काठमाडौं । मुलुकभरका बैंक तथा वित्तीय संस्था पूर्णरुपमा सञ्चालनमा आएका छन् । जेन जी आन्दोलनका कारण प्रभावित भएको बैंकिङ सेवा आइतबारदेखि सुचारु भएको हो ।
नेपाल बैंकर्स संघका अनुसार बैंकहरुले आइतबारदेखि सबै कार्यालय सञ्चालनमा ल्याएका छन् । आन्दोलनबाट क्षति पुगेका बैंकहरुका शाखा कार्यालय र एटिएमहरू पनि चाँडै नै सञ्चालन गर्ने तयारी थालिएको छ । शुक्रबारसम्म आंशिकरुपमा मात्रै सञ्चालन गरिएको थियो ।
नेपाल राष्ट्र बैंकका गभर्नर प्रा.डा. विश्वनाथ पौडेलले बैंकर, निजी क्षेत्रका व्यवसायी र उद्योगीहरूसँग छलफल गरेका छन् । गभर्नर पौडेलले बैंक तथा वित्तीय संस्थासम्बद्ध एसोसिएसनका प्रतिनिधि र उद्योगी व्यवसायीका प्रतिनिधिहरूसँग पछिल्लो घटनाक्रमका कारण परेको असरबारे छुट्टाछुट्टै छलफल गरेका हुन् ।
जेन जी आन्दोलनका कारण ठूलो क्षति व्यहोरेका उद्योगी तथा व्यवसायीहरूका लागि विशेष प्याकेज ल्याउन गभर्नरसँग माग राखेका छन् ।
गभर्नर पौडेलले बैंकरहरुसंग पनि छुट्टै छलफल गरेका छन् । पौडेर र बैंकहरुबीच आन्दोलनबाट क्षति व्यहोरेका व्यवसायीहरूका लागि कस्ता प्याकेज ल्याएर सहुलियत दिन सकिन्छ भन्नेबारे छलफल भएको थियो ।