काठमाडौं । इलामका पहिचान पक्षधर नेता डकेन्द्रसिंह थेगिम अहिले उज्यालो नेपाल नामक पार्टीमा प्रस्तावित केन्द्रीय सदस्य छन् । ऊर्जामन्त्री कुलमान घिसिङको समर्थन रहेको यस पार्टीमा पूर्वऊर्जा सचिव अनुपकुमार उपाध्याय संयोजक छन् । ५१ सदस्यीय केन्द्रीय कमिटी प्रस्तावित छन् ।
यही ५१ जनामध्ये एक हुन् थेगिम । उनी कुनै समय धरानका मेयर हर्क साम्पाङसँग एकै ठाउँमा थिए । गत वर्ष सम्पन्न इलाम उपनिर्वाचनमा हर्कले डकेन्द्रलाई समर्थन जनाएका थिए । मेयर हर्कले इलाम नै पुगेर डकेन्द्रको पक्षमा भाषण गरेका थिए । भलै डकेन्द्र एमालेका उम्मेदवार सुहाङ नेम्बाङसँग पराजित भए । सुहाङले २७ हजार बढी मत ल्याएर विजयी हुँदा डकेन्द्रले ११ हजार बढी मत ल्याएका थिए । डकेन्द्रलाई पूर्वका सबै पहिचान पक्षधरहरूको साथ थियो ।
उपनिर्वाचनमा एक ठाउँमा उभिएका हर्क र डकेन्द्र अहिले अलग अलग बाटो हिँडेका छन् । हर्कले श्रम संस्कृति पार्टी गठन गरेर अगाडि बढेका छन् भने डकेन्द्र कुलमानको उज्यालो नेपालमा केन्द्रीय सदस्य बन्नलाई आइपुगेका छन् ।
आफूले उपनिर्वाचनमा सहयोग गरेको तर, अहिले पार्टी गठन हुँदा साथ छाडेको भन्दै हर्कले डकेन्द्र लक्षित स्टाटस समेत लेखे । डकेन्द्रलाई व्यङ्ग्य गर्दै हर्कले लेखेका छन्, ‘म गएर नबोल्दिएको भए, समर्थन नगरेको भए २५ सय जति मतमा सीमित हुने थियो, ११ हजार कट्दैन थियो ।’
हर्क साम्पाङले भने जस्तो २५ सय मात्रै त तपाईँको भोट ? भन्ने प्रश्नमा डकेन्द्रले भने, ‘उहाँको गफ ठूलो हो । हर्क साम्पाङ एउटा प्रवृत्ति हो । उहाँको स्टाटसलाई धेरै सिरियसली लिनुहुन्न ।’
आफू र हर्कबीच कम्युनिकेसन ग्याप भएको चाहिँ डकेन्द्रले स्वीकारे । उनले भने, ‘उहाँसँग सम्पर्क हुनै नसक्ने अवस्था आयो । कसैलाई ढोगेर आऊ आऊ भनिँदैन भन्ने स्टाटस हाल्नुहुन्छ । अनि आफू गएर ढोग्न खोज्दा स्वीकार पनि गर्नुहुन्न ।’
हर्कले भनेको २५ सय मात्रै भोट आउने कुरा एक्जाजेरेसन मात्रै भएको डकेन्द्रले बताए । इलाममा भोट मागिदिन हर्क आउँदा कार्यक्रमहरूमा गाडीका गाडी मान्छेहरू आउने गरेको डकेन्द्रले बताए । तर, सेलिब्रेटी मेयर भएकाले उनलाई हेर्न अधिकांश मान्छे आउने गरेको बताए । डकेन्द्रसिंले भने, ‘सबै मान्छे भोट हाल्नलाई त आउँदैनन् नि ! सेलिब्रेटी मेयर भएकाले हेर्न मात्रै आएका थिए ।’
आफूलाई प्रदेश नम्बर १ का सम्पूर्ण पहिचान पक्षधरहरूले साथ दिएको र हर्क एक्लैको समर्थनले त्यति धेरै भोट नआएको बताए । आफूले उपनिर्वाचनपछि इलाममा भव्य कार्यक्रम गरेर ताम्रपत्र बनाएर प्रशस्ती गाउँदै श्रम पिता भनेर सम्मान समेत गरेको बताए । त्यसबेला आफूले पार्टी निर्माण गर्नुपर्छ भनेर भन्दा ‘मेरो अर्कै छ हौ’ भनेर हिँडेको बताए ।
श्रम संस्कृति पार्टी दर्ता गर्न हर्क काठमाडौं आउँदा आफू पनि काठमाडौंमै रहेको, तर हर्कले बेवास्ता गरेको डकेन्द्रसिंहको भनाइ छ । हर्कप्रति आफ्नो सम्मान यथावत रहेको बताउँदै भने, ‘उहाँको पार्टीको विचार र सिद्धान्त के हो ? कार्यदिशा के हो ? अहिलेसम्म थाहा छैन । श्रम गर्दै बाँकी दिन अफिसमा बस्नुपर्छ भन्ने कुराले मात्रै देश विकास हुन सक्दैन । पार्टी बन्नलाई दर्शन पनि चाहिन्छ ।’
आफूहरूको उज्यालो नेपालले सिद्धान्त र विचार निर्माणमा गृहकार्य गरिरहेको बताए । साथै कुलमान र हर्कलाई एक ठाउँमा ल्याउन आफूले सहजीकरण गर्ने पनि बताए ।
ya
