Tag: भरतपुर महानगरपालिका

चितवन । नेकपा एमालेले चितवनका भरतपुर महानगर र माडी नगर कमिटीको नेतृत्व चयन गरेको छ । १५ गते अधिवेशन उद्घाटन भए पनि ९ दिन ढिलो गरी महानगर कमिटीलाई पूर्णता दिइएको छ ।

भरतपुर महानगर कमिटीको अध्यक्षमा शंकर थपलिया चयन भएका छन् । उनी तत्कालीन सचिव थिए । यस्तै सचिवमा टिकाराम सुवेदी चयन भएका छन् । उनी पूर्वमाओवादी नेता हुन् । पछि मनोनित गर्ने गरी उपाध्यक्ष पद खाली राखिएको छ ।

उपसचिवमा निशा अधिकारी चयन भएकी छन् । एक उपसचिव पद खाली राखिएको छ । महानगर कमिटी ११७ सदस्यीय चयन गरिएको हो । बिहीबार केन्द्रीय नेताहरुको उपस्थितिमा महानगर कमिटीका अध्यक्ष, पदाधिकारी र सदस्यहरुलाई सपथ गराउने तयारी एमाले चितवनले गरेको छ ।

कात्तिक ९ गते नै नगर अधिवेशन भएको माडी कमिटीले १५ दिन पछि बल्ल पूर्णता पाएको छ । माडी नगर कमिटीको अध्यक्षमा नारायणप्रसाद अधिकारी चयन भएका छन् । ७१ सदस्यीय कमिटी ९ गतेनै सर्वसम्मत भए पनि पदाधिकारीमै २२ जना आकांक्षी बनेपछि सहमति गराउन सकस परेको थियो ।

अध्यक्षमा ४ जना आकांक्षी थिए । उपाध्यक्षमा रामेश्वर चौधरी, सचिवमा श्रीप्रसाद दवाडी, उपसचिवमा पूर्णकला सुनार र मोहदत्त काफ्ले चयन भएका छन् ।

माडी कमिटीलाई २६ गते सपथ गराउने तयारी छ । ९ गते नै नगर अधिवेशन भएका कालिका र राप्ती नगरपालिका कमिटिलाई पनि २५ गते नै सर्वसम्मत गराउने प्रयास भैरहेको छ ।

रत्ननगर नगर कमिटीमा ईश्वरीप्रसाद अर्याल, खैरहनी नगर कमिटीमा पूर्णप्रसाद डल्लाकोटी, इच्छाकामना गाउँ कमिटीमा कृष्णप्रसाद सिलवालको नेतृत्वमा कमिटीहरु बनिसकेका छन् ।

चितवन । भरतपुर महानगरपालिकाकी प्रमुख रेणु दाहालले चितवनको भरतपुरको विकास देखेर अत्तालिएकाहरुले आफूहरुलाई लखेट्ने कुरा गरेको बताएकी छन् ।

नेकपा माओवादी केन्द्र भरतपुर महानगर कमिटीले आयोजना गरेको कार्यक्रममा बोल्दै दाहालले चार वर्षको अवधिमा कसैले नगरेको र गर्न नसकेका काम हुँदा केहि व्यक्ति आत्तिएकाले अनावश्यक अभिव्यक्ति दिन थालेको बताइन् ।

‘जनताको अमूल्य मतबाट निर्वाचित भएर आएपछि सिन्को नभाँच्ने हिजोको परिपाटी थियो,’ पार्टी अध्यक्ष प्रचण्डसमेतको उपस्थिति रहेको कार्यलक्रममा उनले भनिन्, ‘विकासका नाममा केहि नगर्ने, चुनावदेखि चुनावसम्मको स्थितिमात्र थियो । अहिले महानगरपालिकाभरि विकासको लहर आएको छ । यो सबै महानगरवासीले देखेको कुरा हो । जनताको मन जितेर स्वार्थ नराखेर रातदिन काम गर्दा लखेट्ने कुराहरु आएका छन् ।’

नेपाली कांग्रेस चितवनका सभापति जितनारायण श्रेष्ठले केहि दिनघि प्रचण्ड र रेणुलाई चितवनबाट लखेट्ने अभिव्यक्ति दिएका थिए । श्रेष्ठको सोही अभिव्यक्तिलाई लक्षित गरी रेणुले काउन्टर दिएकी हुन् ।

उनले नेकपा एमालेको दशौं राष्ट्रिय महाधिवेशन अन्तै हुने तय भए पनि भरतपुरमै ल्याएर गर्नुपर्ने स्थिति बनाइएको बताएन् । ‘सबै तिरबाट घेराबन्दी र काम गर्ने मान्छेलाई लखेट्ने परिपाटी अहिले पनि हामीले देखेका छौं । म भन्न चाहन्छु । हामी हिजो पनि जनताका अधिकारका लागि मर्न तयार भएर हिडेका हौं, अहिले पनि जनताकै लागि लडिरहेका छौं । जति हामीलाई लखेट्ने कुरा गर्छन् त्यति नै धेरै जनताको सेवक भएर काम गर्ने प्रेरणा मिलेको छ,’ उनले भनिन् ।

महानगर प्रम्ख दाहाल तत्कालीन कांग्रेस-माओवादी गठबन्धनबाट निर्वाचित भएकी हुन् ।