पर्वत । जलजला गाउँपालिका-४ धुलेपालसिङ बस्ने ३३ वर्षीय रामबहादुर परियारलाई पत्नीको हत्या आरोपमा प्रहरीले पक्राउ गरेको छ । ३४ वर्षीया सन्तु जलारीको हत्या गरेको आरोपमा परियारलाई पक्राउ गरेको प्रहरीले जानकारी दिएको छ ।
रामबहादुर आफैँले सोही ठाउँस्थित धुलेपालसिङको जंगलमा घरायसी झगडाको कारण श्रीमतीको हत्या गरेको भनी प्रहरी चौकी वारिबेनीमा जानकारी प्राप्त भएको जिल्ला प्रहरी कार्यालय पर्वतले जनाएको छ ।
घटनबारे अनुसन्धान भइरहेको बताइएको छ ।
काठमाडौं । डडेल्धुरा र सिन्धुलीबाट भरुवा बन्दुकसहित ५ जनालाई प्रहरीलाई पक्राउ गरेको छ ।
प्रहरीका अनुसार डडेल्धुराको आलिताल गाउँपालिका-८ स्थित गंगामाला सामुदायिक बनबाट १ थान भरुवा बन्दुक र ३३ थान छर्रासहित सोही ठाउँ बस्ने २६ वर्षीय भीमबहादुर बोहरासमेत २ जनालाई आइतबार दिउँसो प्रहरीले पक्राउ गरेको हो ।
त्यस्तै सिन्धुली, कमलामाई नगरपालिका-९ भिमानबाट १ थान भरुवा बन्दुक र करिब ५० ग्राम बारुदसहित ३ जना पक्राउ परेका छन् । प्रहरीले हरिहरपुरगढी गाउँपालिका-३ बस्ने ५१ वर्षीय सार्कीमान लोप्चन, ३७ वर्षीय छेवाङ लोप्चन र ४० वर्षीय पासाङ लोप्चनलाई पक्राउ गरेको हो ।
काठमाडौंबाट बर्दिबासतर्फ जाँदै गरेको बा.५ च २९८४ नम्बरको कारलाई इलाका प्रहरी कार्यालय भिमानको टोलीले जाँच गर्नेक्रममा कारको डिक्कीमा लुकाएर राखेको अवस्थामा ती हतियार बरामद परेको प्रहरीले बताएको छ ।
विराटनगर । आम हड्तालको दिन गाडी चलाएको भन्दै तोडफोड गरेको आरोपमा विराटनगरमा चारजना बन्दकर्ता पक्राउ परेका छन् ।
बन्द गराउँदै हिँडेका प्रदर्शनकारीले बा. १६ च ४४०४ नम्बरको गाडी तोडफोड गरिएपछि प्रचण्ड-माधव पक्षका जिल्ला सदस्य पारुल क्षेत्री, मिरा दाहाल, महानगर सचिवालय सदस्य सारदा मैनालीसहित चारजनालाई नियन्त्रणमा लिइएको प्रमुख जिल्ला अधिकारी कोषहरी निरौलाले जानकारी दिए ।
भक्तपुर । बिना कारवाही सजाय र थुना मुक्त गराई दिन्छौ भनी ठगी गरेको अभियोगमा २ जनालाई प्रहरीले पक्राउ गरेको छ ।
पक्राउ पर्नेहरुमा सूर्यबिनायक नगरपालिका ६ बस्ने सिन्धुली सुनकोशी गाउँपालिका -४ भोलेनी घर भएका ३३ वर्षीय बीर बहादुर तामाङ र सूर्यबिनायक नगरपालिका-६ बस्ने रामेछाप सुनपाती गाउँपालिका -७ घर भएका २७ वर्षीय ग्याल्छेन लामा रहेका छन् ।
गत कात्तिक १६ गते भक्तपुर सूर्यबिनायक नगरपालिका-६ गणेश मन्दिर नजिकबाट बिशेष सूचनाको आधारमा महानगरीय अपराध महाशाखाबाट खटिएको प्रहरीले धावा लामा र राज कुमार घिसिङलाई सुनौलो कछुवा सहित पक्राउ गरेको थियो ।
पक्राउ परेका उनीहरुलाई बिना कारवाही सजाय र थुना मुक्त गराई दिन्छौ भनेर बिश्वास दिलाई ग्याल्छेन र बीरबहादुरले नगद २ लाख १० हजार रुपैयाँ ठगी गरी सम्पर्क बिहिन भएको भन्ने सूचनाको आधारमा महानगरीय प्रहरी वृत्त जगाती भक्तपुरबाट खटिएको प्रहरीले बीर बहादुरलाई शुक्रबार र ग्याल्छेनलाई शनिबार पक्राउ गरेको हो ।
पक्राउ ग्याल्छेन र बीर बहादुर उपर जिल्ला अदालत भक्तपुरबाट ठगी कसूरमा ५ दिन म्याद थप गरी अनसुन्धान भइरहेको महानगरीय प्रहरी परिसर भक्तपुरले जनाएको छ ।
जनकपुरधाम । यातायात तथा व्यवस्था कार्यालय जनकपुरका कार्यालय सहयोगी र एक दलाललाई घुस रकमसहित अख्तियारले पक्राउ गरेको छ ।
कार्यालय सहयोगी भोगेन्द्र कापर र दलाल राजकिशोर भगत घुस रकमसहित पक्राउ परेको अख्तियारको कार्यालय बर्दिबासका प्रवक्ता मनिराज ज्ञवालीले जानकारी दिए ।
उनका अनुसार कापरबाट २ लाख २३ हजार ८२० रुपैया र दलाल भगतको साथबाट ५० हजार रुपैयाँ नगद बरामद भएको छ ।
प्रवक्ता ज्ञवालीले भने, ‘यातायात कार्यालयका छैठौं तहका कर्मचारी तेजेन्द्र भनिने अनिल गिरीको निर्देशनमा दलाल भगतबाट कार्यालय सहयोगी कापरले घुस लिएका थिए ।’ घुस लिन भनेका कर्मचारी गिरी फरार भएका छन् ।
लोडर र स्काभेटरको चालक अनुमति पत्रका लागि दलालले कर्मचारीलाई घुस दिन लागेको सूचना पाएपछि अख्तियारको टोली आएर छापा मारेको प्रवक्ता ज्ञवालीले बताए । उनका अनुसार रकम खोज्न करिब ५ घण्टा नै लागेको छ ।
झापा । तीन करोड रुपैया भन्दा बढी मूल्य पर्ने ओरिएन्स कम्पनीका विभिन्न किसिमका खाद्यान्न परिपूरक डाइटरी सप्लिमेन्ट सहित झापा प्रहरीले एक जनालाई पक्राउ गरेको छ ।
दमक नगरपालिका वडा नम्बर ६ स्थित पदम गुरुङको घरमा भाडा लिई अवैध रुपमा उक्त कम्पनीका खाद्य वस्तुहरु भण्डार गरि विक्री गर्न लागेको सूचनाका आधारमा सामान सहित पक्राउ गरिएको झापा जिल्लाका प्रहरी प्रमुख प्रहरी उपरीक्षक सानुराम भट्टराईले बताए ।
दमककै जितेन्द्र साह समतेले काठमाडौंको बालाजुमा दर्ता रहेको ग्लोवल ओरियन्स प्रालिकबाट केही खाद्य वस्तु खरि गरि अन्य ठूलो परिणाममा ती भन्सार राजश्व छलेर भित्र्याइएको प्रहरीले जनाएको छ ।
कम्पनीका संचालकहरुमध्ये जितेन्द्र साहलाई पक्राउ गरिएको र अरु व्यक्तिको खोजी भइरहेको प्रहरीले जनाएको छ । बरामद भएका सामानहरुको मूल्य ३ करोड २९ लाखको विल भएको तर साढे २ लाखको विल नभएको सामान भेटिएको प्रहरीले जनाएको छ ।
पक्राउ परेका व्यक्ति र बरामद सामानलाई प्रहरीले बुधवार राजश्व अनुसन्धान कार्यालय इटहरीमा पठाउने भएको छ ।
रुपन्देही । सेवाग्राहीबाट घुस लिएका रूपन्देही जिल्ला अदालतका नापी निरीक्षक (सर्वेक्षक) सुमित चौलागाईं र मनोज थापा अख्तियारको फन्दामा परेका छन् ।
अदालतमा परेको जग्गासम्बन्धी मुद्दाको नापजाँच कार्यमा सहजीकरण गरिदिने भनी उनीहरूले सेवाग्राहीसँग घुस लिएका थिए ।
सेवाग्राहीबाट पाँच हजार अतिरिक्त रकम लिइसकेको अवस्थामा रूपन्देही कोटहीमाई गाउँपालिका १ बोगडियाबाट उनीहरूलाई नियन्त्रणमा लिएको अख्तियार दुरुपयोग अनुसन्धान आयोगले जनाएको छ ।
अतिरिक्त रकम माग गरेको भन्ने उजुरीका आधारमा अख्तियार दुरुपयोग अनुसन्धान आयोगको कार्यालय, बुटवलबाट खटिएको टोलीले उनीहरूलाई पक्राउ गरेको अख्तियारका सहायक प्रवक्ता गणेशबहादुर अधिकारीले जानकारी दिए ।
काठमाडौं । नेपाल प्रहरी संगठनलाई ठगी गरेको आरोपमा क्राउन टेक्सटाइल्स उद्योगका सन्चालक पक्राउ परेका छन् । केन्द्रीय अनुसन्धान ब्यूरोले चितवन माडी नगरपालिकाका ४६ वर्षीय नरेन्द्रनाथ पौडेल र क्राउन टेक्सटाईल्स ईण्डष्ट्रिज प्रालि बहुअरी वीरगंजका संचालक ५५ वर्षीय पिताम्बर कुमार मुन्कालाई आइतबार प्रहरीले पक्राउ गरेको हो । पिताम्बरलाई वीरगंज पर्साबाट तथा नरेन्द्रलाई काठमाडौंबाट पक्राउ गरिएको प्रहरील जनाएको छ ।
नेपाल प्रहरीलाई आवश्यक उलन पाईन्टको कपडा २० हजार मीटर खरिद गर्न ठेक्का पाएको कम्पनीले प्रहरी संगठनलाई जालसाजी गरी आफूलाई फाइदा पुर्याउने काम गरेको प्रहरीले जनाएको छ । प्रति मिटरको १ हजार ८२ रुपैयाँका दरले २० हजार मिटरको कपडा २ करोड १६ लाख ४० हजार रुपैयाँमा खरिद गर्ने निर्णय भएको थियो ।
उक्त फर्म र प्रहरी प्रधान कार्यालय प्रबन्ध निर्देशनालय नक्साल काठमाडौंबीच भएको सम्झौताबमोजिम आपूर्ति भएको सामानको गुणस्तर परीक्षण गर्ने क्रममा प्रहरी प्रधान कार्यालय प्रबन्ध निर्देशनालयबाट सम्बन्धित आपूर्तिकर्ता फर्म क्राउन टेक्सटाईल्स ईण्डष्ट्रिज प्रालिका प्रतिनिधि नरेन्द्रलाई रोहवरमा राखी नमूना निकाली परीक्षण गर्दा ठगी गरेको पाइएको हो ।
नरेन्द्रले प्रहरी संगठनको नाम, जिम्मेवार अधिकृतको नाम, मोबाईल नम्बर तथा ईमेल ठेगाना समेत उल्लेख गरी डिएचएल मार्फत सोही ल्यावमा आफूखुसी दोश्रो नमूना पठाई प्रहरी संगठनलाई नै जालसाजी गरी आफूलाई फाईदा पुर्याउने कार्य गरेको प्रहरीले जनाएको छ ।
पक्राउ दुवै जना उपर जिल्ला अदालत काठमाडौंबाट म्याद थप गरी यस सम्बन्धमा थप अनुसन्धान गरिरहेको प्रहरी प्रधान कार्यालय केन्द्रीय अनुसन्धान व्यूरो महाराजगञ्जले जनाएको छ ।
कैलाली । धनगढी उपमहानगरपालिका–१० जुगेडास्थित अस्थायी प्रहरी पोष्टमा कार्यरत प्रहरी सहायक निरीक्षक गोविन्द विक र प्रहरी जवान राम बहादुर साँउदको हत्याका मुख्य अभियुक्त अमर राना पक्राउ परेका छन् । प्रहरीका अनुसार घटनाका मुख्य योजनाकार राना घटनापश्चात फरार थिए । घटनापछि भारत भएका उनको प्रहरीले खोजी गरिरहेको थियो ।
रानालाई विशेष सूचनाको आधारमा सुदूर पश्चिम प्रदेश प्रहरी कार्यालय तथा जिल्ला प्रहरी कार्यालय कैलालीबाट खटिएको संयुक्त प्रहरी टोलीले धनगढी उपमहानगरपालिका–१९ फुलबारी क्षेत्रको नेपाल भारत सीमा नजिकबाट पक्राउ गरेको हो ।
सिमावर्ति क्षेत्रमा हुने अपराध एवं तस्करी नियन्त्रण गर्ने उद्देश्यले जुगेडाको दक्षिणी भागमा नियमित गस्ती गर्ने क्रममा भारततर्फ गोरु गाडामा मटर तस्करी गरिरहेको अवस्थामा फेला पारी नियन्त्रणमा लिने क्रममा तस्करहरुको समूहले गत कार्तिक १ गते प्रहरी सहायक निरिक्षक गोबिन्द र प्रहरी जवान राम बहादुरलाई धारिलो हतियार प्रयोग गरी हत्या गरेर फालेको अवस्थामा प्रहरी सहायक निरीक्षक गोबिन्दको शव भोलिपल्ट बिहान मोहना नदीमा फेला परेको थियो । प्रहरी जवान राम बहादुरको शव कार्तिक ४ गते बिहान सोही नदीमा फेला परेको थियो ।
घटनामा संलग्न ९ जना पर्कु भन्ने रोहित राना, राजेन्द्र राना, चोर भन्ने सुरेश राना, गब्बर भन्ने राज कुमार राना, राम निवास राना, टल्लु भन्ने दलराम राना, रोहित राना, गोपाल भन्ने राम गोपाल राना र राजिव गुप्तालाई यस अघिनै विभिन्न मितिमा पक्राउ गरी कर्तव्य ज्यान मुद्दामा जिल्ला अदालत कैलालीमा पेश गरिएकोमा अदालतको आदेशले ८ जना पुर्पक्षका लागि कारागार चलान भएका थिए भने राजिव गुप्ता १ लाख ५० हजार रुपैयाँ धरौटी तिरी तारेखमा छुटेका थिए ।
अमर रानालाई आजै जिल्ला अदालत कैलालीमा पेश गरिने जिल्ला प्रहरी कार्यालय कैलालीले जनाएको छ ।
काठमाडौं । विभिन्न समयमा ईपिएस परीक्षामा नक्कली परीक्षार्थी बनी ठगी गर्ने कार्यमा संलग्न रहेको आरोपमा प्रहरीले एक जनालाई पक्राउ गरेको छ ।
सुनसरी धरान उपमहानगरपालिका १९ घर भई काठमाडौं महानगरपालिका ५ रुद्रमतीमार्ग, कालोपुल बस्ने ५१ वर्षीय उत्तममान लिम्बुलाई मंगलबार प्रहरीले पक्राउ गरेको हो ।
सेन्ससेज कन्सल्टेन्स बागबजार काठमाडौंमा कोरियन भाषाको प्रशिक्षकको रुपमा काम गर्ने उत्तम मान समेतले विभिन्न समयमा कोरियन भाषाको ईपिएस परीक्षामा सहभागी हुन आएका विद्यार्थीलाई प्रभाव तथा प्रलोभनमा पारी विद्यार्थीहरुको प्रवेश पत्रमा आफ्नो फोटो राखी परीक्षा दिई उत्तिर्ण हुने र प्रतिव्यक्ति ७ लाख रुपैयाँसम्म लिई विद्यार्थीहरुलाई कोरिया पठाउने कार्यमा वर्षौदेखि संलग्न रहँदै आएको खुल्न आएको छ ।
विशेष सूचना आधारमा महानगरीय अपराध महाशाखाबाट खटिएको प्रहरीले उत्तममानलाई पक्राउ गरी आवश्यक कारवाहीको लागि महानगरीय प्रहरी परिसर, काठमाडौं पठाइएको जनाएको छ ।
उदयपुर । उदयपुरको त्रियुगा नगरपालिका–१४ स्थित धाप्लाङटारमा सञ्चालनमा रहेको कञ्चनजङ्घा गोल्डेन गुड क्रसर उद्योगमा बम विस्फोट गराएको आरोपमा प्रहरीले तीन जनालाई पक्राउ गरेको छ ।
जिल्ला प्रहरी कार्यालय उदयपुरका अनुसार पक्राउ पर्नेमा जिल्लाको चौदण्डीगढी नगरपालिका–८ का २३ वर्षीय एम्बी पुलामी मगर, ३२ वर्षीय यम्बरबहादुर मगर र १८ वर्षीय दीपक क्षेत्री छन् ।
सोमबार राति धाप्लाङटारस्थित क्रसर उद्योगमा सुतली र सकेट बमसहित दुई बम विस्फोट गराएको आरोपमा तीन जनालाई पक्राउ गरेर अनुसन्धान शुरु गरिएको उदयपुरका प्रहरी नायब उपरीक्षक तथा सूचना अधिकारी वेदप्रसाद गौतमले बताए ।
सोमबार राति छ जनाको अज्ञात समूहले क्रसर उद्योगमा गएर उद्योगका सुरक्षागार्ड कर्णबहादुर तामाङलाई नियन्त्रणमा लिई बम विस्फोट गराएको प्रहरीले बताएको छ ।
बम विस्फोटपछि जिल्ला प्रहरी, इलाका प्रहरी बेल्टार र सशस्त्र प्रहरी बेसक्याम्प बेल्टारको टोलीले स्थानीय क्षेत्र र जङ्गल आसपास बम विस्फोट गराउनेको तीव्र खोजी गर्ने क्रममा तीन जनालाई पक्राउ गरेको प्रहरीले बताएको छ ।
बम विस्फोटबाट क्रसर उद्योगको जेसिभी, मोटरसहित पेट्रोलको ड्रममा क्षति हुँदा रु १० लाख बराबरको क्षति भएको उद्योगका सञ्चालक सुमन्त कोइरालाले बताए ।