काठमाडौं । नेपाल भलिबल संघको आयोजनामा जारी एनभीए महिला तथा पुरुष क्लब भलिबल च्याम्पियनसिपको छैठौं संस्करणका फाइनल खेलहरू आज हुँदैछन् ।
शनिबार त्रिपुरेश्वरस्थित राष्ट्रिय खेलकुद परिषद्को कभर्डहलमा हुने फाइनलमा पुरुषतर्फ त्रिभुवन आर्मी क्लब र हेल्प नेपाल तथा महिलातर्फ एपीएफ र न्यू डायमन्ड स्पोस्ट्स क्लब भिड्ने छन् ।
पुरुषतर्फको फाइनल खेल विभागीय टोली आर्मी र साविक विजेता हेल्प नेपालबीच दिउँसो ३ बजे सुरु हुनेछ । यस्तै, पुरुषतर्फको तेस्रो स्थानको लागि नेपाल पुलिस क्लब र एपीएफ क्लबले बिहान ११ बजे प्रतिस्पर्धा गर्नेछन् ।
यस्तै, महिलातर्फको फाइनलमा दिउँसो १ बजे एपीएफ क्लब र न्यु डायमन्ड स्पोर्ट्स क्लब खेल्ने छन् । यस्तै महिलाको तेस्रो स्थानको नेपाल पुलिस क्लब र त्रिभुवन आर्मीबीच बिहान ९ बजे प्रतिस्पर्धा हुनेछ ।
च्याम्पियनसिपको महिला र पुरुष दुवैतर्फ विजेताले ४ लाख प्राप्त, उपविजेताले २ लाख र तेस्रोले १ लाख प्राप्त गर्नेछन् । त्यस्तै सर्वोत्कृष्ठ खेलाडीले २५ हजारसँगै विधागत उत्कृष्ट खेलाडीले १० हजार रूपैयाँ प्राप्त गर्नेछन् ।
