बीबीसी । ३५० यात्रु बोकेर तीव्र गतिमा कुदिरहेको रेल सुरुङभित्र पस्दा ताइवानमा शुक्रबार ३४ जनाको मृत्यु भएको छ भने ७२ जना भित्रै फसेका छन् ।
त्यहाँको केन्द्रिय आपतकालिन अपरेसन केन्द्रका अनुसार उद्दारकर्ताहरु सुरुङभित्रै पसेर फसेकालाई उद्दार गर्ने काममा जुटेका छन् । उक्त रेल राजधानी ताइपेइदेखि ताइतुङ सहरतर्फ गैरहेको थियो ।
दर्जनौं पर्यटक उक्त रेलमा रहेको जनाइएको छ । ती पर्यटक अप्रिल ४ मा धुमधामसँग मनाइने परम्परागत चिनियाँ फेस्टिभल क्वीङमिङ मनाउन त्यसतर्फ जाँदै थिए ।
स्थानीय संचारमाध्यमका अनुसार बिहान १० बजे रेलको बाटोमा एउटा निर्माण कार्यमा प्रयोग हुने गाडी बिग्रिएर बस्दा तीव्र गतिमा कुदेको रेल त्यहाँ ठोक्किएर उक्त सुरुङभित्र पसेको थियो ।
शुक्रबारको उक्त घटनालाई ताइवानको इतिहासमा दशकपछिको सबैभन्दा दुःखद रेल दुर्घटना भनिएको छ । यसअघि सन् २०१८ मा भएको रेल दुर्घटनामा १८ जनाको मृत्यु भएको थियो ।
