काठमाडौं । चारजना पूर्वप्रधानन्यायाधीशविरुद्ध सर्वोच्च अदालतमा अवहेलना मुद्दा चलाउन माग गर्दै परेका निवेदन दर्ता भएका छन् ।
मंगलवार रित नपुगेर दर्ता नभएको निवेदनसमेत बुधवार अदालत खुलेलगत्तै दर्ता भएका हुन् ।
अधिवक्ता लोचन भट्टराई समेतले पूर्व प्रधानन्यायाधीशहरू मीनवहादुर रायमाझी, कल्याण श्रेष्ठ, अनुपराज शर्मा र सुशीला कार्कीमाथि अदालतको अवहेलना मुद्दा चलाउन माग गर्दै निवेदन पेश गरेका थिए ।
चार पूर्वप्रधानन्यायाधीशले केही दिनअघि संवैधानिक इजलासमा प्रतिनिधिसभा विघटनविरुद्धको मुद्दा सुनुवाइ भइरहेका बेला त्यसलाई प्रभावित पार्ने गरी अदालतलाई दबाब दिन विज्ञप्ति निकालेको आरोप लगाइएको छ ।
उनीहरूले प्रतिनिधिसभा विघटन असंवैधानिक रहेको र यसलाई अदालतले बदर गर्नुपर्ने आशयको वक्तव्य दिएका थिए । अदालतमा विचाराधीन मुद्दामा पूर्वप्रधानन्यायाधीशहरुले सडकबाट दबाब दिएकोमा आलोचना समेत भएको थियो ।