Tag: पाल्पा

पाल्पा । पाल्पाको रामपुर नगरपालिका –३ ओईरीघाटस्थित भित्री कच्ची सडक खण्डमा स्कुटर दुर्घटना हुँदा चालकको मृत्यु भएको छ ।

रामपुरको लाम्टाङ भन्ने ठाउँबाट ओरीघाटतर्फ आउँदै गरेको लुम्बिनी प्रदेश ०९–००४ प ८०३९ नम्बरको स्कुटर दुर्घटना हुँदा स्कुटरका चालक सोही ठाउँका ७५ वर्षीय पदमबहादुर ठाडा मगरको मृत्यु भएको हो ।

स्कुटर आफै अनियन्त्रित भई दुर्घटना हुँदा चालक ठाडा घाइते हुनु भएको थियो । घाइते ठाडालाई स्थानीयले उद्धार गरी उपचारको लागि रामपुर अस्पताल पठाए पनि उनको बाटोमै मृत्यु भएको जिल्ला प्रहरी कार्यालय पाल्पाले जनाएको छ ।

घटनाको विषयमा थप अनुसन्धान भइरहेको जिल्ला प्रहरी कार्यालय पाल्पाका सूचना अधिकारी प्रहरी नायव उपरीक्षक सुनिल मल्लले जानकारी दिनुभयो ।

आज नयाँ वर्षको नाममा मादक पदार्थ सेवन र लागूपदार्थ सेवनको कारण दुर्घटना हुन सक्ने भएकोले ठाउँ ठाउँमा सवारी चेक जाँच र प्रहरी गस्ती बढाएको पाल्पाका प्रमुख जिल्ला अधिकारी तोयनारायण सुवेदीले बताए ।

काठमाडौं । पाल्पाको रामपुर नगरपालिकाका मेयर रमणबहादुर थापासहित नगरपालिकाका पदाधिकारीविरुद्ध अदालतको अवहेलना मुद्दा दायर भएको छ ।

अधिवक्ता राजाराम घिमिरे र तुलसीराम पोखरेलले दर्ता गरेको रिटमाथि पुस १९ गते सुनुवाइको पेसी तोकिएको छ । अवहेलना मुद्दामा मेयर थापा,उपमेयर विष्णुदेवी आचार्यसहितलाई विपक्षी बनाइएको छ ।

सर्वोच्च अदालतले गत असार २९ गते रामपुर नगरपालिकालाई कालिगण्डकी नदीबाट गिटी बालुवा लगायत नदीजन्य पदार्थ निकाल्ने कार्य नगर्न,नगराउन अन्तरिम आदेश दिएको थियो ।

अदालतको आदेशविपरीत मेयर थापाले मंसिर २२ गते नगरपालिकाको १२६ औं बैठक राखी नदीजन्य पदार्थका कारण कालीगण्डकीको वहाव परिवर्तन हुन गइ खेतीयोग्य जमिनलगायत भूगोलको संरचना बिग्रन गएको भन्दै जनप्रतिनिधिको प्रत्यक्ष निगरानीमा पुस १० देखि १९ गतेसम्म नदीजन्य सामग्री निकाल्न अनुमति दिने निर्णय गराएका थिए ।

यसले सर्वोच्च अदालतको अन्तरिम आदेशको अवज्ञा गरेको तथा अदालतमा विचाराधीन रहेको विषयमा न्याय सम्पादनको कार्यमा अवरोध भएको भन्दै अवहेलनामा कारबाही गर्न माग गर्दै मुद्दा परेको छ ।

रूपन्देही । डेंगु रोगबाट पाल्पाको रम्भा गाउँपालिका-१ मा नेकपा एमालेबाट वडा सदस्यमा निर्वाचित हुमबहादुर सिंजालीको मृत्यु भएको छ ।

गाउँपालिका अध्यक्ष विष्णुप्रसाद भण्डारीका अनुसार रम्भा-१ बिसौना घर भएका सिंजालीको डेंगुका कारण मृत्यु भएको हो । ५७ वर्षीय सिंजालीको उपचारका क्रममा बुटवलको गौतम बुद्ध सामुदायिक मुटु अस्पतालमा मृत्यु भएको हो ।

आइतबार हात दुख्ने समस्या देखिएर स्याङ्जाको गल्याङ सामुदायिक अस्पताल पुगेका उनलाई सामान्य उपचारपछि घर पठाइएको थियो । निको नभएपछि तानसेनको युनाइटेड मिसन अस्पताल हुँदै सिंजालीलाई बुटवल ल्याइएको थियो ।

वडा सदस्यको मृत्यु भएपछि गाउँपालिकामा शोक बिदा दिइएको छ ।

रूपन्देही । अविरल वर्षापछि आज विहान आएको पहिरोले बुटवल उपमहानगरपालिका-३ ज्योतिनगरमा एक दर्जन घरमा क्षति पुर्‍याएको छ । २०५५ सालमा पहिरो गएको स्थानमा पुनः पहिरो खसेपछि सो क्षेत्र थप प्रभावित बनेको हो ।

चुरेबाट खसेको पहिरोले मनमाया भाट क्षेत्री लगायत एक दर्जन घरमा क्षति पुगेको स्थानीयले जनाएका छन् । बुटवल वडा-४ का अध्यक्ष टंक पराजुलीले गैरीगाउँका केही घरमा क्षति पुराएको र वर्षा निरन्तर भएकाले उद्दारमा कठिनाइ भएको बताए ।

स्थानीयका अनुसार ३ घरमा पहिरो पसेको छ । उज्यालो भइसकेको हुँदा मानवीय क्षति भने भएको छैन । यहि भदौ ११ गते उक्त वस्ती माथिको चुरेमा पहिरो गएपछि स्थानीयहरु सावधानी अपनाउँदै आएका थिए ।

पहिरो गएपछि स्थानीयले क्षति पुगेका घरका सरसामान सार्ने काम गरिरहेका छन् । त्यसैगरी पहिरोले क्षति पुग्नसक्ने घरबाट समेत सामान अन्यत्र सार्ने तयारी गरिरहेका छन् ।

पहिरोले बुटवलको गोलपार्कदेखि लक्ष्मीनगर जाने रिङरोड र त्यहाँ रहेको विजुलीको पोल बगाएको छ । बुटवलको वडा नम्बर ३ र ४ माथि रहेको चुरेमा २ वटा ठूला पहिरो गएकोमा यससँगै ३ ठूला पहिरो गएको छ ।

उक्त ठाउँमा २०५५ साल भदौ २० गते पनि पहिरो खस्दा ५ दर्जन घरमा क्षति पुगेको थियो । पहिरोमा परेका ५७ घरपरिवारलाई सरकारले क्षतिपूर्ती दिएको थियो । पहिरोले बुटवलको वडा नम्बर ३ र २ मा क्षति पु¥याएको नगर प्रमुख शिवराज सुवेदीले बताए ।

उता पाल्पाको तानसेनमा घर भत्केर पुरिँदा एक जना १० वर्षीया बालिकाको मृत्यु भएको छ । तानसेन नगरपालिका-५ कैलासनगरमा एकतले ढुङ्गा माटोले बनेको घर भत्किएर पुरिँदा स्थानीय नारायण दर्जीकी १० वर्षीया छोरी नैना दर्जीको मृत्यु भएको हो ।

राती सुतिरहेकै अवस्थामा घरको पछाडिको गारो भत्किर पुरिएर गम्भीर घाइते भएकी बालिकाको उपचारका क्रममा मिशन अस्पताल तानसेनमा निधन भएको हो ।

रुपन्देही । पाल्पाका दुई स्थानीय तहले आफैं स्रोत व्यवस्थापन गरी खोप खरिदको गर्न स्वास्थ्य मन्त्रालयसँग अनुमति मागेका छन् ।

रामपुर नगरपालिका र रम्भा गाउँपालिकाले आर्थिक व्यस्थापन आफैंले गर्ने गरी मन्त्रालसँग अनुमति मागेका हुन् । रामपुर नगरपालिकाले ५० हजार डोज र रम्भा गाउँपालिकाले २० हजार डोज कोरोना खोप खरिदको लागि मन्त्रालयसँग अनुमति माग गर्दै पत्राचार गरेका छन् ।

विपद व्यवस्थापन कोषमा १ करोड ५० लाख रुपैयाँ, कोरोना कहरको कारण खर्च हुन नसकेको विकास बजेट, रामपुर क्षेत्रबाट विदेशमा रहेका व्यक्तिहरुको सहयोगमा कोभिड खोप खरिदको लागि बजेट व्यवस्थापन गरिएको रामपुर नगरपालिकाका नगर प्रमुख थापाले बताए ।

रम्भा गाउँपालिकाले विपद् व्यवस्थापन कोषमा ७० लाख रुपैयाँ रहेको, थप बजेट चालू आर्थिक वर्षमा सम्झौता नभएका विकास निर्माणको योजनाबाट परिपूर्ति हुनेगरी मिलाएको गाउँपालिकाका अध्यक्ष विष्णुप्रसाद भण्डारीले बताए ।

महामारीको समयमा विकास निर्माणको कामभन्दा जनताको ज्यान बचाउनु पहिलो प्राथमिकता भएकोले गाउँपालिकाले खोपलाई पहिलो प्राथमिकता दिई खोप खरिदको लागि प्रक्रिया अगाडि बढाएको अध्यक्ष भण्डारीले बताए ।

दुबै स्थानीय सरकारले भारतका विभिन्न ३ वटा कम्पनीसँग खोप खरिदको लागि कुराकानी भइरहेकोले मन्त्रालयसँग अनुमति मागेको जनाएका छन् ।

रुपन्देही । अर्थमन्त्री विष्णुप्रसाद पौडेलको विशेष योजनामा रहेको रुपन्देही र पाल्पाको सीमा क्षेत्रमा रहेको सिद्धबाबा सुरुङ मार्गको टेण्डर आह्वान गरिएको छ ।

यसअघि अर्थमन्त्री भएको समयमा यो सुरुङमार्गलाई प्राथमिकता साथ योजनामा राखेर बजेट बिनियोजन गर्न थालेका अर्थमन्त्री पौडेलले दोस्रोपटक अर्थमन्त्री भएपछि बजेट सुनिश्चित गरी अगाडि बढाएका हुन् ।

सिद्धार्थ राजमार्गको बुटवल–तानसेन सडकखण्डमा सुरुङमार्ग बनाउन बजेट सुनिश्चित भएपछि आज टेण्डर भएको हो । ‘मृत्यु मार्ग’का रुपमा चिनिने यो सडक पहिरोको उच्च जोखिमयुक्त क्षेत्र हो । जोखिमयुक्त सिद्धबाबा क्षेत्रमा सुरुङ मार्ग बनाउन संघीय भौतिक पूर्वाधार तथा यातायात मन्त्रालयले प्रक्रिया थालेको थियो ।

सुरुङ मार्ग निर्माण गर्न अर्थ मन्त्रालयले १० अर्ब बजेटको सुनिश्चितता दिएको र सोही आधारमा प्रकृया अगाडि बढाइएको सडक विभागका उपमहानिर्देशक विजय जैसीले नेपाल प्रेसलाई बताए ।

‘अहिले ५ वर्षको समय तोकेर टेण्डर आह्वान भएको छ, यसका विभिन्न संरचनागत सम्झौताहरुमा स्पष्ट उल्लेख छन्, ४५ दिनको समय राखेर सूचना सार्वजनिक गरिएको छ, त्यसपछि निर्माणको काम अगाडि बढ्नेछ,’ उनले भने ।

मंसिर १ गतेको अर्थमन्त्रीस्तरीय निर्णयले सुरुङका लागि बहुवर्षीय योजनामा काम गर्ने गरी बजेट स्वीकृति दिएको हो । ‘ग्लोबल टेन्डर आह्वान गर्छौं, आर्थिक वर्षभित्रै निर्माण सुरु हुनेछ,’ उनले भने । सुरुङमार्ग ५ वर्षभित्र बनाइसक्ने टेण्डरमा उल्लेख छ । करिब ५ कि.मी. को यो सिद्धबाबा सुरुङमार्ग आयोजनामध्ये ११२६ मिटरको टनेल, ७८० मिटरको डबल लेन रक सेड, माथिल्लो भागमा रक नेट, स्लोप पोटेक्सन लगायतका कामहरु हुनेछन् ।

सिद्धबाबामा सुरुङ मार्ग बनाउने विषयमा केही वर्षयता बहस भइरहेको थियो । लुम्बिनीबाट गण्डकीको राजधानी पोखरा जोड्ने महत्वपूर्ण सडकमा सुरुङ नै समस्याको समाधान भएको निष्कर्षसहित निर्माण प्रक्रिया थालिएको हो ।

अर्थमन्त्री तथा रुपन्देहीबाट प्रतिनिधिसभाका सदस्य विष्णु पौडेलले सुरुङ मार्गसँगै डबल लेनको सडकसमेत निर्माण हुने बताएका छन् ।

‘सुनौली–कोरला सडकको दीर्घकालीन सोचसहित सिद्धबाबामा सुरुङ बनाउने निष्कर्ष निकालिएको हो,’ उनले भने, ‘रुपन्देही र पाल्पावासीका लागि मात्र होइन यो देशकै पहिलो र नमुना योजनाका रुपमा अगाडि बढेको योजना हो, सबैको साथले समयमै निर्माण सम्पन्न हुनेछ ।’

रुपन्देही र पाल्पाको सीमानामा पर्ने सिद्धबाबा क्षेत्रमा स्वीस सरकार विकास सहयोगमार्फत सुरुङ मार्गको भौगर्भिक अध्ययन गरिएको थियो । ड्रिलिप नेपालले प्लानेट टेस्ट प्रालिमार्फत गरेको अध्ययनले सुरुङ मार्ग बनाउन सकिने प्रतिवेदन दिएको थियो ।

सुरुङ मार्ग पाल्पाको सिद्धबाबा मन्दिरको उत्तरतर्फको चिडियाखोलाको छेउबाट सुरु हुनेछ । चिडियाखोला खोंचबाट सुरु हुने सुरुङ दोभाननजिकै रामापिथेकस पार्कको उत्तरतर्फ निस्कनेछ । यो करिब ११ सय मिटरको हुने अनुमान छ ।

सिद्धार्थ राजमार्ग सिद्धबाबा क्षेत्रकै पहिरोका कारण असुरक्षित मानिन्छ । यहाँ पछिल्ला पाँच वर्षमा करिब डेढ सयको मृत्यु भएको छ भने सयौंको अंगभंग भएको छ । सिद्धबाबा क्षेत्र पत्रे चट्टानको भएकाले यो सडकमा पहिरो खस्नका लागि पानी पर्नुपर्दैन ।