कैलाली । सुदूरपश्चिममा बुधबार १४ जना कोरोना संक्रमितको मृत्यु भएको छ । कैलालीमा सबै भन्दा धेरै १० जनाको मृत्यु भएको छ । कंचनपुरमा ४ जनाल मृत्यु भएको प्रदेश स्वास्थ निर्देशनालयले जनाएको छ ।
यो संगै प्रदेशमा ज्यान गुमाउनेको संख्या २७० पुगेको छ । प्रदेशमा पछिल्लो २४ घन्टामा ७४७ जनामा संक्रमण पुष्टि भएको छ । प्रदेशमा मंगलबार २६९ जना संक्रमण मुक्त भएका छन् ।
दाङ । दाङको बेलझुण्डी कोरोना अस्पतालमा थप ८ जना संक्रमितको मृत्यु भएको छ । कोरोना अस्पतालका व्यवस्थापक द्रोण वलीका अनुसार गएराति ८ः४५ बजेदेखि अहिले दिउँसो ३ः४५ बजेसम्म उपचाररत ८ जना कोरोना संक्रमितको मृत्यु भएको हो ।
मृतक २ जना महिला र ६ जना पुरूष हुन् । अक्सिजन अभावका कारण उनीहरूको मृत्यु भएको हो । अस्पतालमा ४० जनालाई मात्रै पुग्ने अक्सिजन भएको भन्दै वलीले भने, ‘अहिले ६१ जनाको उपचार गरिरहेका छौ । यसरी कसरी उपचार सम्भव छ ?
उनका अनुसार अहिले ६१ मध्य ५ जनाको आईसीयूमा उपचार भइरहेको छ । अक्सिजन अभावका कारण थप संक्रमित भर्ना गर्न नसकिने अस्पतालले जनाएको छ ।
दिल्ली । पछिल्लो साता भारतमा कोरोनाभाइरस संक्रमण घट्ने क्रममा देखिएको छ । मंगलबार ३ लाख २९ हजार संक्रमित भेटिए ।
पछिल्लो २४ घण्टामा ३,८७६ जनाको मृत्यु भएको छ ।
भारतमा कूल संक्रमित संख्या २ करोड २६ लाख पुगेको छ । १ करोड ९० लाख निको भएका छन् ।
२ लाख ४९ हजार जनाको भाइरसबाट मृत्यु भएको छ । सक्रिय संक्रमित संख्या ३७ लाख १५ हजार पुगेको छ ।
विश्व स्वास्थ्य संगठनले भारतको संक्रमण र मृत्युदुर चिन्तित तुल्याउने खालको रहेको जनाएको छ ।
जनकपुरधाम । पूर्व–पश्चिम राजमार्ग अन्तर्गत सप्तरीको पोर्ताहामा आज विहान मालबाहक ट्रकले मोटरसाइकलमा ठक्कर दिँदा श्रीमान–श्रीमतीको मृत्यु भएको छ ।
मृत्यु हुनेमा हनुमाननगर कंकालिनी नगरपालिका -१ भलुवाका अन्दाजी ५० वर्षीय सत्यनारायण मण्डल र उनकी ४५ वर्षीया श्रीमती सुनिता देवी रहेकी छन् ।
ना ६ ख ३८६१ नम्बरको मोटसाइकलमा सवार श्रीमान–श्रीमतीको घटनास्थलमै मृत्यु भएको प्रहरीले जनाएको छ ।
मोटरसाइकललाई ठक्कर दिने ना ६ ख ३८६१ नम्बरको मालबाहक ट्रक राजमार्गको छेउमा पल्टिएको छ । ट्रक चालकलाई भने ईलाका प्रहरी कार्यालय भारदहले नियन्त्रणमा लिएको छ ।
स्थानीयका अनुसार मृतक श्रीमान–श्रीमती आवश्यक कामले मोटरसाइकल चढेर बरमझिया बजारतर्फ हिँडेका थिए । मृतक दुवैजनाको शव पोष्टमार्टमका लागि गजेन्द्रनारायण सिंह अस्पताल राजविराज ल्याउन लागेको प्रहरीले जनाएको छ ।
मेरिल्यान्ड । अमेरिकाको मेरिल्यान्ड राज्यमा भएको अन्धाधुन्द गोली हानाहानको घटनामा एक नेपालीले ज्यान गुमाएका छन् ।
ज्यान गुमाउने चारमध्ये एकजना नेपाली रहेको अधिकारीहरुले जनाएका छन् ।
मृत्यु हुने नेपालीमा संखुवासभा घर भएका २४ वर्षका सागर घिमिरे रहेको जनाइएको छ । उनी गत अप्रिलमा साउथ क्यारोलिनाको अरेन्जवर्गमा रहेको क्लाफलिन युनिभर्सिटीबाट ग्राजुएट भएका थिए ।
उनी झन्डै एकसाता अगाडिमात्र वुडल्यान कम्प्लेक्समा बसाई सरेका थिए । बाल्टिमोर काउन्टी पुलिस डिपार्टमेन्टले प्रेस वक्तब्य जारी गर्दै मृतकहरुको पहिचान सार्वजनिक गरेको थियो ।
उक्त घटनामा अर्का एक नेपालीको घर पूर्णरुपमा जलाइएको छ भने त्यहाँ कम्तीमा दुई घर पुरै र दुई घर आंशिक रुपमा जलेको बताइएको छ ।
नयाँ दिल्ली । कोरोनाभाइरस महामारीको दोस्रो लहरका कारण निकै प्रभावित भएको भारतमा पछिल्लो २४ घण्टामा कोरोनाभाइरस (कोभिड-१९) बाट संक्रमितको संख्या अघिल्लो दिनहरुको तुलनामा केही कमी आएको छ ।
भारतीय केन्द्रीय स्वास्थ्य तथा परिवार कल्याण मन्त्रालयले पछिल्लो २४ घण्टामा तीन लाख ६६ हजार व्यक्ति संक्रमित भएको जनाएको छ । यो सहित भारतमा हालसम्म कूल संक्रमितको संख्या २ करोड २६ लाख ६२ हजार पुगेको छ ।
साथै, विगत २४ घण्टामा तीन हजार ७५४ जनाको मृत्यु भएको छ । भारतमा यो सहित २ लाख ४६ हजार ११६ जनाको कोभिड–१९ को संक्रमणबाट ज्यान गइसकेको छ ।
भारतमा पछिल्लो २४ घण्टामा ३ लाख ५३ हजार व्यक्ति कोभिड-१९ बाट संक्रमणमुक्त भएका छन् । हालसम्म भारतमा यो सहित १ करोड ८६ लाख ७१ हजार व्यक्ति संक्रमणमुक्त भएको पाइएको छ ।
यसैबीच, गत जनवरीबाट थालिएको कोभिड-१९ विरुद्धको खोप लगाउने व्यक्तिको संख्या १७ करोड २ लाख पुगेको मन्त्रालयले जनाएको छ । हाल भारतमा १८ वर्षभन्दा माथिका व्यक्तिलाई खोप दिन थालिएको छ ।
भारतीय स्वास्थ्य अनुसन्धान परिषदका अनुसार भारतमा ३० करोड ३७ लाख नमुना परीक्षण गरिएको छ ।
भारतमा कोभिड–१९ को दोस्रो लहरले स्वास्थ्य संस्थामाथि ठूलो दबाब आएको छ । अक्सिजन, बेड, औषधि र अस्पतालको अभावमा मानिसहरुले सामान्य उपचार समेत नपाएर अकालमा ज्यान गुमाउनु परेको भारतीय सञ्चार माध्यमहरुले जनाएको छ ।
यसैबीच, कोरोनाभाइरसको संक्रमणबाट विश्वभर ३३ लाख ६ हजार व्यक्तिको ज्यान गएको विश्व स्वास्थ्य संगठनले जनाएको छ ।
विश्वमै सर्वाधिक असर परेको संयुक्तराज्य अमेरिकामा ५ लाख ९५ हजार, ब्राजिलमा ४ लाख २२ हजार, भारतमा २ लाख ४६ हजार, मेक्सिकोमा २ लाख १८ हजार, बेलायतमा १ लाख २७ हजार, इटालीमा १ लाख २२ हजार, रसियामा १ लाख १३ हजार तथा फ्रान्समा १ लाख ६ हजारको कोभिड-१९ को संक्रमणबाट मृत्यु भइसकेको छ ।
पछिल्लो समय संयुक्तराज्य अमेरिका र युरोपमा कोरोनाभाइरस विरुद्धको खोप व्यापक स्तरमा लगाउन थालिएपछि कोभिड-१९ बाट प्रभावितहरुको संख्यामा उल्लेख कमी आएको जोन्स हप्किन्स विश्वविद्यालयले जनाएको छ ।
बाँके । कोरोनाभाइरस संक्रमणबाट बाँकेमा पछिल्लो २४ घण्टाभित्र १७ जनाको मृत्यु भएको छ । हाल यो मृत्युको तथ्यांक अहिले सम्मकै उच्च हो ।
जिल्ला कोभिड संकट व्यवस्थापनका अनुसार बाँकेमा १७ जनाको उपचारको क्रममा मृत्यु भएको हो ।
हालसम्म योसँगै बाँकेमा कोरोना संक्रमणबाट मृत्यु हुनेको संख्या १ सय ८६ पुगेको छ भने बाहिरी जिल्लाबाट उपचारको लागि बाँकेमा आएका १ सय ३९ जनाको मृत्यु भइसकेको केन्द्रका फोकल पर्सन तेज ओलीले जानकारी दिए ।
दाङ । अस्पतालले भर्ना गर्न नमानेपछि एकजना कोरोना संक्रमितको मृत्यु भएको छ । राप्ती स्वास्थ्य बिज्ञान प्रतिष्ठान घोराहीले भर्ना गर्न नमानेपछि सल्यानको छत्रेश्वरी गाउँपालिका वडा नम्बर-२ का एक ४९ बर्षिय पुरूषको आज मृत्यु भएको हो।
मृतकका आफन्तले उपचारका लागि गएराति १२ बजे प्रतिष्ठानमा उपचारका लागि ल्याएका थिए । तर, प्रतिष्ठानले बेडको अभाव देखाउँदै उपचार गर्न अस्विकार गरेको मृतकका आफन्तले जानकारी दिएका छन् ।
मृतक पुरुषको सल्यानमा एन्टिजेनद्वारा परीक्षण गर्दा कोभिड पोजेटिभ देखिएको भोटेचौर आइसोलेशनका डाक्टर प्रोशेष सिंहले बताए । डाक्टर सिंहले अक्सिजन लगाएर उपचार गर्नुपर्ने संक्रमितको उपचार नपाएर मृत्यु भएको दावी गरे । उनका अनुसार कोरोना संक्रमित ती पुरूषको मृत्यु अस्पतालले भर्ना गर्न नमानेपछि सल्यान फर्काउँदै गर्दा मृत्यु भएको हो ।
कैलाली । कैलालीमा शनिवार ९ जनाको कोरोना संक्रमणबाट मृत्यु भएको छ ।
धनगढी ३ का ६१ वर्षीय पुरुष, कञ्चनपुर २ पुनर्वासका ८७ वर्षीय पुरुष कैलाली बर्दगोरीया २ का ७५ वर्षीय पुरुष, बर्दगोरीया ६ का ६१ वर्षीय पुरुषको कोरोना संक्रमणबाट मृत्यु भएको छ ।
त्यस्तै धनगढी १ बस्ने ५० वर्षीय पुरुष, धनगढी ५ का ४३ वर्षीय पुरुष, धनगढीका ४ का ८१ वर्षीय पुरुष, धनगढी १२ का ५० वर्षीया महिलाको पनि कोरोना संक्रमणबाट मृत्यु भएको छ ।
त्यस्तै कैलाली लम्की चुहा नगरपालिका ६ का ४२ वर्षीय पुरुषको कोरोना संक्रमणबाट मृत्यु भएको जिल्ला प्रशासन कार्यालय कैलालीका सूचना अधिकारी शिवराज जोशीले जानकारी दिए ।
नयाँ दिल्ली । कोरोनाभाइरस महामारीको दोस्रो लहरको सङ्कट व्यहोरिरहेको भारतमा विगत २४ घण्टाको अवधिमा ४ लाख नयाँ संक्रमित फेला परेका छन् । भारतमा यो सहित कूल संक्रमितको संख्या २ करोड १८ लाख ९२ पुगेको छ ।
भारतमा लगातार तेस्रो दिन ४ लाखभन्दा बढी व्यक्तिमा संक्रमण देखिएको छ ।
भारतको केन्द्रीय स्वास्थ्य तथा परिवार कल्याण मन्त्रालयका अनुसार २४ घण्टाको अवधिमा थप ४ हजार १८७ जनाको कोभिड–१९ को संक्रमणबाट मृत्यु भएको छ । यो सहित भारतमा कोभिडको संक्रमणबाट मृत्यु हुनेको कूल संख्या २ लाख ३८ हजार २७० पुगेको हो ।
हाल विश्वमै कोभिड-१९ को संक्रमणबाट ज्यान गुमाउनेको संख्या संयुक्तराज्य अमेरिका र ब्राजिलपछि भारत तेस्रो स्थानमा छ । संयुक्तराज्य अमेरिकामा ५ लाख ९४ हजार तथा ब्राजिलमा ४ लाख १९ हजारको ज्यान गइसकेको छ ।
भारतमा अझै पनि ३७ लाख २३ हजार व्यक्ति सक्रिय संक्रमित अवस्थामा छन् । मन्त्रालयका अनुसार हालसम्म एक करोड ७९ लाख ३१ हजार व्यक्ति कोभिड-१९ बाट संक्रमणमुक्त भएका छन् ।
भारतमा कोभिड-१९ को दोस्रो लहरका कारण जनजीवन अस्तव्यस्त भए पनि भारत सरकारले देशव्यापी पूर्ण लकडाउन नगर्ने बताएको छ । कतिपय भारतीय राज्यहरुमा रात्रिकालीन निषेधाज्ञा वा आंशिक लकडाउन गरिएको छ । राजधानी नयाँ दिल्लीमा आगामी मे १० सम्मका लागि लकडाउन गरिएको छ ।
गत जनवरीमा देशव्यापी खोप अभियान सञ्चालन गरिएको भारतमा हालसम्म करिब १६ करोड ७४ लाख व्यक्तिलाई कोभिड-१९ को खोप दिइसकिएको छ । १८ वर्षभन्दा माथिका व्यक्तिका लागि गत मे १ तारिखबाट खोप अभियान शुरु भइसकेको छ ।
यसैबीच, बिहीबारसम्म भारतमा कोभिड-१९ को ३० करोड नमुना परीक्षण गरिएको छ । शुक्रबार एकै दिन १८ लाख नमुना परीक्षण गरिएको भारतीय स्वास्थ्य अनुसन्धान परिषदले जनाएको छ ।
गण्डकी । प्रदेश स्वास्थ्य निर्देशनालय गण्डकीका अनुसार मृत्यु हुनेमा कास्कीका २ र पर्वतका एक जना संक्रमित छन् ।तीनै जनाको पोखरामा उपचारका क्रममा मृत्यु भएको निर्देशनालय प्रमुख डा. विनोदविन्दु शर्माले जानकारी दिए ।
कास्कीका मृत्यु हुने संक्रमितमा पोखरा २३ का ४८ वर्षीय महिला र पोखरा १० का ८१ वर्षीय पुरुष छन् ।त्यस्तै, पर्वत, कुश्मा नगरपालिका १ का ४० वर्षीय संक्रमितको शुक्रबार पोखराको मेडिप्लस अस्पतालमा उपचारका क्रममा मृत्यु भएको छ ।
यो सँगै गण्डकीमा कोरोनाबाट मृत्यु हुनेको संख्या २५१ पुगेको छ । शुक्रबार अहिलेसम्मकै सबैभन्दा धेरै एकैदिन ७ जना संक्रमितको मृत्यु भएको थियो ।
नेपालगञ्ज । कोरोनाभाइरस संक्रमणले यहाँ एकै परिवारका चार जनाले ज्यान गुमाएका छन् । पूर्वराष्ट्रिय क्रिकेटर जाहिर अहमद, उनकी बहिनी र दुई दाइको मृत्यु भएको हो ।
नेपालगञ्जको भेरी अस्पतालमा उपचारको क्रममा ४२ वर्षीय जाहिरको बुधवार बेलुका मृत्यु भएको हो । त्यही अस्पतालमा उनका दाई एजाजको बिहीवार बेलुकी ७ बजे र इम्तियाजको शुक्रबार बिहान साढे १० बजे ज्यान गएको हो । उनकी बहिनी भने भारतको रुपैडियामा कोरोना संक्रमणले मृत्यु भएको हो ।
अहमदको परिवारमा अन्य सदस्यहरु पनि संक्रमित भएका छन् ती मध्ये कोहि घरमा आइसोलेसनमा र कोही अस्पतालमा उपचाररत छन् ।
जाहिर आहमद सन १९९७ मा सिंगापुरमा आयोजना भएको एसीसी यू–१९ कपमा नेपालले सहभागी हुन जाँदा १८ सदस्यीय टोलीमा थिए । पछिल्लो समय उनी लुम्बिनी प्रदेशको क्रिकेट छनोट समितिमा थिए ।
राष्ट्रिय खेलकुद परिषद्मा उनी अधिकृतस्तरका प्रशिक्षक हुन । काठमाडौंमा सम्पन्न १३ औं दक्षिण एसियाली खेलकुदमा उनी नेपालको भारोत्तोलन प्रशिक्षण टोलीमा थिए । उनले नेपालको प्रशिक्षक भएर ताइवान, उज्वेकिस्तान, मलेसियामा टिम लगेका थिए ।
गुल्मी । गुल्मीमा चट्याङ लागेर एक जनाको मृत्युभएको छ भने आठ घाइते भएका छन् ।
मृत्यु हुनेमा मुसिकोट –४ दजाकोटका १८ वर्षीया करिश्मा गाहा रहेको जिल्ला प्रहरी कार्यालयले जनाएको छ । जिल्ला प्रहरी कार्यालय गुल्मीका प्रहरी उपरीक्षक गोपालचन्द्र भट्टराईका अनुसार चट्याङले घाइते उनीलाई अस्पताल ल्याउने क्रममा बाटोमा नै मृत्युभएको हो ।
घरमा बसिरहेका जुनी गाहा, मेलिना गाहा, जेनित गाहा, तुलबहादुर गाहा, उजुरसिंह गाहा, फटिकला गाहा, चित्रबहादुर गाहा र ज्योती गाहा घाइते भएका छन । घाइतेहरु मध्ये चार जनालाई थप उपचारको लागि पाल्पा पठाइएको छ भने अन्य चार जनाको गुल्मी अस्पतालमा उपचार भइरहेको छ ।
उजिरबहादुर गाहा र भीम श्री गाहाको घरमा चट्याङ पर्दा उक्त घटना भएको प्रहरीले जनाएको छ ।
रासस
बाँके । कोरोना सङ्क्रमणबाट नेपालगञ्जमा एकैघरका तीन दाजुभाइको मृत्यु भएको छ ।
मृत्युहुनेमा नेपालगञ्ज उपमहानगरपालिका –३ निवासी इम्तियाज, एजाज र जहीर अहमद रहेका छन् । जिल्ला कोभिड सङ्कट व्यवस्थापन केन्द्र बाँकेका स्रोत व्यक्ति तेज वलीका अनुसार उनीहरुको एकएक दिनको अन्तरालमा मृत्यु भएको हो ।
जहीरको मृत्यु भएको भोलिपल्ट एजाजको मृत्यु भएको थियो । आज विहान इम्तियाजको मृत्यु भएको स्रोत व्यक्ति वलीले बताउनुभयो । सात दाजुभाई मध्ये जहीर कान्छा , एजाज राइलो र इम्तियाज काइलो हुन् ।
उनीहरु सबैको भेरी अस्पतालमा उपचारको क्रममा मृत्यु भएको हो । नेपालगञ्जको विपिचोक नजिकै व्यापार गर्दै आउनु भएका जहिरको बुधबार, एजाजको बिहीवार र इम्तियाजको आज मृत्यु भएको हो ।
एउटै परिवारको तीन दाजुभाईको मृत्युपछि परिवारमा बज्रपात परेको स्थानीय रसिद कुरेशीले बताउनुभयो । बिहीवार रातीमात्रै बाँकेका अस्पतालमा भर्ना भएका थप १० कोरोना सङ्क्रमित बिरामीको उपचारकाक्रममा मृत्यु भएको थियो ।
हालसम्म बाँकेमा सङ्क्रमणबाट मृत्यु हुनेको सङ्ख्या १६९ जना पुगेको छ भने उपचारका लागि बाहिरी जिल्लाबाट बाँके आएका १३० जनाको मृत्यु भएको जिल्ला कोभिड सङ्कट व्यवस्थापन केन्द्रले जनाएको छ ।
रासस
भक्तपुर । अस्पतालले अक्सिजनको व्यवस्था गर्न नसक्दा एकैसाथ दुई कोरोना संक्रमितको मृत्यु भएको छ ।
भक्तपुर कौशलटारस्थित भक्तपुर इन्टरनेशनल नेपाल अस्पतालमा उपचारका लागि भर्ना भएका दुई कोरोना संक्रमितको अस्पतालमा अक्सिजन सकिएपछि मृत्यु भएको जिल्ला स्वास्थ्य कार्यालय भक्तपुरका प्रमुख कृष्ण मिजारले जानकारी दिए ।
भक्तपुरका अस्पतालहरुमा अक्सिजनको अभाव भइरहेको उनको भनाइ थियो । उनले उक्त अस्पतालले भर्ना भएका बिरामीलाई अक्सिजन सकिन लागेकाले अन्यत्र लैजान बिरामीका परिवारलाई भनेपछि अस्पताल खोज्दा-खोज्दै मृत्यु भएको उनले जानकारी दिए ।
एकदमै गम्भीर अवस्थामा रहेका बिरामीलाई अस्पतालमा पर्याप्त अक्सिजनको व्यवस्था नगरी उपचार गर्दा बिरामीको ज्यान गएको मृतकका परिवारले बताएका छन् ।
उदयपुर । उदयपुरको कटारी नगरपालिका-११ हर्देनी भीरमाथि टिकटक बनाउने क्रममा लडेर एकजनाको मृत्यु भएको छ ।
धरानबाट ओखलढुङगातर्फ जाँदै गरेको ना. १ च ३३७० नम्बरको सुमो आज बिहान पौने १० बजे भीर छेउमा बिग्रिएको र सोही सुमोमा सवार धरान-५ का १८ वर्षीय सुभास परियार सुमोबाट ओर्लिएर टिकटक बनाउने क्रममा भीरबाट लडेको जिल्ला प्रहरी कार्यालयले जनाएको छ ।
प्रहरीका अनुसार लडेर गम्भीर घाइते भएको परियारको उपचारको लागि कटारी अस्पताल लैजाने क्रममा बाटोमा नै मृत्यु भएको हो ।
रूपन्देही । लुम्बिनी प्रादेशिक अस्पतालको कोरोन विशेष अस्पतालमा थप ६ जना संक्रमितको मृत्यु भएको छ । पछिल्लो २४ घण्टाको अवधिमा रुपन्देही, अर्घाखाँची, कपिलवस्तु र सल्यानका गरी ६ जनाको मृत्यु अस्पतालका प्रवक्ता डा. विष्णु गौतमले बताए ।
रुपन्देहीको बुटवल ४ का ८४ वर्षीय पुरुष, बुटवल ९ का ६१ वर्षीय पुरुष, बुटवल ११ का ६५ वर्षीय पुरुषको उपचारका क्रममा मृत्यु भएको गौतमले बताए ।
यस्तै अर्घाखाँचीको धातिवाङका ७५ वर्षीय पुरुष, कपिलवस्तुको शिवराज ७ का ४३ वर्षीय पुरुष र शारदा ११ सल्यानका ४३ वर्षीय पुरुषको उपचारका क्रममा मृत्यु भएको छ ।
चीन । शाङ्घाईको नजिकैको एउटा शहरमा शुक्रबार साँझ आएको घातक आँधीबेरीमा परी कम्तीमा ११ जनाको मृत्यु भएको र १०० भन्दा बढी घाइते भएको चिनियाँ अधिकारीहरूले शनिबार बताएका छन् ।
शुक्रबार साँझ माछा मार्न गएका माछा मार्ने डुङ्गामा रहेका ९ जना आँधीपछि सम्पर्कमा आएका छैनन् तर सोही डुङ्गाका अन्य २ जनालाई सकुशल उद्धार गरिएको छ ।
याङ्जे नदीको उत्तरी किनारमा रहेको ८० लाख जनसङ्ख्या रहेको नान्तोङ शहर र वरपरका क्षेत्रमा ठूला असिनासहित आएको आँधीबेरीमा परी उनीहरूको मृत्यु भएको चिनियाँ वेबसाइट ‘ट्यूटियाओ डटकम’ले जनाएको छ ।
आँधीपछि कतिपय मृतकहरू रूख र बिजुलीको खम्बाले थिचिएको अवस्थामा भेटिएका थिए भने अन्यलाई बतासले पानीमा फ्याँकिएको अवस्थामा पाइएको स्थानीय अधिकारीहरूले सामाजिक सञ्जाल ओइवोमार्फत् जानकारी गराएका छन् ।
आँधीका कारण कम्तीमा १०२ जना घाइते भएका छन्, धेरै घरहरू भत्किएका छन् भने करिब तीन हजार स्थानीयलाई सुरक्षितस्थलमा सारिएको छ ।
सिन्धुपाल्चोक । कोरोना संक्रमणबाट सिन्धुपाल्चोकको कुबिण्डेका एक पुरुषको आज धुलिखेल अस्पतालमा मृत्यु भएको छ । ३७ वर्षीय पुरुषको आज बिहान धुलिखेल अस्पतालमा उपचारका क्रममा मृत्यु भएको हो ।
मुटुका रोगी उनलाई शुक्रबार थप समस्या भएपछि दिउँसो अस्पताल भर्ना गरिएको थियो । शुक्रबार उपचारका लागि गरिएको पीसीआर परीक्षणमा कोराना पुष्टि भएको अस्पतालका आकस्मिक विभाग प्रमुख डा. सानु श्रेष्ठले जानकारी दिए ।
श्रेष्ठका अनुसार थप स्वास्थ्य परीक्षणमा निमोनियाबाट समेत ग्रस्त भएका उनलाई उपचारका क्रममा पाइपबाट स्वासप्रस्वास गराइएको थियो । आइसीयू श्यया नहुँदा आकस्मिक कक्षमै उपचार गराइएको अस्पतालले जनाएको छ ।
काठमाडौं । शनिबार भारतमा चारलाख भन्दा बढी कोरोनाभाइरस संक्रमित थपिएका छन् । स्वास्थ्य मन्त्रालयका अनुसार एकैदिन भारतमा ४ लाख १ हजार ९९३ जना संक्रमित थपिएका हुन् ।
पछिल्लो २४ घण्टामा ३५२३ जनाको मृत्यु भएको छ । २ लाख ९९ हजार ९८८ जना निको भएका छन् ।
भारतमा कूल संक्रमित संख्या १ करोड ९१ लाखभन्दा बढी छ । कूल मृतक संख्या २ लाख ११ ८५३ पुगेको छ । सक्रिय संक्रमित संख्या ३२ लाख ६८ हजार ७१० पुगेको छ ।
१५ करोड ४९ लाखभन्दा बढीलाई खोप लगाइएको छ ।
ब्राजिल । २४ घण्टायता कोभिड-१९ को संक्रमणबाट यहाँका ३ हजार १६५ नागरिकको मृत्यु भएको छ । ब्राजिलको स्वास्थ्य मन्त्रालयले दिएको जानकारी अनुसार बुधबार मात्र यहाँ अघिल्लो २४ घन्टामा कोभिड-१९ को संक्रमणमा परेका यहाँका ती नागरिकको एकै दिनमा ज्यान गएको हो ।
यो सँगै ब्राजिलमा कोभिडको प्रकोपबाट मृत्यु हुने व्यक्तिको संख्या करिब ४ लाख नजिक पुगेको छ । प्राप्त समाचारअनुसार यहाँका तीन लाख ९८ हजार १८५ जनाको यो संक्रमणबाट मृत्यु भएको सो मन्त्रालयले दिएको समाचारमा जनाइएको छ ।
त्यसैगरी सोही अवधीमा थप अर्थात् गएको २४ घन्टायता करिब ८० हजार जनामा कोरोना भाइरस संक्रमण देखिएको पनि मन्त्रालयले जनाएको छ । कोरोना भाइरसको संक्रमण शुरु भएबाट ब्राजिलमा हालसम्म १ करोड ४५ लाख ३७ हजार जनाभन्दा बढीमा सो संक्रमण भएको बताइएको छ ।
स्वास्थ्य मन्त्रालयका अनुसार पछिल्लो समय ब्राजिलमा कोरोना भाइरसको नयाँ प्रजातिको भाइरसका साथै नयाँ नयाँ वेभहरु आइरहेका छन् । अस्पतालहरूले बिरामीको चाप थेग्न नसकेपछि उपचारमा समस्या भएको जनाएका छन् । यहाँको अवस्था दिन प्रति दिन थप जटिल बन्दै गएको पनि बताएका छन् ।
यस देशमा कोरोना भाइरसबाट सबैभन्दा बढी प्रभावित राज्यका रुपमा साओ पाओलो रहेको छ । साओ पाओलोमा मात्र ९४ हजार भन्दा बढी नागरिकको ज्यान गएको छ । त्यसैगरी सो राज्यमा करिब ४० लाख नागरिक कारोना भाइरसबाट संक्रमित भएका छन् ।
यहाँका अधिकारीहरुले अप्रिल महिना ब्राजिलका लागि सबैभन्दा खराब महिना भएको बताएका छन् । उनीहरुले यस महिनाभित्र मात्र कम्तीमा पनि ७० हजार जना नागरिकको यही संक्रमणबाट नै ज्यान गएको बताएका छन् ।
तनहुँ । धारापानीमा बुधबार साँझ भएको स्कुटर दुर्घटनामा २ जनाको मृत्यु भएको छ ।
ऋषिङ-४ थप्रेकबाट दमौलीतर्फ आउँदै गरेको ग १८ प ३७७ नम्बरको स्कुटर दुर्घटना हुँदा सवार २ जनाको मृत्यु भएको हो ।
मृत्यु हुनेमा ऋषिङ-४ का ३७ वर्षीय सन्देश गजमेर र सोही ठाउँकी २६ वर्षीया पवित्रा रानाभाट रहेको जिल्ला प्रहरी कार्यालय तनहुँका प्रहरी नायब उपरीक्षक युवराज तिमिल्सिनाले जानकारी दिए ।
सन्देशलाई दमौली अस्पतालमा चिकित्सकले मृत घोषणा गरेका थिए भने पवित्राको पोखरास्थित मणिपाल शिक्षण अस्पतालमा मृत्यु भएको प्रनाउ तिमिल्सिनाले जानकारी दिए ।
मृतकमध्ये सन्देश बालविकास माध्यमिक विद्यालयमा लेखापालका रूपमा कार्यरत थिए भने पवित्रा महेन्द्रज्योति माध्यमिक विद्यालयको शिक्षिका थिइन ।
कोरोना सङ्क्रमणका कारण विद्यालय बन्द भएपछि उनीहरु दमौली फर्कदै थिए । ओरालोमा ब्रेक फेल भई अनियन्त्रित भई स्कूटर पल्टिँदा दुर्घटना भएको प्रहरीले जनाएको छ ।
कैलाली । कोरोना संक्रमित कैलालीका एक वृद्धको उपचारको क्रममा कोहलपुरमा मृत्यु भएको छ ।
जिल्लाको टिकापुर नगरपालिका १ ज्योतिनगर बस्ने वर्ष ७० का एक पुरुषको उपचारका क्रममा मृत्यु भएको हो ।
कोहलपुर मेडिकल कलेजमा मधुमेहको उपचार गराउन पुगेका उनीमा बुधवार कोरोना संक्रमण पुष्टि भएको थियो । श्वासप्रश्वासमा समस्या भएपछि उपचार्थ भर्ना भएका वृद्धको मेडिकल कजेलमा मृत्यु भएको टिकापुर नगरपालिकाका स्वास्थ्य प्रमुख बलबहादुर रावलले जानकारी दिए ।
जनकपुरधाम । प्रदेश २ मा हावाहुरी र चट्याङले दुईजनाको मृत्यु भएको छ भने एक बालक घाइते भएका छन् ।
बिहीबार बिहान हावाहुरीले धनुषाको मिथिला नगरपालिका ६ ढल्केवरमा इँटाको पर्खाल भत्किँदा किचिएर एक महिलाको मृत्यु भएको हो ।
मृत्यू हुनेमा स्थानीय ६० वर्षीया दौलतिया देवी दास रहेकी छन् ।
पर्खाल भत्किँदा च्यापिएर घाइते भएकी दासको उपचारको क्रममा जनकपुरमा मृत्यु भएको जिल्ला प्रहरी कार्यालय धनुषाले जनाएको छ ।
पर्खाल भत्किँदा मृतक महिलाकी नाति १२ बर्षिय अनुराग दासलाई पनि चोट लागेको छ । घाइते अनुरागको उपचार भइरहेको आफन्तले जनाएका छन् ।
प्रहरीका अनुसार मृतक महिला खाजाघर सञ्चाल गर्दै आएकी थिइन् । उनी नाति अनुरागलाई लिएर खाजाघरमै सुतिरहेका बेला स्थानीय शैलेन्द्र साहले निर्माण गरिरहेको घरको दोस्रो तल्लाको पर्खाल खसेको थियो ।
यस्तै हावाहुरीसँगै चट्याङ परेर रौतहटको गुजरा नगरपालिका ८ मा एकजनाको मृत्यु भएको छ । मृत्यु हुनेमा गुजरा नगरपालिका ७ का रामलखन महरा छन् ।
विहेमा सहभागी हुन महरा आफ्न्तको घर पुगेका थिए । शौच गर्न घरबाट बाहिर निस्केकै बेला चट्याङ लागेर उनको मृत्यु भएको रौतहट प्रहरीले जनाएको छ ।
बाँके । बाँकेमा बिहीवार मात्र दुई जना कोरोना संक्रमितको मृत्यु भएको छ । नेपालगञ्ज उपमहानगरपालिका वडा नं. १ बाँकेकी ६५ बर्षीया महिलाको बिहीवार दिउँसो मृत्यु भएको छ ।
नेपालगञ्ज मेडिकल कलेजमा बैशाख ७ गते पिसिआर टेष्ट गराएकी उनलाई कोरोना संक्रमण पुष्टि भएको थियो । बैशाख ८ गते भर्ना भएकी उनको बिहीवार मृत्यु भएको बाँकेका कोरोना फोकल पर्सन तेज वलीले जानकारी दिए ।
त्यसअघि नेपालगंज उपमहानगरपालिका वडा नं. १७ की ८६ वर्षीया महिलाको नेपालगंज मेडिकल कलेज कोहलपुरमा उपचारका क्रममा मृत्यु भएको वलीले बताए । यो सँगै बाँकेमा मृत्युु हुने कोरोना संक्रमितको संख्या ६८ पुगेको छ ।
मोरङ । मोरङ कानेपोखरी २ दलेलीमा चट्याङ पर्दा एक महिलाको मृत्यु भएको छ । बिहिबार बिहान परेको चट्याङमा परी स्थानीय ४३ बर्षीय सुकवती राजवंशीको मृत्यु भएको प्रहरीले जनाएको छ ।
पानी परेको बेला घर नजिकै रहेका गाईगोरू सार्न जाने क्रममा चट्याङमा परी राजवंशी गम्भीर घाईते भएकी थिईन ।
घाईते राजबंशीको उपचारको लागि उर्लाबारी स्थित मदनभण्डारी अस्पताल तथा ट्रमासेन्टर लगेकोमा अस्पताल पुर्याउन साथ मृत्यु भएको ईलाका प्रहरी कार्यालय उर्लाबारीले जनाएको छ ।
कैलाली । कञ्चनपुर भीमदत्त नगरपालिका वडा नम्बर ५ का वडाध्यक्ष मदन चन्दको मृत्यु भएको छ ।
वनभोज खाने क्रममा घाँटीमा एक्कासि समस्या देखिएपछि उपचारको क्रममा शुक्रबार राति उनको मृत्यु भएको जिल्ला प्रहरी कार्यालय कञ्चनपुरले जानकारी दिएको छ ।
शुक्रबार वडाध्यक्ष चन्दको नेतृत्वमा वडाका जनप्रतिनिधि तथा कर्मचारी गरी ८ जना बेदकोट नगरपालिकाको चुनेपानी क्षेत्रमा वनभोज मनाउन गएका थिए ।
त्यसैक्रमममा उनको घाँटीमा एक्कासि समस्या देखिएपछि उनलाई महाकाली अस्पताल ल्याइएको र उपचारको क्रममा मृत्यु भएको जिल्ला प्रहरी कार्यालय कञ्चनपुरका प्रहरी नायव उपरीक्षक अमर बहादुर थापा क्षेत्रीले जानकारी दिए ।
घटनाबारे अनुसन्धान भइरहेको उनले बताए । उनले शव परीक्षणपछि मृत्युबारे विस्तृत जानकारी हुनेसमेत बताए।
रुपन्देही । कपिलवस्तुको बुद्धभूमीमा नेपाली सेना सवार रहेको ट्रकले मोटरसाइकलाई ठक्कर दिँदा एक युवकको मृत्यु भएको छ ।
ठक्करबाट शिवराज नगरपालिका- ५ निवासी १९ वर्षीय भुुवन पाण्डेको मृत्यु भएको ट्राफिक प्रहरी कार्यालय गोरुसिंगे कपिलवस्तुले जनाएको छ ।
पूर्वबाट पश्चिम जाँदै गरेको नेपाली सेना सवार बा १ ग २४२३ नम्बरको ट्रकले विपरीत दिशाबाट आउँदै गरेको लु ३६ प ४५९८ नम्बरको मोटरसाइकललाई मंगलबार दिउँसो ठक्कर दिएर दुर्घटना भएको हो ।
बुुद्धभूूमी नगरपालिका ९ चम्पापुरमा भएको ठक्करबाट अर्का एक जना २१ वर्षीय अमृत रोकामगर घाइते भएका छन् । घाइतेको खुुट्टामा गम्भीर चोट लागेको छ । उनलाई थप उपचारका लागि कपिलवस्तुबाट बुटवल ल्याइएको छ ।
धनगढी । कैलालीमा एक जना कोरोना संक्रमित पुरुषको उपचारका क्रममा मृत्यु भएको छ । गोदावरी नगरपालिका–२ का ७० वर्षीय बृद्धको कोरोना संक्रमण बाट मृत्यु भएको हो ।
फागुन ३ गरे सेती प्रादेशिक अस्पतालको अस्थायी कोरोना अस्पतालमा भर्ना भएका उनको भेन्टिलेटरमा राखेर उपचार भइरहेको थियो । उपचारकै क्रममा सोमबार विहान उनको मृत्यु भएको सेती अस्पतालका सूचना अधिकारी दिलिप कुमार श्रेष्ठले जानकारी दिए ।
यो सहित सेती अस्पतालमा उपचारका क्रममा मृत्यु हुने संक्रमितको संख्या ३२ पुगेको छ । ५० शय्याको अस्थायी अस्पताल अहिले खाली भएको छ । उनीसँगै नेपालमा कोरोना संक्रमणबाट मृत्यु हुनेको संख्या २ हजार ९ सय ९५ पुगेको छ ।
आइतबार साँझसम्म नेपालमा २ लाख ७३ हजार ४३१ जनामा कोरोना संक्रमण देखिएको छ । तीमध्ये २ लाख ६९ हजार ८७६ जना निको भइसकेका छन् । आइतबार साँझसम्म देशभरका क्वारेन्टीनमा ६८ जना छन् ।
स्वास्थ्य मन्त्रालयले आइतबार सार्वजनिक गरेको तथ्यांकअनुसार देशभरका अस्पतालमा गरी ५२ जना कोरोना संक्रमितको आईसीयूमा र १० जनाको भेन्टिलेटरमा राखेर उपचार भइरहेको छ । ९ सय ९६ जना अस्पतालमा उपचाररत छन् भने बाँकी होम आईसोलेसनमा छन् ।