काठमाडौं । लकडाउनपछि व्यस्त हुने नायिकमध्ये पर्छिन् बेनिशा हमाल । उनले केही समयअघि फिल्म ‘भाँडाकुटी’ साइन्ड गरेकी थिइन् ।
फागुनदेखि सुरु हुने भनिएको सो फिल्म अहिले पि-प्रोडक्सनमै अड्किएको छ । उक्त फिल्म सुटिङमा ढिलाइ हुने भएपछि बेनिशाले नयाँ फिल्म साइन गरेकी छिन् ।
परिच्छेद सेनले निर्देशन गर्ने फिल्म ‘प्रेमगञ्ज’मा बेनिशा फिमेल लिड हुनेछिन् । डेब्यु ब्वाइ तेज गिरीसँग बेनिशाले अनस्क्रिन रोमान्स गर्ने पक्का भएको छ ।
सञ्जय लामाले खिच्ने यो फिल्म लभस्टोरी हो । त्रिकोणात्मक कथावस्तुमा बन्ने फिल्ममा सुप्रिया खनाल, राइडर प्रशान्त, सिम्रन खड्का, आयुषी ढकाल लगायतको अभिनय हुनेछ ।
चलचित्र चौतारीको ब्यानरमा निर्माण हुने फिल्मको छायांकन काठमाडौं, जिरी र काभ्रेमा हुने जनाइएको छ । २५ वर्षदेखि प्राविधिकको रुपमा कार्य गरेका राजु फुयाँल यसका निर्माता हुन् ।
बैशाख १ गतेदेखि छायांकन हुने निर्देशक सेनले जानकारी दिए । उनका अनुसार आउने भ्यालेन्टाइन्स डेमा फिल्म रिलिज हुनेछ ।
