Tag: गृहमन्त्री बालकृष्ण खाँण

काठमाडौं । गृहमन्त्री बालकृष्ण खाणले सरकारको काम कुनै पनि व्यवसायीलाई दुःख दिने नभएको बताएका छन् ।

नेपाल निर्माण व्यवसायी महासंघको २३औं साधारणसभालाई शुक्रबार सम्बोधन गर्दै उनले सरकारको काम व्यवसायीलाई काम गर्न सहज हुने वातावरण निर्माण गरिदिने रहेको जनाए ।

‘तराईदेखि हिमालसम्मको बाटो र पुल निर्माण गर्न विदेशी कम्पनीको आवश्यकता छैन । नेपाली निर्माण व्यवसायी सक्षम बनेका छन्,’ गृहमन्त्री खाँणले भने, ‘सरकारको काम कुनै पनि व्यवसायीलाई दुःख दिने होइन । वातावरण सहज बनाइदिने हो ।’

निर्माण व्यवसायीहरुको क्षमता अभिवृद्धि गर्ने, विश्वास अझ जनतासामु मुखरित गराउन वातावरण बनाउन वर्तमान सरकार गम्भिर रहेको उनले बताए ।

‘निर्माण व्यवसायी देशका धरोधर हुन् । कुनै पनि व्यवसायीलाई सुरक्षा दिने काम सरकारले गर्छ,’ उनले भने ।

काठमाडौं । गृहमन्त्री बालकृष्ण खाणले तराईमा हावाहुरीका कारण मृत्यु भएका तीनजना र पहाडी तथा हिमाली जिल्लामा हिमपातका कारण अफ्ठ्यारोमा परेकाहरूलाई तत्काल व्यवस्थापन र राहत उपलब्ध गराउन सम्बन्धित निकायलाई निर्देशन दिएका छन् ।

शनिबार बिहान गृहमन्त्री खाणले मन्त्रालयका विपद् तथा द्वन्द्व व्यवस्थापन महाशाखाका प्रमुख सहसचिव प्रदीपकुमार कोइराला तथा तराईका दुई जिल्लासँगै हिमाली जिल्लाका आठ प्रमुख जिल्ला अधिकारी र एक सहायक प्रमुख जिल्ला अधिकारीलाई हिमपात र हावाहुरीका कारण अफ्ट्यारोमा परेकालाई तत्काल राहत उपलब्ध गराउन निर्देशन दिएका हुन् ।

शुक्रबार दिउँसो धनुषाको सवैला नगरपालिका १२ मा अवस्थित फकिरचन उच्चमाध्यामिक विद्यालयको प्राङ्गणमा भिक्स मसालाको हाँगा भाचिँदा महेन्द्र सदाकी ८ वर्षकी छोरी प्रतिमाकुमारी र चन्द्रशेखर सदाका ७ वर्षीय छोरा अरविन्दको मृत्यु भएको सहायक प्रमुख जिल्ला अधिकारी प्रदर्शनी कुमारीले जानकारी दिए ।

त्यस्तै शुक्रबारै रौतहटको बुधिमाई नगरपालिका एकमा घर ढलेर भित्ताले च्याप्दा राममंगल रायकी श्रीमति ४५ फुलमतियादेवी मृत्यु भएको थियो । गृहमन्त्री खाणले रौतहटका प्रमुख जिल्ला अधिकारी कृष्णबहादुर शाही र प्रहरी प्रमुख एसपी विनोद घिमिरेलाई आवश्यक राहतको व्यवस्था गर्न निर्देशन दिए ।

काठमाडौं । गृहमन्त्री बालकृष्ण खाणले गरिब एवं अशक्तलाई तराईमा शीतलहर र हिमालमा हिमपातबाट बचाउन न्यानो कपडा तथा दाउरा वितरणका लागि सरकारले गरेको निर्णय कार्यान्वयन र कोभिड–१९ सङ्क्रमण अवस्थालगायत विषयमा २० जिल्लाका प्रमुख जिल्ला अधिकारीलाई टेलिफोन गरेका छन् ।

गृहमन्त्री खाणले मनाङका प्रमुख जिल्ला अधिकारी रवीन्द्र आचार्य, डडेलधुराका प्रेमराज जोशी, गोरखाका शङ्करहरि आचार्य, ताप्लेजुङका उमेश पाण्डे, बझाङका बाबुराम अर्याल र सोलुखुम्बुका गणेशविक्रम शाहीलाई आज टेलिफोन गरी न्यानोे कपडा तथा दाउराको व्यवस्थापन गर्न निर्देशन दिएका हुन्।

यस्तै उनले मुगुका प्रमुख जिल्ला अधिकारी रोमबहादुर महत, खोटाङका फणिन्द्र दाहाल, ओखलढुङ्गाका दिलकुमार तामाङ, सुनसरीका इन्द्रदेव यादव, उदयपुरका वीरेन्द्रकुमार यादव र पाँचथरका सुरेश न्यौपानेसँग जिल्लागत शान्तिसुरक्षा र कोभिड–१९ लगायतका विषयमा जानकारी लिएको थियो ।

यसैगरी सिन्धुपाल्चोकका प्रमुख जिल्ला अधिकारी बेदनिधि खनाल, इलामका माधवप्रसाद ढुङ्गाना, रसुवाका नवराज जैसी, म्याग्दीका चिरञ्जीवी राना, लमजुङकका सुशील वैद्य, सप्तरीका जनार्दन गौतम, रौतहटका कृष्णबहादुर शाही र पर्वतका पर्वत देवी पाण्डे खत्रीसँग टेलिफोनमा जिल्लामा कोभिड–१९ सङ्क्रमणको अवस्था, खोप लगाएकाको सङ्ख्या, शान्ति सुरक्षाको अवस्था र न्यानो कपडा वितरणबारे जानकारी लिनुभएको गृहमन्त्रीका प्रेस संयोजक मधुसुधन भट्टराईले जानकारी दिए।

गृहमन्त्री खाणले जिल्ला प्रशासन र जिल्लास्थित सरकारी कार्यालयमा कोभिड–१९ को अवस्था, शान्ति सुरक्षाको स्थिति, तराईमा शीतलहर र हिमालमा हिमपातको प्रभावमा परेका गरिब र अशक्त नागरिकलाई न्यानो कपडा वितरणबारे जानकारी लिएको हो । सरकारले गत मङसिर १ गते नै रकम खर्च गर्ने अख्तियारीसहित तराईमा शीतलहरबाट बच्न र हिमालमा हिमपातबाट बच्न न्यानो कपडा वितरणका लागि निर्देशन दिएको थियो ।

ओखलढुङ्गाका प्रमुख जिल्ला अधिकारी तामाङले गृहमन्त्री खाँणले टेलिफोनमा जिल्लामा कोभिड–१९ को सङ्क्रमणको अवस्था, रोक्नका लागि खोप लगाउने कार्य, आइसोलेसन, शान्ति सुरक्षाको अवस्था र न्यानो कपडा वितरणबारे जानकारी लिएको बताए । ‘मन्त्रीज्यूले बिहान टेलिफोनमा जिल्लामा शान्ति सुरक्षाको अवस्था, कोभिड सङ्क्रमण, कोभिडविरुद्धको खोप र शीतलहरबारे जानकारी लिनुभयो’, प्रजिअ तामाङले भने। सीमानाकाबाट आउने नागरिकमा कोभिडको सङ्क्रमणबारे पनि मन्त्री खाँणले जानकारी लिए ।

इलामका प्रजिअ ढुङ्गानाले सीमाबाट आएका नागरिकमा कोभिड सङ्क्रमणको अवस्था, निको हुने दर, विद्यालय सञ्चालनको अवस्था कस्तो छ भनेर मन्त्री खाणले जानकारी लिएको बताए।

गोरखाका प्रजिअ आचार्य र रसुवाका प्रजिअ जैसीले हिमपातबाट बच्न नागरिकलाई न्यानो कपडा वितरण, कोभिड सङ्क्रमणको अवस्था र शान्ति सुरक्षाको अवस्थाबारे गृहमन्त्रीले टेलिफोनबाट जानकारी लिएको बताए ।

रूपन्देही । झुण्डिएको अवस्थामा मृत फेला परेका प्रहरी बरिष्ठ उपरीक्षक (एसएसपी) सुशिलकुमार यादवको घटनाबारे बुझ्नका लागि गृहमन्त्री बालकृष्ण खाण घटनास्थल संघीय प्रहरी कार्यालय भैरहवा पुगेका छन् । घटनास्थलमा मृतकको श्रीमती पुगेपछि अहिले शव निकालेर मुचुल्का उठाउने काम भैरहेको जनाइएको छ ।

कार्यालय प्रवेशमा भने पत्रकारमाथी रोक

संघीय प्रहरी इकाइ कार्यालय भैरहवाका प्रमुख एसएसपी सुशीलकुमार यादवको शंकास्पद मृत्युपछि पत्रकारलाई कार्यालय प्रवेशमा निषेध गरेपछि थप आशंका गरिएको छ। शंकास्पद मृत्युमा आन्तरिक विषय खुल्नसक्ने भएकाले प्रहरीले पत्रकारलाई कार्यालय प्रवेशमा निषेध गरेको पत्रकारले नै गुनासो गरेका छन् ।

सांगठनिक समस्याका कारण एसएसपीको मृत्यु भएको हो भने प्रहरीबाट धेरै विषय खुल्नसक्छ । तर रुपन्देही प्रहरीले कार्यालयमा आएका विभिन्न प्रहरी अधिकारीहसँग पत्रकारलाई भौतिक रुपमा सम्पर्क गर्न दिएको छैन ।

रुपन्देही प्रहरीले एसएसपी यादवका परिवार सदस्य, आफन्तसहित सर्वसाधारण, व्यवसायीलगायतलाई कार्यालयमा प्रवेश गराए पनि पत्रकारलाई प्रवेशमा पूर्णरुपमा रोक लगाउँदा प्रहरीले आवश्यक सूचना लुकाउन चाहेको आभास भएको पत्रकार दीपक घिमिरेले बताए ।

‘हाम्रो कार्यालय भए पनि हामीले पत्रकारलाई प्रवेशमा रोक लगाएका होइनौँ ।’ संघीय प्रहरी इकाई कार्यालय भैरहवाका डिएसपी हेमबहादुर केसीले भने, ‘अनुसन्धानको विषय भएकोले सबै काम जिल्ला प्रहरी कार्यालय रुपन्देहीले गरिरहेको छ । यस विषयमा हामीले केही गरेका छैनौँ ।’  कार्यालयमा जिल्ला प्रहरी कार्यालयका डिएसपी नवरत्न पौडेल खटिएका छन् । शुक्रबार दिउँसो एसएसपी यादवको शव कार्यालयको क्वाटरमा झुन्डिएको अवस्थामा फेला परेको थियो ।

काठमाडौं । गृहमन्त्री बालकृष्ण खाणले विविध कठिनाइका बाबजुत व्यक्तिगत घटना दर्ता तथा व्यवस्थापन सूचना प्रणालीलाई वडास्तरसम्म विस्तार गरिएको बताएका छन् । संयुक्त राष्ट्रसंघीय आर्थिक तथा सामाजिक परिषद्को आयोजनामा भएको व्यक्तिगत घटना दर्ता तथा तथ्यांक व्यवस्थापन सन्बन्धी सम्मेलनलाई भर्चुअल माध्यमबाट सम्बोधन गर्दै गृहमन्त्री खाणले आफूहरुले सन् २०२४ सम्म व्यक्तिगत घटना दर्तालाई सतः प्रतिशत पु¥याउने अन्तराष्ट्रिय प्रतिबद्धता बमोजिम काम गरिरहेको जानकारी गराएका हुन् ।

सम्मेलनलाई सम्बोधन गर्दै गृहमन्त्री खाणले व्यक्तिगत घटना दर्ता तथा तथ्यांक व्यवस्थापनसन्बम्धी प्रणाली सुदृढीकरण गर्ने सन्दर्भमा देखिएका चुनौती समाधान गर्न सबै मिलेर अगाडि बढ्नुपर्नेमा जोड दिए । एशिया तथा प्यासिफिक क्षेत्रका दुई दर्जन बढी सदस्य राष्ट्रको सहभागितामा आयोजित सम्मेलनमा नेपालको नेतृत्व गर्दै गृहमन्त्री खाणले सम्मेलनले एसिया प्रशान्त क्षेत्रमा व्यक्तिगत घटना दर्ता तथा तथ्यांक व्यावस्थापन कार्यलाई महत्वपूर्ण योगदान गर्ने बताए ।

सबै नेपालीको समयमा नै जनसांख्यिक विवरण अध्यावधिक गर्न र राष्ट्रिय परिचय कायम गर्न व्यक्तिगत घटना दर्ता तथा तथ्यांक व्यावस्थापन प्रणाली आधारको रूपमा रहने बताउँदै उनले यसको सफल कार्यान्वयन गर्ने प्रतिबद्धता पनि जनाए ।

सन् २०१५ देखि २०२४ सम्म घटना दर्ता दशकको मध्यावधि समिक्षा गर्न सम्मेलन आयोजना भएको हो । यसभन्दा अघि सम्मेलन नोभेम्बर १६ देखि १९ सम्म थाइल्याण्डको बैंककमा आयोजना भइरहेको छ । सम्मेलनलाई गृहमन्त्री खाणले राष्ट्रिय परिचय पत्र तथा पञ्जिकरण विभागको हलबाट भर्चुअल सम्बोधन गरेका हुन् । सम्मेलनलाई सम्बोधनपछि गृहमन्त्री खाणले विभाग र राष्ट्रिय परिचय पत्र निर्माणको प्रणालीबारे जानकारी पनि लिएका छन् ।

काठमाडौं । गृहमन्त्री बालकृष्ण खाणले चाडपर्वका बेला म्याद गुज्रेका खाद्य सामाग्री र औषधि विक्रि वितरण गरेको पाइएमा कानुन अनुरुप अगाडि बढ्न बाध्य हुने बताएका छन् । बिहीबार गृह मन्त्रालयमा बसेको चाडपर्व लक्षित बजार अनुगमनसम्बन्धी बैठकमा मन्त्री खाणले नागरिकको जीवन रक्षा र हितमा लाग्नु सरकारको दायित्व भएको भन्दै त्यो दायित्व पूरा गर्न सरकार प्रतिबद्ध रहेको बताएका हुन् ।

उनले भने, ‘नागरिकको जीवन रक्षा र हितका लागि काम गर्नु राज्यको पहिलो दायित्व हो, त्यो दायित्व पूरा गर्न हामी प्रतिबद्ध छौं । म्याद गुज्रेका औषधि र खाद्य सामाग्री विक्रि वितरण गरेको पाइएमा हामी कानुन अनुरुप अगाडि बढ्नुपर्छ । त्यस विषयमा यहाँहरूले ध्यान दिनुहोला ।’

आपूर्ति व्यवस्थापन, बजार अनुगमन र व्यवस्थापन तथा यातायात व्यवस्थापन एजेण्डा राखेर बोलाइएको बैठकमा उपभोक्ता अधिकारकर्मी, यातायात व्यवसायी, उद्योगी व्यवसायी र सरकारी निकायका र सुरक्षा निकायका उच्च अधिकारीको सहभागिता रहेको बैठकमा मन्त्री खाणले म्याद गुज्रेका सामाग्री बेच्दा घुमीफिरी आफ्नै भान्सामा आइपुग्नेतर्फ पनि ध्यान दिन आग्रह गरे ।

उनले चाडपर्वमा अन्य बेलामा भन्दा कम नाफा लिएर धेरै वस्तु सुपथ मूल्यमा बेच्न पनि व्यवसायीलाई आग्रह गर्दै भने, ‘अन्य बेलामा जस्तै धेरै नाफा नलिई कम नाफा लिएर सुपथ मूल्यमा बेचेर उपभोक्तालाई राहत दिनुस् भन्ने मेरो आग्रह छ । बढी मूल्यमा बेचेको अनुगमनका क्रममा पाइएमा सरकारी निकाय कानुन अनुरुप अगाडि बढ्न पर्छ ।’

व्यवसायी, सरकार र उपभोक्ता मिलेर अगाडि बढेमा मात्र चाडपर्व रमाइलो गरी मनाएर बिदा गर्न सकिने उनको भनाइ थियो । मन्त्री खाणले उद्योगी, व्यवसायीलाई कोभिड–१९ विरुद्धको खोपमा प्राथमिकता दिन र यातायात व्यवसायीको मागमा सरकार सकारात्मक रहेको बताए । उनले सवारी दुर्घटना न्यूनिकरणमा गम्भीर बन्न पनि व्यवसायीलाई आग्रह गरेका छन् । उनले बर्षातका समयमा बिग्रिएका मुलुकका विभिन्न स्थानका सडक दशैं अगाडि मर्मत गर्न प्रधानमन्त्रीसँग कुरा राखेर पहल गर्ने बताए । जनताको सुरक्षाका लागि सरकारले आफ्नो दायित्व कुनै पनि अवस्थामा पूरा गर्न प्रतिबद्ध रहेको उनको भनाई थियो ।

गृहसचिव टेकनारायण पाण्डेले चाडपर्वमा बजार व्यवस्थापनमा त्रिपक्षीय सम्बन्ध जरुरी रहेको बताए । उनले बजार प्रणालीबाट जनस्वास्थ्यमा खेलवाड गर्न नपाइने भन्दै खेलवाड गर्न नदिन गृहमन्त्रालय प्रतिबद्ध रहेको पनि बताए । उनले भने, ‘बजार प्रणालीबाट जनस्वास्थ्यमाथी खेलबाड हुन नदिन गृहमन्त्रालय प्रतिबद्ध छ । खेलवाड भए नभएकोबारे बजार अनुगमन हुन्छ ।’ उनले अनुगमनमा मूल्यसूचीजस्तै स्वास्थ्य मापदण्ड पनि हेरिने बताए ।

उद्योग वाणिज्य तथा आपूर्ति मन्त्रालयका सचिव दिनेश भट्टराईले चाडपर्वका बेला म्याद सकिएका खाद्य सामाग्री विक्रि वितरण गरेको पाइएमा शक्त कारबाही गर्न मातहतका निकायलाई निर्देशन दिएको जानकारी गराएका छन् । उनले भने, ‘हामीले वाणिज्य र गुणस्तर विभागलाई स्पष्ट रूपमा भनेका छौं, चाडपर्वको मौका छोपी नबिकेर म्याद गुज्रिएका सामाग्री निरक्षर उपभोक्ता भएका स्थानसम्म पुर्याएर विक्री हुनसक्छ । त्यस्तो पाइएमा सक्त कारबाही गर्नू,।’ नेपाल प्रहरीका महानिरीक्षक (आईजीपी) शैलेश थापाले मुख्य चाडपर्वलाई लक्षित गर्दै प्रहरीले विषेश सुरक्षा योजना बनाएको बताए ।

बैठकमा महानगरीय ट्राफिक प्रहरी महाशाखाका प्रमुख, प्रहरी बरिष्ठ उपरीक्षक (एसएसपी) जनक भट्टराई र यातायात व्यवस्था विभागका प्रवक्तासमेत रहेका निर्देशक डा‍‌ लोकनाथ भुसालले दशैंमा सार्वजनिक सवारी साधन कसरी सञ्चालन गर्ने भनेर अहिलेसम्म भएका तयारीबारे जानकारी गराएका थिए । प्रवक्ता भुसालले आगामी ११ गतेबाट दशैंलाई अग्रिम टिकट विक्रि खुला गर्ने र १४ स्थानमा यात्रु सहायता कक्ष राख्ने निर्णय भएको जानकारी गराए । त्यस्तै बसको टिकट अनलाइनमा काट्ने बनाउन प्रयास भइरहेको उनको भनाई थियो । बैठकमा उपभोक्ताकर्मी, यातायात  व्यवसायी, उद्योगीले आ–आफ्ना धारणा राखेका थिए ।

काठमाडौं । गृहमन्त्री बालकृष्ण खाणले ७ जिल्लाका प्रमुख जिल्ला अधिकारीलाई बाढी, पहिरो र डुवानमा परेकालाई उपलब्ध स्रोत साधनको भरपुर उपयोग गरी उद्धार गर्न, राहत उपलब्ध गराउन र खतराको सम्भावना नभएको स्थानमा सार्न निर्देशन दिएका छन् । उनले सोमबार विभिन्न ७ जिल्लाका प्रमुख जिल्ला अधिकारीसँग जिल्लामा भएका घटनाबारे टेलिफोनमार्फत जानकारी लिने क्रममा यस्तो निर्देशन दिएका हुन् ।

गृहमन्त्री खाणले रोल्पाका प्रमुख जिल्ला अधिकारी नवराज सापकोटालाई टेलिफोन गरेर रातभर लगातार परेको वर्षातका कारण आएको पहिरो र बाढीको असरबारले जानकारी लिएका छन् । प्रमुख जिल्ला अधिकारी सापकोटाका अनुसार जिल्लाको रोल्पा नगरपालिका १० बाम्लामा पूर्णबहादुर थापाको घर पहिरोले भत्काउँदा दुई जनाको मृत्यु भएको छ । दुई जना घाइते भएका छन् । प्रजिअ सापकोटाले ७० वर्षका गौरी थापा र पाँच वर्षका हिमाल रोकाको मृत्यु भएको जानकारी गृहमन्त्रीलाई गराएका छन् । घटनामा हिमाका बाबु मनबहादुर रोका र आमा भिमकुमारी रोका घाइते भएका छन् । मनबहादुरको अवस्था गम्भीर रहेको र उनलाई नेपाल प्रहरी र सशस्त्र प्रहरीको टोलीले अस्पतालसम्म पु¥याएको उनले बताए ।

त्यस्तै मन्त्री खाणले काठमाडौँका प्रमुख जिल्ला अधिकारी कालीप्रसाद पराजुलीलाई टेलिफोन गरेर रातभरको वर्षातपछिको अवस्थाबारे जानकारी लिएका छन् । प्रजिअ अधिकारीले अहिलेसम्म जिल्लामा ३ सय ८५ घर टहरा डुवानमा परेको, २ सय ३२ जनाको उद्धार गरिएको र एउटा झोलंगे पुलमा असर पु¥याएको जानकारी मन्त्रीलाई गराएका छन् । मुख्यगरी जिल्लाका १० स्थान डुवानमा परेको जानकारी मन्त्री खाणलाई प्रजिअ पराजुलीले गराएका छन् ।

ललितपुरका प्रमुख जिल्ला अधिकारी ढुण्डीप्रसाद निरौलालाई पनि टेलिफोन गरेर नख्खु कारागारमा भएको अवस्थाबारे जानकारी लिएका छन् । कारागारमा आइतबार अपरान्ह चौकिदारले बेथिति मच्चाएको भन्दै कैदीबन्दीले नाराबाजी गरेको सूचना आएपछि गृहमन्त्री खाणले त्यसबारे चासो राख्दै थप जानकारी लिएका हुन् । प्रजिअ निरौलाले चौकिदारको विरोधमा कैदीबन्दीले नारावाजी गरेको र रातभरमा दुवै समूहबीच सहमति गराएर अवस्था सामान्य बनाएको जानकारी मन्त्री खाणलाई गराएका छन् । ‘नख्खु कारागारमा देखिएको अवस्थाबारे मन्त्रीज्यूले जानकारी लिनुभएको थियो,’ प्रजिअ निरौलाले भने, ‘केही अवस्था असहज देखिएको थियो । अहिले सहमतिमा सामान्य भइसकेको छ ।’

मन्त्री खाणले निरन्तरको वर्षातका कारण आएको बाढी, पहिरो र भएको डुवानको असरबारे कैलालीका प्रमुख जिल्ला अधिकारी खगेन्द्रप्रसाद रिजाल, बाँकेका प्रमुख जिल्ला अधिकारी शिवराम गेलाल, भक्तपुरका प्रमुख जिल्ला अधिकारी प्रेमप्रसाद भट्टराईसँग पनि जानकारी लिएका छन् । ति प्रमुख जिल्ला अधिकारीले जिल्लाको अवस्थाबारे जानकारी गराएको गृहमन्त्रीको सचिवालयले जनाएको छ । सचिवालयका अनुसार सबै प्रजिअलाई गृहमन्त्रीले प्राकृत्तिक विपत्तिमा परेका नागरिकलाई राहत, उद्धार उपलब्ध स्रोत साधनको उपयोग गरेर काम गर्न निर्देशन दिएका छन् ।

मोरङका प्रमुख जिल्ला अधिकारी कोषहरि निरौलाले प्रहरी हिरासतमा रहेका लागूऔषध मुद्दाका भीम कामत विरामी भई अस्पताल लैजाने क्रममा मृत्यु भएको पनि गृहमन्त्री खाणलाई जानकारी गराए ।

काठमाडौं । गृहमन्त्री बालकृष्ण खाँणले सर्वसाधारणको जीउधनको सुरक्षामा गम्भिर भएर लाग्न निर्देशन दिएका छन् । शुक्रबार राष्ट्रिय विपद् जोखिम न्यूनीकरण तथा व्यवस्थापन प्राधिकरणमा अन्तरक्रिया तथा निरीक्षण भ्रमण गर्दै उनले प्राधिकरणलाई यस्तो निर्देशन दिएका हुन् ।

मन्त्री खाँणले अहिलेको अवस्थामा विपदको जोखिम न्यूनीकरण पहिलो प्राथमिकता हुनुपर्ने भन्दै यसका लागि प्राधिकरणको संस्थागत सुदृढीकरण, बजेट व्यवस्थापन लगायतमा आवश्यक सहयोग गर्ने प्रतिबद्धता जनाए । मन्त्री खाँणले विपदमा काम गर्ने सरकारी संरचनाबीच सहकार्य र समन्वय हुनुपर्नेमा जोड दिए ।

विपद् कुनै पनि बेला आउनसक्ने हुनाले सोही अनुरुपको तयारी अवस्थाका लागि सचेतनाका कार्यक्रम बढाउनुपर्ने उनको धारणा थियो । मन्त्री खाँणले गाउँ गाउँबाट विपद्को जानकारी तुरुन्तै पाउने संयन्त्रको विकास गरी मानवीय क्षतिलाई बचाउनुपर्नेमा जोड दिए । पछिल्लो समय पानी नपर्ने हिमाली भूभागमा पानी पर्ने जस्ता विपद्का कल्पना नगरेका जोखिम देखिन थालेको हुँदा बहुआयामिक ढङ्गले अघि बढ्नुपर्ने मन्त्री खाँणले बताए । उनले विपद्का विभिन्न पक्षका बारेमा अध्ययन हुनु आवश्यक रहेकोमा समेत जोड दिएका छन् ।

गृहसचिव महेश्वर न्यौपानेले विपद्को जोखिम न्यूनीकरण र पूर्वतयारीमा प्राधिकरणले बढी ध्यान केन्द्रित गर्नुपर्नेमा जोड दिए । उनले विपद्सँग सम्बन्धित विज्ञसहितको कर्मचारी व्यवस्थापनको ढाँचामा प्राधिकरण जान आवश्यक रहेको बताए । विपद सम्बन्धी अध्ययन, अनुसन्धान र जोखिमको पहिचान गरी काम त्यसतर्फ केन्द्रीत गर्नु जरुरी रहेको सचिव न्यौपानेको भनाई थियो ।

उक्त अवसरमा गृहमन्त्रालयको विपद् तथा द्वन्द्व व्यवस्थापन महाशाखाका प्रमुख तथा सह(सचिब हुमकला पाण्डेले मनसुनजन्य विपद्का घटना, खोज, उद्धार र राहत तथा क्षतिको अवस्था र गृहमन्त्रालयबाट भएका कामहरुका बारेमा जानकारी गराउनुभएको थियो ।

त्यस्तै प्राधिकरणका कार्यकारी प्रमुख अनिल पोखरेलले प्राधिकरणबाट भएका काम, यसका चुनौती र आगामी कार्यदिशाबारे जानकारी गराएका थिए । उनले प्राधिकरणको मौजुदा संगठन संरचनामा प्राविधिक जनशक्तिको अभाव रहेकोतर्फ मन्त्रीको ध्यानाकर्षण गराएका थिए । पछिल्लो समय जलवायू परिवर्तनका कारण विपद्का घटना बढ्दै गएको र नयाँ नयाँ स्वरुपमा देखा परेको भन्दै यसको जोखिम न्यूनीकरणमै ध्यान दिनुपर्नेमा पोखरेलले जोड दिएका थिए ।