Tag: परराष्ट्र मन्त्रालय

काठमाडौं । लिक्विड अक्सिजन लगायतका स्वास्थ्य सामाग्रीको आपूर्तिमा लगाइएको रोक हटाउन आग्रह गर्दै नेपालले भारतलाई कूटनीतिक नोट पठाएको छ ।

परराष्ट्र प्रवक्ता सेवा लम्सालका अनुसार स्वास्थ्य मन्त्रालयको समन्वयमा परराष्ट्र मन्त्रालयले भारतलाई उक्त आग्रहसहितको पत्र पठाएको हो । उनले कूटनीतिक च्यानलबाट स्वास्थ्य सामाग्री आपूर्तिको लागि नेपालले भारतसँग पहल गरिरहेको बताइन् ।

भारतले स्वास्थ्य सामाग्री आपूर्ति गर्न सकारात्मक जवाफ दिएको र चाँडै आपूर्ति सुचारु हुने कुरामा आफू आशावादी रहेको समेत परराष्ट्र मन्त्रालयले जनाएको छ ।

अक्सिजन, सिलिन्डर लगायतका सामाग्रीको घरेलु खपत पछिल्लो समय बढिरहेको बताउँदै भारतले ती सामाग्री आपूर्तिमा अहिले रोक लगाएको छ । नेपालले भारतको झारखण्डस्थित लिन्ड इन्डिया अक्सिजन प्लान्टबाट अक्सिजन आपूर्ति गर्दै आइरहेको थियो ।

बढ्दो कोरनाभाइरस संक्रमणले अक्सिजन लगायतका सामाग्री अपुग हुने आंकलन गर्दै नेपालले ती सामाग्रीको आपूर्ति सुचारु गर्न कूटनीतिक लबिइङ थालेको हो ।

परराष्ट्रमन्त्री प्रदीपकुमार ज्ञवाली र स्वास्थ्य मन्त्री हृदयेश त्रिपाठीले साताअघि भारतीय समकक्षीहरुसँग खोपसहित अक्सिजन लगायतका सामाग्रीको आपूर्ति सुचारु गर्न आग्रह गरेका थिए ।

काठमाडौं । सरकारले रिक्त ११ विदेशस्थित मिसनमा कुटनीतिज्ञ नियुक्त गर्ने योजना बनाएको छ । परराष्ट्र मन्त्रालयका अनुसार ५ देशमा लामो समयदेखि राजदूत पद रिक्त छ भने ६ मुलुकका दूतको कार्यकाल सकिँदैछ ।

इजिप्ट, श्रीलंका, दक्षिण कोरिया, अष्ट्रिया र रुसमा राजदूत पद रिक्त छ । जापान (प्रतिभा राणा), म्यानमार (भीमकुमार उदास), बहराइन (पदम सुन्दास), ओमान (शर्मिला पराजुली ढकाल), साउदी अरेबिया (महेन्द्रसिंह राजपूत), डेनमार्क (युवनाथ लम्साल)का राजदूतको कार्यकाल सकिँदैछ । ब्राजिलका राजदूतलाई कार्यकाल सकिएपनि फिर्ता बोलाइएको छैन ।

राजदूतको कार्यकाल सकिनुभन्दा तीन महिनाअघि नै परराष्ट्रले फिर्ता हुने मिति लगायतका विषय तोकेर पत्र पठाउने गर्छ । नयाँ राजदूत नियुक्तीका लागि परराष्ट्रले ‘राजदूत तथा स्थायी नियोगका प्रतिनिधि नियुक्तीसम्बन्धी निर्देशिका -२०७५ तयार पारेको थियो ।

उक्त निर्देशिका अनुसार नयाँ नियुक्तिका लागि कार्यकाल सकिनु तीन महिनाअघि नै गृहकार्य थाल्नुपर्छ । राजदूत नियुक्तिमा ५० प्रतिशत परराष्ट्र सेवा र ५० प्रतिशत राजनीतिक कोटाबाट राजदूत नियुक्त गर्दै आइएको छ ।