काठमाडौं । नेपाल खेलकुद पत्रकार मञ्च-बाराले प्रदान गर्ने ‘खेलकुद पत्रकारिता पुरस्कार २०७७’ पत्रकार अविनाश आचार्यलाई प्रदान गरिने भएको छ ।
शनिबार सिमरामा सम्पन्न मञ्चको बैठकले २५ हजार राशीको सो पुरस्कार सीआईएन र स्थानीय रेडियो सिमरामा कार्यरत पत्रकार आचार्यलाई प्रदान गर्ने निर्णय गरेको अध्यक्ष सुनील गाउँलेले जानकारी दिए ।
‘भदौ २७ गते मञ्चको स्थापना दिवसका अवसरमा एक कार्यक्रमकाबीच पुरस्कार प्रदान गर्नेछौं,’ अध्यक्ष गाउले भने, ‘जिल्लामा रहेर क्रियाशिल पत्रकारहरूलाई खेलकुद पत्रकारितामा प्रोत्साहन गर्ने उद्देश्यले मञ्चले स्थापना गरेको सो पुरस्कार आगामी दिनमा प्रत्येक वर्ष प्रदान गर्ने बैठक निर्णय गरेको छ ।’
मञ्चका अध्यक्ष गाउँलेको अध्यक्षतामा सप्पन्न बैठकमा मञ्चका सल्लाहकारसमेत रहेका पत्रकार महासङ्घ बाराका अध्यक्ष रेशम तिवारी, वरिष्ठ पत्रकार गुरुप्रसाद गौतम लगायतको उपस्थिति थियो ।
