Tag: प्रचण्ड–माधव पक्ष

काठमाडौं । नेकपा संसदीय दलको नेताबाट केपी ओलीलाई हटाएर प्रचण्डलाई चयन गरिएको भन्ने प्रचण्ड-माधव पक्षको सूचनालाई संघीय संसद सचिवालयले दर्ता गर्न अश्वीकार गरेको छ ।

दलको बैठकलगत्तै बहुमत सांसदको हस्ताक्षर रहेको दाबीसहित प्रचण्ड, माधव नेपालसहितका नेताहरु संसद सचिवालयमा सो जानकारी दर्ता गराउन संसदका महासचिवसमक्ष पुगेका थिए ।

महासचिव भरतराज गौतमले कानून र ऐन तथा सम्बन्धित दलको विधान समेत बुझेर आवश्यक कारबाही अघि बढाउने बताएपछि ठूलो स्वरमा चर्काचर्की परेको छ । नेताहरुले आफूहरु वैधानिक भएको भन्दै मान्यता दिनुपर्ने बताएका छन् ।

स्रोतका अनुसार निवेदन दर्ता नभई आफूहरू बाहिर ननिस्कने भनेर नेताहरुले दबाब दिए पनि महासचिव गौतमले भने परामर्श गरेर निकास दिने बताएका कारण प्रचण्ड-माधव पक्षका नेताहरु आक्रोशित बनेका छन् ।

काठमाडौं । नेपाल कम्युनिष्ट पार्टी (प्रचण्ड-माधव पक्ष) को संसदीय दलको बैठक बस्ने भएको छ। बैठक दिउँसो एक बजे सिंहरदबारस्थित संसदीय दलको कार्यालयमा बस्न लागेको हो ।

प्रमुख सचेतक देव गुरुङले बैठकमा ओलीपक्षीय सांसदहरूलाई पनि आमन्त्रित गरिएको बताए ।

विभाजित नेपाल कम्युनिष्ट पार्टीको ओली पक्षले पनि शनिबारका लागि संसदीय दलको बैठक डाकेको छ। शनिबार दिउँसो सिंहदरबारस्थित नेकपा संसदीय दलको कार्यालयमा बोलाइएको बैठकमा प्रचण्ड-माधव पक्षलाई समेत बोलाइएको छ।

सबै सांसदहरुलाई एसएमएसमार्फत आमन्त्रण गरिएको प्रमुख सेचतक विशाल भट्टराईले जानकारी दिए।

संघीय संसदमा सग्लो नेकपाका १७४ सांसद छन् ।

सुर्खेत । कालीकोट रासकोट नगरपालिकाका नगरप्रमुख काशीचन्द्र बरालले आफू प्रचण्ड-माधव पक्षीय नेकपामै फर्किएको घोषणा गरेका छन् ।

फागुन ४ गते नेपाल प्रेससँग कुरा गर्दै बरालले राजनीतिक संस्कार हराएको प्रचण्ड-माधव पक्षमा नबस्ने भन्दै आफू ओलीतिर लागेको बताएका थिए । उनले भनेका थिए, ‘मैले टिम बदलेको सत्य हो । कहिले घोषणा हुन्छ अहिले भन्दिन । म आफैंले ओली पक्षमा लागेको घोषणा गर्छु । प्रचण्ड पक्षले राजनीतिक संस्कार खत्तम बनाए । त्यही समूहमा रहेर काम गर्न सक्ने वातावरण भएन । अति पेलेपछि विस्फोट हुने रहेछ, भयो ।’

बिहीबार प्रेस विज्ञप्ति जारी गर्दै बरालले आफ्नो विषयमा सञ्‍चारमाध्यमले अर्नगल प्रचार गरेको आरोप लगाएका छन् ।

यता, ओलीपक्षीय नेकपा कालीकोटका सचिव नेश्नल शाहीले मेयर फर्किएको कुरा सामाजिक सञ्जालबाटै थाहा पाएको बताए । ‘उहाँलाई हामीले ओली समूहमा आउन भनेका थिएनौं । उहाँ आफै राजनीतिक संस्कार ओली समूहमा छ भन्दै आउनु भएको हो । उहाँलाई पार्टीले केन्द्रीय सदस्य पनि बनाइसकेको थियो ’, उनले भने, ‘प्रदेश सभा निर्वाचन क्षेत्र नं. ‘ख’ को अध्यक्ष माग्नु भएको थियो । त्यो अहिले नै हुन नसक्ने देखेपछि जानु भएको हो कि थाहा भएन ।’

बरालले विज्ञप्तिमा लेखेका छन्, ‘केही संचार माध्यम र सामाजिक सञ्जालमा मेरो नाम, फोटो, कपोलकल्पीत पद जोडेर मेरो औपचारिक धारणा सार्वजनिकजनिक नहुँदै ‘हामी नै आधिकारिक हौं’ भन्दै नानाथरी गरिएका प्रचारबाजीको म घोर भर्त्सना गर्दछु । विगतदेखि अहिलेसम्म आइपुग्दा आम समुदायको भावना, क्रान्तिमा गरेको त्याग, तपस्या, बलिदानी, शहीदका अधुरा सपनाहरू पूरा गर्ने अभिभारा, पार्टी नेतृत्व र कार्यकर्ताको भावनाको उच्च कदर गर्दै अध्यक्षद्वय कमरेड पुष्पकमल दाहाल (प्रचण्ड) र कमरेड माधव कुमार नेपालले नेतृत्व गरेको नेकपामै निरन्तर रहिरहेको स्पष्ट पार्न चाहन्छु ।’

काठमाडौं । विभाजित नेपाल कम्युनिष्ट प्रचण्ड-माधव पक्षको केन्द्रीय कमिटी बैठक पेरिसडाँडामा शुरू भएको छ ।

केही बेरअघि सकिएको स्थायी कमिटी बैठकले संसदीय दलको नेता फेर्ने एजेन्डा केन्द्रीय कमिटी वैठकमा लैजाने निर्णय गरेको थियो ।

प्रचण्ड-नेपाल पक्षको संसदीय दलको बैठकले यसअघि नै संसदीय दलको नेताबाट केपी ओलीलाई हटाएर प्रचण्डलाई नेता बनाउने निर्णय गरेको थियो ।

काठमाडौं । प्रचण्ड-माधव पक्षीय नेकपाको स्थायी कमिटी बैठक जारी छ ।

केही बेरपछि शूरू हुने केन्द्रीय कमिटी बैठकका एजेण्डा तय गर्न स्थायी कमिटी बैठक बसिरहेको हो ।

संसद पुन:स्थापनापछि पहिलो पटक बस्न लागेको केन्द्रीय कमिटी बैठकले पछिल्लो राजनीतिक घनाक्रमबारे निर्णय लिने बताइएको छ ।

काठमाडौं । विभाजित नेकपाको प्रचण्ड-माधव पक्षले पुस ५ गते प्रतिनिधिसभा विघटनपछि दर्ता गराएको प्रधानमन्त्री केपी शर्मा ओलीविरुद्धको अविश्वास प्रस्ताव संसदका आगामी अधिवेशनमा अघि नबढाउने भएको छ ।

९० जना सांसदको हस्ताक्षरसहित दर्ता गरिएको प्रस्तावको वैधानिकतामाथि समेत प्रश्न उठेको र कांग्रेस, जसपालगायतका दलहरुले सो प्रस्तावलाई समर्थन जनाउने सम्भावना समेत नदेखिएपछि आफ्नो प्रस्ताव अघि बढाउनबाट प्रचण्ड-माधव पक्ष पछि हटेको हो ।

सोमबार बिहान बसेको सचिवालय बैठकमा समेत यसबारेमा छलफल भएको र अन्य दलहरुसँग समेत परामर्श गरेर नयाँ ढंगले जानुपर्ने देखिएकाले अहिले सो प्रस्तावको सन्दर्भमा थप कदम नचालिने प्रचण्ड-माधव पक्षका वरिष्ठ नेता झलनाथ खनालले बताए ।

पुस ५ गते दर्ता भएको प्रस्तावमा वैकल्पिक प्रधानमन्त्रीको रुपमा पुष्पकमल दाहाल ‘प्रचण्ड’ लाई अघि सारिएको छ । तर, सोही प्रस्तावमा अन्य दलले जस्ताको तस्तै सहमति नजनाउँदा अप्ठेरो हुने देखिएपछि पहिले नेकपा विभाजनको कानूनी मान्यता समेत टुंगो लगाएर नयाँ ढंगले अघि बढ्नुपर्ने उनले बताए ।

पूर्वसभामुख समेत रहेका नेकपा संसदीय दलका उपनेता सुवास नेम्वाङले भने प्रतिनिधिसभा पुनःस्थापनासँगै संसदमा विचाराधीन विधेयक र प्रस्तावहरु स्वतः सक्रिय हुने बताए । यद्यपि अविश्वास प्रस्ताव दर्ता गर्नेले फिर्ता लिन सक्ने उनको भनाइ छ ।

सभामुखले समेत यसबारेमा परामर्श गर्ने भएका छन् । प्रचण्ड-माधव पक्ष नेकपा संसदीय दलबाट ओलीलाई हटाउने प्रक्रियामा भने नजाने भएको छ । पहिले दर्ता गरिएको अविश्वास प्रस्तावका हस्ताक्षरकर्तामध्ये ६ जना सांसदले फिर्ता लिइसकेका छन् ।

काठमाडौं । नेकपाको प्रचण्ड-माधव पक्षले प्रतिनिधिसभा पुन:स्थापना भएको सन्दर्भमा प्रधानमन्त्रीविरूद्धको अविश्‍वास प्रस्तावबारे आवश्यक परे नयाँ ढंगबाट सोच्ने बताएको छ ।

पेरिसडाँडामा केहीबेरअघि सकिएको स्थायी कमिटी बैठकको निर्णयबारे जानकारी दिंदै प्रवक्ता नारायणकाजी श्रेष्ठले भने, ‘भ्रमपूर्ण ढंगबाट प्रतिगामी गुटमा लाग्नुभएकाहरूलाई आ-आफ्नो जिम्मेवारीमा फर्कन आग्रह गरेका छौं ।’

बैठकले प्रतिनिधि सभा पुन:स्थापना गर्ने सर्वोच्चको फैसलाले संविधान र लोकतन्त्रको रक्षा गरेको ठहरसहित आन्दोलनमा सहयोग गर्ने सबैलाई धन्यवाद दिएको छ ।

‘फैसला आउनेबित्तिकै हामीले प्रधानमन्त्रीलाई राजीनामा दिन भनेका छौं । अहिलेसम्म राजीनामा आएको छैन । प्रतिनिधिसभाको बैठकबाट संविधान अनुसार प्रक्रियाको बारेमा छलफल हुनेछ ।’

आफूहरू हिजैदेखि पार्टी एकताको पक्षमा रहेको भन्दै श्रेष्ठले भने, ‘पार्टी एकतालाई प्रहार गर्ने चोइट्याउनेले र आफूलाई आत्मालोचक ढंगले प्रस्तुत नगरेसम्म कुराका लागि कुरा मात्र हुन्छ । मैले संविधान र लोकतन्त्रको विरुद्ध लागेर गल्ती गरें भन्नुपर्‍यो ।’

कांग्रेससँग सम्भावित सत्ता सहकार्यबारे सोधिएको प्रश्नको जवाफमा श्रेष्ठले भने, ‘प्रतिगमनको विरुद्धमा संयुक्त आन्दोलन गर्न चाहन्थ्यौं । कांग्रेसले निर्णय लिएन । संसद पुन:स्थापना भएपछि लोकतन्त्रवादी शक्तिहरू मिलेर जान छलफल गरेका हौं । हामीले फलानालाई बनाएर आफू बन्ने भनेर भनेका छैनौं ।’

काठमाडौं। नेपाल कम्युनिष्ट पार्टी(प्रचण्ड–माधव पक्ष)ले स्थायी कमिटी बैठक बोलाएको छ। प्रवक्ता नारायणकाजी श्रेष्ठले उपत्यकामा उपलब्ध स्थायी कमिटी सदस्यहरूको बैठक दुई बजेपछि राखिएको जानकारी दिए।

दिउँसो चार बजे संसदीय दलको बैठक बोलाएको प्रचण्ड–माधव पक्षले प्रतिनिसिधसभा पुर्नस्थापनापछिको घटनाक्रमबारे छलफल गर्न स्थायी कमिटी बैठक बोलाएको हो।

आजै ओली पक्षको समेत स्थायी समिति बैठक बसेको छ।

प्रधानमन्त्रीसमेत रहेका नेकपा अध्यक्ष केपी शर्मा ओलीले बिहान ११ बजेका लागि स्थायी समिति बैठक बोलाएका हुन् । पार्टी विभाजनपछि ओली पक्षीय स्थायी समितिको बैठक पहिलोपल्ट बस्न लागेको हो ।

काठमाडौं । नेपाल कम्युनिष्ट पार्टी (प्रचण्ड–माधव पक्ष) का अध्यक्ष पुष्पकमल दाहाल ‘प्रचण्ड’ ले सर्वोच्च अदालतले केही दिनमै संसद पुनर्स्थापना गर्ने दाबी गरेका छन्। आइतबार प्रवासी नेपालीसँग भर्चुअल माध्यमबाट कुराकानी गर्दै उनले प्रधानमन्त्री केपी शर्मा ओलीको ‘सेटिङ’ भत्किसकेको टिप्पणी गरे।

‘केपी ओलीको तथाकथित ‘सेटिङ’ भत्किसकेको छ’ उनले भने, ‘केही दिनमै अदालतले संसद पुनर्स्थापना गर्छ । अहिले माहोल सकारात्मक बनेको छ ।’ प्रचण्डले निर्वाचन आयोगले पनि आफूहरूलाई नै वैधानिकता दिनुको विकल्प नभएको दाबी गरे। उनले प्रधानमन्त्री ओलीले पछिल्लो पटक विक्षिप्त भएर अदालतलाई धम्क्याउने, उपराष्ट्रपति, सभामुखलगायतलाई अपमान गरेको समेत दाबी गरे।

‘प्रधानमन्त्री केपीजीले हिजो विराटनगरमा विक्षिप्त भएर अदालत विरुद्ध आन्दोलन गर्छु भन्नुभयो’ उनको भनाइ छ, ‘उपराष्ट्रपति, सभामुखलाई अपमान गर्ने काम गर्नुभयो। धेरै परिपक्व प्रदेश प्रमुखलाई बर्खास्त गर्नुभयो । यसले पनि उहाँ छट्पटिंदै जानुभएको देखिन्छ ।’

प्रचण्डले आफूहरूले विगतमा ओलीप्रति बढ्तै उदारता देखाएको हो कि भन्ने महसूस अहिले भएको टिप्पणी गरे। ‘केपीजी प्रति अलि उदार नै भयौं’ उनी भन्छन्, ‘पार्टी एकताको प्रस्तावक भएकाले पनि मैले उहाँलाई बुझाएर, सम्झाएर ठीक ठाउँमा ल्याउने प्रयत्न गरेँ । आलोपालो प्रधानमन्त्रीको सहमतिमा मैले उदारता नदेखाएको भए के हुन्थ्यो ?’

उनको थप भनाइ छ– ‘केपीलाई नियन्त्रण गर्ने र उनको अराजकतालाई नियन्त्रण गर्ने कुरामा हाम्रो उदारता पनि कतै कमजोरीका रुपमा रह्यो । त्यसको समीक्षा गरेर हामी प्रतिबद्धता पत्र ल्याउँदैछौं।’

विगतको तीतो अनुभवबाट शिक्षा लिएर नै संविधानमा प्रधानमन्त्रीलाई विशेषाधिकार नदिएको भन्दै प्रचण्डले भने–‘अहिले केपीजीले संविधानमा हमला गर्नुभयो र हामीले त्यसको तुरुन्तै प्रतिवाद गर्‍यौं ।’

काठमाडौं । प्रचण्ड-माधव पक्षीय नेपाल कम्युनिष्ट पार्टीमा संगठनभित्र बराबरी भाग लगाउने सहमति बनेको छ ।

२० पुसमा बसेको स्थायी कमिटी बैठकले पार्टी एकताका बाँकी काम टुंग्याउन भन्दै अध्यक्ष माधव नेपालको अध्यक्षतामा कार्यदल बनाएको थियो । नेताहरुको व्यस्तता कारण देखाउँदै कार्यदल तोकिएको समयभन्दा केही ढिला सहमतिमा पुगेको हो ।

स्थायी कमिटी सदस्य एवम् कार्यदल सदस्य गिरिराजमणि पोखरेलले पार्टी एकीकरणका काम टुंग्याउन ९ बुँदे मापदण्डमा सहमति बनेको जानकारी दिए ।

उक्त मापदण्ड अनुसार प्रदेश र जिल्लाका इन्चार्ज, सहइन्चार्ज एवं पार्टी कमिटीहरु तथा जनसंगठनका पदाधिकारीहरुमा ५०-५० प्रतिशत भाग लगाउने सहमति बनेको हो । साविकको जुन पक्षबाट रिक्त भएको हो त्यही पक्षवाट पूर्ति गरिने छ ।

‘सामान्यता पार्टी कमिटीहरु तथा जनवर्गीय संगठनका विभिन्न तहमा पपदाधिकारी तथा सदस्यहरुमा कमिटीको कुल सदस्य संख्यामा ५०/५० प्रतिशत हुनेगरी गर्ने, विशेष परिस्थितिमा विशेष व्यवस्था गर्न सकिनेछ ,’ मापदण्डमा भनिएको छ।

२० पुसको स्थायी कमिटी बैठकले ओली पक्षतिर लागेका प्रदेश इन्चार्जहरु शंकर पोखरेल र पृथ्वीसुब्बा गुरुङलाई हटाएको थियो । उनीहरुलाई हटाएर लुम्बिनी प्रदेश इन्चार्जमा युवराज ज्ञवाली र गण्डकी प्रदेश इन्चार्जमा देवेन्द्र पौडेललाई नियुक्त गरेको थियो ।

उपयुक्त मापदण्ड र आधारमा अब यथाशीघ्र रिक्त स्थानहरूको पूर्ति गरिने छ। यसअघि पूर्वएमाले र माओवादीबीच ६० /४० प्रतिशतको अनुपातमा भागबन्डा भएको थियो।

प्रचण्ड-माधव पक्षले विभिन्न प्रदेश कमिटीमा ९ पदाधिकारी नियुक्त गर्न बाँकी छ। प्रदेश २ का इन्चार्ज सत्यनारायण मण्डल, सहइन्चार्ज प्रभु साह र सचिव सुमन प्याकुरेल पनि ओली पक्षतिरै लागेकाले त्यहाँ सबै पदाधिकारी नियुक्ति गर्न बाँकी छ।

सग्लो नेकपाको जस्तै पदाधिकारी संरचनामा गए पनि उपाध्यक्ष र महासचिव नियुक्त हुन बाँकी छ । महासचिवमा धेरै आकांक्षी भएका कारण विशेष गरी महासचिव नियुक्ति प्रचण्ड-माधव पक्षलाई कठिनाइ भएको छ ।

महासचिवमा भीम रावल, सुरेन्द्र पाण्डे, हरिबोल गजुरेल, वर्षमान पुन, जनार्दन शर्मालगायत आकांक्षी छन् । पार्टीमा धेरै भाग नपाएका वरिष्ठ नेता झलनाथ खनालको सिफारिसअनुसार सुरेन्द्र पाण्डेलाई महासचिव बनाउने तयारी भए पनि आकांक्षीहरुको विरोधका कारण कुनै निर्णय भएको छैन् ।

काठमाडौं । प्रचण्ड-माधव पक्षीय नेकपाका अध्यक्ष पुष्पकमल दाहाल ‘प्रचण्ड’ले अहिलेको राजनीतिक परिस्थिति तरल भएको भन्दै जतिबेला जे पनि हुन सक्ने विश्लेषण सुनाएका छन्।

शुक्रबार पेरिसडाँडामा बसेको केन्द्रीय कमिटीको अनौपचारिक बैठकमा प्रचण्डले संक्षिप्त ‘ब्रफिङ’गर्दै प्रचण्डले जस्तो सुकै परिस्थितिका लागि पनि तयार रहन निर्देशन दिएका हुन् ।

‘साथीहरुलाई ‘रिजिड’नहुनका लागि अनुरोध गर्नुभयो,’ केन्द्रीय सदस्य युवराज दुलाल ‘शरद’ले नेपाल प्रेससँग भने, ‘जति बेला जस्तो सुकै परिस्थिति आउँदा पनि खेरी पनि तम्तयार रहन निर्देशन दिनुभयो ।’

परिस्थिति अनुकूल संघर्ष समितिले तय गर्ने संघर्षका कार्यक्रम पनि फेरिएको भन्दै प्रचण्डले बदलिने परिस्थिति अनुसारै अगाडि बढ्नुपरेको प्रचण्डको भनाइ थियो ।

‘संघर्ष समितिले बनाएका संघर्षका कार्यक्रम बेला-बेला फेरबदल हुनुको कारण पस्थितिमा आएको फेरबदलले हो,’ केन्द्रीय सदस्यको जिज्ञासमा मेटाउने क्रममा प्रचण्डले बैठकमा भनेका थिए, ‘यो तरलताको अवस्थामा पूर्वनिर्धारित योजना अनुसार नै कसरी जान्छ भन्ने हुँदैन । परिस्थिति बदलिए अनुसार हामी पनि बदलिए अगाडि बढ्नुपर्ने हुन्छ ।’

अहिलेको राजनीतिक परिस्थितिबारे भने अर्का अध्यक्ष माधवकुमार नेपालले ब्रिफिङ गरेका थिए । निर्वाचन आयोगबाट पार्टीको आधिकारिकता र सूर्य चिन्ह नपाए थप आन्दोलनमा उत्रिने भन्दै केन्द्रीय सदस्यहरुलाई तयार रहन नेपालले आग्रह गरेका छन् ।

बैठकलाई शुरूमै सम्बोधन गर्दै नेपालले निर्वाचन आयोगको संकेत राम्रो नदेखिएको सुनाएका थिए । दुई तिहाई सदस्य आफूहरुसँग हुँदा पनि निर्वाचन आयोगगले आधिकारिकता नदिए चुप नलाग्ने उनको भनाइ थियो।

नेपालले केपी ओलीले अनेक भ्रम फैलाउने खोजिरहेको र पूर्वएमालेहरू आफ्नो नेतृत्वमा लैजान खोजिरहेको भन्दै भ्रम चिर्नुपर्ने उनको भनाइ थियो ।

ओलीले सत्ता र शक्तिको दुरुपयोग गरेर जनता कार्यकर्तालाई भ्रमित पार्न खोजिरहेकाले भ्रम चिर्न आवश्यक रहेको उनले बताए।

बैठकमा सातै प्रदेशका इन्चार्जहरूले पार्टीको अवस्था र भावी रणनीतिको रिपोर्टिङ गरेका थिए ।

काठमाडौं । प्रचण्ड-माधव पक्षीय नेकपाले पार्टी आधिकारकिताबारे निर्वाचन आयोगले छिट्टै निर्णय लिने विश्वास जनाएको छ ।

शुक्रबार बसेको केन्द्रीय कमिटीको अनौपचारिक बैठकले गरेका निर्णय सुनाउँदै प्रवक्ता नारायणकाजी श्रेष्ठले भने, ‘विधि र नियम हेरेर हाम्रो पार्टीको आधिकारिकताबारे छिट्टै निर्णय लिनेछ भन्ने विश्वास हामीले गरेका छौं ।’

बैठकले संविधान र लोकतन्त्रको रक्षा गर्ने गरी अदालतले निर्णय लिने विश्वास व्यक्त गरेको उनले जानकारी दिए ।

श्रेष्ठले आज केन्द्रीय कमिटीका सदस्यको नागरिकता संकलनमात्रै गरिएको र हस्ताक्षर आवश्यक परेका बेला पनि संकलन गर्न सकिने बताए ।

पार्टिको प्रदेश, जिल्ला कमिटीलगायतका संरचनामा पदाधिकारी पनि चाँडै नियुक्त गर्ने निर्णय पनि गरेको छ ।

बैठकले अहिलेसम्म जारी आन्दोलन सफल भएको निष्कर्ष निकाल्दै चौथो चरणको सडक संघर्षका कार्यक्रम प्रभावकारी बनाउन तल्लो तहलाई निर्देशन दिएकोसमेत श्रेष्ठले बताए ।

काठमाडौं । विभाजित नेकपाको प्रचण्ड–माधव पक्षले केन्द्रीय कमिटीको बैठक आकस्मिक रुपमा बोलाएको छ ।

नागरिकता र परिचयपत्र सहित केन्द्रीय सदस्यहरु पार्टी केन्द्रीय कार्यालय पेरिसडाँडामा पुग्ने क्रम जारी रहेका बेला बैठक बोलाइएको हो ।

निर्वाचन आयोगले पार्टीको आधिकारिकता नदिने बुझेपछि प्रचण्ड–माधव पक्षले वहुमत केन्द्रीय सदस्यहरुको नागरिकतासहित आयोगमा गएर दबाब दिने तयारी गरिरहेको छ ।

सोही प्रयोजनको लागि बैठक बस्न लागेको केन्द्रीय सदस्य यज्ञराज सुनुवारले नेपालप्रेसलाई बताए । आयोगले वहुमत पक्षलाई आधिकारिकता नदिए दुर्भाग्यपूर्ण हुने उनको भनाइ छ ।

पेरिसडाँडामा अहिले केन्द्रीय सदस्यहरुको नागरिकता संकलन तथा हस्ताक्षर गर्ने क्रम चलिरहेको छ ।

नेकपाको ४४१ सदस्यीय केन्द्रीय कमिटीको वहुमत आफ्नो पक्षमा रहेको प्रचण्ड माधव पक्षले जनाएको छ । आयोगले भने पुस ५ गते प्रतिनिधिसभा विघटनपछि नेकपाका दुवै पक्षले गरेका निर्णयलाई मान्यता नदिने भनिसकेको छ ।

काठमाडौं । प्रतिनिधिसभा विघटनविरुद्ध आन्दोलनरत प्रचण्ड-माधव पक्षीय नेकपाले मानव साङ्लोसहित काठमाडौंको टुँडिखेल घेराउ गर्दैछ ।

बुधबारदेखि शुरू भएको चौथो चरणको संघर्षको कार्यक्रमअन्तर्गत आज अपरान्ह एक घण्टा टुँडिखेलबाहिर मानव साङ्लो बनाएर विरोध प्रदर्शन गरिंदैछ ।

साढे ३ बजे भेला भएर अपरान्ह ४ देखि ५ बजेसम्म मानव साङ्लोले टुँडिखेल घेर्ने केन्द्रीय संघर्ष समितिका सचिवालय सदस्य प्रकाश विकल्पले जानकारी दिए ।

नयाँ चरणको आन्दोलनअन्तर्गत फागुन २ गते नेकपा प्रचण्ड-माधव पक्षले ५ देखि २१ फागुनसम्म गर्ने संघर्षका कार्यक्रम सार्वजनिक गरेको थियो ।

काठमाडौं । भारतको त्रिपुरा राज्यका मुख्यमन्त्री विप्लव देवको अभिव्यक्तिलाई लिएर नेकपा (दाहाल-नेपाल) पक्षले आपत्ति जनाएको छ ।

पार्टी प्रवक्ता नारायणकाजी श्रेष्ठद्वारा हस्ताक्षरित वक्तव्यमा भारतीय गृहमन्त्री अमित शाहले अभिव्यक्तिलाई प्रष्ट पार्नुपर्ने माग राखिएको छ ।

संवेदनशिल विषयमा दिइएको अभिव्यक्तिले दुई छिमेकी मित्रराष्ट्रबीचको सम्बन्धमा भ्रम छर्ने र नकारात्मक असर पुर्‍याउने भन्दै विज्ञप्तीमा प्रष्टीकरण माग गरिएको छ ।

हालै त्रिपुरा राज्यका मुख्यमन्त्री देवले भारतीय गृहमन्त्री शाहले नेपाल र श्रीलंकामा बीजेपी संगठन विस्तार गरेर सरकार बनाउनुपर्ने बताएको उल्लेख गरेका थिए ।

यो अभिव्यक्तिलाई लिएर नेपालले औपचारिकरुपमै भारतीय विदेश मन्त्रालयमा प्रष्टीकरणसहितको कुटनीतिक नोट पठाएको छ ।

काठमाडौं । प्रतिनिधिसभा विघटनविरुद्ध रहेको प्रचण्ड-माधव पक्षीय नेपाल कम्युनिष्ट पार्टीले चौथो चरणको संघर्षको कार्यक्रम घोषणा गरेको छ।

आइतबार पेरिसडाँडामा पत्रकारसम्मेलन गरेर सार्वजनिक गरिएको कार्यक्रममा काठमाडौंको टुँडिखेललाई मानव साङ्लोले घेर्नेलगायतका छन् ।

केन्द्रीय संघर्ष समितिले फागुन ५ देखि २१ गतेसम्म संघर्षका कार्यक्रम सार्वजनिक गरेको छ ।

यस्ता छन् आन्दोलनका कार्यक्रम :

–फागुन ५ देखि १२ सम्म जिल्ला कमिटीले आफ्नो तहमा कार्यक्रम गर्ने ।

–फागुन ६ गते मानव साङ्लोले काठमाडौंको टुँडिखेल घेराउ गर्ने।

–७ गते सबै वडामा कार्यक्रम

–८ गते राजनीतिक दल, नागरिक समाज र बौद्धिक समुदायसमेतको उपस्थितिमा बृहत् अन्तरक्रिया गर्ने ।

–९ गते महिलाा हिंसा, बलात्कारविरुद्ध देशव्यापी प्रदर्शन ।

– फागनुन १० गते काठमाडौं उपत्यकाका प्रत्येक जिल्लाका दलितद्वारा प्रदर्शन ।

–फागुन १४ गते काठमाडौंमा बृहत् युवा र्‍याली ।

–फागुन १२ गते चितवन र २१ गते दाङमा बृहत् विरोध कार्यक्रम ।

काठमाडौं । प्रतिनिधिसभा विघटनविरुद्ध आन्दोलनरत विभाजित नेकपाको प्रचण्ड-माधव पक्षले अन्तिम धक्काको लागि तयार रहन आव्हान गरेको छ ।

सोनाम ल्होसार पर्वको अवसरमा अध्यक्षद्वय पुष्पकमल दाहाल र माधवकुमार नेपालले संयुक्त शुभकामना वक्तव्य निकाल्दै जनताको बलिदान, संघर्ष र प्राप्त जनमतको उपहास गरी संविधानको सफल कार्यान्वयन र संरक्षण नभएको भन्दै ‘प्रतिनिधिसभा विघटनको असंवैधानिक कदमविरुद्ध आन्दोलनमा होमिनुको विकल्प नभएको’ उल्लेख गरेका छन् ।

‘समुदायको पहिचान र हक अधिकारका लागि नेपाली जनताले सयौं वर्षदेखि संघर्ष गर्दै आएका छन् । नेपाली जनताको बलिदानीपूर्ण संघर्ष र त्यागले नै नेपालमा धर्मनिरपेक्षता, समानुपातिकता, समावेशिता, संघीयता र गणतन्त्रात्मक व्यवस्था कायम भएको हो’ शुभकामना वक्तव्यमा भनिएको छ, ‘पछिल्लो घटनाका रूपमा सरकारको तर्फबाट उत्पीडनमा परेका जाति, क्षेत्र र लिङ्गका जनताको मौलिक हक अधिकार कुण्ठित गर्ने दुष्प्रयास शुरू भएको छ । प्रतिगामी कदमविरुद्ध अन्तिम धक्काका लागि तयार रहन हार्दिक आव्हान गर्दछौं ।’

काठमाडौं । नेपाल कम्युनिष्ट पार्टी (प्रचण्ड-माधव पक्ष) ले नेता रामकुमारी झाँक्रीलाई विनाशर्त रिहा गर्न माग गरेको छ।

झाँक्रीको पक्राउलाई लिएर नेपाल प्रेससँग कुरा गर्दै प्रवक्ता नारायणकाजी श्रेष्ठले यो अभिव्यक्ति स्वतन्त्रतामाथि आक्रमण गर्ने र नियन्त्रण गर्ने प्रयत्न भएको टिप्पणी गरे ।

‘यो अभिव्यक्ति स्वतन्त्रतामाथि आक्रमण गर्ने र त्यसलाई नियन्त्रण गर्ने सर्वसत्तावादी प्रयत्न हो’ श्रेष्ठले भने, ‘हामी यो गिरफ्तारीको भर्त्सना गर्दछौं र विनाशर्त रिहा गर्न माग गर्छौं ।’

केन्द्रीय संघर्ष समितिका संयोजकसमेत रहेका श्रेष्ठले पक्राउको विषयलाई लिएर आफूहरूको बैठक बसेको बताए ।

‘हामीले यसलाई त्यतिकै हेरेर चाहिं बस्दैनौं’ उनको भनाइ छ, ‘ यही विषयमा केन्द्रीय संघर्ष समितिको कार्यालय बैठक भयो । हामीले वक्तव्य जारी गर्ने निर्णय गरिसकेका छौं । अब के गर्नुपर्छ हामी सल्लाह गर्छौं।’

काठमाडौं । नेपाल कम्युनिष्ट पार्टीको प्रचण्ड-नेपाल पक्षकी नेतृ रामकुमारी झाँक्रीले फेरि राष्ट्रपति विद्यादेवी भण्डारीमाथि प्रहार गरेकी छन् ।

पार्टीद्वारा राजधानीमा आयोजित विरोधसभामा भाषण गर्दै उनले राष्ट्रपतिमाथि बोल्दा महिला अस्मिताको प्रश्न नआउने बताइन् ।

झाँक्रीले भनिन्, ‘बोल्न पाइन्छ । नागरिकको मुखमा टेप टाँसिएको छैन । हामी बोल्न जन्मेका हौं । खड्ग प्रसाद ओली तानाशाह हुन् । उनको प्यादा बन्ने राष्ट्रपति माथि बोल्न पाइन्छ ।’

उनले थपिन्, ‘एउटा खलपात्रको विरुद्धमा बोल्दै गर्दा कसले भन्छ महिला अस्मिता मिचियो ? कुनै पदमा लिंग हुँदैन । मैले राष्ट्रपति संस्थाविरुद्ध होइन, व्यक्तिविरुद्ध बोलेको हुँ ।’

झाँक्रीले प्रचण्ड र माधव नेपाललाई आजकै सभाबाट ‘ओली प्रवृत्ति कहिल्यै नदोहोरिने सुनिश्‍चितताको घोषणा गर्नुहोस् ।’ भन्दै यो संघर्ष एउटा पात्रको विरोधमात्र नभएर लोकतन्त्र र संविधानको रक्षाका लागि भएको बताइन् ।

काठमाडौं । विभाजित नेपाल कम्युनिष्ट पार्टीको प्रचण्ड-माधव पक्षले आज फेरि काठमाडौंमा शक्ति प्रदर्शन गरिरहेको छ । प्रदर्शनीमार्गमा हुने सभाका लागि काठमाडौंका विभिन्न स्थानमा जुलुसहरू निस्किरहेका छन् ।

संसद विघटनको विरोधमा आन्दोलनरत उक्त पक्षले आजको प्रदर्शनका लागि विभिन्न जिल्लाबाट मानिसहरू ओसारेको छ । आमसभालाई शीर्ष नेताहरुले सम्बोधन गर्नेछन् ।

आज प्रचण्ड-माधव पक्षको आमसभामा बोल्ने वक्ताहरुको सूची लामो छ । तीन शीर्ष नेताहरू प्रचण्ड, माधवकुमार नेपाल र झलनाथ खनालले सभालाई सम्बोधन गर्नेछन् । यसैगरी अन्य वक्ताहरुमा अञ्जना विशंखे, अमृता थापा, भानुभक्त जोशी, महफुज अन्सारी, रामकुमारी झॉक्री, रामचन्द्र झा, सन्तकुमार चौधरी, जनार्दन शर्मा, देव गरुङ, रघु पन्त, नारायणकाजी श्रेष्ठलगायत छन् । कार्यक्रमको अध्यक्षता हितबहादुर तामाङले गर्नेछन् भने सञ्चालन लिलामणी पोखरेलले गर्ने भएका छन् ।

काठमाडौं । विभाजित नेकपाको प्रचण्ड–माधव पक्षले गर्न लागेको जुलुस शुरु नहुँदै काठमाडौंको ट्राफिक व्यवस्था अस्तव्यस्त बनेको छ । काठमाडौंको ‘कोर सडक’ मा मोटरसाइकल बाहेक अन्य सवारी साधान चल्न सकेका छैनन् ।

ट्राफिक प्रहरी कार्यालयका अनुसार भाडाका गाडीहरुलाई जावलाखेल, तीनकुने, महाराजगन्जलगायत स्थानमै रोकिएको छ । जुलुसमा सहभागी हुनेहरुलाई बाहिरी जिल्लाबाट लिएर आएका ठूला बसलाई पनि चक्रपथ बाहिरै रोकिएको छ ।

उपत्यकाका सबै ट्राफिक प्रहरीलाई सडकमा उतारेर यातायात व्यवस्थापन गर्न खोजिए पनि सम्भव भएको छैन । सडकमा सवारी जाम छ भने कार्यालय जान हिंडेकाहरु बाटोमै अलपत्र परेका छन् ।

धोबीखोला कोरिडोरलगायतका वैकल्पिक भित्री सडकमा समेत जाम भएको छ । महानगरीय प्रहरी महाशाखाका प्रवक्ता श्यामकृष्ण अधिकारीले बिहान ९ नबज्दै जाम शुरु भएको बताए ।

विभिन्न जिल्लाबाट काठमाडौंमा आएका प्रदर्शनकारीहरु पार्टी प्यालेस र होटलबाट निस्किएर साना साना समूहमा सडकमा आउन थालेपछि जाम शुरु भएको थियो ।

काठमाडौं । भोलि गर्न लागेको विरोधसभमा उपत्यका बाहिर र भित्रबाट लाखौं मानिस ओर्लिने निष्कर्ष नेपाल कम्युनिष्ट पार्टीको प्रचण्ड–माधव पक्षले निकालेको छ। विरोधसभाको तयारीबारे समीक्षा गर्न मंगलबार दिउँसो बसेको प्रचण्ड–माधव पक्षको सचिवालय कमिटीको बैठकमा लाखौं मान्छे सभामा आउने ‘रिर्पोटिङ’ भएको बरिष्ठ नेता झलनाथ खनालले जानकारी दिए।

‘भोलिको कार्यक्रमको बारेमा योजना कस्तो–कस्तो बनेको छ ? तयारी के हो भन्ने बारेमा छलफल गर्यौ,’ खनालले नेपाल प्रेससँग भने, ‘तयारी एकदमै राम्रो ढंगले अगाडि बढेका उपत्यकाका चारैतिरबाट ठूलो संख्यामा जनसमुदाय भोलि उपत्यकामा ओइरिने, उपत्यका भित्रैबाट पनि ठूलो संख्यामा जनसमुदाय मार्चमा रिर्पोटिङ भयो।’

प्रतिनिधिसभा विघटनविरुद्ध भोलि विरोध सभा गर्न लागेको प्रचण्ड–माधव पक्षले सभा अहिलेसम्मकै वृहत हुने र लाखौं मानिस सहभागि हुने दावी गरेको छ । सभाको पूर्व सन्ध्यामा राजधानीको प्रदर्शनी मार्गमा प्रचण्ड–माधव पक्ष निकट युवाले मार्चपास समेत गरेका थिए।

काठमाडौं । नेपाल कम्युनिष्ट पार्टी (प्रचण्ड-माधव पक्ष) ले बुधबार (भोलि) गर्न लागेको विरोधसभामा कुनै दलको कार्यक्रमका रूपमा मात्रै नबुझी सहभागी हुन आह्वान गरेको छ ।

बुधबार हुन लागेको विरोधसभाबारे फेसबुक लाइभमार्फत ‘ब्रिफिङ’गर्दै नेकपा स्थायी कमिटी सदस्य एवम् केन्द्रीय संघर्ष समितिका सहसंयोजक योगेश भट्टराई यस्तो आह्वान गरेका हुन्।

‘भोलिको विरोध प्रदर्शन कुनै राजनीतिक दलको मात्रै विरोध प्रदर्शन होइन,’ भट्टराइले भने, ‘अवश्य पनि यो नेपाल कम्युनिष्ट पार्टीको आयोजनामा हुने विरोध प्रदर्शन हो । यो विरोध प्रदर्शन प्रतिगमनको विरुद्धमा हो, असंवैधानिक कदमको विरुद्धमा हो, लोकतन्त्रको पक्षमा हो । अहिले भइरहेका बलात्कार, हत्या, हिंसाको विरुद्धमा हो । मुलुकमा समाजिक, आर्थिक क्षेत्रमा बढीरहेको बेतिथिविरुद्ध पनि भएको हुनाले यो कुनै दलको रूपमा मात्रै नबुझिकन आम जनसमुदायलाई भोलिको विरोध प्रदर्शनमा उल्लासमय ढंगले सहभागि बनिदिनुहुनका निम्ति म नेपाल कम्युनिष्ट पार्टीको तर्फबाट हार्दिक आह्वान गर्न चाहान्छु ।’

खुलामञ्चलाई बसपार्क बनाएकाले बाध्यतावस पुनः सडकमै सभा गर्नुपर्ने भएको भन्दै त्यसबाट हुने असुविधाप्रति उनले माफी मागे । उनले भने, ‘आज दुर्भाग्यवस टुँडिखेल छैन । पहिलेको खुलामञ्‍चलाई बञ्‍च बनाएको छ । फेरि पनि सडकमै विरोधसमा गर्नुपर्ने बाध्यता आइलागेको छ ।’

‘ट्राफिक डाइभर्ट’गरिहने हुँदा आम सर्वसाधरणमा केही कष्ट हुने भन्दै उनले भने, ‘विभिन्न ठाउँबाट ट्राफिक डाइभर्ट हुने कुरा ट्राफिकले व्यवस्थापन गर्नु भएको छ। समयमै गन्त्वयमा पुग्न नसकिने अथवा भनेको बाटोबाट जान नपाउने जस्ता केही कष्ट आम सर्वसाधारणलाई हुनेछन् । त्यसका लागि हाम्रो पार्टी दुःख व्यक्त गर्छ, हामी क्षमा चाहान्छौं ।’

‘यो एउटा बाध्यता छ,’ भट्टराईले भने, ‘यदि केपी ओलीले संविधानमाथि आक्रमण नगरेको भए, मुलुकलाई प्रतिगमनको दिसामा नलगेको भए सायद यो अवस्था हुने थिएन नै । त्यसैले यो बाध्यकर अवस्था हो भन्ने आम जनसमुदायले बुझिदिनु हुनेछ भन्ने आशा मैले लिएको छु ।’

आफूहरूले सडकमा कमभन्दा कम असर परोस् भन्ने कुरामा ध्यान दिएको र सभा पनि संक्षिप्त हुने उनको भनाइ छ।

काठमाडौं । नेपाल कम्युनिष्ट पार्टी (प्रचण्ड-माधव पक्ष) का अध्यक्ष माधवकुमार नेपालले केपी ओली पक्षसँग असल मानिस नरहेको बताएका छन् ।

सोमबार एकिकृत अखिल नेपाल शिक्षक संगठनको राष्ट्रिय परिषद्को पहिलो बैठकलाई राजधानीमा सम्बोधन गर्दै उनले ओलीसँग ‘बा’ भन्न रुचाउने मान्छे मात्रै रहेको टिप्पणी गरेका छन् ।

‘केपी ओलीको पक्षमा ‘बा’ भन्ने मात्रै छन्,’ नेपालले भने, ‘त्यहाँ क्रान्तिकारी, सहयोद्धा छैनन् । हामीसँग असल मानिस छन् ।’ उनले ओलीसँग नाटक गर्न सिपालु मान्छे मात्रै रहेको आरोप समेत लगाए । नेपालले भने, ‘ केपी ओलीसँग जोडिएका मान्छे नौटंकी गर्न मात्रै सिपालु छन् । उनीहरूले राजनीतिक कुरा गर्नु गफ मात्रै हो ।’

सूर्य चिन्ह आफूहरुले मात्रै पाउने दाबी गर्दै उनले भने, ‘ओली बा पार्टी खोल्दिए सबै भन्दा राम्रो । त्यो मन पराउने सबै उतै जान्छन्।’

नेपालले अहिलेको लडाइँ केपी ओलीविरुद्ध नभई केपी ओली प्रवृत्तिविरुद्धको भएको बताए ।

काठमाडौं । विभाजित नेपाल कम्युनिष्ट पार्टीको प्रचण्ड-माधव पक्षले आमहड्ताल पूर्णरूपमा सफल भएको दाबी गरेको छ।

केन्द्रीय संघर्ष समितिका संयोजक नारायणकाजी श्रेष्ठले विज्ञप्ति जारी गर्दै आमहड्तालमा प्राप्त सर्मथनले आफूहरूलाई उत्साहित बनाएको उल्लेख गरेका छन् ।

आन्दोलनलाई बदनाम बनाउने र जनतालाई उत्तेजित बनाउने कोसिस गरिए पनि आफूहरूको संयमताले त्यो असफल भएको विज्ञप्तिमा लेखिएको छ ।

आन्दोलनमा सहभागी नेताकार्यकर्ता र नागरिकलाई धन्यवादसमेत दिइएको छ।

काठमाडौं । विभाजित नेपाल कम्युनिष्ट पार्टीको प्रचण्ड-माधव पक्षले आफूहरुरूको आमहड्तालाई बदनाम बनाउने कोसिस भएको दाबी गरेको छ ।

प्रतिनिधिसभा विघटनविरूद्ध गरिएको आमहड्तालबारे देशभरका घटनाको ‘अपडेट’ पार्टीको फेसवुक पेजमा लाइभ गरेर जानकारी गराउँदै केन्द्रीय सदस्य विष्णु रिजालले यस्तो टिप्पणी गरे ।

रिजालले नेकपाको ओली पक्षतिर लक्षित गर्दै ‘साइबर सेना’ले त्यस्तो काम गरेको आरोप लगाए । ‘आज बिहानैदेखि साइबर अपराधमा अभ्यस्त व्यक्तिहरूले विभिन्न आन्दोलनका तस्बिर राखेर, अरु देशका आन्दोलनका तस्बिर राखेर परिस्थितिलाई भड्काउने, जनसमुदायलाई उत्तेजित बनाउने खोजको पनि पाइयो,’ उनको भनाइ छ, ‘किसानहरूको भक्तपुरको तस्बिर भन्दै बङ्गलादेशको तस्बिर राख्ने, २०७० सालको चुनावमा भएको आगजानीको तस्बिरलाई गाडीमा आगजानी भन्ने । किसानहरूका अरु सामग्रीहरु नष्ट गरियो भन्ने खालका कुराहरू पनि सामाजिक संजालमा भएका थिए। हिजो नै आमहड्ताल फिर्ता भयो भन्ने कुप्रचार सामाजिक संजालमा भएका थिए । केही समयअघि गठन गरिएको कथित ‘साइबर सेना’नामको ‘साइबर क्राइम ग्रुप’को काम हो भन्ने कुरामा ढुक्क हुनुहोस् भन्ने म निवदेन गर्न चाहान्छु ।’

आमहड्ताललाई शान्तिपूर्ण बनाएको बताउँदै उनले भने, ‘हामीले मुलरूपमा आमहड्ताललाई शालीन र शान्तिपूर्ण बनाएका छौं । आन्दोलनका क्रममा आदरणीय जनसमुदायले भोग्नु परेको असजिलोप्रति पार्टीको तर्फबाट विनम्रतापूर्वक क्षमायाचना गर्न चाहान्छु । साथसाथै यस आन्दोलनलाई बदनाम गर्नलाई भएका प्रयासहरूलाई पनि चिनिदिनु हुने छ भन्ने आग्रह गर्न चाहान्छु ।’

कहाँ के भए ?

दिनभरका घटनाक्रमको जानकारी गराउँदै उनले स्थायी कमिटी सदस्य अष्टलक्ष्मी शाक्यलाई बिहानै ६ बजे कलंकीबाट गिरफ्तार गरिएको बताए । त्यहीबाट हितमान शाक्य, बिजय पौडेल, अमृता थापालगायत पनि पक्रउ परेका थिए।

चाबहिलबाट केन्द्रीय सदस्य कृष्ण केसी लगायतलाई गिरफ्तार गरिएको र बागबजारबाट युवा नेता रमेश मल्ल गिरफ्तार गरिएको उनको भनाइ छ।

प्रचण्ड-माधव पक्षले सार्वजनिक गरेको आजका मुख्य घटनाहरू :-

काठमाडौं । प्रचण्ड-माधव पक्षीय नेकपाका कार्यकर्ताले बिहानै सामाखुसीमा ट्याक्सी जलाएर आजको आमहड्ताल हिंसात्मक हुने संकेत दिए । तर, सो घटनाको चौतर्फी निन्दा भएपछि उनीहरुले थप आक्रामकता देखाएका छैनन् ।

ट्याक्सी जलाइएसँगै बिहानैदेखि काठमाडौंका सडक सुनसान भए । मानिसहरू सडकमा निस्कन डराए । तर, मध्यान्नपछि भने बन्दको बिस्तारै खुकुलो हुन थालेको छ । हामीले काठमाडौंका विभिन्न स्थानको अवलोकन गर्दा सवारीसाधन बाक्लै संख्यामा देखिएका छन् ।

आन्दोलनकारीको पनि मुड दिउँसोदेखि फेरिएको छ । उनीहरुले सडकमा निस्केका सवारीसाधनलाई आक्रमण तोडफोड गरेका छैनन् । अवरोध प्रयास भने गरिरहेका छन् ।

बालाजु, सामाखुसी, नारायाणगोपाल चोक, चावहिल, पुरानो बानेश्वर, नयाँबानेश्वर क्षेत्रति सवारी सधान बाक्लै चलेका छन् । चक्रपथ क्षेत्रमा महानगर यातायात, ट्याक्सी, टेम्पु, माइक्रो र अन्य केही सवारी साधन पनि बाक्लै चल्न थालेका छन् ।

मध्यान्ह हुनै थाल्दा आन्दोलनकारी नरम बनेका थिए । मुख्य चोकमा भएको जम्मा भएको भीडले पनि सवारी सधान रोक्न प्रयास गरे पनि बल प्रयोग गरेका देखिएन । बरु, ठाउँ-ठाउँमा प्रहरीले नै सवारीसधान चल्न रोकिरहेको थियो । एम्बुलेन्स, प्रेसलगायत अत्यावश्यक सेवाका सवारीसाधन भने निर्वाध चलेका छन् ।

हिजो आमहड्तालको घोषणा भएदेखि नै सामाजिक सञ्जालमा तीब्र विरोध भइरहेको छ । प्रचण्ड-नेपाल पक्षले आमहड्तालमा धेरै कठोरता अपनाउन नसक्नुको कारण पनि यही हो । सो समूहका नेताहरुले आमहड्ताललाई बाध्यातत्मक भन्दै आएका छन् ।