Tag: कर्णाली प्रदेशसभा

सुर्खेत । कर्णाली प्रदेशसभाको दशौं बैठक आज दिउँसो १ बजे बस्ने भएको छ । फागुन १६ गते बसेको वैठकलाई नेकपा एमालेले सात बुँदे सहमति कार्यान्वयनबारेमा भएको प्रगति सदनमा प्रस्तुत गर्नुपर्ने भन्दै माग राखेपछि अवरुद्ध भएको थियो ।

एमालेले सरकार र प्रमुख प्रतिपक्षी दलबीच माघ १८ गते भएको सहमतिअनुसार सातौं बुँदामा सरकारले गरेको प्रतिबद्धता सम्बन्धमा संसद सचिवालयलाई जानकारी दिने प्रतिबद्धता उल्लेख भएको छ । सोही प्रतिबद्धता अनुसार सरकारले सचिवालयमा भएको प्रगतिका बारेमा कुनैपनि विवरण सचिवालयलाई उपलब्ध नगराएको बताउँदै एमालेले लिखित प्रगति माग गरेको छ ।

एमालेले सदन अवरुद्ध गरेकै दिन मुख्यमन्त्री जीवनबहादुर शाहीले गरेको पत्रकार सम्मलेनमा प्रमुख प्रतिपक्षी दल एमालेसँगको सहमति अनुसार झण्डै ८४ करोड रकम फिर्ता ल्याइएको दाबी गरेका थिए । उनले एमालेकै सांसदहरुले जनतामाझ गएर टुक्रे आयोजना काँग्रेसले काटेको हो भन्दै प्रचार गर्दा आफू दुःखी भएको बताए ।

सुर्खेत । कर्णाली प्रदेशसभाको आजका लागि बोलाइएको बैठक सूचना टाँस गरी स्थागित गरिएको छ । प्रदेशसभा सचिव जीवराज बुढाथोकीका अनुसार विशेष कारणबस आज १ बजेका लागि बोलाइएको बैठक स्थगित भएको हो ।

प्रदेशसभाको अर्को बैठक भोलि १ बजेका लागि बोलाइएको छ । दलहरुबीच बैठक सञ्चालनबारे छलफल भइरहेको छ ।

अहिले नेकपा एमाले संसदीय दलका नेता यामलाल कंडेल, नेकपा माओवादी केन्द्रका दलका नेता महेन्द्रबहादुर शाही र नेपाली काँग्रेस दलका नेता एवम मुख्यमन्त्री जीवनबहादुर शाही छलफलमा जुटेका छन् ।

सुर्खेत । कर्णाली प्रदेशका मुख्यमन्त्री जीवनबहादुर शाहीले विश्वासको मत पाएका छन् । मंगलबार बसेको प्रदेशसभाको बैठकमा मुख्यमन्त्री शाहीले विश्वासको मत पाएका हुन् ।

प्रदेशसभा बैठकमा उनको पक्षमा २२ मत परेको सभामुख राजबहादुर शाहीले घोषणा गरे । मुख्यमन्त्री शाहीलाई माओवादी केन्द्र, नेकपा (एकीकृत समाजवादी) र राप्रपा नेपालले समर्थन गरेको छ ।

कर्णाली प्रदेशसभामा नेपाली कांग्रेसका ६, माओवादी केन्द्र १२, नेकपा (एकीकृत समाजवादी) तीन र राप्रपा नेपालका एक जना सांसद छन् । प्रमुख प्रतिपक्षी दल नेकपा एमालेका सांसद अनुपस्थित भएपछि विपक्षमा भने मत नै परेन ।

राप्रपाको पनि समर्थन

पहिलोपटक राप्रपा नेपालले मुख्यमन्त्री शाहीलाई समर्थन दिएको छ । राप्रपा सांसद शोसिला शाहीले कर्णालीका मुख्यमन्त्रीलाई परिणाममुखी काम गर्न समर्थन गरेको बताइन् ।

‘हामीले पाँच वर्षसम्मका लागि अघिल्लो सरकारलाई समर्थन गर्‍याैँ। तर, परिणाम आउन सकेन । अघिल्लो सरकार जस्तो नहोस् । यो सरकारले परिणाममुखी काम गर्न मुख्यमन्त्रीलाई आग्रह गर्दैछु,’ मत दिएपछि उनले भनिन् ।

सुर्खेत । कर्णाली प्रदेशसभामा ‘पहिलो गैरसरकारी विधेयक’ को रूपमा ‘सिंजा सभ्यता विकास तथा संरक्षण विधेयक २०७८’ दर्ता भएको छ । जुम्ला जिल्लाबाट निर्वाचित प्रदेश सांसद एवम् पूर्वआन्तरिक मामिला तथा कानूनमन्त्री नरेश भण्डारीले प्रदेशसभामा विधेयक दर्ता गराएका हुन् ।

यो गैरसरकारी विधेयक नेपालको प्रादेशिक संरचनाको अभ्यासका क्रममा पहिलोपटक दर्ता भएको हो । विधेयकले खस संस्कृतिको संरक्षण, प्रचारप्रसारका लागि कोसेढुंगाको काम गर्ने सांसद भण्डारीको अपेक्षा छ ।

‘सिंजा सभ्यता क्षेत्रको सामाजिक, धार्मिक, भाषिक, आर्थिक, सांस्कृतिक, तथा पर्यटकीय पूर्वाधारहरुको विकास गर्न यो विधेयकको आवश्यकता महसुस भएको थियो,’ उनले भने, ‘सिंजा सभ्यता क्षेत्रभित्रको भाषिक, धार्मिक, ऐतिहासिक, पुरातात्विक महत्वका स्थानहरु र सो क्षेत्रभित्र रहेका विभिन्न सम्पदाको संरक्षण र व्यवस्थापन गर्नका लागि आवश्यक कानून निर्माण गर्नु राज्यको दायित्व हो । राज्यले नगरेकका कारण मैले यो दर्ता गरेको हुँ ।’

उनले विधेयकमा सिंजा सभ्यता क्षेत्रभित्रका ऐतिहासिक, धार्मिक, पुरातात्विक महत्वका मठ–मन्दिर, थान, ताल, सरोवर, गुफा र अन्य तीर्थस्थलहरूको पहिचान, खोजी तथा अनुसन्धान गर्ने, सिंजा सभ्यता क्षेत्रको वातावरणीय सन्तुलन कायम राख्न आवश्यक काम गर्ने उदेश्य राखेका छन् ।

पूर्वमन्त्री भण्डारीले भने, ‘खसान साहित्य र मौलिकतालाई जीवित राख्न पनि यो विधेयक प्रदेश सभामा दर्ता गराएको हुँ ।’

यस्तै, सिंजा सभ्यतासँग सम्बन्धित ऐतिहासिक, धार्मिक, सांस्कृतिक, भाषिक, पुरातात्विक महत्वका विषयमा अध्ययन तथा अनुसन्धान गर्ने, सिंजा सभ्यता विकासका लागि नेपालभित्र वा बाहिर कुनै क्षेत्रबाट नगदी, जिन्सी वा अन्य कुनै प्रकारको सहायता जुटाउने काम पनि यही कानूनमार्फत गराउन मिल्ने गरी विधेयक दर्ता गरिएको जानकारी दिए ।

सुर्खेत । कर्णाली प्रदेशसभामा सरकारले ५६ विधेयक र तीन अध्यादेश दर्ता गरेको छ । तीमध्ये ३६ वटा विधेयक पारित भइ प्रदेश प्रमुखबाट प्रमाणीकरणसमेत भइसकेका छन् । दर्ता भएकामध्ये ९ विधेयक टेबुल नै हुन नसकेको सभामुख राजबहादुर शाहीले बताए ।

कर्णाली प्रदेश सहकारी ऐन २०७५ लाई पहिलो संशोधन गर्न बनेको विधेयक, कर्णाली प्रदेश सूचना प्रविधि तथा आमसञ्चार प्रतिष्ठान स्थापनासम्बन्धी व्यवस्था गर्न बनेको विधेयक र पर्वतीय ज्ञान, विज्ञान तथा प्रविधि विश्वविद्यालयको स्थापना व्यवस्थापन र सञ्चालन गर्न बनेको विधेयक प्रदेशसभा सचिवालयमा दर्ता भएका छन् ।

सभामुख शाहीका अनुसार उपभोक्ता संरक्षण गर्ने सम्बन्धमा व्यवस्था गर्न बनेको विधेयक र प्रदेशमा स्वास्थ्य सेवा प्रवाह सम्बन्धमा व्यवस्था गर्न बनेको विधेयक, कर्णाली प्रदेशभित्रको राष्ट्रिय वनको संरक्षण र सु–व्यवस्था गर्न बनेको विधेयक र कर्णाली प्रदेश पर्यटन सम्बन्धमा व्यवस्था गर्न बनेको विधेयक र प्रदेश औद्योगिक व्यवसायका सम्बन्धमा व्यवस्था गर्न बनेको विधेयक विषयगत छलफलमा लगिएको छ ।

उनका अनुसार कर्णाली प्रदेश प्रहरी सेवासम्बन्धमा व्यवस्था गर्न बनेको विधेयक, शान्ति तथा पुनःस्थापना केन्द्र स्थापनासम्बन्धी विधेयक, कर्णाली पूर्वाधार विकास प्राधिकरण, कृषि व्यवसाय प्रवद्र्धन सम्बन्धमा व्यवस्था गर्न बनेको विधेयक, प्रदेश लोकसेवा आयोग ऐन २०७५ लाई संशोधन गर्न बनेको विधेयक र प्रशासकीय कार्यविधि (नियमित गर्ने) ऐन २०७५ लाई संशोधन गर्न बनेको विधेयक बैठकमा पेस हुन बाँकी छन् ।

‘सदन नियमित रुपमा सञ्चालनमा आइदिएको भए यी विधेयक पारित भइसक्थे, दलहरुबीच असमझदारी बढेका कारण बारम्बारका वार्ता र छलफलपछि पनि सदन सञ्चालन हुने अवस्था आएन’ सभामुख शाहीले भने, ‘यसअघिका ६ वटा अधिवेशनले भने राम्रोसँग कानून निर्माण गरिसकेको छ ।’

सुर्खेत । कर्णाली प्रदेशसभाको आज बसेको बैठक स्थगित भएको छ । प्रमुख प्रतिपक्षी दल नेकपा एमालेले सरकारमा एमालेका मन्त्री फिर्ता हुनुपर्ने र कर्णाली सरकार जनताका काममा भन्दा ‘हेलिकप्टर मोह’मा फसेको भन्दै विरोध जनाएपछि प्रदेशसभा बैठक स्थगित भएको हो ।

प्रदेशसभाको अर्को बैठक असार १३ गते दिउँसो २ बजेका लागि बोलाइएको छ ।

स्थागित प्रदेशसभा बैठकमा सत्तापक्षभन्दा दोब्बर प्रतिपक्षी सांसद उपस्थित थिए । बैठकमा सत्तापक्षका दुई मन्त्रीसहित सात सांसद उपस्थित थिए भने प्रमुख प्रतिपक्षी दल नेकपा एमालेका १२ सांसद सहभागी थिए ।

प्रमुख सत्तारुढ दल नेकपा माओवादी केन्द्रका प्रमुख सचेतक ठम्मर विष्टले सदन अवरुद्ध हुने थाहा भएका कारण सांसदहरु उपस्थित नभएको हुनसक्ने बताए ।

सुर्खेत । कर्णाली प्रदेशसभामा नेकपा एमालेका सांसदहरूको संख्या फेरि २० पुगेको छ । सभमुख राजबहादुर शाहीले सर्वोच्च अदालतले चार जना सांसदलाई पुर्नबहाली गर्नु भन्ने व्यहोरोको पत्र प्रदेशसभामा सुनाएपछि प्रकाश ज्वाला, नन्दसिंह बुढा, अम्मरबहादुर थापा र कुर्मराज शाही पुर्नवहाली भएका छन् ।

माओवादी सरकार जोगाउन फ्लोर क्रस गरेका उनीहरूलाई एमालेले कारवाही गरेको थियो । ३५ सदस्य रहेको कर्णाली प्रदेशसभामा मुख्यमन्त्री महेन्द्रबहादुर शाहीको पक्षमा १८ सांसद र प्रतिपक्षमा १६ जना रहेका थिए ।

एमालेका चार सांसद पुनर्वहाली भएसँगै सरकार अल्पमतमा परेको छ । आज सरकारको आर्थिक वर्ष २०७८/०७९ को वार्षिक नीति तथा कार्यक्रम पारित गर्ने कार्यसूची थियो । भोलि नयाँ बजेट ल्याउने सरकारको तयारी छ ।

सभामुखले पत्र पढेसँगै एमाले संसदीय दलका नेता यामलाल कँडेलले एमालेको सांसद लिएर सरकार चलाउने कुरा मान्य नहुने बताएका छन् । ‘संसदीय अभ्यासका आधारबाट संसदलाई कारवाही अघि बढाउने हो भने एमालेका माननीय सदस्यलाई कोही कसैले कहि राख्ने अधिकार छैन । थिति बिगार्ने गरी छलफल चलाउन सकिदैन । जति भनेपनि बुझ्दै नबुझ्ने हो भने, सरकार यहि बाटोमा हिडने नै हो, जो पायो त्यहि व्यक्तिलाई मन्त्री बनाउने हो भने, आफ्नालाई थन्काउने हो भने हाम्रो भन्नु केही छैन । एमालेका सांसदहरु एमाले बसेकै लाइनमा आएर बस्नुपर्छ ।’

उनले अदालतको निर्णय अनुसार आफ्नो दल चल्ने सदनमा बताए । ‘सभाभित्रको संख्यामा फेरबदल भएको छ । छलफलको विषय अहिले नै रोक्नुपर्ने हो । तर, छलफल चलाउन हामी समस्याको समाधान चाहन्छौं । हामी केही समय पर्खिैन्छौं । सदन अवरुद्ध गर्ने हाम्रो चाहना छैन ।’

उनले एमालेका सांसद एमालेमै फिर्ता गरे मात्रै छलफलमा सहयोग गरिने प्रष्ट पारेका छन् ।

सुर्खेत । सर्वोच्च अदालतले अन्तरिम आदेशमार्फत पुनर्वाहली गरेका सांसदहरूलाई दलीय आचरण देखाउन कर्णाली संसदीय दलले अनुरोध गरेको छ ।

माओवादी सरकार जोगाउन पार्टी ह्वीप उल्लंघन गरेर राजनीतिक अपराध गरेको भन्दै एमालेले प्रकाश ज्वाला, अम्मरबहादुर थापा, नन्दसिंह बुढा र कुर्मराज शाहीलाई कारवाही गरेको थियो । उनीहरूमाथिको कारवाही लागू नगर्न सर्वोच्चले हिजो अन्तरिम आदेश दिएको थियो ।

कर्णाली प्रदेशसभाको बैठकको सुरुमै संसदीय दलका नेता यामलाल कंडेलले सर्वोच्च अदालतको आदेश आफूहरूले स्वीकार गर्ने र कार्यान्वयन गरेर जाने बताए । तर, त्यसका लागि दलीय आचरण, मूल्य र मान्यताभित्र सांसदहरू बस्नुपर्ने उनको भनाइ छ ।

‘नेकपा एमाले शक्ति पृथककीरणको सिद्धान्तमा विश्वास गर्छ । सम्मानित अदालतको फैसला गरेपछि कार्यान्वयन गर्छ ’, नेता कंडेलले भने,‘एमालेमा नै रहन पाउँ भन्ने माग उहाँहरूको पूरा भएको छ । अदालतले अर्को आदेश जारी नगरेसम्म उहाँहरू एमाले भइसक्नु भयो । संसदभित्र दुईवटा एमाले हुँदैन, छैन । कसैले त्यस्तो सोचेको छ भने त्यो भ्रम मात्र हो ।’

सुर्खेत । फौजदारी अभियोग लागेका भौतिक पूर्वाधार एवम शहरी विकास मन्त्री अम्मर बहादुर थापा सदनमा उपस्थित भएकोमा विरोध गर्दै प्रदेशसभा बैठक अवरुद्ध गरेको नेकपा एमालेको माग सम्वोधन गर्न कर्णली सरकार तयार भएको छ ।

सत्तापक्ष र प्रतिपक्षबीच आज लिखित सहमति हुने स्राेतले जानकारी दिएको छ । मन्त्री थापाको बर्खास्तीको माग गरी एमालेले प्रदेशसभाको आठौं अधिवेशन सुरु भएको पहिलो दिन जेठ २४ गतेदेखि नै संसद अवरुद्ध गरिरहेको थियो ।

‘एमालेले राखेको माग सर्वोच्चमा विचाराधीन भएका कारण सदन अवरुद्ध गर्न उचित थिएन । तर सदन सञ्चालन गर्नु सरकारको दायित्व हो ।’ निरन्तरको छलफलमा सहभागी सत्ता पक्षीय एक नेताले नेपालप्रेसलाई भने, ‘सरकारले आजबाट प्रमुख प्रतिपक्षी दलको माग सम्वोधन गर्छ र आजबाट सदन सुचारु हुन्छ ।’

जेठ २४ गते बसेको सर्वदलीय वैठकमा सत्तापक्षले जेठ ३० गतेसम्म मन्त्री थापालाई सदनमा उपस्थित नगराउने मौखिक प्रतिवद्धता जनाएको थियो । जेठ २५ गतेको वैठकमा लिखित रुपमा सहमति गर्नुपर्ने एमालेको माग सत्तापक्षले अस्वीकार गर्दा सहमति भाँडिएको थियो । २६ गते बसेको वैठकमा पनि सत्तापक्ष सहमति गर्न इच्छुक नदेखिएको बताउँदै एमालेले सदन अवरुद्ध गरेको थियो ।

२६ गतेको सदन अवरुद्ध भएसँगै सत्तापक्ष लचिलो भएको छ । आज दिउँसो १२ बजे बस्ने सर्वदलीय वैठकमा लिखित सहमति हुने एमाले स्रोतको भनाई छ । यो सहमति हुनुपूर्व नेपाली कांग्रेस संसदीय दलका नेता जीवनबहादुर शाही र नेकपा एमालेका प्रमुख सचेतक गुलावजंग शाहबीच सहमति भएको बताइएको छ ।

आज लिखित सहमति भएपछि सदनमा सरकारले प्री–बजेट छलफल गराउने छ । उक्त छलफल भोलि सकिनेछ र पर्सी सरकारले सदनमा नीति तथा कार्यक्रम प्रसतुत गर्ते तयारी गरेको छ ।

काठमाडौं । कर्णाली प्रदेशसभा बैठक सूचना टाँसेर स्थगित गरिएको छ ।

आज २ बजे बैठक बोलाइएको थियो । नैतिक पतन पुष्टि भएका भौतिक पूर्वाधार विकास मन्त्री अम्मर थापालाई बर्खास्त नगरेसम्म सदन चल्न नदिने भन्दै नेकपा एमालेले हिजो सदन अवरुद्ध गरेको थियो ।

भोलि दिउँसो २ बजेसम्मलाई बैठक स्थगित गरिएको सूचना टाँस गरेर प्रदेशसभा सचिवालयले जनाएको छ ।

सुर्खेत । कर्णाली प्रदेशसभाले स्थापना भएको साढे तीन वर्षपछि आफ्नै युट्युव च्यानल र फेसबुक पेजका अलावा मिडिया ग्यालरीबाट प्रत्यक्ष प्रसारण गर्ने भएको छ ।

यहि जेठ २४ गते दिउसो २ बजे देखि बस्ने भनिएको आठौं अधिवेशनको पहिलो वैठकबाटै मिडियाकर्मीका लागि प्रत्यक्ष प्रसारणको व्यवस्था मिलाईएको सभामुख राजबहादुर शाहीले बताए ।

‘यसअघि पत्रकार मित्रहरुले सचिवालयको भिडिया ततकाल नपाउने गरेको गुनासो गर्दै आउनु भएको थियो । यो समस्या अब सदाकालागि अन्त्य भएको छ । हामीले प्रत्यक्ष प्रसारण गर्ने मिडियालाई सोझौ प्रसारण लाईनको व्यवस्था मिलाएका छौं । हाल त्यसकालागि १५ वटा लाईनको व्यवस्था मिलाएका छौं ।’ सभामुख शाही भन्छन्, ‘त्यसका अलावा युट्युव च्यानल तथा फेसबुक पेज कर्णाली प्रदेश सभामार्फत लाईभ प्रसारण हुनेछ । उक्त भिडियोमा प्रदेश सभाको मात्रै लोगो हुनेछ ।’

सुर्खेत । कर्णाली प्रदेशसभाको हिउँदे अधिवेशन कुनै विधेयक पारित नभइ अन्त्य हुने सम्भावना बढेको छ ।

प्रमुख प्रतिपक्षी नेकपा एमालेले कोरोना संक्रमणको जोखिम देखाउँदै गरेको अवरोधका कारण प्रदेशसभाको बैठक बस्न सकेको छैन ।

वैशाख ३ बाट शुरू भएको हिउँदे अधिवेशनपछि ३ पटकमात्र बैठक बसेको छ । सभामुख राजबहादुर शाहीले वैशाखको अन्तिमसम्म सदन अन्त्य भई जेठ पहिलो सातामा बजेट अधिवेशन आव्हान हुनसक्ने बताए ।

सुर्खेत । नेकपा एमाले कर्णाली प्रदेशसभा संसदीय दलको वैठकमा सांसद देवी वली पनि सहभागी छन् ।

मुख्यमन्त्री महेन्द्रबहादुर शाही नेतृत्वको सरकार जोगाउन फ्लोर क्रस गरेर पछि मत सच्याएकी वलीलाई नेकपा एमालेले दुई पटक स्पष्टीकरण सोधिसकेको छ ।

नेकपा एमाले संसदीय दलको कार्यालयमा दलका नेता यामलाल कंडेलको अध्यक्षतामा बैठक जारी छ । सदनमा आगामी रणनीतिबारे छलफल भइरहेको प्रमुख सचेतक गुलावजंग शाहले बताए ।

आजै प्रदेशसभाको बैठकमा एमालेका फ्लोर क्रस गरेका चार सांसद निष्कासित भएको एमालेको पत्र सभामुख राजबहादुर शाहीले जानकारी गराउने भएका छन् ।

२० सदस्य रहेको कर्णाली प्रदेशसभामा अब सभामुखबाहेक १५ जनामात्रै रहने भएका छन् ।

सुर्खेत । कर्णाली प्रदेशसभामा फ्लोरक्रस गरी मुख्यमन्त्री महेन्द्रबहादुर शाहीलाई मतदान गरेका एमालेको माधव नेपाल समूहका तीन जना मन्त्रीले आज साँझ ६ बजे शपथ ग्रहण गर्ने भएका छन् ।

प्रदेश प्रमुख गोविन्दप्रसाद कलौनीका प्रेस सल्लाहकार दिपेन्द्र ओलीका अनुसार प्रदेश सरकारले उद्योग पर्यटन वन तथा वातावरण मन्त्रीमा कुर्मराज शाही, भौतिक पूर्वाधार विकास मन्त्रीमा अम्मरबहादुर थापा र भूमि व्यवस्था कृषि तथा सहकारी मन्त्रीमा नन्दसिंह बुढालाई प्रदेश प्रमुखले शपथग्रहण गराउने भएका हुन् ।

सुर्खेत । कर्णाली प्रदेशसभाको बैठक १० मिनेटका लागि स्थगित भएको छ ।

प्रदेशसभा बैठकमा दलीय आधारमा धारणा राख्ने क्रम सकिएपछि सभामुखले १० मिनेटका लागि बैठक स्थगित गरेका हुन् ।

मुख्यमन्त्री महेन्द्रबहादुर शाहीले आजको बैठकबाट विश्वासको मत लिँदैछन् ।