काठमाडौं । आइतबार राति वेम्ब्ली स्टेडियममा भएको युरो २०२० को फाइनलमा इटालीले बाजी मार्यो । सन् २००६ विश्वकपपछि पहिलो पटक ठूलो प्रतियोगिता जितेको इटालीले युरो १९६८ पछि पहिलोपटक जितेको हो ।
घरेलु टोलीविरुद्ध प्रतिस्पर्धात्मक खेलमा पुनरागमनसहित जित निकालेको इटालीले ३४ खेलमा अपराजित यात्रासमेत तय गरिसकेको छ । खेलको दोस्रो मिनेटमै १-० गोलको नतिजामा पराजित भएको इटालीले दोस्रो हाफमा बराबरी गोल फर्काएको थियो ।
बराबरी गोलसँगै अतिरिक्त समयमा धकेलिएको खेल पुन: बराबरीमा सीमित भएपछि नतिजाका लागि पेनाल्टी सुटआउटको विकल्प रहेन । सोही पेनाल्टी सुटआउटका लागि ११८औं मिनेटमा मैदान प्रवेश गरेका इङ्लिस दुई खेलाडी- जाडोन साञ्चो र मार्कस रासफोर्ड चुक्दा इटालीले बाजी मार्यो । पेनाल्टीमा ३-२ गोलको नतिजा निकालेको इटालीले दोस्रो पटक युरोपियन च्याम्पियनसिपको उपाधि चुम्यो ।
यी सबै त सामान्य वास्तविकता थिए । तर, इटालीले पेनाल्टी सुटआउटमा इङ्ल्यान्डलाई पराजित गरेसँगै एक समर्थकले २०१३ मा गरेको भविष्यवाणी मिलेको छ ।
@lawseyitfc ले २०१३ को फेब्रुअरी २२ मा इङ्ल्यान्ड युरो २०२० को पेनाल्टी सुटआउटमा इटालीसँग पराजित हुने भविष्यवाणी गरेका थिए ।
अझ रोमाञ्चक कुरा त केछ भने उनले आफ्नो ट्वीटमा युरो २०२० भनेरै मेन्सन गरेका छन् । र, कोरोना महामारीका कारण एक वर्ष पछाडि धकेलिएको युरोपियन च्याम्पियनसिपको नाम भने ‘युरो २०२०’ नै राखिएको थियो ।
यसले उनको भविष्यवाणी अझै मिलेको दर्शाएको छ । विभिन्न अन्तर्राष्ट्रिय खेलकुद सञ्चारमाध्यमहरूमा उनको ट्वीट भाइरल बनेपछि उनले फेरि ट्वीट गरेका छन् ।
उनले आफ्नै पुरानो भविष्यवाणीको ट्वीटमा रिप्लाई गर्दै ‘लोल…. कसैले यो किन भेट्टायो फेरि.. ‘ भनेर प्रतिक्रिया दिएका छन् ।
