Tag: कुशल मल्ल

काठमाडौं। नेपाली राष्ट्रिय टोलीमा केही समयदेखि ओपनरको भूमिकामा जमिरहेका ब्याट्सम्यान हुन्, आसिफ शेख । यद्यपि, उनको प्रदर्शनमा बारम्बार उतारचढाव आइरहन्छ ।

नेपाल क्रिकेट संघ (क्यान) ले विश्वकपका लागि घोषणा गरेको १५ सदस्यीय राष्ट्रिय टोलीमा आसिफ अटाउनेमा कुनै शंका थिएन । आसिफका सहोदर दाजु आरिफ शेख भने अटाउन सकेनन् ।

राष्ट्रिय टोली घोषणा भएको दिन नेपालले वेस्ट इन्डिज ‘ए’सँग खेलेको खेलमा आरिफ पनि टोलीमा थिए । सायद यस खेलमा राम्रो प्रदर्शन गर्न सकेको भए उनले छनोटकर्ताको विश्वास जित्न सक्थे । दुर्भाग्य, मध्य क्रमका यी अनुभवी ब्याटिङ अलराउन्डर ३ रनमै आउट भए ।

आरिफले हालसम्म ३८ टी-२० अन्तर्राष्ट्रिय खेल्दै १०९.०७ को स्ट्राइक रेटमा ४९३ रन जोडेका छन्। उनले एक पटक पनि अर्धशतक बनाएका छैनन् । तर, बलिङमा ४ विकेट लिएका छन् । टी-२० अन्तर्राष्ट्रिय क्रिकेटमा यो विर्सनलायक प्रदर्शन हो । आरिफले ५१ एक दिवसीय अन्तर्राष्ट्रिय खेल खेल्दै ६ अर्धशतकसहित ९६४ रन बनाएका छन् । स्ट्राइक रेट ६२.४३ छ ।

आसिफको कहानी भने बेग्लै छ । तीन वर्षअघि टी-२० अन्तर्राष्ट्रिय क्रिकेटमा डेब्यु गरेका उनले पछाडि फर्केर हेर्नुपरेको छैन । नेपालको ओपनिङ ब्याटिङमा आसिफ र कुशल भुर्तेलको जोडी लगातार जमिरहेको छ । सन् २०२१ को अप्रिलमा यी दुईले नेदरल्यान्ड्सविरुद्ध खेल्दै डेब्यु गरेका थिए । नेपालले त्रिकोणात्मक टी-२० अन्तर्राष्ट्रिय शृङ्खला खेल्न मलेसियालाई पनि नेपाल बोलाएको थियो ।

कुशल र आसिफले पहिलो खेलमै अर्धशतक बनाएर डेब्युलाई स्मरणीय बनाएका थिए । त्यसयता आसिफले टी-२० अन्तर्राष्ट्रिय क्रिकेटमा ४४ खेल खेल्दै एक हजार २३ रन जोडेका छन् । उनले ५ अर्धशतक बनाएका छन् भने स्ट्राइक रेट ११८.६७ छ । हालै वेस्ट इन्डिज ‘ए’विरुद्ध भएको अन्तिम खेलमा उनले ५१ रनको पाली खेलेका थिए । सोही टोलीविरुद्ध खेलेको पहिलो खेलमा उनले खाता खोल्न सकेका थिएनन् ।

त्यसअघि नेपाल सहभागी एसीसी प्रिमियर कपका अन्तिम तीन खेलमा आसिफको प्रदर्शन विर्सनालयक रहेको थियो । उनले लिग चरणको अन्तिम खेलमा साउदी अरबविरुद्ध २ रन बनाएका थिए भने सेमिफाइनलमा यूएईविरुद्ध ८ रन जोडेर आउट भएका थिए ।

तेस्रो स्थानका लागि भएको खेलमा हङकङका बलरले उनलाई ५ रनमा आउट गरेका थिए । तर, खराब प्रदर्शन हुँदा पनि छनोटकर्ताले उनीमाथि विश्वास गुमाएनन् । भनिन्छ- फर्म इज ट्याम्पोररी, क्लास इज पर्मानेन्ट अर्थात् लय अस्थायी हो, तर क्लास स्थायी ।

दायाँ हाते यी ब्याटरको क्षमतामाथि कुनै शंका छैन । उनले एक दिवसीय अन्तर्राष्ट्रिय क्रिकेटमा पनि ४९ खेल खेल्दै एक शतक र १२ अर्धशतकसहित एक हजार ४०१ रन बनाएका छन् । स्ट्राइक रेट ७६.९७ रहेको छ । गत वर्ष भएको एसिया कपमा उनले भारतविरुद्ध अर्धशतकीय पाली खेलेका थिए । त्यस खेलमा उनले ५८ रन जोडेका थिए ।

उनले एक दिवसीय अन्तर्राष्ट्रिय क्रिकेटमा ओमान, स्कटल्यान्ड, यूएई, नेदरल्यान्ड्स, पीएनजी, नामिबिया जस्ता टोलीहरुविरुद्ध अर्धशतक बनाएका छन् । यस्तै टी-२० अन्तर्राष्ट्रिय क्रिकेटमा नेदरल्यान्ड्स, यूएई जस्ता टोलीविरुद्ध अर्धशतक बनाएका छन् । उनी तीन पटक शून्यमा आउट भएका छन् । तर, २ वर्षयता उनले यसरी आउट हुनु परेको छैन । आसिफले टी-२० अन्तर्राष्ट्रिय क्रिकेटमा ३४ छक्का र ९९ चौका प्रहार गरेका छन् ।

आसिफ ओपनरका रूपमा एंकर रोलमा हुन्छन् । कुशलसित उनको ट्युनिङ निकै राम्रो मिल्ने गरेको छ । उनीहरूको पार्टनरशिप टिक्यो भने नेपाललाई निकै सजिलो हुन्छ । आसिफको अतिरिक्त जिम्मेवारी भनेको विकेट किपरको हो । विकेट किपिङ उनको सफा नै छ । दोहोरो भूमिका भएका कारणले पनि उनलाई रिप्लेस गर्न सजिलो छैन ।

नेपाली क्रिकेट खेलाडीहरुबारे नेपाल प्रेसका थप सामग्री पढ्नुहोस्-

1. टी-२० विश्वकपअघि कुशलको खराब फर्म नेपालको चिन्ता
2. ‘रेड हट’ फर्ममा रोहित, फ्यानलाई बनाउँदैछन् मोहित
3. अनुभवी ओपनर आसिफबाट आशा
4. अस्थिर फर्मबाट गुज्रिरहेका ललित: सन्दीपको अभावले मनोवैज्ञानिक दबाब
5. सन्दीप जोरा- नेपालका नवोदित ब्याटिङ स्टार
6. १६७ को स्ट्राइक रेटमा ब्याटिङ गरिरहेका कुशल
7. सन्दीपलाई पछ्याइरहेका बलर, १० नम्बरमा आएर खेल जिताउन सक्ने ब्याट्सम्यान
8. ‘थ्रीडी क्रिकेटर’ दीपेन्द्र : नेपालको भरोसाका केन्द्र
9. ‘योर्कर विशेषज्ञ’ अविनाश: जो डेथ ओभरमा अक्सर चुक्छन्
10. सोमपाल कामी- धार खोजिरहेको नेपालको पुरानो हतियार
11. सागर ढकाल- नेपालले खोजिरहेका नयाँ विशेषज्ञ स्पीनर
12. प्रतिश जिसी- नेपालको फास्ट बलिङमा अविनाश, सोमपाल र करणका विकल्प
13. एकदिवसीयको प्रदर्शनले टी-२० विश्वकपमा अटाएका अनिल जो बन्दैछन् आसिफलाई ‘थ्रेट’
14. २ वर्षयता टी-२० अन्तर्राष्ट्रिय नखेली विश्वकप पुगेका कमल
15. कहिल्यै शून्यमा आउट नभएका गुल्शन

काठमाडौं । अन्तिम खेललाई बिर्सने हो भने नेपाल र वेस्ट इन्डिज ‘ए’ बीचको श्रृंखला ‘रोहित भर्सेस वेस्ट इन्डिज’ जस्तो बन्यो । तीन वटा खेलमा टीमको ब्याटिङ पंक्ति धर्मराउँदा कप्तान रोहित पौडेल एक्लैले वेस्ट इन्डिजलाई कडा टक्कर दिए ।

विश्वकपको ठीक अगाडि कप्तानको तातो फर्म नेपालका लागि सुखद समाचार बनेको छ । वेस्ट इन्डिजको धारिलो बलिङ आक्रमणलाई उनले जसरी आत्मविश्वासका साथ सामना गरे, त्यसले विश्वकप खेल्न जाँदै गर्दा सिंगो टीमको आत्मबल उच्च बनेकोमा शंका छैन । ‘लिडिङ फ्रम दि फ्रन्ट’ को सिद्धान्तलाई अनुशरण गर्दै रोहितले अन्य खेलाडीहरुलार्ई पनि प्रेरणा दिएका छन् ।

नेपाली क्रिकेट टीमभित्र रोहितभन्दा पाका र अनुभवी अरु धेरै खेलाडी छन् । नेपाली क्रिकेटमा उनीभन्दा ग्ल्यामरस र पपुलर अनुहारहरु पनि थुप्रै होलान् । सन्दीप लामिछानेमाथि मुद्दा दायर भएपश्चातको विषम स्थितिमा उनलाई टीमको बागडोर आइपरेको थियो । त्यसपश्चात एउटा कप्तानको रुपमा र एउटा खेलाडीको रुपमा उनी खरो उत्रिए । आलोचकहरुलाई आफ्नो प्रदर्शनबाटै जवाफ दिए ।

उमेरले कच्चा भए पनि रोहितको खेलमा निकै परिपक्वता छ । परिस्थितिअनुसार उनी आफ्नो खेल शैलीमा परिमार्जन गर्न सक्छन् । विकेट जोगाउनुपर्ने अवस्थामा क्रिजमा टिकेर स्ट्राइक रोटेट गर्दै खेल्छन् । रन गति बढाउनुपर्ने भए ठूला सटहरु हिर्काउन धक मान्दैनन् । उनको रनिङ बिटविन द विकेट तेज छ भने फिल्डिङ उत्तिकै सार्प छ ।

उमेरले भर्खर २१ वर्षका त भए । तर, नेपालका लागि कैयौं म्याच विनिङ पारीहरु खेलिसकेका छन् । पछिल्लो समय नेपालले हासिल गरेका महत्वपूर्ण सफलताहरुमा उनको बलियो हात छ । ‘मध्यक्रममा रोहित छन्’ भन्ने भावले नै एकप्रकारको सान्त्वना महसुस हुन्छ । सानो कदका यी खेलाडी नेपाली क्रिकेटका ठूला नाम बनिसकेका छन् ।

रोहित नेपालका प्राविधिक रुपमा सबैभन्दा उत्कृष्ट ब्याट्सम्यान हुन् भन्दा फरक नपर्ला । उनीसँग ‘रेञ्ज अफ सट्स’ छन् । उनका स्ट्रोकहरु निकै दर्शनीय हुन्छन् । जिउडाल नपत्याउँदो भए पनि उनी पावरफुल सटहरु हान्न सक्छन् ।

पछिल्लो समय रोहितले ब्याटिङबाट मात्र नभएर बलिङबाट पनि टीमलाई योगदान दिन थालेका छन् । यो नेपालका लागि अर्को प्लस प्वाइन्ट हो । उनको स्पिन बलिङ किफायतीमात्र होइन, धारिलो पनि छ । यद्यपि, टीममा धेरै अलराउन्डर भएकाले रोहित आफूलाई कमैमात्र बलिङमा उतार्ने गरेका छन् । आफैं कप्तान भएकाले पनि उनले आफूलाई कम चान्स दिएका हुन सक्छन् ।

तथ्यांकमा हेर्ने हो भने रोहित एक दिवसीय अन्तर्राष्ट्रियमा नेपालका लागि सबैभन्दा बढी रन बनाउने ब्याट्सम्यान हुन् । अहिलेसम्म ६१ ओडीआई खेलेर १,५८६ रन बनाइसकेका रोहितले १ शतक र ९ अर्धशतक प्रहार गरेका छन् । रोहितको एक दिवसीय औसत २९.९२ र स्ट्राइक रेट ७४.५६ रहेको छ ।

टी-२० अन्तर्राष्ट्रियमा रोहितले ४९ खेल खेल्दै ६ अर्धशतकसहित १,१०८ रन बनाएका छन् । टी-२० मा उनको औसत रन २९.१५ र स्ट्राइक रेट १२४.९१ रहेको छ । टी-२० अन्तर्राष्ट्रियमा पनि सर्वाधिक रन बनाउने ब्याट्सम्यानको सूचीमा दीपेन्द्रसिंह ऐरीपछि रोहित दोस्रो स्थानमा छन् ।

भर्खरै वेस्ट इन्डिजविरुद्धको सिरिजमा रोहितले जुन प्रदर्शन गरे, त्यो उनको करिअरकै एउटा हाइलाइट्समा पर्नसक्छ । यो सिरिज अफिसियल टी-२० आई थिएन र नेपालका लागि ठूलो महत्वको पनि होइन । तर, वेस्ट इन्डिजले पठाएको टीम निकै बलियो थियो । राष्ट्रिय टीमबाट खेलिसकेका र भविष्यमा खेल्नसक्ने खेलाडीहरुले भरिएको वेस्ट इन्डिज ‘ए’ विरुद्ध रोहितले गर्व गर्नलायक प्रदर्शन गरे ।

पहिलो खेलमा रोहितको एकल प्रदर्शनले वेस्ट इन्डिजलाई स्तब्ध बनाएको थियो । वेस्ट इन्डिजले दिएको २०० माथिको विशाल लक्ष्य पछ्याउने क्रममा अविश्वसनीय ब्याटिङ गर्दै शतक बनाएका रोहित नेपाललाई जीत नजिक पुर्‍याएर आउट भएका थिए । अन्य दुई वटा म्याचमा पनि उनको ब्याट त्यसैगरी चम्कियो । अन्तिम खेलमा भने टीमका अग्रपंक्तिका ब्याट्सम्यानहरुले जिम्मेवारी लिए र उनलाई फुर्सद दिए ।

वेस्ट इन्डिजविरुद्धको फर्म रोहितले विश्वकपमा पनि देखाउनेछन् भन्ने आशा लिइएको छ । हुन त विश्वकपमा नेपालले योभन्दा धेरै कठिन चुनौतीको सामना गर्नुपर्ने हुन्छ । तर, रोहित जस्तोसुकै चुनौतीका लागि पनि तयार देखिन्छन् । साथै उनीसँग एउटा बलियो ब्याटिङ युनिट पनि छ ।

रोहित कमजोरीविहीन खेलाडी त अवश्य होइनन् । एउटा ब्याट्सम्यानका रुपमा उनले अझै पनि निखारिन सक्ने ठाउँहरु छन् । धेरै पटक उनी राम्रो स्टार्ट लिएर पनि कन्भर्ट गर्न चुक्छन् । गलत समयमा विकेट खेल फ्याकिरहेका हुन्छन् । कहिले उनी लयमा आउन आवश्यकताभन्दा बढी समय लिन्छन् र आफैंमाथि प्रेसर बढाउँछन् । यी पक्षहरु पनि अनुभव बढ्दै जाँदा उनले सुधार्ने नै छन् ।

एउटा कप्तानका रुपमा रोहितले सिक्न धेरै बाँकी छ । खासगरी बलिङको रोटेसनमा उनी धेरै चुकिरहेका हुन्छन् । सक्षम हुँदाहुँदै आफैंलाई कम बल गराउनुले उनमा आत्मविश्वासको कमी महसुस हुन्छ । फेरि एकदुई वटा खेलमा असफल हुनासाथ एकथरि उरन्ठेउला फ्यानहरु सामाजिक सञ्जालमा खेदो गर्न थालिहाल्छन् । दक्षिण एसियाली देशमा क्रिकेट टीमको कप्तान हुन कहाँ सजिलो छ र ?

नेपाली क्रिकेट खेलाडीहरुबारे नेपाल प्रेसका थप सामग्री पढ्नुहोस्-

1. टी-२० विश्वकपअघि कुशलको खराब फर्म नेपालको चिन्ता
2. ‘रेड हट’ फर्ममा रोहित, फ्यानलाई बनाउँदैछन् मोहित
3. अनुभवी ओपनर आसिफबाट आशा
4. अस्थिर फर्मबाट गुज्रिरहेका ललित: सन्दीपको अभावले मनोवैज्ञानिक दबाब
5. सन्दीप जोरा- नेपालका नवोदित ब्याटिङ स्टार
6. १६७ को स्ट्राइक रेटमा ब्याटिङ गरिरहेका कुशल
7. सन्दीपलाई पछ्याइरहेका बलर, १० नम्बरमा आएर खेल जिताउन सक्ने ब्याट्सम्यान
8. ‘थ्रीडी क्रिकेटर’ दीपेन्द्र : नेपालको भरोसाका केन्द्र
9. ‘योर्कर विशेषज्ञ’ अविनाश: जो डेथ ओभरमा अक्सर चुक्छन्
10. सोमपाल कामी- धार खोजिरहेको नेपालको पुरानो हतियार
11. सागर ढकाल- नेपालले खोजिरहेका नयाँ विशेषज्ञ स्पीनर
12. प्रतिश जिसी- नेपालको फास्ट बलिङमा अविनाश, सोमपाल र करणका विकल्प
13. एकदिवसीयको प्रदर्शनले टी-२० विश्वकपमा अटाएका अनिल जो बन्दैछन् आसिफलाई ‘थ्रेट’
14. २ वर्षयता टी-२० अन्तर्राष्ट्रिय नखेली विश्वकप पुगेका कमल
15. कहिल्यै शून्यमा आउट नभएका गुल्शन