Tag: अजय शाही

रुपन्देही । लुम्बिनी प्रदेशका मुख्यमन्त्री कुलप्रसाद केसीले विनाविभागीय मन्त्री नियुक्ति गरेको २३ दिनपछि अजय शाहीलाई उद्योग वाणिज्य तथा आपूर्ती मन्त्रालयको जिम्मेवारी दिएका छन् ।

माओवादी केन्द्र, नेपाली कांग्रेस, जसपा तथा जनमोर्चाको गठबन्धनमा साउन २८ गते मुख्यमन्त्री भएका केसीले सोही दिन ६ जना मन्त्री बनाउँदा अजय शाहीसहित सुमन शर्मा रायमाझी र पुर्मती ढेंगालाई विनाविभागीय मन्त्री बनाएका थिए ।

२३ दिनपछि शाहीले मन्त्रालय पाएपनि रायमाझी र ढेंगाले अझै मन्त्रालय पाएका छैनन् ।

लुम्बिनीमा प्रमुख प्रतिपक्ष दल नेकपा एमालेले अजय शाही एमालेको सांसद भएकाले सरकार, प्रदेशसभा र प्रदेश प्रमुखले बलजफ्ती मन्त्री बनाएको आरोप लगाउँदै आएको छ ।

उनी चुनावमा सूर्य चिह्न लिएर जितेपछि हालसम्म एमालेको संसदीय दलमै रहेको र साउन २७ गते पार्टीको निर्णयविपरीत विपक्षी गठबन्धनमा गएकाले कारबाही गरेपनि सभामुखले कानुन विपरीत कारवाही नगरी विवाद बढाएको आरोप एमालेको छ ।

मुख्यमन्त्री केसीले गठबन्धन दलभित्रको भागवण्डा मिलाउन नसकेका कारण अन्य मन्त्रीलाई जिम्मेवारी दिन सकेका छैनन् । यसअघि ९ मन्त्री रहेको लुम्बिनीमा अहिलेको सरकारले १३ मन्त्री र केही राज्यमन्त्री थप गर्ने कानुनी प्रबन्ध मिलाएको छ ।

प्रदेश सरकारका प्रवक्ता कृष्णध्वज खड्काले सरकारमा सहभागी दलबीच सहमति गरेर छिट्टै मन्त्रीपरिषद् पूर्ण हुने र सबैको जिम्मेवारी विभाजन हुने बताए ।

अहिले मुख्यमन्त्री केसीले आन्तरिक मामिला तथा संचार, ऊर्जा जलस्रोत तथा सिंचाई, कानून, महिला,बालबालिका तथा जेष्ठ नागरिक, कृषि, खाद्य प्रविधि तथा भूमि व्यवस्था, वन तथा भूसंरक्षण, शिक्षा, विज्ञान, युवा तथा खेलकुद, श्रम, रोजगार तथा यातायात व्यवस्था, स्वास्थ्य, जनसंख्या तथा परिवार कल्याण मन्त्रालयको जिम्मेवारी आफैले राखेका छन् ।

काठमाडौं । सभामुखले स्वविवेकीय अधिकार प्रयोग गर्न नपाउने जिकिर विमला वली र अजय शाहीलाई प्रदेशसभा सदस्यको हैसियतमा काम गर्न नदिन माग गरेको छ ।

सर्वोच्च अदालमा बुधबार लुम्बिनी प्रदेशका सभामुखविरुद्ध रिट दायर गर्दै एमालेले मुद्दाको अन्तिम किनारा नलागेसम्म उनीहरूलाई रोक्न माग गरेको छ ।

दुवैजना एमालेको सदस्य भएको भन्दै उनीहरूलाई कारवाही नगर्ने सभामुखको निर्णय बदर गर्न समेत एमालेले रिटमा माग गरेको छ। सभामुखले स्वविवेकीय अधिकार प्रयोग गर्न नपाउने जिकिर पनि रिटमा गरिएको छ ।

‘दुवैजना प्रदेशसभा सदस्यहरूलाई गैरकानूनी रूपमा पदमा आसिन गराइएको छ,’ भनिएको छ, ‘ उपरोक्त कानूनबमोजिम सभाको सभामुखले स्वविवेकीय अधिकार प्रयोग गर्न पाउने होइन । निजले सम्बन्धित दलबाट निष्कासित भइसकेको प्रदेशसभा सदस्यलाई सम्बन्धित सदनमा जानकारी गराई वा सूचना टाँसगरी पदबाट निष्कासन भई पदरिक्त भएको सूचना ऐ. ऐनको दफा ३६ बमोजिम निर्वाचन आयोगलाई दिने हो ।’

रुपन्देही । मुख्यमन्त्री कुलप्रसाद केसीले विश्वासको मत लिने योजनासहित भदौ १ गतेदेखि शुरू भएको लुम्बिनी प्रदेशसभाको नवौं अधिवेशन लगातार अवरुद्ध छ ।

पछि प्रदेशसभामा सत्ता समीकरण र सांसदहरूको जोडघटाउ फेरबदल हुनसक्ने आशंकाकाबीच मुख्यमन्त्री चाँडै विश्वासको मत लिने दाउमा छन् ।

नेकपा एमालेले आफ्ना २ सांसदलाई कारवाही गरी पदमुक्तका लागि प्रदेशसभामा पठाएको पत्र अगाडि बढाउन माग गर्दै यसअघि सदन अवरोध गरेकोमा प्रदेशसभाले अस्वीकार गरेपछि एमाले अझ चिढिएको छ ।

सभामुख घर्तीले पार्टीले निर्णय गरेर पठाए पनि कारवाहीका लागि आवश्यक प्रमाण नपुगेको पत्र पठाएपछि आइतबार अपरान्ह एमालले पत्रकार सम्मेलन गरेर सभामुख आफैं न्यायाधीश बन्न खोजेको आरोप लगाएको थियो ।

यो पनि पढ्नुहोस् :

सभामुखले राजनीतिक भीडन्त निम्त्याएको लुम्बिनी एमालेको आरोप, पदमा बसिरहन नमिल्ने ठहर

‘आवश्यक प्रमाण हामीले सभामुखालई दिने होइन, उहाँ दलको कार्यकर्ता बन्नुभयो, सभामुखको भूमिका बिर्सनेलाई कसरी संवैधानिक जिम्मेवारी दिन सकिन्छ ?’ एमाले संसदीय दलका उपनेता वैजनाथ चौधरीले भने, ‘सभामुखले पदमा बस्ने नैतिक जिम्मेवारी बहन गर्न सक्नुभएन, सदनबाट ठेगान लगाउँछौं । सभामुख र एमालेको सवालजवाफले प्रदेशसभाको आज दिउँसो १ बजे बस्ने नवौं अधिवेशनको तेस्रो बैठक पनि अनिश्चित बनेको हो ।’

बैठक बोलाइए पनि प्रमुख प्रतिपक्षी दल एमालेले सदन चल्न नदिने संकेत गरिसकेको छ ।

यो पनि पढ्नुहोस् :

एमालेलाई लुम्बिनी प्रदेशसभाको जवाफः अजय शाही र विमला वलीलाई पदमुक्त गर्न मिल्दैन

सूर्य चिन्हबाट निर्वाचित भइ अहिलेसम्म एमालेको संसदीय दलमा रहेका प्रदेशसभा सदस्य अजय शाही माओवादी नेतृत्वको सरकारमा मन्त्री बनेका छन् भने र नेकपाबाट सूर्य चिन्ह लिएर निर्वाचित भई माओवादी र एमाले अलग अलग भएपछि पनि एमालेमा रहेकी विमला ओलीले माओवादी रोजेपछि एमालेले कारवाही गरी पदमुक्त गर्न पठाए पनि सभामुखले अस्वीकार गरेका थिए ।

रूपन्देही । लुम्बिनी प्रदेशसभामा प्रतिपक्षी दल नेकपा एमालेले सदनमा अवरोध गरेको छ । एमाले सांसदहरूले रोष्ट्रम घेराउ गर्दै नाराबाजी गरेका छन् ।

एमालेले आफूले कारवाही गरेका सांसदहरू अजय शाही र विमला खत्रीलाई पदमुक्त गर्न माग गरेको छ ।

एमालेले कारबाही गरेका सांसदको विषयमा आएका कागजपत्रका विषयमा अन्य जानकारी पनि आएकाले यसबारे छलफल गरेर अघि बढ्ने सभामुख पूर्णबहादुर घर्तीले बताएका छन् ।

उनले संसदको नियमानुसार नै कारवाहीही अघि बढ्ने बताए ।

रुपन्देही । लुम्बिनी प्रदेशसभा सचिवालयले यसअघि सार्वजनिक गरेको पुस्तकमा एमालेको सूचीमा पहिलो नम्बरमा राखिएका सांसद अजय शाहीलाई अहिले स्वतन्त्र सूचीमा राखेपछि एमाले र प्रदेशसभाबीच विवाद शुरु भएको छ ।

प्रदेशसभाले सार्वजनिक गरेको प्रदेशसभा नियमावली तथा सदस्य विवरणमा शाहीको नाम एमाले सांसदहरुको सूचीको पहिलो नम्बरमा छ ।

तर अहिले शाहीलाई प्रदेशसभा सचिवालयले स्वतन्त्र सांसदको सूचीमा राखेपछि एमाले र प्रदेशसभा सचिवालयबीच दूरी बढेको हो ।

‘एमाले शक्तिमा रहँदासम्म एउटा हुने र हटेपछि अर्को हुने कुरा हुँदैन, यो प्रदेशसभाको सत्ता केन्द्रीत राजनीतिबाहेक केही होइन’, एमाले लुम्बिनीका अध्यक्ष तथा सांसद लिला गिरीले भने ।

शाहीलाई नवगठित मन्त्रिपरिषदमा सामेल गरेको भन्दै नेकपा एमालेले प्रदेश प्रमुख अमिक शेरचनविरुद्ध आपत्ति जनाएपछि प्रदेशसभा सचिवालयले दिएको सूचीका आधारमा उनको हैसियत स्वतन्त्र सांसदको रहेको प्रदेश प्रमुख कार्यालयले दावी गरेको छ ।

नवलपरासीबाट सूर्य चिह्न लिएर नेकपा एमालेको सहयोगमा स्वतन्त्र सांसदको रुपमा निर्वाचित सांसद अजय शाही वर्तमान मुख्यमन्त्री कुलप्रसाद केसी नेतृत्वको सरकारमा बिनाविभागीय मन्त्री छन् ।

यसअघि प्रदेशसभा सचिवालयले प्रकाशन गरेका पुस्तक तथा प्रकाशनहरुमा उनको दलीय हैसियत नेकपा एमाले उल्लेख रहेपनि अहिले एकाएक शक्ति परिवर्तनपछि फेर्न थालिएको भन्दै एमालेले सभामुख पूर्णबहादुर घर्ती तथा प्रदेशसभा सचिव दुर्लभकुमार पुनको ध्यानाकर्षण गराइसकेको दावी गरेको छ ।

प्रदेशसभा सचिवालयका सचिव दुर्लभकुमार पुनले शाहीको बिषयमा छापिएको पुस्तकमा प्रिन्ट मिस्टेक भएको दावी गरेका छन् । पुनले भने, शाहीजीको बिषयमा छापिएका कुनै पुस्तकमा स्वतन्त्र समूह छ भने कुनैमा नेकपा एमाले छ, प्रिन्ट मिस्टेक भएको छ । तर यो पुस्तक छापिएको ३ वर्ष भइसक्दा पनि अहिलेसम्म प्रदेशसभाले पुस्तकमा गल्ती छापिएको सूचना कतै गरेको थिएन ।’

पछिल्लोपटक साउन २७ गतेको प्रदेशसभाको विशेष अधिवशेनमा उनी सत्ता पक्षको कुर्चीमा बसेका थिए । त्यो बेला सत्तारुढ दलको रुपमा नेकपा एमाले थियो । शाहीलाई स्वतन्त्र सांसदको रुपमा प्रदेश प्रमुखको कार्यालयमा नाम पठाइएको भन्दै नेकपा एमालेले गम्भीर आपत्ति जनाएको छ ।

एमाले संसदीय दलका प्रमुख सचेतक भूमिश्वर ढकालले एमाले सांसदलाई सभामुखले जर्वरजस्ती पार्टी परिवर्तन गर्ने र आफूखुसी नामावली फेरबदल गर्ने गरेको भन्दै त्यसविरुद्ध कडा कदम चाल्ने चेतावनी दिएका छन् ।

ढकालले नेपाल प्रेससँग भने’, ‘सभामुखले गलत राजनीतिक अभ्यास मात्रै होइन, गैरसंवैधानिक काम गरिरहनुभएको छ, कहिले कसलाई एमालेविरुद्ध लाग्न भन्नुभएको छ, कहिले कसलाई जवरजस्ती दल परिवर्तन गर्न दवाव दिनुभएको छ, उहाँले आफ्नो पदीय मर्यादा भुल्नुभयो, माओवादीको कार्यकर्ताभन्दा फरक व्यवहार गर्नभएन ।’

प्रदेशसभा सचिवालयका सचिव पुनले अजय शाही एमालेको सूर्य चिह्नबाट निर्वाचित सांसद भएको तर उहाँले आफ्नो व्यक्तिगत विवरणमा स्वतन्त्र सांसदको समूह उल्लेख गरेकोले सोहीअनुसार प्रदेश प्रमुखकोमा पठाइएको दावी गरेका छन् ।

एमालेले सभामुख, प्रदेशसभा सचिव, प्रदेश प्रमुख सबैले एमालेलाई कमजोर बनाउने गैरराजनीतिक खेल शुरु गरेकाले अब यसबारे गम्भीर भएर अगाडि बढ्ने बताएको छ । प्रमुख प्रतिपक्षको सांसदलाई बिनाजानकारी सरकारको मन्त्री बनाएको विषय सामान्य नरहेको पूर्वमन्त्री तथा एमाले सांसद लिला गिरीको भनाइ छ ।

रूपन्देही । लुम्बिनीमा गठबन्धनलाई साथ दिएर मन्त्री बनेका अजय शाहीले आफू स्वतन्त्र सांसद भएको भन्दै एमालेको ह्वीप नलाग्ने जिकिर गरेका छन् ।

सूर्य चुनाव चिन्हबाट निर्वाचित नवलपरासीका सांसद शाहीलाई नेकपा एमाले प्रदेश कमिटीले स्पष्टीकरण सोधेर कारवाही प्रक्रिया अघि बढाएको थियो । एमालेले बहिष्कार गरेको प्रदेशसभाको विशेष अधिवेशनमा उपस्थित शाही ४ दलीय गठबन्धनको सरकारमा विनाविभागीय मन्त्री बनेका छन् ।

‘म नवलपरासी (बर्दघाट सुस्ता पश्चिम) निर्वाचन क्षेत्र १ ‘ख’ बाट स्वतन्त्र रुपमा निर्वाचित प्रदेश सभा सदस्य हुँ । म आवद्ध रहेको स्वतन्त्र राजनीतिक समूह र तत्कालीन नेकपा (एमाले) बीच भएको २ दुई बुँदे सम्झौता सहमती अनुसार मैले सूर्य चुनाव चिन्ह प्रयोग गरेर स्वतन्त्र रुपमै निर्वाचनमा होमिएर निर्वाचित भएको सबैमा जानकारी गराउँदछु’, विज्ञप्तिमार्फत शाहीले भनेका छन्, ‘मैले नेकपा (एमाले) पार्टीको सदस्यता लिएको छैन । तसर्थः मलाई राजनैतिक पार्टीको व्हीप लाग्दैन ।’

स्वतन्त्र सांसदलाई कुनै पार्टीको ह्वीप नलाग्ने दावी गर्दै उनले प्रदेशका जनताप्रति उत्तरदायी भएर काम गर्नेसमेत बताएका छन् ।

रूपन्देही । नेकपा एमालेले ४ दलीय गठबन्धनलाई सघाउँदै मन्त्री बनेका सांसद अजय शाहीलाई कारवाहीका लागि प्रक्रिया अगाडि बढाएको छ।
एमालेले आफ्नो चुनाव चिन्हबाट निर्वाचित नवलपरासीका सांसद अजय शाही र तत्कालीन नेकपाको सूर्य चिन्हबाट जितेकी विमला वलीले नयाँ सरकार बनाउन दाबी गरेको निवेदनमा हस्ताक्षर गरेपछि कारवाही प्रक्रिया अघि बढाएको एमाले सचेतक भूमिश्वर ढकालले बताए।

ढकालले शाहीलाई लिखित स्पष्टीकरण सोधेका छन् भने वलीलाई पार्टी अध्यक्ष केपी ओलीले पठाएको स्पष्टीकरण यसअघि नै बुझाएको बताए।
एमालेले बहिस्कार गर्ने भनेको प्रदेश सभाको विशेष अधिवेशनमा उपस्थित शाही ४ दलीय गठबन्धनको सरकारमा विनाविभागीय मन्त्री बनेका छन्।

नवलपरासी पश्चिम–१ ख बाट सूर्य चिन्हबाट चुनाव जितेका उनले वैशाख १९ गते मुख्यमन्त्री शंकर पोखरेलविरुद्ध अविश्वासको प्रस्तावमा हस्ताक्षर गरेर अर्को दिन फिर्ता लिएको जनाएका थिए।

उनीसँगै विपक्षी गठबन्धनमा लागेका कपिलवस्तुका धर्मबहादुर लाल श्रीवास्तव एमाले फर्केर मन्त्री बनेपछि शाही असन्तुष्ट रहेका थिए।
हृदयेश त्रिपाठीनिकट शाहीले आफु सूर्य चिन्हबाट चुनाव लडेपनि स्वतन्त्र सांसद रहेकाले गठबन्धनमा सहभागी भएको बताए।
‘सूर्य चिन्हबाट चुनाव जितेपनि म स्वतन्त्र सांसद हो, त्यसैले मैले गठबन्धनलाई समर्थन गरेको हुँ मलाई एमालेले कारबाही गर्ने भन्ने कुरा हुँदैन, यदि कारबाही गर्ने नै कुरा आएमा म अदालत जान्छु।’ उनले भने ।

काठमाडौं । संसदीय प्रणालीमाथि नै प्रश्न उठ्नेगरी लुम्बिनीमा प्रतिपक्षी पार्टीका सांसद नयाँ सरकारमा मन्त्री खान गएका छन् । संविधानविदका अनुसार यस्तो हर्कत अनैतिक मात्र नभएर असंवैधानिकसमेत हो ।

२०७४ सालको संसदीय चुनावमा सुर्य चिन्हबाट जितेको अजय शाही कानूनतः एमाले सांसद हुन् । हृदयश त्रिपाठीको समूहका उनले एमालेको चिन्ह लिएर चुनाव लडेका थिए । त्यसैले संसदभित्र उनी अहिले प्रतिपक्षी सांसदको हैसियतमा छन् । तर, माओवादी नेतृत्वमा बनेको नयाँ सरकारमा उनलाई मन्त्री नियुक्त गरिएको छ ।

संसदीय निर्वाचनमा स्वतन्त्र राजनीतिक समूहको नाममा सुर्य चिन्ह लिएर दुई उम्मेदवार (अजय शाही र धर्मबहादुर लाल श्रीवास्तव) ले चुनाव जितेका थिए । शंकर पोखरेलको नेतृत्वमा सरकार रहुञ्जेल उनीहरु सत्तापक्षकै सांसदको हैसियतमा रहे । जब पोखेलको सरकार ढल्ने निश्चित भयो, त्यसपछि शाहीले कित्ता परिवर्तन गरे ।

हिजो आह्वान भएको संसदको विशेष अधिवेसन एमालेले बहिष्कार गर्ने निर्णय लिएको थियो । तर, सो निर्णय उल्लंघन गर्दै शाहीले संसद वैठकमा भाग लिए । त्यसपछि उनी मन्त्री बन्न सक्ने अड्कन काटिएको थियो । नभन्दै माओवादीका नवनियुक्त मुख्यमन्त्री कुलप्रसाद केसीले उनलाई पहिलो लटमै मन्त्री बनाएका छन् । उनको मन्त्रालय भने तोकिएको छैन ।

त्यसो त शाही नआउँदा पनि माओवादी-कांग्रेस गठवन्धनलाई बहुमत पुग्थ्यो । एकजना सांसद पनि यताउता हुँदा अविश्वासको प्रस्ताव फेल हुने अवस्था थियो । त्यसैले सांसदीय मूल्य-मान्यता विर्सेर मुख्यमन्त्री केसीले एमालेका सांसदलाई मन्त्री बनाइदिएका छन् ।

संविधानविद टिकाराम भट्टराईले सुर्य चिन्हबाट चुनाव जितेका शाही एमालेकै हैसियतमा हुने भएकाले उनी मन्त्री बन्दा कानुनी प्रश्न उठेको बताए ।

‘स्वतन्त्र भए पनि सुर्य चिन्हबाट चुनाव लडे पनि उहाँहरु एमालेकै सांसद हो, एमाले प्रतिपक्षमा बस्ने निर्णय गरिसकेपछि यो विषय दलीय अनुशासनको कारवाहीको दायराभित्र आउँछ ।’

मन्त्री बन्न गएका शाहीलाई एमालेले कारवाही गरेर संसदबाट हटाउन सक्ने उनको भनाइ छ ।

यसअघि तत्कालीन नेकपाबाट उपचुनाव जितेर प्रदेश सभा सांसद बनेकी बिमला वली माओवादी प्रवेश गरेकी थिइन् । उनले पनि सुर्य चिन्हबाटै चुनाव लडेकी हुन्, तर त्यसबेला एमाले र माआवादी मिलेर नेकपा बनेको थियो, जुन पार्टी अहिले भंग भएको छ । तर, शाहीले भने एमालेबाटै चुनाव जितेकाले उनको हकमा पार्टी परिवर्तनको छुट नभएको संविधानविदले बताएका छन्।

शाहीले नवलपरासी पश्चिम १ ख बाट सूर्य चिन्हबाट चुनाव जितेका थिए । यसअघि बजेट निर्णयार्थ पेस गर्ने दिनमा पनि उनी बिरामी परेको भन्दै काठमाडौं गएका थिए ।

शाही र वली बैशाख १९ गते मुख्यमन्त्री शंकर पोखरेलविरुद्धको अविश्यासको प्रस्ताव पेश गर्ने समयमा पनि हस्ताक्षरकर्ता हुन् । तर शाहीले अर्को दिन आफू एमालेमै रहेको विज्ञप्ती निकालेका थिए । उनीसँगै विपक्षी गठबन्धनमा लागेका कपिलवस्तुका धर्मबहादुर लाल श्रीवास्तव फर्केर एमालेमा मन्त्री बनेपछि शाही असन्तुष्ट रहेका थिए ।

एमालेले विमला र शाही दुवै विरुद्ध कारवाही प्रक्रिया अगाडि बढाएको छ ।

स्वतन्त्र राजनीतिक समूहको नामबाट सूर्य चुनाव चिह्न लिएर निर्वाचनमा विजयी भएका लुम्बिनी प्रदेशसभामा दुई सांसद छन् ।

यो समूहले यसअघि पोखरेल नेतृत्वको सरकारलाई साथ दिएको थियो र सांसद धर्मबहादुर लाल श्रीवास्तव सरकारमै सहभागी भएका थिए । अहिले सोही समूहका अर्का सांसद शाही केसी नेतृत्वको मन्त्रिपरिषदमा सहभागी भएका छन् ।

रुपन्देही । नेकपा एमालेको चुनाव चिन्हबाट निर्वाचित नवलपरासीका सांसद अजय शाही र तत्कालीन नेकपाको सूर्य चिन्हबाट जितेका विमला वलीले माओवादी केन्द्रको नेतृत्वमा नयाँ सरकार बनाउन माग गरेको निवेदनमा हस्ताक्षर गरेपछि पार्टीले कारवाही प्रकृया अगाडि बढाएको छ ।

सांसद वली यसअघि नै पत्रकार सम्मेलन गरेर माओवादी प्रवेशको घोषणा गरेकी थिइन् भने शाहीले बिहीबार पेस गरेको निवेदनमा हस्ताक्षर गरेका हुन् । शाहीले बुधबार सम्पन्न एमाले संसदीय दलले प्रदेशसभामा सहभागिता नहुने भनी गरेको निर्णय विपरीत सहभागिता जनाएका थिए । सत्तारुढ एमालेले संविधानविपरीत आएको अविश्वास प्रस्तावलाई प्रदेश प्रमुखले मान्यता दिएको भन्दै विशेष अधिवेशन बहिष्कार गर्ने निर्णय गरेको थियो । तर, सांसद अजय शाही भने बैठकमा सहभागी भएका हुन् । सदनमा सत्तापक्षको कुर्सीमा उनीमात्रै थिए । उनले नवलपरासीपश्चिम १ ख बाट सूर्य चिन्हबाट चुनाव जितेका थिए ।

शाही चार दलीय गठबन्धनको पक्षमा आएको र उनलाई गठबन्धनले स्थान दिने कांग्रेस दलका नेता वीरेन्द्र कनौडियाले बुधबार नै नेपाल प्रेसलाई बताएका थिए । यसअघि बजेट निर्णयार्थ पेस गर्ने दिनमा पनि उनी बिरामी परेको भन्दै काठमाडौं गएका थिए । एमालेका प्रमुख सचेतक भूमिश्वर ढकालले विमला वलीको कारवाही प्रकृया पार्टी केन्द्रबाट स्वीकृत भएर आइसकेकाले तत्काल अगाडि बढाइने र शाहीलाई पनि कारबाही गरिने बताए ।

उनले भने, ‘पार्टी निर्णयविपरीत जान कसैलाई छुट छैन, चुनावमा सूर्य चिन्ह लिएर जित्ने अनि अनुचित लाभमा पार्टी फेर्नेलाई तत्काल कारवाही हुन्छ । व्यक्तिका असहमति हुनसक्छन्, त्यो पार्टीभित्र छलफल गर्नुपर्दछ, विपक्षी दलसँग सहकार्य गरेर अगाडि बढ्न पाइँदैन ।’

शाही र वली बैशाख १९ गते मुख्यमन्त्री शंकर पोखरेलविरुद्धको अविश्वासको प्रस्ताव पेश गर्ने समयमा पनि हस्ताक्षरकर्ता हुन् । तर, संघीय सरकारमा मन्त्री रहेका हृदयश त्रिपाठीनिकट रहेका शाहीले अर्को दिन पुनःएमालेमै रहेको विज्ञप्ति सार्वजनिक गरेका थिए । उनीसँगै विपक्षी गठबन्धनमा लागेका कपिलवस्तुका धर्मबहादुर लाल श्रीवास्तव फर्केर एमालेमा मन्त्री बनेपछि शाही असन्तुष्ट रहेका थिए ।

शाही र विमला वलीलाई एमालेले कारवाही गरेर सांसद पदबाट मुक्त गराउन पहल थालेको छ । नेकपाबाट निर्वाचित वलीले फागुन २३ को फैसलापछि एमाले रोजेर संसदीय दलका केही बैठकमा समेत भाग लिएकी थिइन् । उनले बैठकको उपस्थितिमा हस्ताक्षर गरेको प्रमाणसहित एमालेले कारवाही प्रक्रिया अघि बढाएको हो ।

रूपन्देही । नेकपा एमाले लुम्बिनी प्रदेश संसदीय दलको निर्णयविपरीत एक सांसद संसद् बैठकमा सहभागी भएका छन् ।

संविधानविपरीत आएको अविश्वास प्रस्तावलाई प्रदेश प्रमुखले मान्यता दिएको भन्दै एमालेले विशेष अधिवेशन बहिष्कार गरेको थियो । सांसद अजय शाही भने बैठकमा सहभागी भएका छन् । सदनमा सत्तापक्षको कुर्सीमा उनीमात्रै थिए । उनले नवलपरासीपश्चिम १ ख बाट सूर्य चिन्हबाट चुनाव जितेका थिए ।

शाही चार दलीय गठबन्धनको पक्षमा आएको र उनलाई गठबन्धनले स्थान दिने कांग्रेस दलका नेता वीरेन्द्र कानोडियाले नेपाल प्रेसलाई बताए ।

यसअघि बजेट निर्णयार्थ पेस गर्ने दिनमा पनि उनी बिरामी परेको भन्दै काठमाडौं गएका थिए । तर, एमाले सचेतक भूमिश्वर ढकालले शुरूमा शाही गए पनि पछि बाहिर आएको बताए । ‘मैले नि सुनेँ, उहाँ गएर एकछिन बसेर आउनु भएछ, मैले भेटेको छैन, केहो वास्तविकता बुझ्नेछु’, ढकालले नेपाल प्रेससँग भने ।