काठमाडौं । नेपाली कांग्रेसको १४ औं महाधिवेशनमा संस्थापनइतर समूहबाट डा. मिनेन्द्र रिजाल महामन्त्रीको उम्मेदवार बन्ने भएका छन् ।
रक्षामन्त्री समेत रहेका रिजालले पार्टीलाई वैचारिक र सांगठनिक दुवै हिसाबले सशक्त बनाउन आफू महामन्त्रीको उम्मेदवार बन्ने बताए ।
संस्थापनइतर समूह यतिबेला सभापतिको साझा उम्मेदवार बनाउन निरन्तर छलफलमा रहेको छ । सभापतिमा साझा उम्मेदवार चयन हुनासाथ महामन्त्रीका रुपमा आफ्नो उम्मेदवारी स्वतः सार्वजनिक हुने रिजालको भनाई छ ।
‘म महामन्त्रीको स्वभाविक उम्मेदवार हुँ । यतिबेला हाम्रो समूहबाट सभापतिको साझा उम्मेदवार बनाउने प्रयत्नमा छौं । साझा उम्मेदवारको टुंगोसँगै महामन्त्रीमा मेरो उम्मेदवारी औपचारिक हुनेछ’, रिजालले भने ।
पार्टीभित्र आफूले गरेको काम र अनुभवकै आधारमा महामन्त्रीको उम्मेदवार बन्न लागेको बताए । ‘पार्टीका लागि होस वा मुलुकका लागि मैले इमान्दारिताका साथ काम गरेको छु । १४ औं महाधिवेशनमा महामन्त्रीका लागि मेरो उम्मेदवारी रहन्छ’, रिजालले भने ।
उनले पार्टीलाई एकतावद्ध र विपक्षीसँग खरो उत्रनसक्ने संगठनका रुपमा लैजानुपर्ने बताए ।
