रुपन्देही । गुल्मीमा छिमेकीको अन्येष्टीमा गएका एक युवक कालीगण्डकी नदीमा डुबेर बेपत्ता भएका छन् ।
चन्द्रकोट गाउँपालिका-८ रुपाकोटका १९ वर्षीय शंकर पौडेल नदीमा बेपत्ता भएको जिल्ला प्रहरी कार्यालय गुल्मीका प्रहरी नायव उपरीक्षक पुरुषोत्तम पाण्डेले जानकारी दिए । प्रहरीका अनुसार पौडेल चन्द्रकोट गाउँपालिका-७ का ७६ वर्षीय थानेश्वर न्यौपानेको मलामी गएका थिए ।
नदीमा नुहाउने क्रममा बेपत्ता भएका पौडेलको खोजी भइरहेको प्रहरीले जनाएको छ ।
जनकपुरधाम । धनुषाको धनुषाधाम नगरपालिका-२ धरमपुरस्थित पोखरीमा आमा-छोराको शव भेटिएको छ ।
स्थानीय अशोक सिंहकी श्रीमती अन्दाजी २८ वर्षीया अर्चना सिंह र ४ वर्षीय छोरा कुशकुमार सिंहको शव सार्वजनिक पोखरीमा फेला परेपछि स्थानीयले प्रहरीलाई खबर गरेका थिए । पोखरीमा तैरिरहेको अवस्थामा भेटिएका उनीहरूको शव पोष्टमार्टमका लागि जनकपुरस्थित प्रादेशिक अस्पताल ल्याउने तयारी भइरहेको छ ।
सेटरिङ कार्पेन्टरको काम गर्ने श्रीमान् अशोक भने आइतबार नै कामका लागि महेन्द्रनगरतर्फ गएको र राती घर नफर्केको बताइएको छ ।
ढल्केबरका प्रहरी निरीक्षक सुरेश ठाकुरका अनुसार दुवैजनाको शरीरमा कतै चोटपटक लागेको देखिँदैन । तत्काल केही भन्न सकिने अवस्था नरहेको भन्दै उनले अनुसन्धान शुरू गरिसकेको र पोष्टमार्टमपछि थप खुल्ने बताए ।