Tag: भक्तपुर

भक्तपुर । भक्तपुर नगरपालिका–७ को हनुमानघाटमा फोहाेर पानी प्रशोधन केन्द्र निर्माण कार्यको सुरु गरिएको छ । काठमाडौं उपत्यका खानेपानी लिमिटेड आयोजना कार्यान्वयन निर्देशनालय, काठमाडाैँ उपत्यका फोहाेर पानी व्यवस्थापन आयोजना र भक्तपुर नगरपालिका–७ को संयोजनमा उक्त निर्माण कार्य सुरु गरिएको हो ।

प्रशोधन केन्द्र निर्माणको भक्तपुर नगरपालिकाका प्रमुख सुनिल प्रजापतिले आइतबार उद्घाटन गरेका हुन् । आयोजनाका टोली उपप्रमुख प्रेम श्रेष्ठले प्रशोधन केन्द्रको क्षमता १० लाख लिटर प्रतिदिन र ११.५७ लिटर प्रति सेकेन्ड रहेको बताए ।

हनुमानघाट क्षेत्रमा नदीको जलस्तर उकास्न र वातावरणीय अवस्था सुधार्न नदीको तीन स्थानमा होचो बाँधसमेत निर्माण गरिने उनले बताए । उनले प्रशोधन केन्द्रको निर्माण ६ मार्च २०२२ बाट सुरु भई १५ महिनामा निर्माण सम्पन्न गरी निर्माण कम्पनीले नै पाँच वर्ष सञ्चालन तथा मर्मत सम्भार गर्ने बताए ।

आयोजना प्रमुख चन्द्रकुमार पाँ श्रेष्ठले १ एमएलडी क्षमता भएको फोहर पानी प्रशोधन केन्द्र निर्माण गरिने र प्रशोधन केन्द्र एमबीबीआर प्रविधिबाट सञ्चालन गरिने जानकारी गराए । उनले अनुमानघाटस्थित पुरानो फोहाेर पानी प्रशोधन केन्द्रको आधुनिकीकरण तथा क्षमता अभिवृद्धि गर्न यो आयोजना प्रस्ताव गरिएको बताए ।

कार्यक्रममा नगर प्रमुख प्रजापतिले स्थानीय तहको निर्वाचनमा भक्तपुरको घोषणापत्रमा दुईवटा पोखरी पुनः सञ्चालन गर्ने उल्लेख गरेको बताउँदै हनुमानघाट फोहाेर पानी प्रशोधन केन्द्र निर्माणपछि हनुमन्त्ते खोला सुधारसँगै सिंगो भक्तपुरकै स्वरुप फेरिने विश्वास व्यक्त गरे ।

प्रशोधन केन्द्रको काम इमानदारीपूर्वक निर्धारित समयभित्र कार्य सम्पन्न हुने आशा व्यक्त गर्दै उनले आयोजना सम्पन्न भइसकेपछि पनि तालिम प्राप्त जनशक्तिबाट यसको नियमित मर्मत सम्भार र सुपरिवेक्षण हुन जरुरी रहेको बताए ।

काठमाडौं । जिल्ला प्रशासन कार्यालय भक्तपुरमा नायव सुब्बादेखि सीडीओसम्म गरी पाँचजना महिलाले जिम्मेवारी सम्हालिरहेका छन् । आफूमातहत चारजना महिला नै भएका कारण काम गर्न सहज भएको सीडीओ रुद्रादेवी शर्मा बताउँछिन् ।

२०७८ भदौ ३० गते सहसचिव शर्माले भक्तपुर सीडीओको नियुक्ति पाएकी थिइन् । शर्मा त्यसअघि गुल्मीको सीडीओ थिइन् । काठमाडौं उपत्यकाका तीन जिल्लामध्ये महिलाले प्रमुख जिल्ला अधिकारीको जिम्मेवारी सम्हाल्ने उनी एक्लो महिला हुन् ।

यस्तै गृह मन्त्रालयले असोज २० गतेबाट सहायक प्रमुख जिल्ला अधिकारीको जिम्मेवारी पनि महिलालाई नै दिएको छ । यसअघि मन्त्रालयमा काजमा रहेकी उपसचिव सीता परियारलाई मन्त्रालयले सहायक प्रमुख जिल्ला अधिकारीको जिम्मेवारी दिएको हो । उनी नेपालकै पहिलो दलित महिला सहायक प्रमुख जिल्ला अधिकारीसमेत हुन् ।

गृह मन्त्रालयले सहायक प्रमुख जिल्ला अधिकारीपछिको तेस्रो वरीयतामा पनि महिलालाई नै जिम्मेवारी दिएको छ । कात्तिक एक गतेदेखि तेस्रो वरीयतामा  प्रशासकीय अधिकृतको जिम्मेवारी शाखा अधिकृत उर्मिला खतिवडाले सम्हाल्दै आएकी छन् । उनी जिल्ला प्रशासन कार्यालयमा नागरिकता शाखा प्रमुखको जिम्मेवारीमा पनि छन् । भक्तपुरको सूर्यविनायक नगरपालिका– ५ की स्थायी बासिन्दा खतिवडा यसअघि सोलुखुम्बु जिल्लाको सहायक प्रमख जिल्ला अधिकारी थिइन् ।

यस्तै कार्यालयको चौथो वरीयता अर्थात् प्रमुख प्रशासकीय अधिकृतकै जिम्मेवारीमा पनि महिला नै छन् । राहदानी तथा मुद्धा शाखाको प्रमुखसमेत रहेकी प्रशासकीय अधिकृत लुमा श्रेष्ठ ६ वर्षदेखि जिल्ला प्रशासन कार्यालय भक्तपुरमा कार्यरत छन् । उनी २०७२ चैत एक गतेबाट कार्यरत छन् ।

यस्तै कार्यालयको पाँचौ वरीयतामा पनि महिला नै रहेकी छन् । प्रशासन शाखाको प्रमुख जिम्मेवारीमा रहेकी नायव सुब्बा कमलादेवी कार्की एक वर्षभन्दा पहिले अर्थात् २०७७ साउन २२ गतेदेखि यस कार्यालयमा कार्यरत छन् ।

जिल्ला प्रशासनमा मात्र हाेइन भक्तपुरमा जिल्ला अदालत पनि महिलाकाे नेतृत्वमा छ । न्यायाधीश कमला पौडेलले जिल्ला अदालतकाे नेतृत्व लिएकी छन् । उनले एकै दिन २४३ मुद्दा फैसला गरी रेकर्ड राखेकी थिइन् ।

महिला नेतृत्वसँग काम गर्न सहज भएको छः सीडीओ शर्मा

जिल्ला प्रशासन कार्यालयका प्रमुख पाँच ओहोदामै महिला भएका कारण काम गर्न सहज भएको बताउँछिन्, प्रमुख जिल्ला अधिकारी शर्मा । शर्माले भनिन्, ‘काम गर्ने र र गराउने भनेको पदले हो । महिला र पुरुषले गर्ने गराउने भन्ने होइन । तर पनि तुलनात्मक रुपमा सहज अनुभूत भएको छ ।’

ललितपुरमा प्रमुख जिल्ला अधिकारीदेखि प्रमुख प्रशासकीय अधिकृतसम्म पाँच जनामध्ये कृष्णाकुमारी गौली मात्रै महिला छिन् । गौली प्रमुख प्रशासकीय अधिकृत हुन् । त्यस्तै काठमाडौंमा तीन जना सहायक प्रमुख जिल्ला अधिकारीमध्ये सुप्रभा खनाल मात्रै महिला छिन् ।