काठमाडौं । पार्टी एकताको वर्षदिन बित्न लागिसक्दा पनि जनता समाजवादी पार्टी (जसपा) नेपालको समायोजन सकिएको छैन ।
तत्कालीन राष्ट्रिय जनता पार्टीकै समायोजन नसकिएका कारण दुई पार्टीको समायोजनको प्रक्रिया अवरुद्ध भएको हो ।
विभिन्न ६ पार्टी मिलेर बनेको तत्कालीन राजपाको समायोजन नसकिंदै समाजवादी पार्टीसँग एकता भएर जसपा बनेको थियो । अहिले राजपाभित्रकै समायोजन नसकी समाजवादीसँग समायोजन गर्न नहुने मत पूर्वराजपामा बढेको छ । यहीकारण पूर्व राजपाका नेताहरूले अधिवेशन सम्पन्न भएका ८ जिल्लाबाहेकमा आन्तरिक समायोजनको काम जारी राखेका छन् ।
झापा, चितवन, नलवपरासी, रुपन्देही, कपिलवस्तु, दाङ, बर्दियामा पूर्वराजपाको अधिवेशनबाट निर्वाचित जिल्ला समिति रहेका छन् । अन्य जिल्लामा पूर्वराजपाको संरचना नै पूर्ण भइनसकेका कारण समाजवादीसँगको समायोजनको काम रोकिएको हो ।
जसपा नेता केशव झाका अनुसार पूर्वराजपाको समायोजन सकिनासाथ जसपा एकीकरणको बाँकी कामले तीब्रता पाउनेछ । कतिपय राजपा नेताहरुले भने समाजवादी पार्टीले एकतर्फी रूपमा समायोजनको काम अगाडि बढाएकोले त्यसलाई अस्वीकार गर्नुपर्ने बताउँदै आएका छन् ।
