काठमाडौं । नेपाल भलिबल संघको आयोजनामा जारी छैठौं एनभीए क्लब भलिबल च्याम्पियनसिपको महिलातर्फ विभागीय टोली त्रिभुवन आर्मी क्लब तेस्रो भएको छ । सेमिफाइनलमा विभागीय टोली एपीएफसँग पराजित हुँदै फाइनल पुग्न असफल भएको आर्मीले तेस्रो स्थान हासिल गरेको हो ।
शनिबार बिहान भएको नेपाल पुलिस क्लबविरुद्धको खेलमा ३-० को सोझो सेटमा जित निकाल्दै आर्मी तेस्रो बनेको हो । पहिलो सेटमा २०-२५ को जित निकालेको आर्मीले दोस्रो सेटमा पुलिसलाई १७-२५ मै रोकेको थियो ।
तेस्रो सेटमा खेलमा फर्किने कोशिस गरेको पुलिसले प्रतिस्पर्धात्मक खेललाई निरन्तरता दिन नसक्दा पुन: आर्मीले १७-२५ को नतिजा निकाल्यो ।
साविक विजेता न्यू डायमन्डसँग सेमिफाइनलमा पराजित हुँदै तेस्रो स्थानमा प्रतिस्पर्धाको मौका पाएको पुलिस साविक उपविजेता हो ।
महिलातर्फको फाइनलमा साविक विजेता न्यू डायमन्ड र विभागीय टोली एपीएफ क्लब दिउँसो १ बजे भिड्दै छन् ।
च्याम्पियन हुने पुरुष तथा महिला टोलीले समान ४ लाख नगद सहित मेडल, ट्रफी र प्रमाण पत्र प्राप्त गर्नेछन् । यस्तै दोश्रोले २ लाख र तेश्रोले १ लाख सहित मेडल, ट्रफी र प्रमाण पत्र प्राप्त गर्नेछन् ।
च्याम्पियनसिपका उत्कृष्ट महिला तथा पुरुष खेलाडीले नगद २५ हजार र विधा अन्तरगत स्पाईकर, सेटर, ब्लकर, सर्भर, डिफेन्स र प्रशिक्षकले जनही नगद १० हजार प्राप्त गर्ने छन् ।
