Tag: प्रज्ञा प्रतिष्ठान

काठमाडौं। नेपाल प्रज्ञा–प्रतिष्ठानले वरिष्ठ साहित्यकार आनन्ददेव भट्टलगायतका विशिष्ट साधकहरूलाई आजीवन तथा मानार्थ प्राज्ञ सदस्यता प्रदान गरेको छ ।

प्रतिष्ठानले वरिष्ठ साहित्यकार आनन्ददेव भट्ट, वरिष्ठ साधक डा. तारानाथ शर्मा, वरिष्ठ कवि नरेश शाक्य,वरिष्ठ दर्शनशास्त्री प्रा.डा. वीरेन्द्रप्रसाद मिश्रलाई आजीवन सदस्यताको सम्मानपत्र प्रदान गरेको हो ।

प्रज्ञा भवनमा आयोजित कार्यक्रम समापनपश्चात कुलपति गंगाप्रसाद उप्रेतीले सदस्य सचिव प्रा. उपाध्याय, प्राज्ञ परिषद् सदस्य प्रा.डा.हेमनाथ पौडेल र प्राज्ञ सभा सदस्य एवम् सञ्चार तथा डायास्पोरा संयोजक शशी लुमुम्बूसहित मेडिकेयर अस्पतालमा उपचाररत रहेका वरिष्ठ साधक भट्ट र चाबहिलस्थित निजी निवासमा आराम गरिरहेका वरिष्ठ साधक डा.शर्मालाई सोही स्थानमा गएर सम्मान अर्पण गरे ।

कार्यक्रममा बोल्दै कुलपति उप्रेतीले आजीवन तथा मानार्थ प्राज्ञ सदस्यता राज्यका तर्फबाट नेपाल प्रज्ञा–प्रतिष्ठानले विशिष्ट साधकलाई प्रदान गर्ने विशिष्ट सम्मान भएको बताए।

वरिष्ठ साहित्यकार आनन्ददेव भट्टले साढे ६ दशकभन्दा लामो समयदेखि नेपाली साहित्यअन्तर्गत कविता, काव्य र समालोचनाका साथै भाषा, दर्शन, सामाजिक शास्त्र आदि विषयक्षेत्रमा सिर्जना, अनुसन्धान र प्राध्यापनका माध्यमबाट गहकिलो र विशिष्ट योगदान गरेका छन् । यस्तै

वरिष्ठ साधक डा। तारानाथ शर्माको सात दशकदेखि साधनारत रही नेपाली साहित्यअन्तर्गत निबन्ध÷नियात्रा, कथा र उपन्याससृजना तथा समालोचनाका साथै भाषा–व्याकरणका क्षेत्रमा अध्ययन÷अनुसन्धान, सम्पादन एवम् प्रकाशनका माध्यमबाट विशिष्ट योगदान रहेको छ ।

पोखरा । पोखरा महानगरले हालै गठन गरेको ‘पोखरा प्रज्ञा प्रतिष्ठान’का नवनियुक्त पदाधिकारीले बुधबार शपथ ग्रहण गरेका छन् । प्रतिष्ठानका नवनियुक्त कुलपति पदमराज ढकाललाई महानगर प्रमुख मानबहादुर जिसीले र बाँकी पदाधिकारीलाई कुलपति ढकालले शपथ खुवाएका हुन् ।

प्राज्ञ सदस्यमा लोकदोहोरी गायक जीवन दाहाल, जनवादी गायक कृष्ण भण्डारी, साहित्यकार प्रकाश ज्ञवाली, कलाकार मिलन शेरचन, कवि सरस्वती श्रेष्ठ र संगीतकार दिलीप गायक छन् ।

यसअघि सदस्यमा संगीतकार तथा गायक धनबहादुर गन्धर्वको नाम सिफारिस भएको थियो । तर, गायकको माघमा निधन भएपछि उनका छोरा गायकलाई प्रतिष्ठानमा नियुक्ति गरिएको हो ।

११ सदस्यीय सांगठनिक ढाँचामा बनेको प्रतिष्ठानमा दुई जनाको पद रिक्त छ । ती पदमा पछि नियुक्त गरिने महानगरले जनाएको छ । प्रतिष्ठानमा दुई जना कार्यपालिका बोर्ड सदस्य समेत रहनेछन् भने महानगरकै प्रमुख प्रशासकीय अधिकृत सदस्य सचिव रहने महानगर प्रज्ञा प्रतिष्ठान ऐनमा उल्लेख छ ।

महानगर प्रमुख जिसीले पोखरा महानगरभित्रका भाषा, साहित्य, संस्कृति, कला, नाटक तथा संगीतको संरक्षण र सम्वर्धन गर्न प्रतिष्ठान स्थापना गरेको बताए । ‘पोखराको कला, साहित्य, संस्कृति लगायत सम्पूर्ण विधिको संरक्षणमा प्रतिष्ठानले सरोकारवालसँग छलफल गरेर गुरुयोजना निर्माण गरोस्’ उनले भने ।

पोखरा महानगर उपप्रमुख मञ्जुदेवी गुरुङले पोखरा कला, संगीत, साहित्य र संस्कृतिको उर्वर भूमि भएको बताइन् । ‘प्रतिष्ठानले सबैलाई एकीकृत गरेर महानगरको पूँजी बनाउन यसले भूमिका खेल्नुपर्छ,’ उनले भनिन् ।

महानगरका प्रमुख प्रशासकीय अधिकृत तथा पोखरा प्रज्ञा प्रतिष्ठानका सदस्य सचिव महेश बरालले गण्डकी प्रदेशका साहित्य, कला, संस्कृति र संगीतलाई मूल प्रवाहमा ल्याउनलाई प्रतिष्ठानले काम गर्नुपर्ने बताए ।

नव नियुक्त कुलपति पदमराज ढकालले प्रतिष्ठानको उद्देश्य अनुरुप अगाडि बढाउने बताए । उनले पोखरामा सिर्जना ग्राम र सांस्कृतिक ग्राम आवश्यक भएकाले ग्राम स्थापना गर्न प्रतिष्ठानले पहल गर्ने बताए ।

पोखरा महानगरको छैठौं नगरसभाले ‘महानगर प्रज्ञा प्रतिष्ठान ऐन–२०७६’ पारित गरेको थियो । उक्त ऐनकोे दफा ८ बमोजिम प्रतिष्ठान गठन भएको हो ।

यससँगै पोखरा महानगर आफ्नै प्रज्ञा प्रतिष्ठान गठन गर्ने गण्डकी प्रदेशको पहिलो स्थानीय तह बनेको छ । महानगरले प्राज्ञ छनोटका लागि पोखरा ७ वडाध्यक्ष रामचन्द्र बरालको संयोजकत्वमा ३ सदस्यीय समिति गठन गरेको थियो ।