काठमाडौं । इटालियन सिरी ए फुटबलमा शनिबार राति युभेन्ट्सले इम्पोलीमाथि ३-२ अन्तरको रोमाञ्चक जित निकालेको छ ।
युभेन्टसको जितमा डुसन भ्लाहोविचले दुई तथा मोइस किनले एक गोल गरे । इम्पोलीको लागि जुर्कोवास्की र आन्द्रे ला मान्टियाले गोल गरे ।
जितसँगै युभेन्ट्सले २७ खेलमा ५० अंक जोडेर चौथो स्थानमा छ । इम्पोली ३१ अंक जोडेर १३औं स्थानमा छ ।
२७ खेलबाट ५७ अंक बनाएको एसि मिलान शीर्ष स्थानमा रहेको छ ।
एजेन्सी । युरोपियन च्याम्पियन्स लिगको समूह चरणको पहिलो खेलमा जर्मन महारथी बार्यन म्युनिखले स्पेनिस महारथी टोली बार्सिलोनालाई ३–० गोलअन्तरले पराजित गरेको छ ।
बार्सिलोनाको घरेलु मैदान नोउ क्याम्पमा भएको खेलमा बार्यनको जितका लागि थोमस मुलरले एक तथा रोबर्ट लेवान्दोस्कीले दुई गोल गरे । लियोनल मेस्सीको बहिर्गमनपछि बार्सिलोनोल पहिलोपल्ट च्याम्पियन्स लिग खेलेको हो ।
युरोपका दुई पावरहाउसबीचको भिडन्तमा बार्यनले सहज विजयी भयो । ३४ औं मिनेटमा थोमस मुलरले लेरोय सानेको पासमा गोल गरी अग्रत दिलाएका थिए । दोस्रो हाफमा लेवाण्डोस्कीले दुई गोल गरे । उनले ५६ औं र ८५ औं मिनेटमा गोल गरेका हुन् ।
समूह ई बाट बायर्नले ३ अंक जोडेको छ ।
यहि समुहको अन्य खेलमा बेनफिाले डाइनामो कियभसँग गोलरहित बराबरी खेल्यो । यस्तै अर्को खेलमा भिल्ला रियलले एटलान्टासँग दुई दुई गोलको बराबरी खेल्यो ।
समूह एच अन्तर्गत साविक विजेता इंग्लिस टोली चेल्सीले स्वीस टोली जेनितमाथि १–० गोलको कठिन जित निकाल्यो । चेल्सीका लागि उच्च लयमा रहेका रोमेलु लुकाकुले गोल गरे । पहिलो हाफ गोलरहित बराबरी भएको खेलको ६९ औं मिनेटमा लुकाकुले गोल गर्दै चेल्सीलाई अग्रता दिलाए ।
अर्को खेलमा इटलीको युभेन्टसले स्वीडेनको माल्मोलाई ३–०ले हरायो । युभेन्टसको जितमा एलेक्स सान्द्रो, पाउलो डिबाला र अल्भारो मोराटाले एक एक गोल गरे ।
काठमाडौं । इटालियन क्लब युभेन्टसले स्टार फरवार्ड क्रिस्टियानो रोनाल्डोको स्थानमा युवा खेलाडी मोइस किनलाई अनुबन्ध गरेको छ ।
पोचुर्गिज कप्तान रोनाल्डो कहिदिन अघि मात्रै युभेन्टसमा तीन वर्षको बसाई टुङ्ग्याउँदै १२ वर्षपछि आफ्नै पुरानै क्लब म्यान्चेस्टर युनाइटेड फर्किएका थिए ।
दुई वर्ष अघि युभेन्टसबाट एभर्टन गएका २१ वर्षीय किनले अघिल्लो सिजन पेरिस सेन्ट जर्मन (पीएसजी)मा लोनमा बिताएका थिए । पीएसजीमा उनले सबै प्रतियोगितामा कुल १७ गोल गरेका थिए ।
शीर्ष टोलीमा २१ खेल खेल्दै ८ गोल गर्नुअघि किन २०१० देखि २०१७ सम्म युभेन्टसको एकेडेमीमा थिए ।
२०१८ मा इटालीको राष्ट्रिय टोलीमा डेब्यु गरेका उनले ९ अन्तर्राष्ट्रिय खेल खेलेका छन् ।
काठमाडौं । म्यानुएल लोकाटेली युभेन्टससँग अनुबन्धित भएसँगै ‘सपना पूरा भएको’ अभिव्यक्ति दिएका छन् । इटालीबाट गत महिना युईएफए युरो २०२० च्याम्पियन बनेका लोकाटेलीले आफ्नो पूर्व क्लब सासुलोलाई आफूलाई अवसर दिएकोमा धन्यवादसमेत दिएका छन् ।
इटालीले युरो जित्दाका महत्त्वपूर्ण खेलाडीसमेत रहेका २३ वर्षीय लोकाटेली बुधबार २५ मिलियन युरोमा युभेन्टसमा अनुबन्धित भएका हुन् । युरोपेली फुटबलका प्रतिष्ठित क्लबहरूसँग लोकाटेलीको नाम जोडिए पनि उनी टुरिन जायन्ट्ससँग अनुबन्धित भएका हुन् ।
‘यो मेरो सपना पूरा भयो,’ लोकाटेलीले भने, ‘बाल्यकालदेखि नै कडा परिश्रम गर्नेका लागि यो सपना पूरा हुनु हो, जसले पिचमा आफ्नो सबै कुरा दिएको थियो ।’
काठमाडौं । पूर्व कप्तान तथा क्लबका सर्वकालिन महान् खेलाडी लियोनेल मेसीले छोडेपछिको पहिलो खेलमा बार्सिलोनाले युभेन्टसलाई ३-० गोलको नतिजामा पराजित गरेको छ । बार्सिलोनास्थित योहान क्रुयिफ स्टेडियममा भएको खेलको तेस्रो मिनेटमै घरेलु टोलीले अग्रता लिएको थियो ।
क्लबका नयाँ फरवार्ड मेम्पिस डिपेले तेस्रो मिनेटमा गरेको गोलसँगै पहिलो हाफमा १-० को अग्रता लिएको बार्सिलोनाले दोस्रो हाफमा थप दुई गोल गर्यो ।
डेनिस फरवार्ड मार्टिन ब्रेथवेटले ५७औं मिनेटमा गोल गर्दै बार्सिलोनाको अग्रता दोब्बर पारेका थिए । निर्धारित ९० मिनेटसम्म गोल गर्न असफल रहेको युभेन्टसले इन्जुरी समयमा थप एक गोल खायो ।
भ्रमणकारी टोलीमाथि हाबी बनेको बार्सिलोनाका लागि रिकार्ड पुजले तेस्रो गोल गर्दै टोलीको सहज जित सुनिश्चित गरे । बार्सिलोनाले १५ अगस्टदेखि सुरु हुने स्पेनिस ला लिगाको पहिलो खेलमा रियाल सोसिडाडसँग घरेलु मैदानमा खेल्ने छ ।
काठमाडौं । म्यासिमिलियानो अलेग्री युभेन्टसको मुख्य प्रशिक्षकको रूपमा टुरिन फर्किने निश्चित भएको छ । साविक विजेता रहेर पनि यो सिजन शीर्ष चारमा रहन संघर्ष गर्नु परेको युभेन्टसले प्रशिक्षक एन्ड्रे पिर्लोलाई बर्खास्त गरेपछि प्रशिक्षकमा अलेग्रीलाई पुन: नियुक्त गर्ने भएको हो ।
२०१४ देखि २०१९ सम्म युभेन्टसको प्रशिक्षकको रूपमा पहिलो कार्यकाल पूरा गरेका अलेग्रीले टुरिनमा रहँदा पाँच सिरि’ए’, चार कोपा इटालिया जिताएका थिए भने दुई पटक च्याम्पियन्स लिगको फाइनलमा पुर्याएका थिए ।
अलेग्री र युभेन्टसका अध्यक्ष एन्ड्रे एग्नेलीबीच आज भएको छलफल सकरात्मक निष्कर्षमा पुगेसँगै अलेग्री प्रशिक्षकमा नियुक्त हुने निश्चित भएको गोलले बताएको छ ।
एजेन्सी । गएराति इटलियन सिरी ए अन्तर्गत क्याग्लीअरीबिरुद्धको खेलमा ह्याट्रिक पूरा गरी आफ्नो आधिकारिक खेलको गोल कीर्तिमान तोडेका युभेन्टसका पोर्चुगिज फरवार्ड क्रिष्टियानो रोनाल्डोलाई ब्राजिलका महान खेलाडी पेलेले शुभकामना दिएका छन् ।
रोनाल्डोले ३२ मिनेटको अन्तरमा ह्याट्रिक पूरा गरी आफ्नो करिअर गोल संख्या ७ सय ७० पुर्याएका हुन् । जुन पेलेभन्दा ३ गोल बढी हो ।
‘जीवन भनेको एकल यात्रा हो । हरेक जीवले आफ्नै बाटो तय गर्ने हो । तिमी एउटा आफ्नै सुन्दर यात्रामा छौं । म तिम्रो धेरै प्रशंसा गर्छु , म तिमीले खेलेको हेरिरहन मन पराउँछु भनेर त भनिराख्नु परेन । आधिकारिक खेलको मेरो गोल कीर्तिमान तोडेकामा तिमीलाई शुभकामना,’ पेलेले इन्स्टाग्राममा लेखेका छन् ।
केहि तथ्यहरुले रोनाल्डोको यो गोललाई विश्व कीर्तिमान दावी गरे पनि चेक फुटबल संघले भने सधैं असन्तुष्टि जनाउँदै आएको छ । उसका अनुसार पूर्व अस्ट्रिया र चेकोस्लोभाकियाका स्ट्राइकर जोसेफ विकान वास्तविक सर्बाधिक गोलकर्ता हुन्, जसले करिअरमा ८ सय २१ गोल गरे ।
यसबीचमा रेकर्ड स्पोर्ट सकर स्ट्याट फाउण्डेसन (आरएसएसएसएफ)का अनुसार विकानले करिअरमा ८ सय ५ गोल गरेका थिए । त्यसमध्ये २७ गोल र्यापिड भियानाको दोस्रो टिम र अर्को एउटा गैरव्यवसायिक टिमका लागि गरेका थिए, जसलाई आधिकारिक मान्न सकिँदैन । त्यस्तै उनले अन्तर्राष्ट्रिय खेलमा गरेको गोललाई पनि आधिकारिक नमान्दा आधिकारि गोल ७ सय ५९ हुन आउँछ ।
एजेन्सी । इर्लिङ हालन्डले युरोपियन च्याम्पियन्स लिगको १४ औं खेलमा १९औं र २०औं गोल गरेपछि बोरुशिया डर्टमन्डले सेभियासँग दोस्रो लेगमा २–२ गोलको बराबरी खेलेको छ । समग्रमा ५–४ गोलअन्तरको जितसहित डर्टमन्ड च्याम्पियन्स लिगको क्वाटरफाइनलमा पुगेको छ ।
२० वर्षीय स्ट्राइकरले ३५ औं मिनेटमा पहिलो गोल गरेका थिए, उनले पहिलो हाफमा विपक्षीको बक्सभित्र बल छोएको पनि त्यही एकपल्ट थियो । मार्कस रिउसको ब्याक पासमा सेभियाका गोलरक्षकलाई पछि पार्दै उनले ट्यापिङ गोल ष्रेका थिए ।
हालण्डको १९ औं च्याम्पियन्स लिग गोल सामान्य थियो भने २० औं गोल चाहिँ नाटकीय । दोस्रो हाफको सुरुमा सेभियाको रक्षापंक्तिलाई छक्याउँदै टाइट एंगलबाट गरेको गोल फलका कारण रद्ध गरियो । भिडियो असिस्टेन्ट रेफ्री (भार)ले सेभियाका जुलेस कोन्डेले हालण्डको जर्सी तानेकोमा पेनाल्टीको निर्णय दिए ।
नर्वेका यी स्ट्राइकर आफैंले पेनाल्टी प्रहार गरे । उनको प्रहार सेभियाका गोलरक्षक बाउनोउले रोकिदिए । नाटक त्यतिमा मात्र सीमित रहेन ।
बोउनोउ पेनाल्टी किक प्रहार गर्नुअघि नै अगाडि बढेको भन्दै भारले अर्को प्रहार गर्न अनुमति दियो । तर हालण्डले यो अवसरलाई खेर जान दिएनन् । घरेलु मैदानमा बराबरी खेले पनि टिमलाई समग्रमा जित दिलाउन सफल रहे ।
दुई गोलको अग्रता बनाएको डर्टमण्डले दोस्रो हाफमा दवावमा खेलेको थियो । युसुफ एन नेस्रीले ६८ औं मिनेटमा पेनाल्टीमा गोल गरे । खेलको इन्जूरी समयमा उनैको हेड गोलसँगै खेल बराबरीमा आएको हो । पहिलो लेग सेभियाले आफ्नै मैदानमा ३–० ले हारेको थियो ।
च्याम्पियन्स लिगको अर्को खेलमा इटलियन च्याम्पियन युभेन्टसले पोर्चुगलको पोर्टोमाथि दोस्रो लेगमा ३–२ गोलको जित हासिल गरे पनि क्वाटरफाइनलमा पुग्न असफल भएको छ । पहिलो लेगमा पोर्टोले घरेलु मैदानमा २–१ को जित रचेको थियो ।
नाटकीय दोस्रो लेगको ५४ औं मिनेटमै पोर्टो १० खेलाडीमा समेटिएको थियो । पोर्टोका लागि ओलिभेरियाले १९ औं मिनेटमा पेनाल्टी गोलले अग्रता दिलाएका थिए । दोस्रो हाफको सुरुमै फेरेडेरिको सिसेले गोल गरेपछि घरेलु टोली युभेन्टसले खेल बराबरीमा ल्यायो । ५४ औं मिनेटमा मेहदी तारेमी दोहोरो पहेँलो कार्ड पाएर बाहिरिएपछि ६८ औं मिनेटमा युभेन्टसले सिसेकै गोलमार्फत अग्रता बनायो ।
नियमित समयमा २–१ गोलमा सकिएसँगै समग्रमा ३–३ को बराबरीमा खेल पुगेको थियो । ३० मिनेट थपिएको अतिरिक्त समयको अन्त्यतिर दुवै टोलीबाट एक एक गोल भयो र अवे गोलका आधारमा पोर्चुगिज च्याम्पियन विजयी रह्यो ।
११५ औं मिनेटमा ओलिभेरियाको लङ रेन्ज फ्रिकिक गोलमा परिणत हुँदा पोर्टोका लागि सकारात्मक संकेत आएको थियो । त्यसको दुई मिनेटपछि नै एड्रियन र्यावियटले हेडर गोलमार्फत आशा जगाएका थिए । खेलको अन्तिम केहि मिनेट पोर्टोका गोलरक्षक अगुस्टिन मर्चेसिनले सानदार बचाउ गरेका थिए ।
एजेन्सी । पोर्चुगिज सुपरस्टार क्रिष्टियानो रोनाल्डोको करिअरमा अर्को कोशेढुंगा पूरा गरेका छन् । सिरी ए अन्तर्गत युभेन्टसले सजिलै जितेको स्पेइजाबिरुद्धको खेलमा रोनाल्डोले क्लब करिअरमा ६ सयौं खेल पूरा गरे ।
त्यही खेलको अन्तिम मिनेटमा गोल गरेपछि उनले सिरी ए मा युभेन्टसका लागि यो सिजन बीसौं गोल गरे । पछिल्लो १२ सिजनयता उनले हरेक सिजन २० भन्दा बढी गोल गरेका छन् । युरोपको शीर्ष पाँच लिगहरुमा यस्तो कीर्तिमान राख्ने रोनाल्डो पहिलो खेलाडी बनेका छन् ।
युभेन्टसका लागि तीनै गोल दोस्रो हाफमा निस्किएको थियो । रोनाल्डोले तेस्रो गोल गरेका थिए । खेल सकिन एक मिनेट बाँकी हुँदा उनले तीव्र काउन्टर एट्याकमा गोल गरेका हुन् ।
६२ औं मिनेटमा अल्भारो मोराटाले फेडेरिको बेनार्डेचीको क्रसमा गोल गरेपछि युभेन्टसले अग्रता बनाएको थियो । ७१ औं मिनेटमा फेडेरिको सिसेले दोस्रो गोल गरेका थिए ।
यो जितले युभेन्टस तेस्रो स्थानमा तीन अंकको दूरीमा पुगेको छ । समान २४ खेलबाट युभेन्टस दोस्रो स्थानको एसी मिलानभन्दा ३ र शीर्ष स्थानको इन्टर मिलानभन्दा ७ अंकले पछाडि छ ।
एजेन्सी । क्रिष्टियानो रोनाल्डोले दुई हेड गोल गरेपछि युभेन्टसले इटालियन सिरी ए तालिकाको अन्तिममा रहेको क्रोटोनलाई ३–० गोलले पराजित गरेको छ । जितसँगै युभेन्टसले शीर्ष स्थानको इन्टर मिलानसँगको दूरी ८ अंकमा झारेको छ ।
३८ औं मिनेटमा एलेक्स सान्द्राेको क्रसलाई उपोग गरेका रोनाल्डोले पहिलो हाफको इन्जूरी समयमा आरोन राम्सेको पासलाई सदुपयोग गरेका हुन् ।
युरोपको शीर्ष ५ लिगमध्ये रोनाल्डोले गोल गरेको क्रोटोन ७८ औं क्लब हो । रोनाल्डोले युभेन्टसमा अनुबन्ध भएको साढे २ वर्षमा ७० गोल पूरा गरेका छन् । युभेन्टसका लागि तेस्रो गोल वेस्टन म्याकेन्नीले क्लोज रेन्जबाट गरेका थिए ।
यो २ गोलसँगै जारी सिजन सिरी ए मा १८ गोलसहित रोनाल्डो सर्बाधिक गोलकर्ताको सूचिमा एक नम्बरमा पुगेका छन् । उनले इन्टर मिलानका रोमेलु लुकाकुलाई पछि पारेका हुन् ।
लगातार ९ सिजनको सिरी ए विजेता युभेन्टस यस सिजन भने केहि कमजोर देखिएको छ । युभेन्टस २२ खेलबाट ४५ अंकसहित तेस्रो स्थानमा छ । एक खेल बढी खेलेको शीर्ष स्थानको इन्टरमिलानको ५३ र दोस्रो स्थानको एसी मिलानको ४९ अंक छ ।
लिगमा १५ खेल बाँकी रहँदा शीर्ष ७ स्थानमा रहेका टोलीहरुबीचको प्रतिस्पर्धा यसपल्ट हेर्नलायक देखिने अपेक्षा छ । अन्तिममा रहेको क्रोटोन भने २३ खेलबाट १२ अंकसहित तालिकाको पुछारमा छ ।
एजेन्सी । युरोपेली च्याम्पियन्स लिग प्रिक्वाटरफाइनल पहिलो लेगमा क्रिष्टियानो रोनाल्डोको टिम युभेन्टसले पोर्चुगलको पोर्टोसँग २–१ गोलको पराजय ब्यहोरेको छ ।
घरेलु मैदानमा पोर्टोले दुवै हाफको पहिलो मिनेटमा गोल गरेको हो । खेल सुरु भएलगत्तै मेहेदी तारेमीले अग्रता दिलाएकोमा दोस्रो हाफ सुरु भएलगत्तै मोउसा मारेगाले गोल गरेका हुन् ।
८२ औं मिनेटमा युभेन्टसका लागि फेडेरिको चिसेले महत्वपूर्ण अवे गोल गरे । दुईबीचको दोस्रो लेग मार्च १० मा एलियान्ज रंगशाला टोरिनोमा हुनेछ ।
यत स्पेनको सेभियाले अग्रता जोगाउन नसक्दा जर्मनीको बोरुसिया डर्टमन्डसँग घरेलु मैदानमा ३–२ गोलको हार ब्यहो¥यो । सेभियाको रोमन सान्चेस रंगशालामा सातौं मिनेटमै सुसोको गोलले घरेलु टोलीले अग्रता बनाएको थियो ।
त्यसयता लगातार ३ गोल खाएपछि पहिलो हाफमै डर्टमन्डले ३–१ को अवस्थामा पुर्याएको थियो । डर्टमन्टका लागि युवा स्ट्राइकर इर्लिङ हलान्डको प्रदर्शन शानदार रह्यो । उनले २७ र ४३ औं मिनेटमा गोल गरे भने त्यसअघि १९ औं मिनेटमा महमुद दाउदको गोलका लागि पास उलब्ध गराएका थिए ।
यो तीन अवे गोल डर्टमन्डको क्वाटफाइनल यात्राका लागि निर्णायक पनि बन्न सक्छ । खेलको अन्त्यतिर सेभियाका लूक डी जोङले अर्को एक गोल फर्काएर गोलअन्तर कम गरेका थिए । दुईबीचको दोस्रो लेग मार्च १० मा हुनेछ ।
एजेन्सी । इन्टर मिलानमाथि दोस्रो लेगमा गोलरहित बराबरी खेले पनि समग्रमा २–१ को नतिजासहित युभेन्टस लगातार दोस्रो पल्ट कोपा इटालियाको फाइनलमा पुगेको छ ।
पहिलो लेगमा मिलानको होममा २–१ को जित निकालेको युभेन्टसले घरेलु मैदानमा खेलको अन्त्यतिर निकै नै दवावका साथ खेल्नुपरेको थियो ।
मिलानका लागि रोमेलु लुकाकु र अचरिफ हाकिमीले दुई सुवर्ण अवसर खेर फालेपछि युभेन्टसको फाइनल यात्रा निश्चित बनेको हो । क्रिष्टियानो रोनाल्डोको दुईवटा शानदार प्रहार मिलानका गोलरक्षक समीर ह्याण्डोवीचले बचाएका थिए ।
गत साता भएको पहिलो लेगमा इन्टर मिलानले घरेलु मैद्यानमा लाउटारो मार्टिनेजको गोलमार्फत अग्रता बनाए पनि त्यसयता रोनाल्डोले २ गोल गरेका थिए ।
युभेन्टसले उपाधिका लागि एटालान्टा र नापोलीबीच हुने दोस्रो सेमिफाइनलको विजेतासँग प्रतिस्पर्धा गर्नेछ । उनीहरु बुधबार खेल्दैछन्, पहिलो लेग गोलरहित बराबरीमा सकिएको थियो ।
फाइनल मे १९ मा हुनेछ । गत संस्करणको फाइनलमा नापोलीले युभेन्टसलाई पेनाल्टी शुटआउटमा पराजित गरेको थियो ।
एजेन्सी । पोर्चुगिज सुपरस्टार क्रिष्टियानो रोनाल्डोले २ गोल गरेपछि कोपा इटालियाको सेमिफाइनल पहिलो लेगमा युभेन्टसले इन्टर मिलानमाथि २–१ गोलको पुनरागमन जित निकालेको छ ।
अर्जेन्टिनाका स्ट्राइकर लाउटारो मार्टिनेजले युभेन्टसका गोलरक्षक जिानलुइगी बुफोनलाई छक्याउँदै खेलको नवौं मिनेटमै इन्टरलाई अग्रता दिलाएका थिए । बुफोनको यो सिनियर करिअरमा ११ सयौं खेल थियो ।
तर २६ औं मिनेटमा रोनाल्डोले पेनाल्टीमा गोल गरी खेल बराबरीमा ल्याए । इन्टरका एस्ले योङले जुहान कार्डाडोलाई फल गरेपछि पाएको पेनाल्टीलाई उनले सदुयोग गरेका हुन् ।
३५ औं मिनेटमा रोनाल्डोले व्यक्तिगत दोस्रो र टिमका लागि विजयी गोल गरेका हुन् । इन्टरको रक्षात्मक कमजोरीको फाइदा रोनाल्डोले उठाएका थिए ।
खेल अवधिभर एक अर्काले गोल गर्ने प्रयास गरिरहे । दुवैले खराव मनोबृत्ति प्रदर्शन गरेका थिए । खेलमा ९ पहेलो कार्डको प्रयोग भएको थियो । तीमध्ये युभेन्टसका खेलाडीले मात्र ६ वटा पाएका थिए । युभेन्टसले सिरी ए अन्तर्गत अघिल्लो महिना व्यहोरेको २–० को हारको बदला पनि लिएको छ ।
कोपा इटालिया उपाधि युभेन्टसले १३ पल्ट जितेको छ । फाइनल प्रवेशका लागि निर्णायक मानिने दोस्रो लेग युभेन्टसको घरेलु मैदानमा अर्को साता हुनेछ ।
एजेन्सी । नापोलीलाई २–० गोलले पराजित गरी युभेन्टसले इटालियन सुपर कपको उपाधि जितेको छ । प्रशिक्षक आन्द्रे पिर्लोका लागि यो पहिलो उपाधि हो ।
गएराति भएको फाइनलमा पहिलो हाफ गोलरहित रहे पनि दोस्रो हाफमा युभेन्टसका लागि क्रिष्टियानो रोनाल्डोले गोल गरी अग्रता दिलाए । उनले ६४ औं मिनेटमा गोल गरे ।
८० औं मिनेटमा नापोलीले पेनाल्टी पाएको थियो । तर लोरेन्जो इसिङनेले गोल गर्न असफल रहेपछि बराबरी गर्ने असवसर खेर गयो ।
खेलको अन्तिम मिनेटमा अल्भारो मोराटाले गोल गरी २–० को जित निश्चित गरेका थिए ।
एजेन्सी । आरोन राम्से र क्रिष्टियानो रोनाल्डोले खेलको अन्त्यतिर गोल गरेपछि युभेन्टस १० खेलाडीमा सीमित सासोउलोलाई ३–१ गोलले पराजित गर्दै इटलीको सिरी एको चौथो स्थानमा उक्लिएको छ ।
वेल्सका मिडफिल्डर राम्सेले खेलको ८२ औं मिनेटमा ६ यार्ड भित्रबाट गोल गरेका हुन् । रोनाल्डोले ९२ औं मिनेटमा आन्द्रे कोनसिग्लीको पासलाई सदुपयोग गरेका हुन् ।
यसअघि पहिलो हाफको अन्तिम मिनेटमा फेडेरिको सिसेलाई फल गरेपछि सासोउलोका पेड्रो ओवियाङ रातो कार्ड खाँदै मैदान बाहिरिएपछि पाहुना टोलीले दोस्रो हाफ १० खेलाडीमा खेलेको हो ।
५० औं मिनेटमा ड्यानिलोले २५ यार्डबाट सानदार गोल गरी एलियान्ज रंगशालामा युभेन्टसलाई अग्रता दिलाएका थिए । तर त्यसको ८ मिनेटपछि नै ग्रेगोरी ड्रेफेलले बराबरी गोल फर्काएका थिए ।
यो सिरी ए को साविक विजेता युभेन्टसका लागि जारी सिजन लिगमा लगातार तेस्रो जित हो, जसकारण १७ खेलबाट ३३ अंकका साथ युभेन्टस अंकतालिकाको चौथो स्थानमा उक्लिएको छ ।
युभेन्टस शीर्ष स्थानको एसी मिलानसँग ७ अंकले पछि छ । मिलानलाई गत साताको बुधबार ३–१ ले पराजित गरेको थियो । युभेन्टससँग अतिरिक्त एक खेल पनि बाँकी छ ।
युभेन्टसलाई पराजित गर्न सकेको भए चौथो स्थानमा उक्लने अवसर सिसोउलोलाई पनि थियो । १७ खेलबाट सिसोउलोको २९ अंक छ, तालिकाको सातौं स्थानमा छ ।