Tag: पोखराको फोहोर

पोखरा । आफूहरुले पाउनुपर्ने भुक्तानी नपाएको र माग सुनुवाइ नभएको भन्दै बिहीबारदेखि रोकिएको फोहोर उठाउने काम २ दिनपछि आजबाट सुरु भएको छ । चैत मसान्तमै सम्झौता म्याद सकिए पनि आफूहरुले पाउनुपर्ने भुक्तानी नपाएको भन्दै कम्पनीले फोहोर उठाउन छोडेका थिए ।

सार्वजनिक निजी साझेदारी अन्तर्गत फोहोर मैला व्यवस्थापन गरिरहेको पोखरा महानगरपालिकाले म्यादसँगै बजेट पनि सकिएकाले कम्पनीलाई भुक्तानी दिन सकेको थिएन । महानगरपालिकाले बाँकी रहेको भुक्तानी पनि दिने र असारसम्म म्याद थप गर्ने सहमतिपछि उनीहरुले फोहोर उठाउन सुरु गरेका हुन् ।

‘महानगरपालिकासँगको सम्झौता म्याद पनि सकिइसकेको थियो । रकमान्तर गरेर फोहोर उठाइरहेका कम्पनीलाई भुक्तानी दिनुपर्ने भएकाले ढिलाइ भएको थियो,’ महानगरपालिकाका स्वास्थ्य महाशाखा प्रमुख कल्पना बरालले नेपाल प्रेससँग भनिन्, ‘आइतबारसम्म सबैलाई चेक दिने सहमति भइसक्यो । फोहोर उठ्न सुरु भइसक्यो ।’

सार्वजनिक निजी साझेदारी अन्तर्गत पोखरा महानगरपालिकामा अहिले विभिन्न ७ वटा कम्पनीले फोहोर उठाइरहेका छन् । उनीहरुले पोखरा महानगर क्षेत्रबाट दैनिक करिब १ सय ८० टन फोहोर संकलन गरिरहेका छन् ।

‘सम्झौता सकिएका कम्पनीका म्याद थप’
फोहोर मैला व्यवस्थापन गर्दा उठेको आम्दानीबाट ८० प्रतिशत कम्पनीले राखेर बाँकी महानगरपालिकालाई बुझाउने सम्झौता थियो । यद्यपि पोखराको फोहोर मैला संकलन गरिरहेका कम्पनीसँग महानगरले गरेको सम्झौता चैत मसान्तमै सकिइसकेको थियो ।

सम्झौता सकिएर कम्पनीले फोहोर उठाउनै बन्द गरिदिएपछि महानगरले ‘अर्को व्यवस्थापन नहुँदासम्म’ अहिले काम गरिरहेकै कम्पनीलाई जिम्मा दिने निर्णय गरेको छ । महानगरपालिकाको शनिबार बसेको कार्यपालिका बैठकले असार मसान्तसम्म पुरानै कम्पनीलाई म्याद थप गरिदिने निर्णय भएको महानगरपालिकाका प्रवक्ता धनबहादुर नेपालीले जानकारी दिए ।

‘अहिले हामी नयाँ ल्यान्डफिल्ड साइटको खोजीमा छौं । फोहोर मैला व्यवस्थापन पिपिपी मोडलमै उत्तम हुने भएपछि असार मसान्तसम्म पुरानै कम्पनीसँग सम्झौता गर्ने निर्णय गरियो,’ महानगर प्रवक्ता नेपालीले भने ।
नयाँ ल्यान्डफिल्ड साइट खोज्न गठित समितिले बुझाएको प्रतिवेदन कार्यपालिका बैठकमा पेश भएको र त्यसलाई पनि पिपिपी मोडलमै लैजाने निर्णय भएको प्रवक्ता नेपालीले जानकारी दिए ।

‘समितिले विभिन्न ५ वटा ठाउँको अध्ययन गरेर प्रतिवेदन बुझाएको छ । त्यसलाई पनि प्राविधिक राखेर अध्ययन गर्छौं,’ उनले भने, ‘पिपिपी मोडलमा जाने भएपछि ईच्छुक निजी कम्पनीले पनि यसबारे आफ्नो कुरा राख्न पाउँछन् ।’

पोखरा महागनगरपालिकाले हाल फोहोर मैला व्यवस्थापन गर्दै आइरहेको ल्यान्डफिल्ड साइट निर्मानाधीन पोखरा क्षेत्रीय अन्तर्राष्ट्रिय विमानस्थल सञ्चालनमा आएसँगै बन्द हुँदैछ । विमानस्थल नजिकै रहेको उक्त ल्यान्डफिल्ड साइटले ‘बर्ड हाजार्ड’ हुने भएपछि अन्यत्र सार्न नेपाल नागरिक उड्ड्यन प्राधिकरणले आग्रह गर्दै आएको थियो ।

नयाँ ल्यान्डफिल्ड खोज गर्न वडा नम्बर १३ का वडाध्यक्ष लेख बहादुर तामाङको संयोजकत्वमा समिति गठन भएको थियो । समितिले सम्भावित विभिन्न ५ ठाउँ सुझाउँदै महानगरलाई २ महिनाअघि प्रतिवेदन बुझाएको थियो । समितिले बुझाएको प्रतिवेदनमध्ये २ वटा ठाउँ उड्ड्यन प्राविधिकरणकै प्राविधिकलाई पनि देखाइसकिएको संयोजक तमाङ बताउँछन् ।

यो पनि

उठाउन छाडियो पोखराको फोहोर, ल्याण्डफिल्ड साइटको विकल्पबारे अन्योल

पोखरा । पोखरा र साविक लेखनाथ नगरपालिका गरेर पोखरा क्षेत्रमा दैनिक करिब १ सय ८० टन फोहोर संकलन हुन्छ । संकलित फोहोर व्यवस्थापन गर्न महानगले सार्वजनिक निजी साझेदारी अन्र्तगत काम सम्पादन गरिरहेको छ ।

संकलित फोहोर व्यवस्थापनका लागि महानगरले पोखरा ३१ को ल्यान्डफिल्ड साइट प्रयोग गरिरहेको छ । जुन निर्माणाधीन पोखरा क्षेत्रीय अन्तर्राष्ट्रिय विमानस्थल नजिकै छ । विमानस्थल सञ्चालनमा आइसकेपछि उडान जोखिम हुने भन्दै विज्ञ प्राविधिक टोलीले ल्यान्डफिल्ड साइटलाई त्यहाँबाट अन्यत्र सार्न सुझाउँदै पनि आएका छन् ।

ल्यान्डफिल्ड साइटमा चराका कारण उडान प्रभावित हुनेमात्रै नभइ दुर्घटना नै निम्त्याउने गरी ‘बर्ड हाजार्ड’ हुने प्राविधिकको सुझाव छ । तर, विमानस्थल निर्माण करिब अन्तिम चरणमा पुगिसक्दा पनि महानगरले नयाँ ल्यान्डफिल्ड साइट व्यवस्थापन गर्न सकेको छैन ।

समयमै ल्यान्डफिल्ड साइट व्यवस्थापन नगर्दा बिहीबारदेखि अनिश्चित कालका लागि पोखरा महानगरको उठ्न छोडेको छ । पिपिपी मोडलअनुसार महानगर क्षेत्रमा फोहोर मैला उठाइरहेका विभिन्न ७ वटा कम्पनी अनिश्चित समयका लागि फोहोर उठाउन बन्द गरेका छन् ।

निर्माणधीन क्षेत्रीय अन्तर्राष्ट्रिय विमानस्थल नजिकै रहेको हालको ल्यान्डफिल्ड साइट विमानस्थल सञ्चालनमा आइसकेपछि बन्द हुने हुँदा त्यसको विकल्प नसोचिएको र आफूहरुसँग महानगरले गरेको सम्झौताबमोजिम जिम्मेवारी पूरा नगरेको आरोप लगाउँदै उनीहरुले फोहोर उठाउन बन्द गरेका हुन् ।

‘सम्झौता गरेर पनि सधैं अस्थायी ढंगले काम ग¥यौं । काम पूरा गरिसक्दासमेत पूरा भुक्तानी पाएका छैनौं,’ लेकसाइट क्षेत्रमा फोहोर मैला उठाउने गरी जिम्मा लिएको भद्रकाली वेस्ट म्यानेज्मेन्ट प्रालिका सुजन गुरुङ भन्छन्, ‘फोहोर मैला व्यवस्थापनमा महानगर सिरियस देखिएन । पटकपटक कुरा राख्दा पनि सुनुवाइ भएन । त्यसैले फोहोर उठाउन छोडेका हौं ।’

उसो त, पोखरा महानगरमा फोहोर व्यवस्थापन गर्न निजी कम्पनीसँग गरिएको सम्झौता सकिइसकेको छ । तर, सम्झौता सकिँदा पनि महानगरले फोहोर मैला व्यवस्थापनका लागि अर्को विकल्प सोचेको छैन । जसका कारण पोखरा क्षेत्रमा दैनिक ठूलो मात्रामा फोहोर मैला थुप्रिने निश्चित भएको सुजनको दाबी छ ।

‘सम्झौता सकिइसक्यो । तर, अहिलेसम्म सम्झौताबमोजिम रकम पाएका छैनौं । सम्झौता सकिइसकेकाले कि तिमीहरु जाऊ काम नगर भन्न सक्नुपर्यो कि हाम्रो व्यवसायको सुरक्षा हुनुपर्यो,’ गुरुङ भन्छन्, ‘कोरोना लकडाउनमा पनि दिनरात नभनी काम ग¥यौं । २, ३ सय कामदार राखेका छौं । महानगरले ठोस निर्णय दिनुपर्छ ।’

महानगर क्षेत्रमा फोहोर मैला व्यवस्थापका लागि ३३ वटा गाडी प्रयोग हुन्छन् । जसमध्ये ४ वटामात्रै महानगरको हो भने बाँकी सबै ती निजी कम्पनीको । सम्झौताअनुसार फोहोर मैला व्यवस्थापनबाट भएको आम्दानी २० प्रतिशत महानगरले र ८० प्रतिशत कम्पनीले राख्ने हुन्छ । फोहोर मैला व्यवस्थापन गर्न महानगरले मासिक ८ रुपैयाँदेखि ९ हजार रुपैयाँसम्म सेवा शुल्क उठाउँदै आएको छ ।

आन्तरिक विवाद छः सरसफाइ शाखा

महानगर सरसफाइ महाशाखा प्रमुख कल्पना बरालले महानगरको ‘आन्तरिक विवाद मिलाउन बाँकी हुँदा’ फोहोर उठाउन रोकिएको बताइन् । उनले निजी कम्पनीले फोहोर उठाउनै नछोडेको र आन्तरिक कुरा मिलिसकेपछि फेरि उठाउन सुरु गर्ने दाबी गरिन् ।

‘फोहोर उठाउन छोडेको भन्ने होइन । थोरै आन्तरिक कुरा हो । कार्यपालिका बैठकमा कुरा जान्छ । कार्यपालिका बैठकले जे निर्णय गर्छ । त्यही हुन्छ,’ उनले भनिन्, ‘आन्तरिक कुरा अलिअलि मिलाउन बाँकी छ । फिर्ता दिनुपर्ने पैसा अलिकति बाँकी छ । त्यसैले पनि होला ।’

बरालले पोखरामा एकदिन फोहोर नउठे त्यसले पोखराकै सौन्दर्य बिगार्ने भएकाले जतिसक्दो चाँडो वार्ता मिल्नुपर्ने बरालको भनाइ छ । ‘एकदिन फोहोर नउठ्दा त कत्रो समस्या हुन्छ । उहाँहरुले गाडी नै थन्क्याएपछि झनै समस्या हुन्छ । मेयर सा’ब सँग उहाँहरु छलफल गर्नुहुन्छ त्यसपछि के निर्णय निस्किन्छ हेरौं,’ उनले भनिन् ।

नयाँ ल्यान्डफिल्ड साइट चाँडै व्यवस्थापन हुन्छ: समिति

निर्माणाधीन पोखरा अन्तर्राष्ट्रिय विमानस्थल क्षेत्रमा रहेको ल्यान्डफिल्ड साइटको विकल्प खोजी गर्न महानगरले पोखरा १३ वडाध्यक्ष दर्शन लामाको संयोजकत्वमा समिति गठन गरेको छ । समिति गठन भएको लामो समय भइसक्दा पनि ठोस निर्णय दिन सकेको छैन ।

तर, समिति संयोजक लामा आफूहरुले २ महिनाअघि नै नयाँ ल्यान्डफिल्डबारे अध्ययन गरी रिपोर्ट महानगरमा बुझाइसकेको बताउँछन् । ‘हामीले ५ वटा सम्भावित ठाउँमा ल्यान्डफिल्ड साइट हुन सक्ने रिपोर्ट महानगरमा बुझाइसकेका थियौं । महानगरको ४७ औं कार्यपालिका बैठकमा राख्ने कुरा थियो । खै किन प्रस्तुत भएन,’ उनले भने, ‘अर्को बैठकमा कुरा जाला !’

संयोजक लामाले अध्ययन भएका ५ ठाउँमध्ये २ ठाउँ राष्ट्रिय नागरिक उड्ड्यन प्राधिकरणका प्राविधिकलाई पनि देखाइसकेको जानकारी दिए । ‘प्राविधिकलाई नै जग्गाा देखाएर रिपोर्ट तयार पारेका छौं । चाँडै ठोस निर्णय आउँछ,’ उनले भने ।

मेयर जिसी भन्छन्ः म्याद थपेर फोहोर उठाउन लगाइन्छ

पोखरा महानगर मेयर मानबहादुर जिसी काम रोकेका ७ निजी कम्पनीको म्याद थप गरेर भएपनि फोहोर मैला व्यवस्थापन गरिने बताए । ती कम्पनीको पहिले गरेको कामको भुक्तानी पाउन बाँकी देखिएको र भुक्तानी भइसकेपछि काम सुरु हुने जानकारी दिए ।

‘नयाँ ल्यान्डफिल्डसहित नयाँ योजनाका साथ अघि बढिरहेका छौं । तर, योजना अहिले नै कार्यान्वयनमा ल्याइहाल्ने अवस्था छैन,’ मेयर जिसीले भने, ‘नयाँ व्यवस्थापन नहुँदासम्म यिनीहरु काम गर्न ईच्छुक छन् भने म्याद थपेर यिनीहरु नै काम गर्छन् ।’