रुपन्देही । बुधबार लुम्बिनी प्रदेशमा सत्तारूढ चार दलमात्र बैठक बसेर गठबन्धन गरी नेकपा एसलाई समावेश नगरेको विज्ञप्ती बाहिरिएपछि पुनः पाँचदलीय गठबन्धनबीच स्थानीय चुनावमा तालमेल गर्ने सहमतिपत्र सार्वजनिक गरिएको छ ।
यसअघि नेकपा एकीकृत समाजवादीका प्रतिनिधिविनै गठबन्धनका दलहरूको बैठक बसेर निर्णय बाहिर आएपछि नेकपा एसलाई साँच्चै गठबन्धनमा नराखिएको हो ? भन्ने विषयमा चर्चा भएको थियो ।
तर बिहीबार बसेको गठबन्धन बैठकले पाँचदलीय गठबन्धनलाई चुनावसम्म लैजाने र चुनावी तालमेललाई व्यवहारिक रूपमा कार्यान्वयन गर्ने निर्णय गरेका छन् ।
‘वैशाख ३० मा हुने स्थानीय चुनावमा लुम्बिनीमा गठबन्धन बलियो तथा बजबुत बनाउनको लागि नियमित बैठक बस्ने, मत विश्लेषण गर्ने र निर्वाचन योजना निर्माण गर्ने निर्णय गरियो,’ बैठकपछि जारी विज्ञप्तिमा उल्लेख छ ।
यस्तै लुम्बिनीका एक सय ९ स्थानीय तहमा गठबन्धनको धरातलीय अवस्था पठाउन सम्बन्धित जिल्लाहरूलाई आग्रह गर्ने निर्णय भएको छ ।
जिल्लाहरूमा पनि पाँचदलीय गठबन्धन बैठक बस्न निर्देशन दिने निर्णय पनि उनीहरूले गरेका छन् । साथै अर्को बैठक चैत २७ मा बस्ने जनाइएको छ ।
बैठकमा नेपाली कांग्रेसका लुम्बिनी प्रदेश सभापति अमरसिंह पुन मगर, नेकपा माओवादी केन्द्रका लुम्बिनी अध्यक्ष सुदर्शन बराल, नेकपा एकीकृत समाजवादीका लुम्बिनी
अध्यक्ष मेटमणी चौधरी, जसपाका अध्यक्ष अशोककुमार यादव र राष्ट्रिय जनमोर्चा नेपालका उपाध्यक्ष बद्री आलम उपस्थित थिए ।
बैठकपछि उनीहरूले संयुक्त प्रेस विज्ञप्ति जारी गर्दै पाँचदलीय गठबन्धनलाई बलियो बनाउँदै लैजाने उल्लेख गरेका छन् ।
नेकपा एसले समयमै खबर नगरी ४ दलको मात्र गठबन्धनको निर्णय बाहिर सार्वजनिक गरेपछि असन्तुष्टि जनाएको थियो । गठबन्धन दलमा भागवण्डाका विषयमा कुरा नमिलेपछि र नेकपा एसको जनाधारका विषयमा प्रश्न उठाएपछि यो विषय सन्तुलनका लागि बाहिर आएको अनुमान गठबन्धन दलका एक सदस्यले बताए ।
