Tag: फिल्म छायांकन

३० भन्दा बढी फिल्म तत्काल छायांकनमा जाने तयारीमा छन् । सरकारले फिल्म सुटिङ फुकुवा गरेपछि माघ–फागुनदेखि फ्लोरमा जाने फिल्मको लाइन छ । अन्तराष्ट्रिय संयुक्त लगानीका फिल्म चाहिँ नेपाली नयाँवर्षदेखि जाने तयारीमा छन् ।

सरकारले लकडाउन घोषणा गरे लगत्तै सात फिल्मको सुटिङ रोकियो भने १५ फिल्म छायांकनमै जान पाएनन् । झन्डै दर्जन फिल्म फ्लोरमा जाने तयारीमा छन् । सरकारले छायांकन अनुमति दिएपछि भने निर्मातालाई हाइसञ्चो भएको छ ।

गणपति, भाँडाकुटी, चिलगाढी, प्रकाश, हुतुतु, चिसो वर्ष, दिपेश सापकोटा र प्रवेश पौडेलका फिल्म छायांकनमा जाने तयारीमा छन् । साथै, छक्का पञ्जाको नयाँ सिरिज, गोर्खा वारियर्स २, रानी महल, मनपरेसी, अल्लारे २, प्रेमपूजा, नाइँ नभन्नू ल ६, छड्के २, बेन्जो, पर्खिबसेँ २, सुदूर, सँगसँगै, पारस, चिसो मान्छे पनि सुटिङमा जाने छन् ।

लकडाउनले गर्दा सुटिङ रोकिएका परेदशी २, दुई नम्बरी, ए मेरो हजुर ४, गुञ्जन, देशान, तीन जन्तु, होल टाइमर र विच्छेद पुनः फ्लोरमा जाने तयारीमा छन् । चिसो सकिएलगत्तै छायांकन सुचारु गरिने सम्बन्धित निर्माताहरुले जनाएका छन् ।

मीनबहादुर भामले निर्देशन गर्ने अन्तराष्ट्रिय संयुक्त लगानीको फिल्म ‘चिसो वर्ष’ चाहिँ बैशाखदेखि छायांकन हुने तयारीमा छ । कास्टिङको अन्तिम चरणमा रहेको फिल्मका प्राविधिक विदेशबाट आउनुपर्ने भएपछि छायांकनमा ढिलाइ हुने भएको हो । दीपक रौनियारको फिल्म ‘राजा’ पनि छायांकनमा जाने तयारीमा छ । एरिक भ्याली आउने वर्ष क्याराभान २’ छायांकन लाने तयारी गर्दैछन् ।

सरकारी फुकुवासँगै फिल्म छायांकनले गति लिन थालेको छ । निर्माताहरु धमाधम कास्टिङ कलमा व्यस्त हुन थालेका छन् । फागुन १ देखि फिल्मांकन सुरु हुने सोसल–रोमकम ड्रामा ‘भाँडाकुटी’ले दुई लिड हिरोइनको खोजी थालेको छ ।

लिडमा बेनिशा हमाल कन्फर्म भए पनि अन्य दुई सहायक एक्ट्रेसको खोजी भैरहेको निर्देशक किरण विकले बताए । फिल्ममा तीन हिरो र तीन हिरोइनलाई लिनुपर्ने हुन्छ । निर्माताहरु चलेकै अनुहार र निर्देशक नयाँलाई स्थान दिनुपर्छ भन्ने योजनामा छन् ।

फिल्ममा यसअघि नै बेनिशा र मुकुन भुषाल अनुबन्धित भैसकेका छन् । सहायक हिरोहरुमा महावीर विश्वकर्मा र रिजेन थापा तय छन् । फिल्मका विद्यार्थी किरण विक यही फिल्मबाट निर्देशनमा डेब्यु गर्दैछन् । बुटवलको सेटिङमा छायांकन हुने फिल्मका थप दुई नायिकाको खोजीका लागि निर्देशक विकसहितको टोली त्यसतर्फ जाँदैछ ।

सकेसम्म आञ्चलिक अनुहारलाई नै लिने तयारीमा निर्देशक छन् । प्रेममा जातीयताको द्वन्द्वलाई उठान गर्ने फिल्मलाई गोपाल आचार्यले सह–निर्देशन गर्दैछन् । फिल्मलाई आउँदो नेपाली नयाँ वर्षमा रिलिज गर्ने तयारी छ ।

सरकारले अनुमति प्रदर्शन गरेसँगै चिसो यामपछि दर्जनौं फिल्म छायांकनमा जाँदैछन् । केही फिल्मको सुटिङ लकडाउनको कारणले अलपत्र परेको थियो । माघ र फागुनमा फ्लोरमा जाने फिल्मको सूची लामो हुने अनुमान गरिएको छ ।

झन्डै नौ महिनादेखि बन्द फिल्म गतिविधि शर्तसहित सञ्चालन गर्न सरकारले अनुमति दिएको छ । मंगलबार बसेको मन्त्री परिषद् बैठकले कोभिड–१९ मापदण्ड पालना गर्दै छायांकन गर्न सशर्त अनुमति दिएको हो । तर, फिल्म हल खुलाउने निर्णय चाहिं भएको छैन ।

मन्त्री परिषद्को निर्णयबारे संचारमन्त्री पार्वत गुरुङले नेपाल प्रेसलाई यस्तो जानकारी दिएका हुन् । मन्त्रालयले फिल्म गतिविधि सशर्त खुला गर्ने प्रस्ताव मन्त्री परिषद्मा लगेको थियो । फिल्म हलको छाता संस्था चलचित्र संघले पुस १० गतेदेखि एकपक्षीय रुपमा हल खुला गर्ने घोषणा गरिसकेको छ । तर, सरकार यस कुरामा भने मौन छ ।

फिल्म छायांकन गर्दा अब कास्ट एन्ड क्रिउले अनिवार्य कोभिड–१९ मापदण्ड पालना गर्नुपर्ने हुन्छ । विश्वव्यापी कोरोना महामारीको असर नेपालमा पनि देखिन थालेपछि २०७६ चैत ११ गतेबाट लकडाउन घोषणा गरिएको थियो । लकडाउन लगत्तै फिल्मको छायांकन रोकिएको थियो ।

सरकारले अनुमति नदिए पनि केही फिल्म छायांकन सुचारु भएको थियो भने, म्युजिक भिडियो छायांकन निरन्तर थियो । मोफसलमा जातीय फिल्म छायांकन पनि धमाधम भैरहेका थिए ।