Tag: धुर्मुस

काठमाडौं । कलाकारले पनि कोरोनाभाइरस महामारीविरुद्ध सहयोगी हात अघि बढाइरहेका छन् । यही मेसोमा अभिनेता एवं सामाजिक अभियन्ता सीताराम कट्टेल धुर्मुसले पनि अस्पताललाई अक्सिजन सहयोग गरेका छन् ।

धुर्मुस सुन्तली फाउन्डेसनका अध्यक्ष रहेका उनले सोमवार बीपी कोइराला मेमोरियल क्यान्सर अस्पतालमा सञ्चालित १ सय ४० शय्याको कोभिड अस्पताललाई ५० थान अक्सिजन हस्तान्तरण गरेका हुन् ।

अक्सिजन नपाएर कसैले ज्यान गुमाउनु नपरोस् भनेर अस्पताललाई अक्सिजन सहयोग गरेको उनले बताएका छन् । भाइरस संक्रमितको उपचारमा अक्सिजनको अभाव देखिएकाले बर्दिवासमा अक्सिजन प्लान्ट स्थापना गर्ने उनको योजना छ ।

धुर्मुस–सुन्तली फाउन्डेसनले महामारीबाट पीडित भएकाको राहत र उद्धारका लागि आकस्मिक हेल्प कक्ष स्थापना गरेर एम्बुलेन्स, रक्तदान लगायतका सेवा दिँदै आएको छ ।

अहिलेसम्म हेल्प डेस्कबाट ८ सयभन्दा बढी व्यक्तिलाई सेवा दिइसकेको र भरतपुर अस्पताललाई स्वास्थ्य सामाग्रीहरु पनि हस्तान्तरण गरिएको धुर्मुसले फेसबुकमा उल्लेख गरेका छन् ।

महाभूकम्पपछि सामाजिक कार्यलाई निरन्तरता दिँदै आएका धुर्मुस अहिले भरतपुरमा अन्तर्राष्ट्रिय क्रिकेट रंगशाला निर्माणमा खटिरहेका छन् । २०७६ सालमा प्रदर्शनमा आएको फिल्म ‘सेन्टी भाइरस’बाट अभिनयमा कमब्याक गरेका उनी रंगशाला निर्माणपछि अभिनयलाई निरन्तरता दिने योजनामा छन् ।

काठमाडौं । वरिष्ठ हास्यकलाकार हरिवंश आचार्यले अर्को पुस्ताका हास्यकलाकार सिताराम कट्टेल धुर्मुसको प्रशंसा गर्दै उनलाई ‘सालिक’को संज्ञा दिएका छन् । धुर्मुसले अघि बढाएको सामाजिक अभियानलाई ईंगित गर्दै उनले यस्तो संज्ञा दिएका हुन् ।

राजधानीमा आयोजित एक कार्यक्रममा हरिवंशले जनतासँग पैसा उठाउने काम अत्यन्त संवेदनशील हुने बताए । आफूहरुको अनुभव पनि सुनाउँदै उनले धुर्मुसको सहनशक्ति उच्च रहेको उल्लेख गरे ।

‘सामाजिक काम गर्दा एकदमै पोल्छ । जनतासँग पैसाका लागि हात थाप्दा त्यो पैसा होइन आगोजस्तो लाग्छ,’ हरिवंशले भने, ६२/६३ को आन्दोलनका क्रममा हामीले पनि आह्वान गरेर दुई करोड ५० लाख उठाएका थियौं । तर, त्यसमा सानो-सानो प्रश्न उठ्दा पनि रातभरि निद्रा लाग्दैनथ्यो । कोही नकारात्मक प्रवृत्तिका मान्छेले यत्तिकै पनि आरोप लगाइदिन्छन् । त्यसैले हामीलाई यति पोल्यो कि त्यो पैसा आफूसँग राख्नै सकेनौं । एउटा कमिटी बनाएर साइन पनि नगरी हस्तान्तरण गरिदियौं ।’

हरिवंशले आफूहरूको भन्दा धुर्मुसको सहनशक्ति धेरै रहेको बताए ।

उनले भने, ‘धुर्मुस भाइ, तपाईं अगाडि बढ्नुस् । तपाईं फलामको मान्छे हो । ढुंगाको मान्छे हो । मलाई त तपाईं एउटा सालिकजस्तै लाग्छ । सालिकलाई सानो ढुंगालो हानो भने ट्वाङ्ग आवाज आउँछ, केही हुँदैन । तपाईंको पनि सहनशक्ति त्यति धेरै छ । तपाईंको महान कामको मूल्यांकन पछि देशले गर्नेछ ।’

चितवनमा धुर्मुस-सुन्तलीले निर्माण गरिरहेको अन्तर्राष्ट्रिय क्रिकेट रंगशाला नेपालमा कसैको व्यक्तिगत पहलमा अघि बढेको सबैभन्दा ठूलो अभियान भएको हरिवंशले बताए ।