरकट्टीमा मृत फेला परेका सियारी गाउँपालिका २ का ३४ वर्षीया राजेन्द्र यादवको हत्या भएको पुष्टि भएको छ ।

राजेन्द्रको सम्पत्ति खाने लोभमा आफ्नै काकासहित ८ जनाको संलग्नता रहेको प्रहरीले बताएको छ । माघ ६ गते राजेन्द्रको आगोले जलाइएको अवस्थामा शव फेला परेको थियो ।

रुपन्देही प्रहरीले हत्यामा संलग्न ८ मध्ये ६ जनालाई बुधबार सार्वजनिक गरेको छ । राजेन्द्रको हत्या गरेर उनको करोडौंको सम्पत्ति खान उनका काका रामबेलाश यादवले योजना बनाएको प्रहरीले जनाएको छ ।

काकाको योजनाअनुसार रक्सीमा निद्रा लाग्ने औषधि राखेर खुवाई राति मोटरसाइकलमा चढाएर लगेर पाइपले घाँटी च्यापी हत्या गरेर राजेन्द्रका कपडा खोलेर छातीमा राखि आगो लगाइएको अनुसन्धानबाट खुलेको रुपन्देही प्रहरी प्रमुख एसपी प्रवीण पोखरेलले जानकारी दिएका छन् ।
राजेन्द्र २ वर्षको हुँदा उनका बुवा रामसुभगको मृत्यु भएको थियो । रामसुभगको मृत्युपछि राजेन्द्रकी आमाले उनको काका अर्थात् आफ्नै देवर रामवेलाससँग विवाह गरेकी थिइन् । पारिवारिक माया नपाएपछि राजेन्दर १५/१६ वर्षकै उमेरमै भारत गए ।

त्यहाँ १४ वर्ष बसेपछि एक वर्षअघि मात्रै घर आएर अंश माग गरे । काकाले अंश नदिएपछि रुपन्देही जिल्ला अदालतमा मुद्दा हाले र अदालतले मिलापत्र गराएको थियो । मिलापत्रपछि राजेन्द्रको नाममा साढे १४ कठ्ठा जमिन परेको थियो ।

त्यही जमिन हडप्नका लागि उनका काका रामवेलासले योजना बनाएर हत्या गरेपछि २५ लाख रुपैयाँ दिने भनेर २ जना सुटर खोजेर उनीहरुकै सहयोगमा राजेन्द्रको हत्या गरिएको प्रहरी अनुसन्धानले देखाएको छ ।

प्रहरीले हत्यामा संलग्न काका रामबेलाससँगै सुटर बुद्धिराम कोहार, मृतकका काकाका छोरा वीरेन्द्र यादव, सन्तकुमार यादव, राकेश यादव, अफताव मुसलमानलाई पक्राउ गरी अदालतबाट म्याद थप गरेर अनुसन्धान गरिरहेको जनाएको छ ।

हत्यामा संलग्नमध्ये सोनु मुराउ र लंगारे भनिने इन्द्रजित यादव भने फरार छन् । उनीहरुको खोजी भइरहेको रुपन्देही प्रहरीले जनाएको छ ।