Tag: प्रधानमन्त्री तथा मन्त्रिपरिषद् कार्यालय

काठमाडौं । प्रधानमन्त्री तथा मन्त्रिपरिषद्को कार्यालयमा तीन जना सचिवसहित ४० जना कर्मचारीमा कोरोना संक्रमण पुष्टि भएको छ । दुइ दिन लगाएर कार्यालयका कार्यरत २ सय जना कर्मचारीको पीसीआर परिक्षण गर्दा ४० जनामा कोरोना संक्रमण पुष्टि भएको प्रधानमन्त्री तथा मन्त्रिपरिषद्को कार्यालयले जनाएको छ ।

कार्यालयमा आर्थिक तथा पूर्वाधार विकास हेर्ने सचिव शिशिरकुमार ढुंगाना, सीसीएमसीका प्रमुखसमेत रहेका प्रादेशिक समन्वय र सामाजिक विकास हेर्ने सचिव रामप्रसाद थपलिया र भर्खरै सहसचिवबाट सचिवमा बढुवा भएर पदस्थापन हुन नसकेका सचिव कृष्णबहादुर रावतसहित ४० जना कर्मचारीमा कोरोना संक्रमण पुष्टि भएको कार्यालयका प्रवक्तासमेत रहेका सहसचिव महादेव पन्थले नेपाल प्रेसलाई जानकारी दिए । उनका अनुसार कार्यालयमा कार्यरत सहसचिव मनोज आचार्य र एक जना अर्का सचिव गरेर दुइ जना सहसचिवलाई पनि कोरोना संक्रमण पुष्टि भएको छ ।

कार्यालका सचिव थपलिया र ढुंगानालाई भने केहि दिन अघि नै संक्रमण पुष्टि भएको थियो । उनीहरु दुवै जना संक्रमणमुक्त भइनसकेको कार्यालयले जनाएको छ । प्रवक्ता पन्थका अनुसार प्रधानमन्त्री तथा मन्त्रपरिषद्को कार्यालयका दुइ जना सचिवमा कोरोना संक्रमण पुष्टि भइसकेपछि कार्यालयले राष्ट्रिय जनस्वास्थ्य प्रयोगशालाको टिम बोलाएर कार्यालयमा नै पीसीआर परिक्षण गराएको थियो । उनका अनुसार थप केहि कर्मचारी आइतबार पनि परिक्षण गरिएकाले उनिहरुको रिपोर्ट आउन बाँकी छ ।

कार्यालयका कर्मचारीमा कोरोना संक्रमणम पुष्टि भएपछि प्रधानमन्त्री तथा मन्त्रिपरिष्दको कार्यालयले कोराना संक्रमित तथा सामान्य ज्वरो तथा रुघाखोकी लागेका कर्मचारीलाई पनि घरमा नै बस्ने भनेको छ भने कार्यालयलाई निसंक्रमण पनि गरिसकेको छ ।

काठमाडौँ । प्रधानमन्त्री तथा मन्त्रिपरिषद् कार्यालय र गृह मन्त्रालयका प्रवक्ता फेरिएका छन् । प्रधानमन्त्री तथा मन्त्रिपरिषद् कार्यालयमा प्रवक्ताको जिम्मेवारी सहसचिव कृष्ण बहादुर राउतलाई दिइएको छ भने गृह मन्त्रालयको प्रवक्ताको जिम्मेवारी सहसचिव फणिन्द्रमणी पोखरेललाई दिइएको हो ।

यसअघि प्रधानमन्त्री तथा मन्त्रिपरिषद्को कार्यालयका प्रवक्ताको जिम्मेवारीमा रहेका सहसचिव किरणराज शर्मा सचिवमा बढुवा भएपछि कार्यालयको पूर्वाधार विकास महाशाखा हेर्ने रावतलाई प्रवक्ताको जिम्मेवारी दिइएको हो ।

यस्तै यस अघि गृह मन्त्रालयमा प्रवक्ताको जिम्मेवारीमा रहेका सहसचिव जनकराज दाहाललाई कारागार व्यवस्थापन विभागको महानिर्देशकको जिम्मेवारी दिइएपछि विभागमा महानिर्देशकको जिम्मेवारीमा रहेका पोखरेललाई आन्तरिक काज सरुवा गरेर शान्ति सुरक्षा महाशाखाको प्रमुखसहित प्रवक्ताको जिम्मेवारी दिने निर्णय भएको हो ।

काठमाडौं । सरकारले सहसचिवबाट सचिवमा बढुवा गरेका ४ जना सचिवको पदस्थापन गरेको छ । बढुवा भएका सचिव डा. दामोदर रेग्मीको गण्डकी प्रदेश प्रमुख सचिवमा पदस्थापन र गणेश प्रसाद पाण्डेको कर्णाली प्रदेश प्रमुख सचिवमा पदस्थापन गरिएको प्रधानमन्त्री तथा मन्त्रिपरिषद् कार्यालयले जनाएको हो ।

कार्यालयका अनुसार इन्जिनियरिङ सेवातर्फ प्रमिला बज्राचार्यलाई खानेपानी मन्त्रालय र कृषि तथा वन सेवाका डा. कृष्णप्रसाद आचार्यलाई कृषि तथा पशुपन्छी मन्त्रालयमा पदस्थापन गर्ने निर्णय भएको कार्यालयका प्रवक्ता समेत रहेका सहसचिव किरणराज शर्माले नेपाल प्रेसलाई जानकारी दिए ।

गत बिहीबार प्रधानमन्त्री निवास बालुवाटारमा बसेको मन्त्रिपरिषद् बैठकले ४ जना सचिवलाई बढुवा तथा पदस्थापन गर्ने निर्णय गरेको थियो । गण्डकी प्रदेश सरकारको प्रमुख सचिव करिव ४ ३ महिनादेखि र कर्णाली प्रदेशको प्रमुख सचिव १ महिनादेखि रिक्त रहेको थियो ।

काठमाडौं । कोरोना भाइरसको संक्रमण नेपाल दिनानुदिन बढिरहेका बेला सरकारले रोकथाम, नियन्त्रण तथा उपचारका कार्यलाई तिव्रता दिइएकाे जनाएकाे छ । प्रधानमन्त्री केपी शर्मा ओलीको सक्रियतामा शनिबारमात्र अक्सिजन सिलिण्डर अभावका विषयमा वालुवाटारमा नै छलफल भएको छ भने आइतबार प्रधानमन्त्री तथा मन्त्रिपरिषद्को कार्यालयमा बसेको कोभिड–१९ संकट व्यवस्थापन केन्द्र (सीसीएमसी) को बैठकमा पनि सहभागि भएर विभिन्न निर्देशन दिएका छन् ।

३ हजार नेपाली नेपाल प्रवेश, क्वारेटाइन नियम पालना नगर्ने ४२ हजारलाई कारवाही
पछिल्लो २ दिनमा देशभरका विभिन्नि सीमानाकाबाट ३ हजार भन्दा बढी नेपाली नेपाल प्रवेश गरेका छन् । गृह मन्त्रालयका अनुसार शनिबार र आइतबार गरेर दुइ दिनमा ३ हजार ३४ जना नेपाली नागरिक नेपाल प्रवेश गरेका हुन् । देशभर क्वारेटाइनको नियम पालना नगर्ने ४२ हजार ८ सय २८ जनालाई कारवाही तथा सचेत गराइएको गृह मन्त्रालयले जनाएको छ ।

३१ हजार भन्दा बढी आइसोलेसन सेन्टर व्यवस्थापन
देशभरमा ३१ हजार भन्दा बढी आइसोलेसन सेन्टरको व्यवस्थापन भएको पनि गृह मन्त्रालयले जनाएको छ । ति मध्ये करिब १ हजार ५ सय अक्सिजन सहितको आइसोलेसन सेन्टर व्यवस्थापन भएको मन्त्रालयका प्रवक्ता समेत रहेका सहसचिव जनकराज दाहालले नेपाल प्रेसलाई जानकारी दिए ।

३ सय ६५ विशेष, ५–५ वटा आइसीयू र भेन्टिलेटर बेड थप
स्वास्थ्य तथा जनसंख्या मन्त्रालयका अनुसार संक्रमितको उपचारका लागि १० हजार ८ सय १२ सामान्य वेड छन् । विशेष उपचारका लागि पछिल्लो २ दिनमा ३ सय ६५ बेड थपिएर जम्मा २ हजार ५ सय ९० बेड पुगेको मन्त्रालयले जनाएको छ । एचडीयू २ हजार २ सय २५, ५ वटा बेड थपिएर १ हजार ६ सय २३ आइसीयू बेड पुगेको मन्त्रालयका प्रवक्ता डा. समिरकुमार अधिकारीले नेपाल प्रेसलाई जानकारी दिए । उनका अनुसार पछिल्लो २ दिनमा नै ५ वटा थपिएर जम्मा भेन्टिलेटरको संख्या पनि ५ सय ९८ पुगेको छ ।

अक्सिजन उत्पादन, आपूर्ति र वितरणलाई प्रभावकारी बनाउन १ सय २६ स्थानमा अनुगमन
अक्सिजन उत्पादन, आपूर्ति र वितरणलाई प्रभावकारी बनाउन सम्बद्ध क्षेत्रमा १ सय २६ स्थानमा अनुगमन भएको वाणिज्य, आपूर्ति तथा संरक्षण विभागले जनाएको छ । उद्योग लगायत अन्य क्षेत्रमा प्रयोगमा रहेका १ हजार २ सय ९२ वटा अक्सिजन सिलिण्डर मेडिकल प्रयोजनका लागि फिर्ता भएका विभागका महानिर्देशक प्रकाश पौडेलले नेपाल प्रेसलाई जानकारी दिए । उनका अनुसार विभागले उपत्यकामा २ वटा खाद्य फर्म, एउटा स्वास्थ्य सामग्री फर्म व्यवसायको अनुगमन भएको र एउटा फर्मलाई ५ हजार जरिवाना समेत गराएको छ ।

देशभरका २९ उद्योगमा १ लाख भन्दा बढी सिलिण्डर
उद्योग, वाणिज्य तथा आपूर्ति मन्त्रालयका अनुसार उपत्यका भित्रका १० वटा उद्योग र उपत्यका बाहिरका १९ वटा उद्योगमा ठुलो ७२ हजार २ सय ५० र सानो ३९ हजार १ सय १४ गरेर १ लाख ११ हजार ३ सय ६४ सिलिण्डर रहेको जनाइएको छ ।

परराष्ट्र मन्त्रालयका अनुसार चीनको सिचुवान प्रान्तले नेपाल सरकारलाई सहायता स्वरुप दिएको ३ दशमलव ६ मिलियर आरएमबी बराबरको कोभिड–१९ विरुद्धको स्वास्थ्य सामग्री १९ मे मा सिचुवान एयरलाइन्सको चार्टर कार्गो उडानबाट काठमाडौं आइपुग्ने जनाएको छ । साथै अमेरिकी सरकारबाट प्राप्त हुने सहयोग आइतबार साँझसम्ममा आइपुग्ने जानकारी आएको छ ।

२ दिनमा ५ करोड भन्दा बढीको स्वास्थ्य सामग्री भन्सारबाट आयात
कोभिड–१९ रोकथाम, नियन्त्रण र उपचारका लािग वैशाख ३१ गते ३ करोड ७७ लाख ४३ हजार ४ सय ३१ बराबरको २८ लाख १३ हजार १६ थान विभिन्न उपकरण भन्सार नाकाबट आयात भएको भन्सार विभागले जनाएको छ । विभागका अनुसार त्यसै दिन ५७ लाख ५६ हजार ६ सय ९६ रुपैयाँ बराबरको अक्सिजन तथा औषधि आयात भएको छ ।

जेठ १ गते शनिबार १ करोड ३५ लाख ५ हजार ३ सय ६९ रुपैयाँ बराबरको १७ हजार १ सय ७७ थान विभिन्न मेडिकल उपकरण पनि आयात भएको विभागका महानिर्देशक यामलाल भुसालले नेपाल प्रेसलाई जानकारी दिए उनका अनुसार २ लाख ६ हजार ७ सय ५८ रुपैयाँ बराबरको अक्सिजन तथा औषधि पनि त्यसैदिन आयात भएको छ ।

ओमनबाट जम्मा ५ सय ६० थान अक्सिजन आयात
संस्कृति, पर्यटन तथा नागरिक उड्डयन मन्त्रालयका अनुसार जम्मा ५ सय यात्रुको उद्धार भएको छ । नेपाल वायुसेवा निगमले ओमनबाट जम्मा ५ सय ६० थान अक्सिजन सिलिण्डर लिई आएको मन्त्रालयका प्रवक्ता तारानाथ अधिकारीले नेपाल प्रेसलाई जानकारी दिए । उनका अनुसार चीनबाट प्राप्त हुने मध्ये १ हजार ६ सय अक्सिजन सिलिण्डर लिन नेपाल वायुसेवा निगमको कार्गो उडान शनिबारदेखि मंगलबारसम्म नियमित जाने आउने गरी तय भएको छ ।

अहिले अक्सिजन सिलिण्डर लगायतका स्वास्थ्य सामग्री प्राप्त हुने क्रम बढ्दै गइरहेको स्थितिमा संक्रमितलाई अक्सिजन र बेडको अभाव हुन नदिन, स्वास्थ्य उपचारलाई व्यवस्थित, सहज र सबैको पहुँच सुनिश्चित गर्न आ–आफ्नो क्षेत्रबाट योगदान पुर्‍याउन पनि सरकारले आग्रह गरको प्रधानमन्त्री तथा मन्त्रिपरिषदको कार्यालयका प्रवक्ता समेत रहेका सहसचिव किरणराज शर्माले नेपाल प्रेससँग बताए ।

काठमाडौ । काठमाडौं उपत्याकाभित्रका सबै सरकारी अस्पताल तथा स्वास्थ्य मन्त्रालयसँग सम्झौता गरेर कोभिड–१९ उपचार गरिरहेका निजी अस्पतालको लागि आवश्यक अक्सिजन सिलिण्डर आपूर्तिको व्यवस्था गर्ने जिम्मेवारी स्वास्थ्य तथा जनसंख्या मन्त्रालयलाई दिइएको छ । यस्तै काठमाडौं उपत्यका बाहिरका सबै अस्पतालमा आवश्यक अक्सिजन सिलिण्डरको आपूर्तिका व्यवस्था भने अस्पतालको समन्वयमा जिल्ला कोभिड संकट व्यवस्था केन्द्र (डीसीएमसी) ले गर्ने व्यवस्था मिलाइएको छ ।

बिहिबार प्रधानमन्त्री तथा मन्त्रिपरिषद्को कार्यालय सिंहदरबारमा मुख्यसचिवको कार्यकक्षमा कोभिड–१९ को रोकथाम, नियन्त्रण तथा उपचारका सम्बन्धमा भएको छलफलले यस्तो निर्णय गरेको हो । बैठकले उपत्यकामा मन्त्रालय र उपत्यका बाहिर डीसीसीएमसीलाई ‘मेडिकल अक्सिजनको प्रयोग र आवश्यकता सम्बन्धी मापदण्ड, २०७८’ बमोजिम अक्सिजन सिलिण्डर मिलाउने जिम्मेवारी दिएको हो ।

बैठकले चिकित्सकको सिफारिस बाहेक कसैले पनि घरमा वा संस्थामा अक्सिजन सिलिण्डर नराख्न, भएका सिलिण्डर नजिकको अस्पताल र स्थानीय प्रशासनमा उपलब्ध गराउन स्वास्थ्य तथा जनसंख्या मन्त्रालयले सार्वजनिक सूचना आव्हान गर्न पनि निर्देशन दिएको छ ।

अक्सिजन सिलिण्डर सम्बन्धी सूचनामूलक सन्देश सरकारी सञ्चार माध्यमम र टेलिफोन सेवा प्रदायकले रिंग ब्याक टोनको रुपमा प्रसारण गर्ने गराउने व्यवस्था गर्न सञ्चार तथा सूचना प्रविधि मन्त्रालयलाई पनि निर्देशन दिएको प्रधानमन्त्री तथा मन्त्रिपरिषद्को कार्यालयका प्रवक्ता समेत रहेका सहसचिव किरणराज शर्माले नेपाल प्रेसलाई जानकारी दिए ।
उनका अनुसार घरमा अक्सिजन सिलिण्डर राखे नराखेको, सम्बन्धित उद्योगले अस्पताल बाहेक अन्यत्र निजी प्रयोगमा दिए नदिएको अनुगमन स्थानीय प्रशासनमार्फत गर्ने गराउने व्यवस्था गर्न गृह मन्त्रालयलाई निर्देशन दिएको छ ।

यसका लागि प्रत्येक अक्सिजन ग्यास उद्योगमा प्राप्त सिलिण्डर र वितरण भएका सिलिण्डरको अभिलेख राख्नका लागि सशस्त्र प्रहरी खटाउने र त्यसको नियमित विवरण प्राप्त हुने व्यवस्था मिलाउने व्यवस्था गर्ने पनि बैठकले निर्णय गरेको छ ।

मापदण्ड विपरित अक्सिजन सिलिण्डर प्रयोग वा वितरण गर्न कसैलाई दवाव नदिने, उद्योग र अस्पतालले पनि कुनै किसिमले मापदण्ड विपरित प्रयोग नगर्ने नगराउने निर्णय बैठकले गरेको छ ।

नेपालले भन्सरा बिन्दुबाट आफै ढुवानी गर्न सक्ने भए चीनबाट स्थलमार्गबाट अक्सिजन सिलिण्डर ल्याउन सकिने देखिएकोले त्यस बमोजिम ढुवानी गर्न सक्ने कुराको जानकारी परराष्ट्र मन्त्रालयले चिनिया पक्षलाई गराउने र ढुवानी गर्दा सुरक्षाको व्यवस्था गृह मन्त्रालयले मिलाउने तथा ढुवानी खर्च स्वास्थ्य तथा जनसंख्या मन्त्रालयले भूक्तानी दिने पनि निर्णय भएको छ ।

सबै अक्सिजन पलान्ट २४ सै घण्टा सञ्चालन हुने व्यवस्था मिलाउने, खाली अक्सिजन सिलिण्डर तत्काल प्लान्टमा पठाउने र प्लान्टले पनि तत्काल भरी फिर्ता पठाउने व्यवस्था गर्ने, यसको समन्वय र अनुगमन स्वास्थ्य तथा जनसंख्या मन्त्रालयको समन्वयमा उद्योग मन्त्रालयले गर्ने र यस कार्यमा आवश्यक सहयोग गृह मन्त्रालय र स्थानीय प्रशासनले गर्ने निर्णय बैठकले गरेको प्रवक्ता शर्माले बताए ।

बैठकमा प्रधानमन्त्री तथा मन्त्रीपरिषद्को कार्यालयका सचिव, गृह मन्त्रालयका सचिव, स्वास्थ्य तथा जनसंख्या मन्त्रालयका सचिव, उद्योग, वाणिज्य तथा आपूर्ति मन्त्रालयका सचिव र परराष्ट्र मन्त्रालयका सचिव लगायतको सहभागितामा रहेको जनाएको छ ।

काठमाडौं । कोभिड-१९ को रोकथाम तथा नियन्त्रणका लागि प्रधानमन्त्री तथा मन्त्रिपरिषदको कार्यालयले अक्सिजन तथा भ्याक्सिनको अभाव हुन नदिने प्रतिबद्धता जनाएको छ ।

प्रधानमन्त्री तथा मन्त्रिपरिषदको कार्यालयले संयुक्त राज्य अमेरिकाको एष्ट्राजेन खोप उपलब्ध गराउन परराष्ट्र मन्त्रालयमार्फत् कुटनीतिक पहल भइरहेको प्रेस विज्ञप्तिमार्फत् जनाएको छ । त्यस्तै भारतसँग अक्सिजन आपूर्ति हुन दिन समेत पहल भइरहेको जानकारी गराएको छ ।

भ्याक्सिन सहयोगका लागि चीन सरकार र तिब्बतसगँ स्वास्थ्य सामग्री र उपकरण अनुदान सहायताका लागि पहल भइरहेको बताइएको छ । सरकार प्रत्येक नागरिकको स्वास्थ्यप्रति गम्भीर रहेको बताउँदै सर्वसाधारणलाई सरकारले जारी गरेका स्वास्थ्य मापदण्डको पालना गर्न विज्ञप्तिमार्फत् अपिल गरिएको छ ।

विज्ञप्तिमा आइसियु र भेन्टिलेटरको संख्या बढाउँदै लगिएको कुरा पनि उल्लेख छ ।

त्यस्तै विभिन्न उद्योगले लुकाएर राखेकाका ४ हजार ३ सय ३९ अक्सिजन सिलिण्डर जफत गरी अस्पताललाई बुझाउने र कोभिडको उपचार्थ प्रयोग हुने औषधि रेम्डेसिभिर कालोबजारी गर्ने पसलहरू नियन्त्रणमा लिइ सिल समेत गर्ने गरिएको गर्ने ब्यवस्था मिलाइएको मन्त्रिपरिषदको कार्यालयले जनाएको छ ।

कोभिडको उपचारका लागि प्रयोग हुने ३० लाख १० हजार ८८ मेडिकल उपकरण आयातका लागि सरकारले अनुमति दिएको थियो । जसमध्ये १२ हजार ३ सय ६३ सामग्री आयात भइसकेको छ ।
‘अक्सिजन प्रयोग गरी वस्तु उत्पादन गर्ने १० उद्योगबाट १ हजासर १ सय ३४ अक्सिजनका सिलिण्डर स्वास्थ्य प्रयोजनका लागि फिर्ता पठाइएको छ भने काठमाडौं उपत्यका भन्दा बाहिरका १८ उद्योगबाट २ हजार ८ सय ८५ प्रति घण्टा क्यूविक मिटर क्षमतामा सञ्चालन भइरहेको छ,’ विज्ञप्तिमा उल्लेख छ ।

त्यसैगरी २२ हजार ३ सय ५० ठूला सिलिण्डर र ८ हजार ९ सय ४ साना सिलिण्डर अक्सिजन उत्पादन गर्ने उद्योग सञ्चालनमा रहेको सरकारको दाबी छ ।

काठमाडौं । सरकारले कोभिड-१९ को रोकथाम र नियन्त्रणका लागि निषेधाज्ञा जारी सरकारी कार्यालयमा आलोपालो वा ‘वर्क फ्रम होम’ प्रणाली लागू गर्न निर्देशन दिएको छ ।

वैशाख १३ गते मन्त्रिपरिषद् बैठकले गरेका निर्णयलाई कार्यान्वयन गर्ने क्रममा प्रधानमन्त्री तथा मन्त्रिपरिषद्को कार्यालयले यस्तो निर्देशन दिएको हो ।

सरकारी र सार्वजनिक कार्यालयमा अनावश्यक भीडभाड हुन नदिन र अत्यावश्यक सेवा प्रवाह गर्ने कार्यालयबाहेक अन्य कार्यालय प्रमुखले आलोपालो पद्धतिअनुसार कर्मचारी खटाई काम पुनः सञ्चालन राख्ने व्यवस्था मिलाउन विभिन्न आयोग, प्राधिकरण र आफू मातहतका विभाग र कार्यालयलाई पत्र लेख्दै निर्देशन दिएको छ ।

कार्यालयले घरबाटै गर्न सकिने कामका हकमा घरबाटै गर्ने र पालोमा अनुपस्थित हुने कर्मचारीका हकमा कार्यालय प्रमुखले कोभिड काजको व्यवस्था मिलाउन भनेको हो ।

प्रधानमन्त्री तथा मन्त्रिपरिषद्को कार्यालयले यही वैशाख १३ गतेको मन्त्रिपरिषद्को निर्णय कार्यान्वयनका लागि ती संवैधानिकलगायत विभिन्न निकायमा यही वैशाख १५ गते पत्राचार गरी सो जानकारी दिएको हो । कोभिड–१९ को सङ्क्रमण बढेपछि काठमाडौँ उपत्यकालगायत ३१ जिल्लामा पूर्ण तथा आंशिक निषेधाज्ञा जारी गरिएको छ ।

काठमाडौँ । सरकारले न्याय सेवा तर्फका १७ कर्मचारीको बढुवा सिफारिस गरेको छ । आइतबार बसेको बढुवा समितिको बैठकले नेपाल न्याय सेवा, सरकारी वकिल समूह, राज राजपत्राङ्कित तृतीय श्रेणीमा ज्येष्ठता तथा कार्यसम्पादन मूल्याङ्कनबाट गरिने बढुवाका लागि १७ जनाको नाम सिफारिस गरेको प्रधानमन्त्री तथा मन्त्रिपरिषद्को कार्यालयले सूचना जारी गर्दै जानकारी गराएको हो ।

बढुवाका लागि सिफारिस हुनेको सूची यसप्रकार छ ।

काठमाडौ । सरकारले कोरोना भाइरस (कोभिड–१९) रोकथाम तथा नियन्त्रणका लागि कोरोना रोकथाम, नियन्त्रण तथा उपचार कोषबाट साढे ८ करोडभन्दा बढी रकम निकासा गरेको छ । कोभिड–१९ को प्रकोपबाट मृत्यु भएका बिरामीको शव व्यवस्थापनका लगायतका कामका लागि विभिन्न अस्पताललाई ८ करोड ५० लाख ८० हजार ३ सय रुपैयाँ निकासा भएको हो ।

कोष सञ्चालन समितिको बैठकले पूर्वाधार विकासको व्यवस्थापन गर्ने प्रयोजनका लागि संघीय सरकार मातहतका १५ वटा र प्रदेश सरकार मातहतका ३ वटा अस्पताललाई मात्र ३ करोड ६० लाख रकम निकासा दिएको प्रधानमन्त्री तथा मन्त्रिपरिषद् कार्यालयका प्रवक्ता समेत रहेका सहसचिव शंकर नेपालले बताए । उनका अनुसार १८ वटै अस्पताललाई २०–२० लाख रुपैयाँ रकम निकास गरिएको हो ।

प्रचलित कानून एवम स्वीकृत मापदण्डबमोजिम भुक्तानी गर्ने, लेखा राख्ने, लेखापरीक्षण गराउने र त्यसको प्रतिवेदन समेत पेश गर्ने गरी कोरोना रोकथाम, नियन्त्रण तथा उपचार कोषबाट रकम निकासा गरिएको प्रवक्ता नेपालले बताए ।

रकम पाउने संघीय सरकार मातहतका अस्पतलामा शुक्रराज ट्रपिकल अस्पताल टेकु, नेपाल प्रहरी अस्पताल महाराजगञ्ज, नेपाली सेना अस्पताल छाउनी, नेपाल एपीएफ अस्पताल बलम्बु, त्रिवि शिक्षण अस्पताल महाराजगञ्ज, पाटन स्वास्थ्य विज्ञान प्रतिष्ठान, ललितपुर, वीर अस्पतालन काठमाडौं, नारायणी अस्पतालन वीरगञ्ज, पोखरा स्वास्थ्य विज्ञान प्रतिष्ठान पोखरा, विपी कोइराला स्वास्थ्य विज्ञान प्रतिष्ठान धरान, भरतपुर अस्पताल चितवन, कोशी अस्पताल विराटनगर, गजेन्द्रनारायण अस्पताल सप्तरी, भेरी अस्पताल नेपालगञ्ज र डडेल्धुरा अस्पताल, डडेल्धुरा रहेका छन् ।

रकम पाउने प्रादेशिक अस्पतालमा लुम्बिनी अस्पताल, बुटवल, सुर्खेत अस्पताल विरेन्द्रनगर र सेती अस्पताल धनगढी रहेका छन् । बैठकले राप्ती स्वास्थ्य विज्ञान प्रतिष्ठान दाङलाई अक्सिजन प्लान्ट निर्माण तथा जडानका लागि २ करोड ५० लाख उपलब्ध गराएको छ ।

निजामती अस्पतालमा भेन्टिलेटर सहितको आइसीयु स्थापना गर्नका लागि २ करोड १५ लाख ९४ हजार ३ सय रकम निकासा दिएको छ । नेपाल एपीएफए अस्पताललाई थप मोलेकुलर ल्यावमा पिसिआर स्वाब सुरक्षित राख्ने प्रयोजनका लागि ७०–८० डिग्री तापक्रम क्षमताको एयर कोल्ड फ्रिजर जडान गर्नका लागि २४ लाख ८६ हजार निकासा दिइएको छ ।