काठमाडौं । नेकपा (एकीकृत समाजवादी) ले वर्षाबाट बालीमा पुगकेो क्षतिको मूल्यांकन गरी पीडित कृषकलाई राहत र क्षतिपूर्ति दिन सरकारसमक्ष माग गरेको छ ।
पछिल्लो समय डुबान, सडक दुर्घटना, वर्षाका कारण भएको विपद्प्रति दु:ख व्यक्त गर्दै सो पार्टीले प्राकृतिक विपद्को व्यवस्थापन तथा न्युनीकरणका लागि सरकारले अल्पकालीन तथा दीर्घकालीन योजना बनाइ कार्यान्वयन गर्नुपर्नेमा पनि जोड दिएको छ ।
नेकपा एसका उपमहासचिव तथा प्रचार विभाग प्रमुख जगन्नाथ खतिवडाले एक विज्ञप्ति जारी गर्दै विपद्मा परी समस्यामा परेका नागरिकको उपचार, राहत र उद्धारका निम्ति देशभरका पार्टी कमिटी एवं जनसंगठनलाई सम्पूर्णरूपमा परिचालित हुन अध्यक्ष माधवकुमार नेपालले निर्देशन दिइसकेको उल्लेख गरेका छन् ।
‘वर्षाकै कारण नेपाली कृषक जनताको प्रमुख खाद्यान्न बाली धान भित्र्याउने कार्य प्रभावित भएको छ । काट्न ठिक्क पारिएको र काटेर थन्क्याउने अवस्थाका धान क्षति हुँदा नेपाली कृषक समुदाय पीडामा छन्’, विज्ञप्तिमा भनिएको छ’, कृषक जनताको यो पीडामा नेकपा (एकीकृत समाजवादी) साथमा रहेको पनि हामी स्पष्ट पार्दछौँ ।
