काठमाडौँ । नेपाली कम्युनिष्ट पार्टी (नेकपा)ले आज जनकपुरको तिरहुतिया गाछीमा सन्देश सभा गर्ने भएको छ ।
प्रदेशस्तरीय सन्देश सभा गरिरहेको नेकपाले जनकपुरमा आफ्नो उपस्थिति जनाउन लागेको हो ।
सन्देश सभामा पार्टीका संयोजक पुष्पकमल दाहाल प्रचण्ड, सहसंयोजक माधवकुमार नेपाल, नेताहरु महिन्द्रा राय यादव, राजेन्द्र पाण्डे, मातृका यादवलगायतले सम्बोधन गर्ने तालिका छ ।
कार्यक्रम दिउँसो १ बजे हुनेछ ।
काठमाडौं । नेकपा एमालेको ११ औ महाधिवेशनमा ४० वर्ष भन्दा मुनिका युवाहरूलाई पनि केन्द्रीय कमिटीमा स्थान दिने तयारी गरेपछि एमाले निकट इन्जिनियरहरूको छाता संगठन प्रोग्रेसिभ इन्जिनियर्सका महासचिव राजन थापाले केन्द्रीय सदस्यमा उम्मेदवारी घोषणा गरेका छन् ।
अनेरास्ववियुको राजनीति बाट पेशागत राजनीतिमा आएका इन्जिनियर थापा २३ वर्ष देखि एमाले निकट विभिन्न जनवर्गीय संगठनमा आबद्ध भएर अहिले पिनका महासचिव रहेका छन् ।
जेन्जी आन्दोलन पछि नेकपा निकट प्रोग्रेसिभ इन्जिनियर्स एसोसिएसन नेपाल मार्फत पार्टी कार्यालय सरसफाइको सुरुवातको नेतृत्व तथा पार्टी कार्यालय तथा नेताका निजी आवासको क्षतिको मूल्याङ्कनको काममा नेतृत्वदायी भूमिकामा आफू लागेको थापाले बताए ।
पार्टीले ४० वर्ष मुनीका युवाहरूलाई पनि केन्द्रीय कमिटीमा समेट्न लागेको छ, हाम्रो संगठनबाट मलाई केन्द्रीय सदस्यमा साथीहरूले अघि सार्नु भएको छ थापाले भने हाम्रो कामको मूल्याङ्कन पार्टीले अवश्य पनि गर्ने छ ।
२०५९ मा सिन्धुपाल्चोक चौताराको कृष्ण रत्न मा वि मा अनेरास्ववियु प्रारम्भिक कमिटी सचिव बाट राजनीतिक जीवन सुरु गरेका थापाले पुल्चोक क्याम्पसको क्याम्पस कमिटी अध्यक्ष हुँदै वि स २०६८मा अनेरास्ववियु केन्द्रीय विभागीय सचिव भएका थिए ।
त्यस पश्चात् अनेरास्ववियु को राजनीति बाट बिदा भएर २०७० सालमा नेपाको केन्द्रीय सदस्य ,पिनको विभिन्न कमिटीमा रहँदै हाल पिनका महासचिव छन् ।
काठमाडौं । युवा तथा खेलकुदमन्त्री बब्लु गुप्ताले ट्राफिक प्रहरीले सवारी चालक, सहचालकप्रति हेर्ने दृष्टिकोण सकारात्मक हुनुपर्ने बताएका छन् ।
आज उपत्यका ट्राफिक प्रहरी कार्यालयले आयोजना गरेको अन्तरराष्ट्रिय स्वयंसेवक दिवस २०८२ का अवसरमा आयोजित सडक दुर्घटना न्यूनीकरण सचेतना स्वयंसेवा कार्यक्रमलाई सम्बोधन गर्नुहुँदै मन्त्री गुप्ताले ट्राफिकप्रति हेर्ने दृष्टिकोण र ट्राफिक प्रहरीले चालक, सहचालकप्रति हेर्ने दृष्टिकोण सकारात्मक हुनुपर्ने बताए ।
उनले भने, “सवारी चालक र ट्राफिक प्रहरी एकअर्काप्रति सकारात्मक हुनुपर्छ । तपाईंहरु सकारात्मक भए सवारी सञ्चालनमा सहज हुन्छ । सवारी चालकले ट्राफिक प्रहरी र नेपाल प्रहरीप्रति सकारात्मक हुनुहोला ।”
यसैगरी उनले दुईपाङ्ग्रे सवारीसाधनका घटना बढी हुने गरेको तथ्याङ्क देखिएकाले दुईपाङ्ग्रे सवारी चालकले विशेष सावधानी अपनाउनुपर्ने बताए । नेपाल आर्थिक हिसाबले कमजोर रहेकाले भएका स्रोतसाधनको सही उपयोग गरेर अघि बढ्नुपर्ने मन्त्री गुप्ताको भनाई थियो ।
सडकमा ट्राफिक लाइट जडान गर्ने, सडकलाई अझ सुरक्षित बनाउने, प्रहरीका भौतिक संरचना बढाउने विषयमा आर्थिक अवस्था कमजोर भएकाले भनेकै समयमा सबै कुरा गर्न नसकिएको मन्त्री गुप्ताले स्पष्ट पारे ।
यसैगरी, उपत्यका प्रहरी कार्यालय रानीपोखरीका प्रमुख एवं प्रहरी अतिरिक्त महानिरीक्षक ईश्वर कार्कीले आमनागरिकको साथ सहयोगबाट ट्राफिक प्रहरीसहित नेपाल प्रहरीले समुदायस्तरमा रहेका समस्या समाधान गर्न महत्वपूर्ण भूमिका खेल्ने विश्वास व्यक्त गरे । उनले भने, “हामी आमनागरिकको सेवामा खटिएका प्रहरी हौँ । हामी प्रत्येक नागरिकलाई सेवा दिन तयार छौँ ।”
उपत्यका ट्राफिक प्रहरी कार्यालयका प्रमुख एवं ट्राफिक वरिष्ठ उपरीक्षक नवराज अधिकारीले ट्राफिक प्रहरी सदैव नागरिकको जिउज्यानका लागि खटिकाले हामी सधैँ आमनागरिकप्रति बफादार भएर कटिबद्ध रहेको बताए ।
कार्यक्रममा उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीले सवारी दुर्घटना एवं ट्राफिक व्यवस्थापनबारे कार्यपत्र प्रस्तुत गरेका थिए ।
काठमाडौं । नेकपा एमालेका उपाध्यक्ष रामबहादुर थापा बादलले ११ औँ महाधिवेशनमा माओवादी पृष्ठभूमिका नेताहरूको जिम्मेवारीमा निरन्तरता हुने बताएका छन् ।
प्रेस चौतारीले गरेको पत्रकार सम्मेलनमा बोल्दै टोपबहादुर रायमाझी भने अहिले थुनामा रहेकाले जिम्मेवारीमा निरन्तरता नहुने बताए । थुनाबाहिर आएपछि थप निर्णय हुनसक्ने बताए ।
उनले भने, ‘माओवादी पृष्ठभूमि भएकाहरूको जिम्मेवारी अधिकांशको निरन्तरता नै होला । नयाँहरू पनि आउनुहोला । त्यसबारेमा पुराना जिम्मेवारीमा भएका सबैको निरन्तरता हुने र अरू नयाँ पनि आउनुहुन्छ ।’
अहिलेको अवस्थामा पार्टी र देशका लागि आफ्नो भूमिका अझै बाँकी रहेको भन्दै नेतृत्वको निरन्तरता हुँदा आफ्नो पनि हुने बताए ।
कैलाली । कैलालीमा एकै दिन पाँच सडक निर्माण थालिएको छ । २ वटा पुलको शिलान्यास गरिएको छ ।
सुदूरपश्चिम सरकारका मुख्यमन्त्री कमलबहादुर शाहले लम्की चुहा १ र मोहन्या ७ मा पर्ने लम्की खानेपानीदेखि राजकाँडा सम्म सडक कालोपत्रे, लम्की चुहा रिङरोड , जानकी र टीकापुर जोड्ने सडक स्तरोन्नति, महेन्द्र राजमार्ग -इन्टेक हाइड्रो हुँदै टीकापुर जोड्ने रणनीतिक मार्ग (केशर मार्ग), मोहन्याल ७ को चिसापानी- ९ सोल्टा सडक स्तरोन्नति आयोजना रिवन काटी निर्माण कार्यको प्रारम्भ गरेका थिए । त्यस्तै मोहन्याल- ७ मा पर्ने साँघुरे खोला, बादेखोलामा निर्माण गरिने पुलको शिलान्यास गरेका हुन् ।
सुदूरपश्चिम प्रदेश सरकारले सडक तथा पुल निर्माणका लागिको आर्थिक वर्ष २०८१/०८२ मा बजेट विनियोजित गरेको थियो । लम्की खानेपानीदेखि राजकाँडासम्म सडक कालोपत्रेको लागत अनुमान रकम ६ करोड ६० लाख ९५ हजार ९ सय १४ रुपैयाँ ३० पैसा रहेको छ, भने आयोजनाको सम्झौता रकम ४ करोड ५६ लाख ९३ हजार ४ सय ४० रुपैयाँ ६० पैसा रहेको छ ।
२०८२-०३-१७ गते सम्झौता मिति रहेको आयोजना १ वर्ष ६ महिनामा सम्पन्न गर्नुपर्ने छ । २.६५ किलोमिटर सडकको लम्बाई रहेको सडक निर्माणको जिम्मा एस.सी.एस.एन.एस/एच.बि.जेभी, सुर्खेतले लिएको छ ।
लम्की चुहा रिङरोडको लागत अनुमान रकम ५ करोड ७९ लाख ६४ हजार २ सय १४ रुपैयाँ ३२ पैसा रहेको छ भने आयोजनाको सम्झौता रकम ४ करोड ३९ लाख ६४ हजार ५ सय ३० रुपैयाँ ४४ पैसा रहेको छ ।
२०८२-०३-१७ गते सम्झौता मिति रहेको आयोजना २०८३-०३-२५ मा आयोजना सम्पन्न गर्नुपर्ने छ । निर्माण व्यवसायी तुलसी र निराजन जेभी टीकापुर न.पा., कैलालीले जिम्मा लिएको सडकको लम्बाई २.७ किलोमिटर रहेको छ ।
यस्तै डुंडेझारी टीकापुर सडक स्तरोन्नतिको लागत अनुमान रकम ९ करोड ०८ लाख १८ हजार ५ सय ०५ रुपैयाँ ३ पैसा रहेको छ भने यो आयोजनाको सम्झौता रकम ६ करोड ०९ लाख २० हजार ८ सय ७७ रुपैयाँ ३५ पैसा रहेको छ । २०८२ -०३-२५ मा सम्झौता भएको आयोजनाको सम्पन्न मिति १ वर्ष ६ महिना रहेको छ । के। एन। एस।र अघि र श्रीपुर जे।भी। काठमाण्डौंले निर्माण जिम्मा पाएको सडकको लम्बाई ३।५ किलोमिटर रहेको छ ।
केशरमार्गको लागत अनुमान रकम ८ करोड २६ लाख ६२ हजार ३४ रुपैयाँ ३२ पैसा रहेकोमा सम्झौता रकम ५ करोड ६२ लाख ६६ हजार ४ सय ७८ रुपैयाँ ७५ पैसा रहेको छ ।
सम्झौता मिति २०८२ -३-१७ गते रहेको आयोजना १ वर्ष ६ महिना ९ दिनमा सम्पन्न गर्नुपर्ने छ । एस.सी.एस.एन.एस. एच.बि.जेभी, सुर्खेत निर्माण कम्पनी रहेको सडकको लम्बाई २.७किलोमिटर रहेको छ । चिसापानी-सोल्टा सडक स्तरोन्नति लागत अनुमान रकम ९ करोड ९९ लाख १२ हजार ३ सय २३ रुपैयाँ ५६ पैसा रहेकोमा सम्झौता रकम ६ करोड ६ लाख ९९ हजार ८ सय ९५ रुपैयाँ ४८ पैसा रहेको छ ।
२०८-९-३-१७ मा सम्झौता मिति रहेको आयोजना सम्पन्न गर्नुपर्ने १ वर्ष ६ महिना रहेको छ । निर्माण व्यवसायी हिमसगरमाथा कन्स्ट्रक्सन प्रा। ली। भरतपुर ९ १०, चितवनले जिम्मा पाएको सडकको लम्बाई २.४ किलोमिटर रहेको छ ।
साँघुरे खोला सडक पुलको लागत अनुमान रकम १५ करोड ६७ लाख १५ हजार ६ सय ६२ रुपैयाँ ५८ पैसा रहेकोमा सम्झौता रकम ११ करोड २१ लाख ६७ हजार ८ सय ६८ रुपैयाँ १३ पैसा रहेको छ । सम्झौता मिति २०८२-३-१७ रहेको आयोजना सम्पन्न २ वर्षमा सम्पन्न गर्नुपर्ने छ ।
त्यसैगरी वादेखोला सडक पुल डिजाइन तथा निर्माण अनुमान रकम १७ करोड ४६ लाख १४ हजार ४ सय २४ रुपैयाँ ०८ पैसा रहेको परियोजनाको सम्झौता रकम १२ करोड ६० लाख ८० हजार ३१ रुपैयाँ २५ पैसा रहेको छ ।
२०८२-०३-१७ सम्झौता मिति रहेको परियोजना २ वर्षमा सम्पन्न गर्नुपर्ने छ । निर्माण व्यवसायी हिमसगरमाथा कन्स्ट्रक्सन प्रा। ली। भरतपुर ९ १० चितवनले जिम्मा लिएको छ ।
सडक निर्माण कार्यको प्रारम्भ र दुई पुलको शिलान्यास कार्यक्रमलाई सम्बोधन गर्दै मुख्यमन्त्री शाहले चुनावी समयमा जनतासँग गरेका वाचा अनुरूप विकासका कार्यलाई तीव्रता दिएको बताएका छन् । आफ्नो क्षेत्रका जनताको वर्षौँदेखिको आवश्यकता—सडक तथा पुलको अभाव—समाधान गर्न प्रदेश सरकारले दृढ प्रयास थालेको उनको भनाई थियो ।
मुख्यमन्त्री शाहले अब सुदूरपश्चिमलाई सधैँ पिछडिएको क्षेत्र भन्ने दृष्टिकोणबाट होइन, विकासको गतिमा अगाडि बढिरहेको सम्पन्न प्रदेश का रूपमा पहिचान गरिने वातावरण तयार गर्दै आफू अघि बढिरहेको बताए। पहाडका दुर्गम क्षेत्रमा विकासलाई गति दिन प्रदेश सरकार निरन्तर सक्रिय रहेको उनको भनाइ थियो।
भ्रष्टाचारप्रति शून्य सहनशीलताको नीति लिएर सरकारले काम गरिरहको उनले बताए ।
शाहले फुकोट कर्णाली, लोअर कर्णाली, अपर कर्णाली लगायतका हाइड्रोपावर परियोजनामा पनि प्रदेश सरकार सहकार्यका लागि तयार रहेको उल्लेख गरेका थिए।
काठमाडौं । प्रधानमन्त्री सुशीला कार्कीको आव्हानमा आज सर्वपक्षीय बैठक बस्दैछ । अपरान्ह ४ बजे बालुवाटारमा बस्ने गरी बैठक डाकिएको प्रधानमन्त्रीको सचिवालयले जनाएको छ ।
बैठकमा प्रमुख ५ राजनीतिक दल, निर्वाचन आयोग र सुरक्षा निकायका प्रमुख सहभागी रहनेछन् । कांग्रेस, एमाले, नेपाली कम्युनिस्ट पार्टी, रास्वपा र राप्रपालाई आजको छलफलका लागि निम्त्याइएको छ ।
माघ ११ को राष्ट्रियसभा र फागुन २१ मा हुने प्रतिनिधिसभाको चुनावमा केन्द्रित रहेर छलफल हुने बताइएको छ ।
भोजपुर । पूर्वपर्यटनमन्त्री कृपाशुर शेर्पाले ७५० विद्यार्थीहरूलाई ज्याकेट वितरण गरेका छन् । एमाले भोजपुरले गरेको निलम्बनको निर्णय सेलाउन नपाउँदै शेर्पा सामाजिक काम लिएर यहाँ आउनुलाई धेरैले अर्थपूर्णरूपमा लिएका छन् ।
तर, उनले सेवा र सहायता नै आफ्नो परिचय भएको भन्दै यसमा कुनै राजनीतिक उद्देश्य नरहेको बताए । एक वर्षजति अघि लेखेको एउटा स्टाटसलाई लिएर शेर्पालाई कारबाही गरिएको छ । उनले आफूमाथि शेरधन राईले प्रतिशोध साँधेको आरोप लगाएका छन् ।
रामप्रसाद राई गाउँपालिका- ५ मानेभन्ज्याङ्ग र ६ नम्बर बैकुण्ठेको बेहेरेश्वर र शावित्रा मावि साथै आसपासका आधारभूत विद्यालयका विद्यार्थीहरूलाई उनले ज्याकेट वितरण गरेका हुन् ।
आफ्नो पहलमा सोवर्स एक्सन नेपालले ३६ लाख ७५ हजार मूल्य बराबरको ज्याकेट उपलब्ध गराएको उनले सुनाए । विद्यार्थीहरूलाई ज्याकेट वितरण समारोहमा जनप्रतिनिधि, स्थानीय अगुवाहरू सहभागी थिए ।
काठमाडौं । नेपाल कम्युनिष्ट पार्टी (एमाले) का उपमहासचिव विष्णुप्रसाद रिमालले पार्टीको आसन्न ११औँ राष्ट्रिय महाधिवेशनमा नीति र नेतृत्वका विषयमा कुनै विवाद नहुने बताउनुभएको छ ।
प्रेस चौतारी नेपालद्वारा आज आयोजित संवाद कार्यक्रममा उपमहासचिव रिमालले लामो इतिहास र सङ्घर्ष हुँदै अन्तरपार्टी लोकतान्त्रिक अभ्यासबाट अघि बढेको पार्टी भएकाले स्वच्छ प्रतिस्पर्धा भएमा अस्वाभाविक मान्न नपर्ने बताए ।
“पार्टीभित्र नीतिको प्रश्नमा कुनै विवाद छैन । हामी जनताको बहुदलीय जनवादको मार्गदर्शनमा समृद्ध नेपाल, सुखी नेपालीको राष्ट्रिय गन्तव्य लिएर हिँडेका छौँ । यही स्थिर नीति र राष्ट्रवादी अडानका साथ मुलुकलाई नै नेतृत्व गर्न सक्ने क्षमता वर्तमान अध्यक्ष केपी शर्मा ओलीमा रहेको छ’’, उनले भने, “त्यस अर्थमा हामी मूल नेतृत्वलाई सघाउने गरी सामूहिक नेतृत्वको प्रणालीमा अघि बढ्नेछौँ । बाहिर चर्चामा आए जस्तो प्रतिस्पर्धा गर्न पाइँदैन या चुनाव हुँदैमा पार्टीमा समस्या आउँछ भन्ने कुरा यथार्थ होइन ।’’
एमालेको महाधिवेशनमा आयोजक र निर्वाचित गरी करिब दुई हजार ४०० प्रतिनिधि रहनेछन् । यही मङ्सिर २७ देखि २९ गतेसम्म हुने महाधिवेशनको उद्घाटन भक्तपुरको सल्लाघारी र बन्दसत्र काठमाडौँको भृकुटीमण्डपमा हुनेछ ।
दाङ । नेकपा एमालेले आगामी महाधिवेशनबाट १० प्रतिशत केन्द्रीय सदस्य युवा छनौट गर्ने तयारी गरेको छ । प्रत्येक निर्वाचन क्षेत्र बाट १ जनागरी १ सय ६५ जना (४० वर्ष मुनिका) युवा महाधिवेशन प्रतिनिधि छनौट भइसकेका छन् ।
युवा क्लस्टर बाहेक खुलाबाट पनि युवा प्रतिनिधि छानिएका छन् । करिब २ सयको हाराहारी युवा प्रतिनिधि छनौट भएको उपमहासचिव प्रदिप ज्ञवालीले जानकारी दिए । उनका अनुसार यसपटक केन्द्रीय कमिटीमा युवालाई १० प्रतिशत कोटा सुरक्षित गरिने छ ।
तर, यसको आधिकारिक निर्णय भने महाधिवेशनको हलले नै गर्ने उनले बताए । यसपटक एमालेको केन्द्रीय कमिटी २५१ सदस्यीय हुनेछ । जसअनुसार १० प्रतिशतले करिब २५ जना युवाले एमालेको केन्द्रीय कमिटी सदस्य बन्ने अवसर पाउनेछन् ।
नेपालका राजनीतिक दलमध्ये कोटा छुट्याएरै पालिकादेखि केन्द्रीय कमिटीमा युवाको प्रतिनिधित्व गराउने एमाले पार्टी बनेको ज्ञवालीले बताए । एमाले यसअघि सेल कमिटीहरूमा एक तिहाइ, वडा कमिटीमा २५, पालिका कमिटीमा २० र जिल्ला कमिटीमा १५ प्रतिशत युवाको प्रतिनिधित्व गराइसकेको छ ।
काठमाडौँ । जनता समाजवादी पार्टी (जसपा) नेपालले फागुन २१ गते हुने प्रतिनिधिसभा सदस्य निर्वाचनका लागि उम्मेदवारको नाम सिफारिस गरेर पठाउन परिपत्र गरेको छ । प्रत्यक्ष र समानुपातिक दुवैमा उम्मेदवारको नाम सिफारिस गरेर पठाउन जिल्ला र प्रदेश कमिटीलाई परिपत्र गरिएको जसपा नेपालका महासचिव लालबाबु राउतले जानकारी दिए ।
प्रतिनिधिसभा निर्वाचन क्षेत्र समन्वय समितिले क्षेत्रीय भेलाबाट कम्तीमा तीन जना उम्मेदवारको नाम छनोट गरी पुस १० गतेभित्र जिल्ला समितिमा पठाउने र जिल्ला समितिले प्रत्येक क्षेत्रबाट कम्तीमा ३ जनाको नाम पुस १५ गतेभित्र प्रदेश समितिमा पठाउनुपर्ने गरी पार्टीले परिपत्र गरेको छ ।
जिल्लाबाट प्राप्त उम्मेदवारको नाममा आवश्यक छलफल गरी प्रत्यक्षका लागि कम्तीमा तीन जनाको नाम पुस २० गतेभित्र केन्द्रमा सिफारिस गर्न जसपा नेपालले परिपत्र गरेको हो ।
समानुपातिकतर्फ प्रत्येक जिल्लाबाट जिल्ला समितिले कम्तीमा तीन जना पुरुष र तीन जना महिला जातीय क्लस्टर अनुसार समावेशी हुने गरी प्रदेश समितिमा आगामी पुस १ गतेभित्र पठाउन उल्लेख गरिएको छ । प्रदेश समितिले प्राप्त गरेको नामावलीमाथि छलफल गरी राय सहित उम्मेदवारहरूको नाम पुस ५ गतेभित्र केन्द्रीय कार्यालयमा पठाउन परिपत्र भएको छ ।
दाङ । नेकपा एमालेका महासचिव शंकर पोखरेलले लोडसेडिङ हटाउन योजना बनाउनेले जस नपाई तेस्रो पक्षले त्यसकै नाममा पार्टी खोलेको टिप्पणी गरेका छन् ।
ऊर्जा, जलस्रोत तथा सिँचाइमन्त्री कुलमान घिसिङले ‘उज्यलो नेपाल पार्टी’ घोषणा गरेकामा इंगित गर्दै महासचिव पोखरेलले सामाजिक सञ्जाल फेसबुकमा यस्तो टिप्पणी गरेका हुन् ।
उनले फेसबुकमा लेखेका छन्, ‘लोडसेडिङविरुद्ध उज्यालो नेपालको योजना एउटाको, जस पायो अर्कोले, पार्टी खोल्यो तेस्रोले । जसको योजना उसैलाई श्रेय दिने कहिले ?’
उनले नेपाललाई लोडसेडिङमुक्त गर्ने योजना एमाले अध्यक्ष केपी शर्मा ओलीको भएको दाबी गर्दै आएका छन् ।
पोखरेलले ७ मंसिर २०८१ मा काठमाडौँको दरबारमार्गमा एमालेले गरेको जागरणसभामा भनेका थिए, ‘केपी ओली पहिलोपटक प्रधानमन्त्री हुँदा नेपालमा १८ घण्टा लोडसेडिङ हुन्थ्यो । आधारभूत लोडसेडिङ एक वर्षभित्र हल गर्ने योजना तयार गर्ने प्रधानमन्त्रीका रूपमा पनि केपी शर्मा ओली रहनुभयो ।’
काठमाडौँ । मधेशका मुख्यमन्त्री सरोजकुमार यादवले बुधबार राजीनामा दिएका छन् । मुख्यमन्त्री नियुक्ति विवादलाई लिएर सर्वोच्च अदालतमा कार्तिक २४ गते र कार्तिक २५ गते रिट दर्ता भएपछि उनलाई सर्वोच्चकै आदेश अनुसार चाँडै विश्वासको मत लिनु पर्ने बाध्यता आइलाग्यो ।
मुख्यमन्त्री भएको ३० दिनभित्र विश्वासको मत लिनु प्रावधानमा पनि उनले टेक्न पाएनन् र २२ औँ दिनमा उनले राजीनामा दिए । मन्त्रिपरिषद् विस्तारसमेत गर्न भ्याएनन् ।
सोमबार अबेर साँझ २४ घण्टा भित्र विश्वासको मत लिन परमादेश जारी भयो । विश्वासको मत लिन बुधबार बोलाइएको प्रदेशसभा बैठकमा मन्तव्य राख्दै उनले राजीनामा घोषणा गरे ।
उसो त उनी अघिका मुख्यमन्त्री जितेन्द्र प्रसाद सोनार (सोनल) को पनि उस्तै अवस्था बन्यो । लोकतान्त्रिक समाजवादी पार्टी (लोसपा) नेपालबाट मुख्यमन्त्री बनेका सोनलले कार्तिक २२ गते राजीनामा दिनु पर्यो । आफ्नै गठबन्धनका दुई सांसद रहबर अन्सारी र माला कर्णले मत कसैलाई नदिने भनेपछि मुख्यमन्त्री सोनलले विश्वासको मत लिनु अघि नै राजीनामाको घोषणा गरे ।
सोनलअघि जनमत पार्टीबाट मुख्यमन्त्री बनेका सतिश कुमार सिंहले असोज २८ गते राजीनामा दिनु पर्यो । उनको आफ्नै पार्टी जनमत नै सरकारबाट फिर्ता भएपछि उनले विश्वासको मत लिन समय माग्दै राजीनामा दिएका हुन् ।
२०८२ जेठ २३ गते जसपा नेपालबाट मुख्यमन्त्री बनेका सरोजकुमार यादवले प्रदेशसभाबाट विश्वासको मत गुमाएपछि २०८२ साल जेठ २५ गते जनमतबाट सतिश कुमार सिंह नेकपा एमाले, माओवादी केन्द्र, नेकपा एकीकृत समाजवादी पार्टी, नागरिक उन्मुक्ति र संघिय समाजवादी पार्टीको समर्थनमा मुख्यमन्त्रीमा नियुक्त भएका थिए ।
भदौ २३ गते देशभर चर्किएको जेन्जी आन्दोलनपछि मुख्यमन्त्री सिंहले सामाजिक सञ्जालमार्फत २०८२ साल भदौ २४ गते पदबाट राजीनामा दिएका थिए । तर पछि मुख्यमन्त्री सिंह सामाजिक सञ्जालमार्फत दिएको राजीनामाबाट पछि हटेपछि उनीविरुद्ध जनमत पार्टीका साथै सत्तारुढ दल नै विपक्षमा उभिएका थिए ।
त्यसपछि लोसपाका जितेन्द्र सोनल ६ दलका ५७ प्रदेशसभा सदस्यहरुको समर्थनमा मुख्यमन्त्री नियुक्त भएका थिए ।
कात्तिक २२ गते संविधानको धारा १६८ को उपधारा ३ अनुसार तत्कालीन प्रदेश प्रमुख सुमित्रा सुवेदी भण्डारीले एमाले संसदीय दलका नेता सरोज यादवलाई कात्तिक २४ गते बिहानै साढे ५ बजे बर्दिबासको एक होटलमा मुख्यमन्त्रीको शपथ ग्रहण गराएकी थिइन् ।
यो घटनाक्रमपटि संघीय सरकारको सिफारिसमा राष्ट्रपतिले प्रदेश प्रमुख भण्डारीलाई पदमुक्त गरे भने पछि मधेश प्रदेश सभाका दुई तिहाइ बहुमत सदस्यले एमालेबाटै सभामुख भएका रामचन्द्र मण्डललाई पनि हटाए ।
२२ औँ दिनमा मुख्यमन्त्री सरोज यादवले पनि बहुमत नपुग्ने देखिएपछि राजीनामा दिए । यसरी ५१ दिनमा मधेशमा ३ मुख्यमन्त्रीको राजीनामापछि अर्को मुख्यमन्त्री चयनका लागि प्रदेश प्रमुख सुरेन्द्र लाभले दाबी गर्न बुधबार आह्वान गरेका छन् ।
काठमाडौं । नेपाली कांग्रेसका सभापति शेरबहादुर देउवाले पार्टीको महाधिवेशनमार्फत युवा सहभागिता सुनिश्चित गर्नुपर्ने बताएका छन् ।
सभापति देउवालाई भेट्न गएका पार्टीका युवा नेताहरूलाई १५औँ महाधिवेशनमा पार्टीलाई एकढिक्का बनाउन युवाको भूमिका महत्त्वपूर्ण रहेको बताए ।
सभापति देउवाले महाधिवेशनमार्फत केन्द्रीय समितिमा युवाको सहभागिता सुनिश्चित हुने वातावरण निर्माण गर्न आग्रह गरे । सभापति देउवाले पार्टीको महाधिवेशन पुस २६ देखि २८ गतेसम्म तोकिसकेकाले समयमै महाधिवेशन हुने उल्लेख गरे ।
सभापति देउवालाई भेट्न नेपाल विद्यार्थी सङ्घका पूर्वअध्यक्ष एवं संविधानसभा सदस्य रञ्जित कर्ण, नेविसङ्घका पूर्वउपाध्यक्ष पुष्पकुमार शाही, नवीन राई, नेविसङ्घका पूर्वमहामन्त्री दीपक भट्टराई, नेविसङ्घका पूर्वकोषाध्यक्ष शिव रिमाल, कांग्रेसका युवा नेताहरू बद्री अर्याल, दिलीप ढुङ्गाना पुगेका थिए ।
धरान । श्रम संस्कृति पार्टीका अध्यक्ष तथा धरान उपमहानगरपालिकाका नगरप्रमुख हर्कराज राई (साम्पाङ) ले आगामी चुनावमा आफ्नो दलले कुनै पनि राजनीतिक दलसँग गठबन्धन नगर्ने स्पष्ट गरेका छन् ।
बराहक्षेत्र स्थित चक्रघट्टीमा आज आयोजित आमसभालाई सम्बोधन गर्दै उहाँले श्रम संस्कृति पार्टी स्वतन्त्र रूपमा चुनावी प्रतिस्पर्धामा उत्रिने बताए ।
“हामी कसैसँग गठबन्धन गरेर होइन, आफ्नै बल र विश्वासको आधारमा चुनाव लड्छौँ,” अध्यक्ष साम्पाङले भने, “नेपालको कुनै पनि राजनीतिक दल ‘चोखो र जनउत्तरदायी’ छैनन ।” जाति, धर्मवर्गका आधारमा फुटेको देशलाई जोड्न निस्केको हो श्रम संस्कृति पार्टी मुलुकको सामाजिक एकता र श्रमको सम्मानमा आधारित राजनीतिक संस्कृति विकास आफ्नो लक्ष्य रहेको उहाँले उल्लेख गरे ।
अध्यक्ष साम्पाङले आफ्नो नेतृत्वमा गठन भएको श्रम संस्कृति पार्टीले हाल देशभर सङ्गठन विस्तारलाई आक्रामक रूपमा अघि बढाइरहेको जानकारी दिए । उनले भने, “जेनजी आन्दोलनपछि ठूला भनिने दलहरू ‘पर्ख र हेर’ को अवस्थामा रहेको बेला श्रम संस्कृति पार्टीले सङ्गठन विस्तारलाई तीव्रता दिएको छ । जनताको विश्वास र समर्थन वृद्धिले आफ्नो दल राष्ट्रिय विकल्पका रूपमा स्थापित भएको छ ।”
विराटनगर । नेपाली काङ्ग्रेस सुनसरीले जेनजी आन्दोलनका क्रममा संलग्न पार्टीका सदस्यहरूको सदस्यता नवीकरण नगर्ने निर्णय गरेको छ ।
आज बसेको जिल्ला समितिको बैठकले आन्दोलनका क्रममा सरकारी तथा निजी सम्पत्ति आगजनी, तोडफोड र लुटपाटमा संलग्न सदस्यको पार्टी सदस्यता नवीकरण नगर्ने निर्णय गरेको हो ।
बैठकले आन्दोलनमा हिंसा भड्काउन प्रोत्साहित गर्ने कार्यकर्ताको वडादेखि नै नामावली संकलन गर्ने र प्राप्त नामावलीका आधारमा त्यस्तो घटनामा संलग्न सदस्यको सदस्यता नवीकरण नगर्ने निर्णय भएको जिल्ला सभापति केदार भण्डारीले बताए ।
जिल्लाले गरेको निर्णयका आधारमा प्रदेश कार्यसमितिले पनि केन्द्रीय समितिलाई सिफारिस गर्ने प्रदेश महामन्त्री उमेश थापाले बताए ।
उनका अनुसार गलत व्यक्तिलाई पार्टीले संरक्षण गर्ने छैन, खोजी खोजी निष्कासन गर्नेछ ।
सुनसरीमा जेनजी आन्दोलनका क्रममा सरकारी कार्यालयमा तोडफोड आगजनी र लुटपाट हुँदा एक अर्ब १७ करोडभन्दा बढीको क्षति भएको थियो ।
निजी क्षेत्रको क्षतिको अहिलेसम्म क्षतिको विवरण संकलन हुन सकेको छैन । जिल्लाका ३३ वटा सरकारी कार्यालयमा भएको आगजनी तथा तोडफोड भएको थियो ।
भैरहवा । साविक नेकपा एसको रुपन्देही जिल्ला कमिटी नेकपा (संयुक्त) मा समाहित भएको छ ।
तत्कालीन एसको जिल्ला भेलाले उक्त निर्णय गरेको हो । भेलाको निर्णयअनुसार हिराध्वज शाह, अविराम विक, मीरा श्रेष्ठ, बाबुराम अर्याल, श्रीराम यादव, टंक पोखरेलसहितका जिल्ला नेताले नेकपा (संयुक्त) रोजेका हुन् ।
निर्णयमा २९ जनाको हस्ताक्षर छ ।
काठमाडौं । नेपाल कम्युनिष्ट पार्टी (एमाले) को आसन्न ११ औँ राष्ट्रिय महाधिवेशनको तयारी तीव्र रुपमा अघि बढाइएको छ ।
महाधिवेशन व्यवस्थापन तयारीका विषयमा आज सो पार्टीको केन्द्रीय कार्यालय, च्यासलमा महासचिव शङ्कर पोखरेलसहितका नेताहरूबीच छलफल भएको छ ।
छलफलमा उपमहासचिवहरू प्रदीप ज्ञवाली, पृथ्वीसुब्बा गुरुङ, विष्णु रिमाल, सचिवहरू, तोकिएका सङ्गठन विभागका प्रमुखसहित विभागीय प्रमुखहरू, स्थायी कमिटी सदस्य, पोलिटब्युरो सदस्य तथा व्यवस्थापन समिति सचिवालयमा रहेका अन्य नेताहरू सहभागी थिए ।
महाधिवेशनका लागि जिल्ला र प्रवासहरूबाट प्राप्त प्रतिनिधिको सूचीलाई केन्द्रीय सङ्गठन विभागले अन्तिम रूप दिने कार्य गरिरहेको बैठकमा जानकारी गराइएको छ ।
गत मङ्सिर १३ गते सबै मातहतका कमिटी र जनसङ्गठनमा देखिएका विवाद समाधान भएपछि प्रतिनिधि सूची पूर्णरूपमा केही दिनमै टुङ्गो लाग्ने जनाइएको छ ।
ओखलढुङ्गा र धनकुटाका विवाद बाहेक अन्यका महाधिवेशन प्रतिनिधिको सूची तयार भइसकेको छ ।
बैठकपछि उपमहासचिव ज्ञवालीले महाधिवेशनका सबै तयारीहरू उत्साहजनक रूपमा अगाडि बढिरहेको जानकारी दिनुभयो । महाधिवेशनमा करिब दुई हजार चार सय भन्दा बढी प्रतिनिधि सहभागी हुने प्रारम्भिक अनुमान गरिएको छ ।
देशभरका प्रदेश, जिल्ला, जनसंगठन तथा मोर्चा संगठनहरूबाट चयन हुने प्रतिनिधिहरूले नेतृत्वसम्बन्धी महत्त्वपूर्ण निर्णयमा सहभागी हुनेछन् ।
महाधिवेशन यही मङ्सिर २७ गते भक्तपुरको सल्लाघारीमा हुने कार्यक्रम छ ।
काठमाडौं । मधेश प्रदेशसभा बैठक सुरू भएको छ । अहिले मुख्यमन्त्री सरोजकुमार यादवले आफूलाई विश्वासको मत दिन मागसहित सम्बोधन गरिरहेका छन् ।
उपसभामुख बबिता राउत ईसरले विश्वासको मतको प्रस्ताव पेस गर्न मुख्यमन्त्रीलाई अनुमति दिएकी थिइन् ।
यादवको सम्बोधन सुरू हुनासाथ विपक्षी गठबन्धन सात दलका ७३ सांसद भने बाहिरिएका छन् । सदनमा एमालेका सांसदहरू मात्र सहभागी छन् ।
२४ घण्टाभित्र विश्वासको मत लिन सर्वोच्चले आदेश दिएको थियो ।
काठमाडौं । उमेर हद्दका कारण विद्यार्थी संगठनबाट बाहिरिएका अनेरास्ववियुका पूर्व सचिव सञ्जीव धिताल नेकपा (एमाले) को ११औँ राष्ट्रिय महाधिवेशनका लागि नेशनल भोलिन्टियर फोर्स मार्फत महाधिवेशन प्रतिनिधिमा चयन भएका छन् ।
अनेरास्ववियुको २४औँ राष्ट्रिय महाधिवेशन पूर्व नेकपा एमालेले ३२ वर्षे उमेर हद लगाएपछि महासचिव पदका बलिया उम्मेदवार मानिएका धिताल विद्यार्थी राजनीतिबाट बाहिरिन बाध्य भएका थिए ।
सिन्धुपाल्चोकका स्थायी बासिन्दा धितालले २०६५ सालमा देशकै जेठो क्याम्पस त्रिचन्द्रबाट विद्यार्थी राजनीतिको यात्रा सुरु गरेका थिए ।
अखिल त्रिचन्द्रको अध्यक्ष हुँदै उनी केन्द्रीय कमिटी सदस्य, सचिवालय सदस्य हुँदै काठमाडौंमा सम्पन्न २३औँ राष्ट्रिय महाधिवेशनबाट सचिवमा निर्वाचित भएका थिए ।
त्यसपछि सङ्गठनले उनलाई कर्णाली प्रदेश इन्चार्जको जिम्मेवारी दिएको थियो । उनको नेतृत्वमा कर्णाली प्रदेश कमिटीसहित दशवटै जिल्लाका अधिवेशन सर्वसम्मत रूपमा सम्पन्न भएका थिए ।
नेकपा एमालेले मंसिर ५ गते गठन गरेको नेशनल भोलिन्टियर फोर्समा धिताललाई केन्द्रीय कमाण्डका सेक्रेटेरियट कमाण्डरको जिम्मेवारी दिइएको छ ।
काठमाडौँ । नेपाल कम्युनिष्ट पार्टी (एमाले)का अध्यक्ष केपी शर्मा ओलीले अपाङ्गता भएका व्यक्तिका लागि आफ्नो पार्टीले सामाजिक सुरक्षा भत्ताको व्यवस्था उनीहरूलाई समाजले गर्दै आएको नकारात्मक व्यवहार, राजनीतिक एवम् सामाजिक आन्दोलनका माध्यमबाट परिवर्तन गर्दै आएको बताएका छन् ।
अपाङ्गता भएका व्यक्तिहरूको अन्तरराष्ट्रिय दिवसका अवसरमा आज जारी गरेको शुभकामना सन्देशमा उनले यस्तो बताएका हुन् ।
राजनीतिक, सामाजिक, सांस्कृतिक, आर्थिक र नागरिक अधिकार प्राप्तिका लागि अपाङ्गता भएका व्यक्तिहरूलाई सङ्गठित गर्दै पार्टीले नेतृत्वमा स्थापनाको प्रयास जारी राखेको, अपाङ्गता भएका तमाम व्यक्तिले उठान गर्दै आएका विषयलाई पनि समावेश गर्दै आएको उनले बताए ।
सन्देशमा अध्यक्ष ओलीले ‘अपाङ्गता भएका व्यक्तिहरूको स्वतन्त्र, स्वावलम्बी र मर्यादित जीवनयापन गर्न व्यक्तिगत सहयोगी सेवा, सहायक सामग्री तथा प्रविधि सेवा, पहुँच युक्तता, सामाजिक सुरक्षा, पारा खेलकुदको विकास, शिक्षा, स्वास्थ्य तथा रोजगारीका सवालमा नेकपा एमाले गम्भीर छ’ भनेका छन् ।
काडमाडौँ । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले सबै प्रकारका अपाङ्गता भएका व्यक्तिमाथिको सामाजिक विभेद अन्त्य, उपचार र जीविकोपार्जनको सुनिश्चितता तथा सम्मानजनक जीवनयापनको वातावरण निर्माणका लागि सबै पक्षसँग हातेमालो गर्न अपरिहार्य भएको बताएका छन् ।
३४ औँ अन्तरराष्ट्रिय अपाङ्गता दिवसका अवसरमा देशविदेशमा रहेका सम्पूर्ण अपाङ्ग समुदायप्रति सम्मान तथा शुभकामना व्यक्त गर्दै उनले अपाङ्ग नागरिकको अधिकार, अवसर र सम्मानलाई राष्ट्र निर्माणको केन्द्रमा राख्नु हामी सबैको साझा जिम्मेवारी भएको बताए ।
संयोजक दाहालले समावेशी विकास, पहुँचयोग्य पूर्वाधार, उपचार, शिक्षा तथा रोजगारमा समान अवसर र सम्मानजनक जीवनका आधारहरूमा टेकेर नै सामाजिक न्यायसहितको समृद्ध नेपाल निर्माण गर्न सकिने सन्देशमा उल्लेख गरेका छन् ।
काठमाडौँ । कुलमान घिसिङ संरक्षक रहेको उज्यालो नेपाल पार्टीको आज औपचारिक घोषणा हुँदैछ । पार्टीले दिउँसो १ बजेदेखि ४ बजे सम्म, प्रज्ञा भवन, कमलादी, काठमाडौँमा घोषणा सभा गर्न लागेको छ ।
कार्यक्रममा प्रमुख अतिथि ऊर्जामन्त्री मन्त्री कुलमान घिसिङ हुनेछन् । कार्यक्रममा उज्यालो नेपाल पार्टीको दीर्घकालीन दृष्टि, मूल ध्येय र विस्तृत घोषणापत्र २०८२, औपचारिक रूपमा सार्वजनिक गरिने बताइएको छ ।
पार्टीको सैद्धान्तिक दृष्टिकोण, प्राथमिकता र कार्य योजनालाई स्पष्ट रूपमा सार्वजनिक गर्ने पार्टीको तयारी छ ।
पार्टीले यसअघि मंसिर १२ गते जारी गरेको विज्ञप्तिमा दलहरूको भीडमा थप एक नयाँ दलको रूपमा मात्रै नभई उज्यालो सपना साकार पार्नसक्ने नेतृत्व, कार्यकुशलता र अनुभव भएको दाबी गरेको थियो । पार्टीले आम नेपाली जनताले विश्वास र भरोसा गरेको नेतृत्व गर्ने बताएको थियो ।
जेन्जी आन्दोलनबाट प्राप्त उपलब्धि संस्थागत गरी समृद्ध राष्ट्र निर्माणार्थ परिणाममुखी संवादमार्फत एकजुट हुन पनि आह्वान गरेको छ।
विराटनगर । नेकपा (एमाले) केन्द्रीय कार्यालयले ओखलढुङामा भएको महाधिवेशन प्रतिनिधि चयन बदर गरेको छ । एकलौटी ढङगले प्रतिनिधि छनौट भएको उजुरी परेपछि महाधिवेशन प्रतिनिधि छनौट प्रक्रिया पुनः शुरु गर्न निर्देशन दिइएको हो । ओखलढुङ्गा जिल्ला कमिटीलाई निर्वाचन प्रक्रिया पाँच दिनभित्र पुनः शुरु गर्न निर्देशन दिइएको छ।
एघारौँ राष्ट्रिय महाधिवेशनका लागि प्रतिनिधि छनौटका सम्बन्धमा अपानि–१३ को निर्देशन, आठमध्ये छवटा पालिका कमिटीको माग, बहुसंख्यक इच्छुक उम्मेदवारको असहमति तथा प्रदेश पार्टी कमिटी र केन्द्रीय संगठन विभागको निर्देशनसमेत उल्लङ्घन गरिएकाले प्रतिनिधि चयन मान्य नहुने निर्णय गरिएको निर्देशन केन्द्रीय कार्यालयले दिएको छ।
यसका लागि सबै आम सदस्यलाई प्रभावकारी माध्यमबाट सूचना प्रवाह गरी पालिकास्तरमै मतदान केन्द्र स्थापना गरी पुनः निर्वाचन प्रक्रिया सञ्चालन गर्न निर्देशन दिएको छ। पुनः निर्वाचनलाई सहज बनाउन प्रदेश इञ्चार्ज शेरधन राई तथा केन्द्रीय नेताहरु विशाल भट्टराई, यज्ञराज सुनुवार र किशोर अधिकारीलाई आवश्यक समन्वय गरी सहयोग गर्न पनि जिम्मेवारी तोकिएको केन्द्रीय कार्यालयले जनाएको छ।
नेकपा एमालेको एघारौँ महाधिवेशनमा प्रतिनिधि छनोटका लागि शनिबार भएको निर्वाचनमा १ हजार ५ सय १८ मत खसेको थियो। ओखलढुङ्गामा अ्म्बिरबाबु गुरुङ र यज्ञ राज सुनुवार पक्षका विचमा प्रतिस्पर्धा छ । महाधिवेशन प्रतिनिधि छनौटमा गुरुङ पक्षले सदरमुकाममा मात्रै निर्वाचन गराएर प्रतिनिधि छनौट भएको दाबी गरेको थियो ।
काठमाडौँ । सोमबार सर्वोच्च अदालतले परमादेश जारी गरेसँगै मधेश प्रदेशका मुख्यमन्त्री सरोजकुमार यादवले सर्वोच्चको आदेशलाई शिरोधार्य गर्दै विश्वासको मत लिएर देखाउने दाबी गरेका छन् ।
नेपाली कांग्रेससहितका ७ दलले दायर गरेको रिटमाथि सर्वोच्चले मुख्यमन्त्री यादवलाई २४ घण्टाभित्र विश्वासको मत लिन नसके संविधानको धारा १६८(२) बमोजिम नयाँ सरकार गठनको प्रक्रिया अघि बढाउन प्रदेश प्रमुखको नाममा परमादेश जारी गरेको थियो ।
सोही परमादेश अनुरुप आफूहरु विश्वासको मत लिने तयारी गरिरहेको र दलहरुसँगको परामर्शलाई अगाडि समेत बढाएको मुख्यमन्त्री यादवले जानकारी दिए । जबकि सर्वोच्चको परमादेशसँगै ७ दलीय गठबन्धनले नयाँ सरकार गठनकालागि तयारी थालिसकेको छ । यस हिसाबले मुख्यमन्त्रीको विपक्षमा मधेश प्रदेशसभाको अंकगणित छ ।
एमालेसँग जम्मा २५ प्रदेशसभा सदस्य छन् जसमध्ये एक जना निलम्बित छन् । जबकि विश्वासको मत पाउनका लागि १ सय ७ सदस्यीय मधेश प्रदेशसभामा विश्वासको मत पाउनका लागि ५४ प्रदेशसभा सदस्यको समर्थन आवश्यक हुन्छ ।
नेपाल संघीय समाजवादी पार्टी र राप्रपाका एक–एक प्रदेशसभा सदस्य मुख्यमन्त्रीको पक्षमा देखिए पनि राप्रपाले आफ्ना मन्त्री कञ्चन बिच्छामाथि कारबाही प्रक्रिया अघि बढाइसकेको छ ।
यता विपक्षमा रहेको गठबन्धनमा कांग्रेसको २२, जसपा नेपालको १८, जनमत पार्टीको १३, माओवादी केन्द्रको ९, लोसपाको ८, एकीकृत समाजवादी पार्टीको ७ र नागरिक उन्मुक्ति पार्टी १ गरी सातदलीय गठबन्धन दुई तिहाइ प्रदेशसभा सदस्य छन् । यस हिसाबले मुख्यमन्त्री यादवले विश्वासको मत पाउने सम्भावना कम देखिन्छ ।
काठमाडौँ । मधेश प्रदेश सभाको बैठक आज बुधबार बिहान ८ः३० बजेका लागि आह्वान भएको छ । बैठकमा मुख्यमन्त्री सरोज कुमार यादवले विश्वासको मत लिने छन् ।
मुख्यमन्त्री यादवले बुधबार दिउँसो २ बजे प्रदेश सभा बैठक आह्वान गरेर विश्वासको मत लिने वातावरण बनाउन प्रदेश सभामा पत्र पठाएका थिए । तर मधेश प्रदेश सभामा रहेका एमालेबाहेकका दलहरुको सर्वदलीय बैठकबाट बुधबार बिहान ८ः३० बजे नै प्रदेशसभा बैठक आह्वान गर्ने निर्णय भएको हो । प्रदेश सभाको बैठक आह्वान गरिएको प्रदेशसभा सचिवालयले जानकारी दिएको छ ।
बैठक आह्वानसम्बन्धी सूचना प्रदेशसभा सदस्यलाई पु¥याइएको छ । उपसभामुख बबिता राउत ईश्वरको अध्यक्षतामा बसेको सर्वदलीय बैठकले बिहानका लागि बैठक आह्वान गर्ने सहमतिअनुसार बैठक आह्वान गरिएको हो । बिहान प्रदेशसभाको कार्यव्यवस्था परामर्श समितिको बैठक बिहान ७ बजे नै आह्वान गरिएको छ।
सोमबार सर्वोच्च अदालतले मुख्यमन्त्री सरोज यादवलाई २४ घण्टाभित्र प्रदेशसभाबाट विश्वासको मत लिन परमादेश गरेपछि प्रदेशसभाबाट विश्वासको मत लिन लागेका हुन् ।
सर्वोच्च अदालतले २४ घण्टाभित्र विश्वासको मत लिन परमादेश जारी गरेपछि मुख्यमन्त्री यादवले आफूलाई यसको औपचारिक रुपमा आदेशको प्रति प्राप्त नभएको बताउँदै प्रदेश सभाबाट प्रति ल्याएर प्रक्रिया अगाडि बढाउन आफूले अग्रसरता लिएको जानकारी दिए ।
काठमाडौं । डा. सिके राउत नेतृत्वको जनमत पार्टीबाट अलग भएका डा. शरद सिंह यादवले बेग्लै पार्टी दर्ता गरेका छन्। निर्वाचन आयोगमा आफैँ अध्यक्ष रहेर जनअधिकार पार्टी दर्ता गरेका हुन्।
पार्टीको चुनाव चिन्ह डुङ्गा राखेको उनले बताए। जनमतमा हुँदा यादव प्रवक्ताको भूमिकामा थिए। उनीसँग जनमतबाट अलग भएका अब्दुल खानसहित केही नेताहरू भने रेशम चौधरीको नाउपा नेपालमा सामेल भएका छन्।
काठमाडौं । नेपाली कांग्रेसले राष्ट्रिय सभा र प्रतिनिधि सभाको निर्वाचनको लागि उम्मेदवारको नाम सिफारिस गर्न परिपत्र गरेको छ।
केन्द्रीय समिति बैठकको निर्णय अनुसार माघ ११ गते हुने राष्ट्रियसभा र फागुन २१ गते हुने प्रतिनिधिसभा निर्वाचनका लागि उम्मेदवारको सिफारिस गर्न निर्देशन दिएको हो।
केन्द्रीय कार्यालयका मुख्यसचिव कृष्णप्रसाद पौडेलले जारी गरेको परिपत्रमा मंसिर मसान्तभित्र उम्मेदवारको नाम केन्द्रमा सिफारिस गरिसक्नुपर्नेछ। कांग्रेसले प्रतिनिधि र राष्ट्रियसभाको उम्मेवारको टुंगो एकैपटक लगाउने तयारी गरेको छ।
काठमाडौँ । मधेश प्रदेश सरकारका मुख्यमन्त्री सरोजकुमार यादवलाई आज मंगलबारभित्र विश्वासको मत लिन सर्वोच्चको आदेशपछि नयाँ सरकार गठनबारे बहस शुरु भएको छ ।
सात दलका ७३ सांसद एकतिर भएर सभामुखसमेत हटाउने सामर्थ्य राख्ने गठबन्धनसँग २४ सिटको नेकपा एमाले एक्लो र निरीह छ । उसले प्रदेश प्रमुख, सभामुख हुँदै मुख्यमन्त्री पनि गुमाउने अवस्था बनिरहँदा सात दलको गठबन्धनमा भने अब के हुन्छ भन्ने चर्चा शुरु भएको छ ।
कात्तिक २२ गते मुख्यमन्त्रीमा विश्वासको मत लिने वातावरण नबनेपछि गिजोलिएको मधेशको राजनीतिक बाटो कस्तो हुने भन्ने अझै प्रष्ट छैन । मधेश प्रदेशका प्रथम मुख्यमन्त्री लालबाबु राउतले सरकार निर्माणबारे अब दलहरु जुट्ने र पुरानै कोर्समा जाने या नयाँ कोर्स शुरु गर्ने भन्ने विषय मंगलबारको घटनाक्रमपछि शुरु हुने बताए ।
उनले पुरानै अवस्थामा सात दल एक ठाउँ भएकाले जितेन्द्र सोनलकै नेतृत्वमा सरकार बनाउने विषयमा दलहरुबीच सहमति बन्नसक्ने या यो भन्दा फरक सरकार बनाउने भन्ने विषय अहिलेसम्म सात दलमा कुनै छलफल नभएको बताए । दुवै पक्षमा छलफल चल्ने उनको भनाइ छ ।
सात वर्ष मधेश प्रदेश सरकारको नेतृत्व गरेको जनता समाजवादी पार्टी (जसपा) नेपालका महासचिवसमेत रहेका राउतले सरकार निर्माणबारे दलहरु छिट्टै निष्कर्षमा पुग्ने बताए । उनले मधेशमा मन, विचार र सिद्धान्त मिल्ने दलहरुबीच एकता र सहकार्य गर्ने पार्टीको निर्णय भएकाले लोसपासँग जसपाको छलफल चलिरहेको पनि बताए ।
जनकपुरधाम । नेकपा एमालेका मधेश प्रदेश अध्यक्ष चन्देश्वर मण्डलले देशीविदेशी शक्ति लागेर एमालेको मुख्यमन्त्रीका पक्षमा भएको बहुमतमा प्रहार गर्ने काम भएको बताएका छन् ।
मंगलबारभित्र मुख्यमन्त्री सरोजकुमार यादवले विश्वासको मत लिनु पर्ने सर्वोच्चको फैसलाको स्वागत गर्दै उनले भने, ‘एमालेको मुख्यमन्त्री गैरसंवैधानिक भन्ने अरु दलरुको आरोप त पुष्टि भएन, विश्वासको मत लिने समयभित्र लिनेछौँ ।’
उनले अघिल्लो सरकारले विश्वासको मत लिन नसकेपछि एमालेले धारा १६८ को उपधारा ३ अनुसार सरकार बनाएको र यो सरकार निर्माण गैरसंवैधानिक भनेर प्रदेश प्रमुखलाई सरकारले हटाए पनि मुख्यमन्त्री चयनमा सर्वोच्चले गलत नभनेको दाबी गरे । उनले भने, ‘यदि एमालेको मुख्यमन्त्री नियुक्ति गलत थियो भने सर्वोच्चले निर्णय उल्ट्याएर पुरानै सरकार स्थापित भइसक्थ्यो ।’
उनले सर्वोच्चको निर्णय मान्ने बताए । ‘शुरुमा हाम्रो बहुमत थियो, जनमतलाई देशी विदेशी शक्ति लागेर गठबन्धनबाट छुटाउने काम भयो,’ उनले भने, ‘एमाले, कांग्रेस र जनमतको बहुमतमा जनमतलाई छुाइयो, अहिले चैँ कांग्रेससँग पनि हाम्रो वार्ता भएको छैन ।’
उनले राजनीतिमा विश्वासको वातावरणमा काम गर्नु पर्ने भएर एमालेले काम गरिरहेको तर अरु दलहरुबाट धोका भएको बताए ।
दाङ । नेकपा एमाले सल्यानमा महाधिवेशन प्रतिनिधि छनोट प्रक्रियामा असन्तुष्टि देखिएको छ ।
१३ जना असन्तुष्ट नेता तथा कार्यकर्ताले केन्द्रमा उजुरी हालेका छन् । कर्णाली प्रदेशका पूर्व सचिवालय सदस्य कुलबहादुर गिरी,पूर्व जिल्ला उपसचिव दानबहादुर, मानव अधिकार एलाइन्स दीपेन्द्र प्रकाश डिसी लगायतकाले जिल्ला नेतृत्वले महाधिवेशन प्रतिनिधि गलत ढंगले गरेकाले त्यसको खारेजीको माग गर्दै केन्द्रीय संगठन विभागमा उजुरी दिएका हुन् ।
महाधिवेशन प्रतिनिधि छनोटलाई निर्वाचन प्रक्रियामा नलगी होटेलमा बसेर मनोमानी ढंगले छनोट गरेको उनीहरूले दाबी गरेका छन् ।
पहिले छनोट गरेका प्रतिनिधि खारेज गरी विधिसम्मत तरिकाले पुन: छनोट गर्नुपर्ने उनीहरूको माग छ ।
रूपन्देही । नेकपा एमालेका पोलिटब्युरो सदस्य सूर्य थापाले पार्टीभित्र नेतृत्व परिवर्तनको कुनै आधार नभएको जिकिर गरेका छन् । केपी शर्मा ओली नै एमालेको विवादरहित विकल्प रहेको उनको भनाइ छ ।
प्रेस चौतारीले रूपन्देहीमा आयोजना गरेको अन्तरक्रियामा बोल्दै उनले अहिले प्रतिस्पर्धा गर्ने समय नै नभएको र केपी ओलीलाई टक्कर दिने नेतृत्व पार्टीमा कोही हुन नसक्ने दाबी गरे ।
थापाले ईश्वर पोखरेलले पनि महाधिवेशनको तयारी नगरेकाले अहिले प्रतिस्पर्धाको प्रसंग उठाउनु उपयुक्त नभएको बताए । उनले भने, ‘भदौसम्म कुनै तयारी थिएन, अहिले प्रतिस्पर्धा गर्ने समय होइन ।’
सडकबाट उठेका मागका आधारमा पार्टी नेतृत्व परिवर्तन नहुने भन्दै उनले एमालेभित्र ओलीकै सशक्त पकड़ रहेको बताए ।
‘एमालेको अध्यक्ष केपी ओली हुनु हुँदैन भनेर सडकमा आवाज उठ्यो भन्दैमा नेतृत्व फेरिँदैन । देउवा र प्रचण्डले पनि नेतृत्व छाड्नुपर्छ भन्ने कुरा गर्छन्, तर अरूको एजेन्डा पूरा गर्न हामी बाध्य छैनौँ,’ उनले भने ।
एमाले र ओली राष्ट्रहितमा उभिएको कारण विभिन्न कोणबाट प्रहार भइरहेको उनको भनाइ छ । केन्द्रीय कमिटीमा ३७८ मध्ये १६ जनाले मात्रै फरक मत राखेको उदाहरण पेश गर्दै उनले ओलीमाथि समर्थन बलियो रहेको दाबी गरे ।
पूर्वउपराष्ट्रपति नन्दकिशोर पुनलाई विद्या भण्डारीलाई सहज बनाउन अघि सारिएको टिप्पणी गर्दै उनले प्रचण्डको ‘सके मिल्ने नभए निल्ने’ प्रवृत्तिले नै अहिलेको राजनीतिक अस्थिरता देखिएको उनको टिप्पणी छ ।
फागुन २१ को निर्वाचनमा पनि कुनै विशेष तयारी नभएको उल्लेख गर्दै थापाले जित्दा क्या वात्, हार्दा मुर्दावाद भन्ने स्वभाव भएका व्यक्तिहरूले प्रतिस्पर्धामा जानु नै व्यर्थ हुने टिप्पणी गरे ।
सर्लाही । ढाडमा केपी ओलीको ट्याटु खोपेका सर्लाहीका युवा उज्ज्वलकुमार कार्की एमालेको महाधिवेशनमा प्रतिनिधि छनोट भएका छन् । ढाडको टाटुकै कारणले उनको प्रतिनिधि बन्न योग्यता पुगेको भने अवश्य होइन ।
एमालेको ११ औं महाधिवेशनका निम्ति सर्लाही १ मा पेचिलो प्रतिस्पर्धा थियो । पार्टीभित्रको अन्तरसंघर्षमा कार्की खासै बलिया थिएनन् । क्षेत्र नम्बर २ बाट प्रतिनिधि बनेकी अधिवक्ता राधिका खतिवडाले उनको पक्षमा जोडबल गरेकी थिइन् । कार्कीलाई प्रतिनिधि बनाउने कि नबनाउने भन्ने विवादले एक दिनको समय नै लम्बिएको थियो । अन्ततः उनको नाममा सहमति जुटेको हो ।
अनेरास्ववियुको जिल्ला अध्यक्षको जिम्मेवारी सम्हालिसकेका कार्की केपी ओलीका ‘अन्धभक्त’ हुन् ।
उनी भन्छन्, ‘विद्यमान संकटको निकास र मुलुकको अग्रगामी हितका निम्ति आजको एमालेमा ओली निर्विकल्प छन् ।’
कार्कीले २०७२ सालको नाकाबन्दीका समयमा ओलीले लिएको राष्ट्रियताको अडानबाट प्रभावित भएर ट्याटु खोपेका हुन् । २०७४ को स्थानीय तह निर्वाचनमा उनी एमालेकै तर्फबाट लालबन्दी नगरपालिका- ८ को वडाध्यक्ष निर्वाचित भएका थिए । एक कार्यकाल जनप्रतिनिधि भएका उनले त्यसपछि सोही पदमा दोहोरिन रुचि राखेनन् ।
काठमाडौं । नेकपा एमाले खोटाङले सर्वसम्मत रूपमा महाधिवेशन प्रतिनिधि टुंग्याएको छ ।
खुल्लातर्फ देवविक्रम राई, कुमारप्रसाद आचार्य, पिके राई, रामप्रसाद दंगाल र सुरेन्द्र कुमार राई महाधिवेशन प्रतिनिधि बनेका छन् ।
युवातर्फ जगत राई महाधिवेशन प्रतिनिधि बने भने दलिततर्फ दीपक ठटाल महाधिवेशन प्रतिनिधि बने । त्यस्तै महिलातर्फ कविता राई, पुष्पकला भुजेल र विणादेवी राई महाधिवेशन प्रतिनिधि चयन भएका छन् ।
काठमाडौं । नेकपा एमालेका उपमहासचिव पृथ्वीसुब्बा गुरुङले सडकबाट माग हुँदैमा पार्टी नेतृत्व परिवर्तन नहुने बताएका छन्।
प्रेस चौतारीले आयोजना गरेको अन्तरक्रियामा बोल्दै अहिले एमालेमा ओलीको विकल्प नभएको उनको तर्क छ।
उनले भने, ‘अब हुने महाधिवेशन नेतृत्वको हो, नीतिको हामीले गरिसकेका छौँ। नेतृत्व चयन गर्दा हामीले अरू कसैको एजेन्डा पूरा गर्न पर्दैन। एमालेको अध्यक्ष केपी ओली हुनु भएन भन्छन्, देउवा र प्रचण्डले पनि नेतृत्व छाड्नुपर्छ भन्दै छन्, तर सडकमा उठेको आवाजकै कारणले पार्टीले आफ्नो नेता फैर्दै जाँदैन। आवश्यक परे केपी ओलीलाई हामीले हटाउने हो नि। जेनजी र सात समुन्द्र पारिको देशहरूले भनेर पार्टीको नेतृत्व फेरिँदैन।’
एमालेले र अध्यक्ष ओलीले राष्ट्र हितको पक्षमा उभिएको कारणले प्रहार भएको दाबी गरे।
विराटनगर । नेपाली कम्युनिष्ट पार्टीले आज विराटनगरमा ‘एकता सन्देश सभा’ गर्दैछ । विराटनगरस्थित जनआन्दोलन चोकको उत्तरतर्फ रहेको पुरानो गुद्रीको खुल्ला मैदानमा दिउँसो १२ बजेदेखि सभा हुनेछ ।
सभामा नेकपा संयोजक तथा पूर्वप्रधानमन्त्री पुष्पकमल दाहाल प्रचण्ड, सहसंयोजक माधवकुमार नेपाल, वरिष्ठ नेता झलनाथ खनाल, भीम रावललगायतले सम्बोधन गर्ने कार्यक्रम तय भएको छ ।
सभामा शक्ति प्रदर्शनको रूपमा विभिन्न ठाउँबाट कार्यकर्ता भेला भएका छन् ।