Blog

काठमाडौं । प्रतिनिधिसभा विघटनको विरोध गर्दै आएको नेपाली कांग्रेसभित्र आन्दोलन वा निर्वाचनमध्ये कुनलाई प्राथमिकता दिने भन्नेमा ध्रुवीकरण देखिएको छ । सभापति शेरबहादुर देउवा पक्षले ‘आन्दोलनभन्दा अदालतको निर्णय कुर्नुपर्ने’ तर्क गरेको छ भने वरिष्ठ नेता रामचन्द्र पौडेल ‘संविधान जोगाउन आन्दोलन गर्नुपर्ने’ पक्षमा उभिएका छन् ।

मंगलबारदेखि सुरु भएको कांग्रेस केन्द्रीय समितिको बैठकको सुरुमै विषय प्रवेश गराउँदै सभापति देउवाले संसद विघटनपछि मुलुकमा गम्भीर राजनीतिक वातावरण बनेकोले पार्टीभित्र बृहद छलफल गरेर निष्कर्षमा पुग्नुपर्ने बताएका थिए ।

देउवाले सरकारको कदम अलोकतान्त्रिक र असंवैधानिक रहेको बताए पनि पार्टीको रणनीति के हुने भन्नेमा बैठकले सुझबुझपूर्ण निर्णय लिनुपर्ने उल्लेख गरेका थिए ।

‘हामीले सरकारको विरोध गरिसकेका छौं । अदालतमा मुद्दा परेको छ । अब आन्दोलन गर्ने वा निर्वाचनमा जाने साथीहरुले आफ्नो धारणा राख्नुहोला’ बैठकमा देउवाले भनेका थिए । देउवाले सत्तारुढ पार्टीको आन्तरिक किचलोका कारण संसद विघटन भएको भन्दै नेकपाको राजनीति कसरी अगाडि बढ्छ, सोहीअनुसार नै कांग्रेसको रणनीति बनाउनुपर्नेमा जोड दिएको केन्द्रीय सदस्यहरुले बताएका छन् ।

देउवालगत्तै बोलेका वरिष्ठ नेता पौडेलले भने संसदमात्रै नभएर संविधानविरुद्ध नै षड्यन्त्र भएकोले आन्दोलनको विकल्प नरहेको बताए ।

‘यो देशमा ठूल्ठूला अपराध गर्ने र अपराध लुकाउनलाई झन् ठूलो अपराध गर्ने श्रृखंलाको निरन्तरता हो प्रतिनिधिसभा विघटनको कदम । लोकतन्त्रप्रति घात गर्ने निर्णय उल्ट्याउनुपर्छ त्यसका लागि जेजे गर्नुपर्ने हो तयार हुनुपर्छ’, पौडेलले बैठकमा भने । पौडेलले ‘अध्यादेशदेखि विघटनसम्म’ मिलीभगत भएको हुनसक्ने आशंका गर्दै संविधान जोगाउनका लागि आन्दोलनमा जानुपर्ने बताएका छन् ।

‘संवैधानिक परिषद सम्बन्धी अध्यादेशमार्फत गरिएका संवैधानिक नियुक्ति पनि खारेज गर्नुपर्छ । कसैले भाग पाउँदैमा संवैधानिक नियुक्ति सदर हुँदैन’, बैठकमा पौडेलले भने ।

मंगलबारको केन्द्रीय समिति बैठकमा देउवा र पौडेलबाहेक तीन जना केन्द्रीय सदस्यहरुले धारणा राखेका थिए । तीनै जनाले आन्दोलनभन्दा निर्वाचनलाई प्राथमिकता दिनुपर्ने बताए । ‘संसद विघटन प्रधानमन्त्री केपी ओलीको मात्रै कदम होइन । यो निर्णयको स्रोत प्रचण्ड र माधव नेपाल पनि हुन् । यसर्थ समग्र नेकपा यो प्रकरणमा दोषी छ’ केन्द्रीय सदस्य महेश आचार्यले भने ।

महेश आचार्यले नेकपाको प्रचण्ड पक्षसंग सडक वा अदालत कुनै पनि स्थानमा सहकार्य गर्न नहुने भन्दै अदालतको आदेश कुर्नुपर्ने बताए । आफ्नो ‘लाइन’ मा बोलेपछि सभापति देउवाले बैठकपछि आचार्यलाई आफ्नो चेम्बरमा बोलाएर एक्लै कुराकानीसमेत गरेका थिए ।

बैठकमा धारणा राखेका सभापति देउवा निकट केन्द्रीय सदस्य एनपी साउदले आन्दोलन अन्तिम विकल्प नभएको बताए । ‘संसद विघटनविरुद्ध अदालतमा मुद्दा परिसकेकोले हामीले मुद्दा दिन आवश्यक छैन । अदालतले नै यसको निरुपण गर्ने भएपछि हामी आन्दोलनमा जानैपर्ने पनि छैन । त्यसैले अब चुनावको तयारीमा लाग्नुपर्छ’, बैठकमा साउदले भने । उनले सरकारले गरेको कमजोरी कि त अदालतले कि त जनमतले उल्टाउने उल्लेख गरेका थिए ।

बैठकमा बोल्ने अर्का केन्द्रीय सदस्य डा. नारायण खड्काले पनि आन्दोलन खतरनाक विकल्प हुने बताए । ‘आन्दोलन डेन्जरस हुनसक्छ । भोलि सबैका एजेण्डा सडकमा आउँदा हाम्रो एजेण्डा लजिकल इन्डमा नपुग्न पनि सक्छ । त्यसैले पार्टीलाई एकताबद्ध गरेर चुनावमा जानुपर्छ’, बैठकमा खड्काले भने ।

कांग्रेस केन्द्रीय समितिको बैठक अझै केहीदिन लम्बिने निश्चित छ । सभापति देउवा संसद विघटनबारे अदालतमा परेका मुद्दाबारे प्रारम्भिक सुनुवाई नहुँदासम्म बैठक लम्ब्याउने पक्षमा छन् । सर्वोच्च अदालतले १० वटा रिटहरुमाथि बुधबार पेशी तोकेको छ भने संवैधानिक इजलास पुगेका दुई रिटमाथि शुक्रबार पेशी तोकिएको छ ।

देउवा ओलीतिर, पौडेल प्रचण्डतिर

कांग्रेस केन्द्रीय समितिको मंगलबारको परिदृश्य हेर्दा ध्रुवीकरण प्रष्ट देखिन्थ्यो । सभापति देउवा निकट केन्द्रीय सदस्यहरुले आन्दोलनभन्दा चुनावको तयारी गर्नुपर्ने धारणा राख्न थालिसकेका छन् ।

बैठकलगत्तै पौडेल पक्षका केही केन्द्रीय सदस्यहरु भने पौडेलको कोठामा परामर्शमा जुटेका थिए । पौडेल पक्षका एक केन्द्रीय सदस्यले संसद विघटनको निर्णयका कारण कांग्रेसमा पनि ध्रुवीकरण चुलिने बताए ।

‘शेरबहादुर दाइ ओलीले चुनाव गराउँछन् र कांग्रेसले बहुमत पाउँछ भन्नेमा ढुक्क देखिनुभयो । रामचन्द्र दाइ ओलीले चुनाव गराउनेमा कन्भिन्स हुनुहुन्न र प्रचण्डसँग मिलेर भएपनि आन्दोलन गर्नुपर्छ भन्नेमा हुनुहुन्छ । यसपटकको बैठकमा दुवै पक्षबीच कडा टक्कर हुने देखिन्छ’, ती केन्द्रीय सदस्यले नेपाल प्रेससँग भने ।

संसद विघटन लगत्तै सार्वजनिक भएको संवैधानिक नियुक्तिको सूचीमा सभापति देउवाले दिएका नामहरु समेटिएको थियो । यसकारण देउवा ओलीप्रति ‘सफ्ट’ हुने आकलन छ । वरिष्ठ नेता पौडेलले भने शुक्रबार नेकपा अध्यक्ष प्रचण्ड र वरिष्ठ नेता माधव नेपालसँग गोप्यरुपमा भेटेर संयुक्त आन्दोलनका लागि तयार हुनसकिने संकेत गरेका थिए ।

प्रतिनिधिसभा विघटन प्रकरणले सत्तारुढ नेकपालाई ‘औपचारिक फुट’ मा पुर्‍याइसकेको छ । यही प्रकरणमा कांग्रेसभित्रको ध्रुवीकरण भने कहाँसम्म पुग्ने हो ? निश्चित छैन ।

काठमाडौं । जनता समाजवादी पार्टी (जसपा)को केन्द्रीय कार्यकारिणी समिति बैठकले संसद अधिवेशन आह्वान गर्न प्रतिनिधिसभाका सभामुखलाई आग्रह गर्ने निर्णय गरेको छ ।

प्रधानमन्त्रीलाई प्रतिनिधिसभा विघटन गर्ने अधिकार संविधानले नदिएको अवस्थामा संसद जीवितै रहेको निष्कर्षसहित सभामुख अग्निप्रसाद सापकोटालाई बैठक शुरु गर्न आग्रह गर्ने निर्णय गरेको हो ।

बैठकपछि पत्रकारहरुसँग कुरा गर्दै जसपाका संघीय परिषद् अध्यक्ष डा. बाबुराम भट्टराईले प्रतिनिधिसभा अहिले पनि जीवित रहेको निष्कर्षसहित सभामुखलाई बैठक आह्वान गर्न आग्रह गर्ने निर्णय भएको बताए ।

उनले भने, प्रतिनिधिसभा अहिले पनि जीवित छ त्यसकारणले हामीले सभामुखलाई प्रतिनिधिसभाको बैठक शुरु गर्नको निम्ति आव्हान गर्ने पनि निर्णय गरेका छौं ।’

प्रतिनिधिसभा विघटनको विरुद्धमा विभिन्न संघर्षका कार्यक्रम आयोजना गर्ने निर्णय पनि बैठकले गरेको छ । जस अनुसार पुस ८ गते सबै जिल्ला सदरमुकाममा प्रदर्शन गर्ने, १० गते सबै जिल्ला सदरमुकाममा राष्ट्रपति र प्रधानमन्त्रीको पुत्ला दहन गर्ने, ११ गते सबै जिल्ला सदरमुकाममा मसाल जुलुस निकाल्ने र १२ गते काठमाडौंमा केन्द्रीकृत जनप्रदर्शन गर्ने निर्णय भएको पनि संघीय परिषद अध्यक्ष डा. भट्टराईले बताए ।

बैठकले प्रधानमन्त्रीको सिफारिशमा राष्ट्रपतिद्वारा प्रतिनिधिसभा विघटनको घोषणा हुनु असंवैधानिक, अलोकतान्त्रिक र प्रतिगमनकारी भएको भन्दै पूर्णरुपमा खारेज गरेको पनि डा. भट्टराईले बताए ।

जनकपुरधाम । नेकपा नेता महेश बस्नेतले प्रधानमन्त्रीले घोषणा गरेको निर्वाचन आमजनताले स्वीकार गरिसकेको दाबी गरेका छन् ।

जनकपुरमा भएको ओली पक्षका युवाहरुको भेलालाई सम्बोधन गर्न जनकपुरधाम आइपुगेका नेता बस्नेतले यस्तो दाबी गरेका हुन् । उनले औपचारिक रुपमा नेपाली कांग्रेसले विरोध गरे पनि निर्वाचनलाई स्वीकार गरिसकेको दाबी गरे ।

‘केपी ओली मधेशविरोधी हो भनेर गलत प्रचार गरिएको छ’ उनले भने, ‘तर उहाँ मधेशविरोधी होइन । मधेशी जनता पनि उहाँको पक्षमा छन् भन्ने सन्देश दिन जनकपुरमा युवा भेला गरेका छौं ।’ मधेशमा पनि ओली पक्षको मजबुत पकड रहेको उनको भनाइ छ ।

‘चौतर्फी घेराबन्दीमा पारेर प्रधानमन्त्रीविरुद्ध अविश्वासको प्रस्ताव ल्याउने र राष्ट्रपतिमाथि महाभियोग लगाउने योजना थाहा पाएपछि बाध्य भएर संसद विघटन गर्नुपरेको बताए । उनले भने, ‘घेराबन्दीमा परेपछि नराम्रा नेतालाई नेतृत्व सुम्पिनुभन्दा डेढ वर्ष अगाडि नै जनतामा जान्छु । जनता न्यायाधीश हुन् । जनताले नै दूध र पानी छुट्याउँछन् भनेर उहाँ (ओली)ले निर्वाचनको प्रस्ताव गर्नुभयो ।’

आवधिक निर्वाचनलाई असंवैधानिक भन्ने व्यक्तिहरु नै असंवैधानिक रहेको उनले तर्क गरे । ‘लोकतन्त्रमा बहुमत प्राप्त गरेका प्रधानमन्त्रीले चौतर्फी जनताको म्यान्डेड लिने भनिसकेपछि अर्को सरकार बन्ने विकल्प रहँदैन’, उनको धारणा छ ।

‘निर्वाचनको प्रक्रियालाई अदालतले अस्वीकार गर्छ भन्ने लाग्दैन’ उनले भने, ‘आमजनताले निर्वाचनलाई स्वीकार गरिसकेकाले न्यायालयले जनताको भावनाविरुद्ध फैसला लिंदैन । त्यसैले हामी चुनावी तयारीमा लागिसकेका छौं ।’

काठमाडौं । नेपाली कांग्रेसका केन्द्रीय सदस्य डा. नारायण खड्काले संसद विघटनको विषय न्यायिक निरुपणका लागि छाडेर पार्टीले चुनावको तयारी गर्नुपर्ने बताएका छन् । कांग्रेस केन्द्रीय समितिको बैठकमा धारणा राख्दै नेता खड्काले सडक आन्दोलनमा जाँदा एजेण्डा र परिणामको ख्याल कांग्रेसले गर्नुपर्ने बताए ।

विगतमा कांग्रेसले पनि बहुमतको सरकार चलाउन नसकेर संसद भंग गरेको उदाहरण पेश गर्दै नेता खड्काले सडकमा जानु सबैभन्दा ‘खतरनाक विकल्प’ रहेको बताए । ‘हाम्रो अगाडि तीन वटा विकल्प छ । पहिलो अदालतमा परेका रिटहरुबारे के फैसला आउँछ त्यो कुर्नुपर्छ । संसदको पक्षमा फैसला आयो भने स्वागत गरेर जानुपर्छ । दोस्रो विकल्प सडक हो । सडक मस्ट डेन्जरस विकल्प हो। आन्दोलनको व्यवस्थापन, उद्देश्य, गन्तव्य र हामीले प्राप्त गर्ने कुरा के हुने र, हामीले आन्दोलन गर्ने फाइदा अरुले लिने हुनसक्छ । त्यसकारण चुनाव हुँदैन भनेर हुँदैन । पार्टीको नेतृत्वले अग्रसरता लिनुपर्छ । चुनाव गराउनका लागि दबाब सिर्जना गरौं । एकताबद्ध भएर चुनावमा जाने र संविधान जोगाउने विकल्प नै उत्तम हो’, खड्काले बैठकमा भने ।

नेपालका राजनीतिक दलहरुले बहुमतको सरकार सञ्चालन गर्न नसक्नु दुर्भाग्यपूर्ण रहेको भन्दै नेता खड्काले पार्टीहरुले बहुमत धान्ने क्षमता नराखेको बताए । ‘हिजो कांग्रेसले पनि बहुमतको सरकार चलाउन नसकेर संसद भंग गरेकै हो । अहिले पनि त्यस्तै भयो अब जनादेशबाटै सबै टुंगो लगाउनुपर्छ, खड्काले भने ।

काठमाडौं । बबरमहलमा सम्पन्न केपी ओली विरोधी नेकपाको केन्द्रीय कमिटी बैठकमा पूर्व माओवादी समूहका नेता प्रभु साहले फरक मत राखेका छन् । माधव नेपाललाई अध्यक्ष चयन गरिएकोमा उनले फरक मत राखेका हुन् ।

साहले पार्टीमा दुई अध्यक्ष हुनु हुँदैन भनेर फरक मत राखे पनि उनको प्रस्तावमा आज छलफल भएन । आफू पार्टीमा एकल अध्यक्ष हुनुपर्छ भन्ने पक्षमा रहेको उनले बताए । माधव नेपाल र प्रभु साह दुवै रौतहटका हुन् ।

स्थानीय अन्तरविरोधका कारण साह माधव नेपालको विपक्षमा छन् । उनले नेपाललाई अध्यक्ष बनाइएकोमा आफ्नो सहमति नरहेको बताएका छन् ।

काठमाडौं । नेकपाको प्रचण्ड–नेपाल पक्षले केपी शर्मा ओलीलाई अनुशासनको कारबाही गर्दै अध्यक्ष पदबाट हटाउने निर्णय गरेको केन्द्रीय सदस्य विष्णु रिजालले जानकारी दिएका छन् ।

उक्त निर्णयलाई बैठकले अनुमोदन पनि गरेको छ । त्यस्तै बैठकले प्रधानमन्त्री ओलीले संसद विघटन गर्नु गलत भएको निष्कर्ष निकाल्दै आन्दोलन गर्ने निर्णय पारित गरेको छ ।

काठमाडौं । नेकपाको प्रचण्ड–माधव नेपाल पक्षले आफ्नो समूहको केन्द्रीय कमिटी बैठकमा दुई तिहाइ केन्द्रीय सदस्य सहभागी भएको दाबी गरेको छ ।

बबरमहलस्थित कार्की पार्टी प्यालेसमा भएको केन्द्रीय कमिटी बैठकमा ४४७ सदस्यीय केन्द्रीय कमिटीका ३१० जना भन्दा बढी सदस्यले हस्ताक्षर गरेको प्रचण्ड पक्षको दाबी छ ।

प्रचण्डले बैठकलाई सम्बोधन गर्दै दुई तिहाइ कमिटी सदस्य आफ्नो पक्षमा रहेकाले बालुवाटारमा केपी ओली पक्षले गरेको बैठक अवैधानिक रहेको बताए ।

काठमाडौं । कांग्रेस केन्द्रीय समिति बैठक भोलि पुन: १ बजे बस्ने गरी सकिएको छ ।

संसद विघटन भएपछि मंगलबार पार्टी कार्यालय सानेपामा सुरु भएको बैठकमा आज सम्बोधन गर्दै सभापति शेरबहादुर देउवाले अहिलेको स्थितिमा पार्टी संयमित हुँदै जिम्मेवार ढंगमा प्रस्तुत हुने बताएका छन् ।

त्यस्तै बैठकमा कांग्रेस वरिष्ठ नेता रामचन्द्र पौडेलले समसामयिक विषयमा धारणा राखेका थिए ।

यस्तै कांग्रेस प्रवक्ता विश्वप्रकाश शर्माले निर्वाचन मात्रै नभइ दलीय फाइदाभन्दा माथि उठेर संविधान र परिवर्तन जोगाउने गरी कांग्रेसले उपयुक्त निर्णय लिने प्रतिक्रिया दिए ।

बैठकमा सबै सदस्यले धारणा राख्ने कार्यसूची छ । बैठक केही दिन लम्बिने  बताइएको छ ।

काठमाडौं । विभाजन हुने चरणमा रहेको नेकपाका अध्यक्ष प्रचण्डले पार्टी एकीकरणपछिको साढे दुई वर्ष विचित्रको अवस्थामा बिताइएको भन्दै आफूलाई बैठकमा बोल्न समेत नदिइएको गुनासो गरेका छन् ।

आफू पक्षधर केन्द्रीय कमिटीको बैठकलाई सम्बोधन गर्दै अध्यक्ष प्रचण्डले बैठक बस्न अनुनय विनय गर्नुपर्ने र सचिवालय बैठकमा बोल्न पाइँदैन भन्ने खालका व्यवहार पनि अर्का अध्यक्ष केपी ओलीबाट भोग्नुपरेको उनले सुनाए ।

बैठकमा प्रचण्डले भने–‘पार्टी र जनताबीचको सम्बन्ध पनि कम्युनिष्ट पार्टीको जस्तो भएन। सुशासन पनि भएन। अनेक अनियमितताका कुरा आए। हामीले सोचेको जस्तो पार्टी नबन्ने भयो भन्ने चिन्ता १८ बुँदे पत्रमा थियोे । त्यो मेरो मात्रै थिएन । हामी सबैको थियोे । बैठक बस्न पनि अनुनय विनय गर्नुपर्ने । अढाइ वर्ष विचित्रको अवस्थामा बिताइयो । सचिवालय बैठकमा बोल्न पाइँदैन भनियो। अध्यक्षलाई पनि बोल्न पाइँदैन भनियो ।’

प्रचण्डले बामदेव गौतम र रामवहादुर थापा बादललाई पनि आफ्नो समूहमा आउन आग्रह गरे । उनले दुवै नेतासँग आफ्नो भावनात्मक सम्बन्ध रहेको भन्दै बैठक हलमा बामदेव र बादलको आवश्यकता रहेको सुनाए । दुवै नेता अहिले कुनै गुटमा नलागी तटस्थ बसेका छन् ।

काठमाडौं । पूर्वअर्थमन्त्री युवराज खतिवडा अमेरिकाका लागि नेपाली राजदूतमा नियुक्त भएका छन् । मन्त्रिपरिषद्ले गरेको सिफारिस सदर गर्दै राष्ट्रपति विद्यादेवी भण्डारीले खतिवडालाई राजदूतमा नियुक्त गरेकी हुन् ।

राष्ट्रपति कार्यालयद्वारा जारी विज्ञप्तिमा संविधानको धारा २८२ बमोजिम खतिवडालाई राजदूतमा नियुक्त गरिएको उल्लेख छ ।

काठमाडौं । विवेकशील साझा पार्टीको प्रवक्तामा केन्द्रीय सदस्य शरदराज पाठक चयन भएका छन् ।

पार्टीका अध्यक्ष रवीन्द्र मिश्रले पाठकलाई प्रवक्तामा चयन गरिएको जानकारी दिएका छन् ।

पाठक गत संघीय निर्वाचनमा चितवन क्षेत्र नं ३ बाट पार्टीका उम्मेदवार थिए ।

काठमाडौं । प्रतिनिधिसभा विघटन बदर गर्न माग गर्दै प्रचण्ड–माधव नेपाल पक्षधर नेकपाका सांसदहरुले सर्वोच्च अदालतमा रिट दर्ता गराएका छन् । विघटित प्रतिनिधिसभाका संसदीय दलका प्रमुख सचेतक देव गुरुङसहितका सांसद मंगलबार अपराह्न सर्वोच्च पुगेर रिट दर्ता गराएका हुन् ।

प्रतिनिधिसभा विघटन गर्दा पाँच वर्षसम्म जनताको प्रतिनिधित्व गर्न पाउने हकबाट वञ्चित भएको भन्दै उत्प्रेषणको आदेशबाट प्रतिनिधिसभा विघटन बदर गराउन माग गरिएको नेकपा नेता तथा विघटित प्रतिनिधिसभाका सदस्य कृष्णभक्त पोखरेलले बताए ।

यसअघि नै सर्वोच्च अदालतमा प्रतिनिधिसभा विघटनको माग गर्दै ११ वटा रिट दर्ता भइसकेका छन् भने एउटा रिट संवैधानिक इजलासमा पठाइएको छ । रिटहरुमाथिको पहिलो सुनुवाई बुधवार हुँदैछ ।

कानूनविद् समेत रहेका नेकपा नेता पोखरेलका अनुसार रिट निवेदनसँगै नेकपाको अध्यक्ष प्रचण्डको विज्ञप्ति र कांग्रेस तथा जसपाको विज्ञप्ति पनि समावेश गरिएको छ । त्यसले बहुमत सांसद विघटनको विपक्षमा रहेको पुष्टि हुने पोखरेलले बताए ।

रिट निवेदन लिएर गुरुङ र पोखरेलका साथै नेकपा नेताहरु शशि श्रेष्ठ र रामकुमारी झाँक्री अदालत पुगेका थिए । यसअघि बहुमत सांसदको हस्ताक्षरसहित अदालत जाने भनिए पनि त्यसो नगरिएको उनले बताए ।

काठमाडौं । कांग्रेस केन्द्रीय समिति बैठकलाई सम्बोधन गर्दै सभापति शेरबहादुर देउवाले अहिलेको स्थितिमा पार्टी संयमित हुँदै जिम्मेवार ढंगमा प्रस्तुत हुने बताएका छन् ।

संसद विघटन भएपछि मंगलबार पार्टी कार्यालय सानेपामा शुरु भएको बैठकमा उनले शान्त, संयमित र भद्र ढंगमा प्रस्तुत हुने बताएका हुन् । बैठकमा विषय प्रवेश गर्दै सभापति देउवाले भने, ‘अहिलेको स्थितिमा कांग्रेस जिम्मेवार भएर प्रस्तुत हुन्छ ।’

त्यस्तै बैठकमा कांग्रेस वरिष्ठ नेता रामचन्द्र पौडेलले समसायिक विषयमा धारणा राखे ।

कांग्रेस प्रवक्ता विश्वप्रकाश शर्माले निर्वाचन मात्रै नभई दलीय फाइदाभन्दा माथि उठेर संविधान र परिवर्तन जोगाउने गरी कांग्रेसले उपयुक्त निर्णय लिने प्रतिक्रिया दिए ।

बैठकमा सबै सदस्यले धारणा राख्ने कार्यसूची छ । बैठक केही दिन लम्बिने निश्चित छ ।

काठमाडौं । प्रचण्ड–माधव नेपाल पक्षीय नेकपा केन्द्रीय कमिटी बैठकमा नेता झलनाथ खनाल प्रधानमन्त्री एवम् नेकपा अध्यक्ष केपी शर्मा ओलीमाथि खनिएका छन् । उनले ओली अति तानाशाही र स्वेच्छाचारी भएको आरोप लगाउँदै संसद् विघटन गर्नुलाई असंवैधानिक कदम भएको टिप्पणी गरे ।

ओलीकै कारण पछिल्लो समय पार्टी निकै कठिन मोडबाट गुज्रिएको बताउँदै खनालले ओली विधि भन्दा मनलाग्दी तरिकाले अघि बढेको टिप्पणी गरे । ‘मनलाग्दी मन्त्री बनाए, कहिल्यै हाम्रो कुरा सुनेनन्’ बैठकमा खनालले गुनासो गरे ।

काठमाडौं । प्रतिनिधिसभा विघटन विरुद्ध आन्दोलन घोषणा गरेको जनता समाजवादी पार्टीको केन्द्रीय कार्यकारिणी समितिको बैठक काठमाडौंमा जारी छ ।

ललितपुरको च्यासलस्थित तुलसीलाल अमात्य स्मृति प्रतिष्ठानको हलमा जसपाको बैठक बसेको हो ।

नेकपाका वरिष्ठ नेता माधव नेपाल पक्षको पकडमा रहेको प्रतिष्ठानको हलमा जसपाको बैठक बस्नुलाई प्रधानमन्त्री केपी ओलीविरुद्ध दुई पक्षको गठबन्धन बन्न लागेको अर्थमा बुझिएको छ ।

कांग्रेस सभापति शेरबहादुर देउवाले बोलाएको सर्वदलीय बैठकमा सोमबार दुवै पक्ष सहभागी भएका थिए । नेकपा अध्यक्ष प्रचण्डले जसपालाई पनि प्रधानमन्त्रीको कदम विरुद्ध सहकार्यको प्रस्ताव राखेका छन् । महन्थ ठाकुर, डा.बाबुराम भट्टराई, राजेन्द्र महतोलगायतका नेताले बैठकलाई सम्बाोधन गर्दैछन् ।

भक्तपुर । नेपाल मजदूर किसान पार्टीका अध्यक्ष नारायणमान बिजुक्छेले प्रधानमन्त्री केपी शर्मा ओलीले संसद् भङ्ग गरेर देशलाई ठूलो सङ्कटबाट जोगाएको बताएका छन् ।

उनले प्रधानमन्त्रीले चालेको कदम उपयुक्त र राम्रो भएकाले त्यसको विरोधमा नलागी नयाँ जनादेशमा जानुपर्नेमा जोड दिए ।

वर्तमान राजनीतिक घटनाक्रमका बारेमा रासस प्रतिनिधि रमेश गिरीसँग कुरा गर्दै उनले भने, “प्रधानमन्त्रीको कदमले देशलाई खतराबाट रोकेको छ, तत्काल देशलाई भड्खालोमा जानबाट जोगाएको छ, पार्टी फुटे अर्को बन्ला, देश फुटे के गर्ने ? यतिखेर ओलीले देश फुट्नबाट जोगाउनुभएको छ, तर यो सङ्कट अझै टरेको छैन, आगामी दिनमा अझै खतरा छ, चलखेल अझै हुन्छ, यसतर्फ अब जनता सजग हुनु जरुरी छ ।”
संविधानले परिकल्पना गरेको मान्यता र संविधानभित्रै रहेर प्रधानमन्त्रीले कदम चालेको जिकिर गर्दै पूर्वसांसद बिजुक्छेले संविधानभित्रका केही कमजोरीलाई संशोधन गरेर जानुपर्ने आवश्यकता भने औंल्याए ।

प्रधानमन्त्री ओलीले ‘कु’ गरे भन्नु गलत भएको टिप्पणी गर्दै नेता बिजुक्छेले राज्य विद्रोह, सैनिक विद्रोह गराएर सत्ता कब्जा गर्ने खेललाई मात्रै ‘कु’ भन्न मिल्ने तर्क राखे । उनले भने, “प्रधानमन्त्रीले ‘कु’ गर्नुभएको होइन, बरु ‘कु’ असफल चाहिं पार्नुभएको हो ।”

दुई तिहाइ बहुमत नजिकको सरकारका राष्ट्रपति र प्रधानमन्त्रीविरुद्ध आफ्नै नेताहरु नै लाग्नु बाह्य चलखेल भएको जिकिर गर्दै उहाँले यसमा प्रधानमन्त्री ओली निकै सचेत भएको र अझै सचेत हुनु जरुरी रहेको बताए ।

८२ वर्षीय नेता बिजुक्छेले भने, “देशमाथि आएको यस्तो सङ्कटमा पनि यो कदम नचालेको भए इतिहासले ओलीलाई लाछी प्रधानमन्त्री भन्थ्यो, उहाँले देशलाई विभाजन हुनबाट जोगाउन यो कदम चाल्नुभएको हो ।”

गुमेको नेपाली भूमि नक्शामा समावेश गरी भूमि फर्काउने अडान ओलीले कायम राखेकाले पनि अहिलेको परिस्थिति आएको तर्क उहाँले दिए । उनले नयाँ जनादेशका लागि चुनावमा जानुको विकल्प नभएको जनाउँदै सरकारले तोकिएकै मितिमा निष्पक्ष र धाँधलीरहित चुनाव गराउनुपर्नेमा जाेड दिए ।

काठमाडौं । नेकपाका दुवै पक्ष एक अर्कालाई निषेध गरेर पार्टी फुटाउने प्रक्रियालाई वैधानिकता दिन लागेका बेला दुवै पक्षमा नखुलेका उपाध्यक्ष वामदेव गौतम र सचिवालय सदस्य रामबहादुर थापा बादल भने बेग्लै छलफलमा जुटेका छन् ।

बबरमहलमा प्रचण्ड–माधव नेपाल पक्षको बैठक चलिरहेका बेला वामदेवलाई भेट्न बादल भैंसेपाटी पुगेका छन् । दुवै नेतालाई बैठकमा सहभागी हुन आग्रह गर्दै प्रचण्ड माधव नेपाललगायतका नेताहरु आज बिहान पनि उनीहरुको निवासमा पुगेका थिए ।

वामदेव र बादलबीच तेस्रो समूह बनाउने बारेमा छलफल भइरहेको स्रोतले जनाएको छ । वामदेवलाई भेट्न बादल पौने दुई बजे भैंसेपाटी पुगेका थिए ।

काठमाडौं । आफू पक्षधर केन्द्रीय कमिटी बैठकलाई सम्बोधन गर्दै वरिष्ठ नेता माधवकुमार नेपालले कुनै समूहले पार्टीको नामबाट गरेका निर्णय वैधानिक नहुने बताएका छन् ।

ओली नेतृत्वको नेकपा केन्द्रीय कमिटी बैठक र निर्वाचन आयोगलाई केन्द्रीय कमिटी पुनर्गठनबारे जानकारी दिएको विषयलाई लक्षित गर्दै नेता नेपालले भने, ‘पहिलो अध्यक्ष हुँ, मेरै निर्णय आधिकारिक हुन्छ भन्ने कसैले नसोचे हुन्छ ।’

‘सचिवालय बैठक बस्न हामीले धेरै पापड बेल्नुपर्यो’ उनले भने, ‘हाम्रो चाहना आज पनि धुम्बाराहीमा बैठक बस्ने थियो, तर विभिन्न कारणले सकेनौं ।’ उक्त समूहको बैठक बबरमहलस्थित एक पार्टी प्यालेसमा बसेको छ ।

अध्यक्ष ओलीबाट आफूहरु पटक–पटक अपमानित भएको पनि उनले बैठकमा बताए ।

काठमाडौं । परराष्ट्रमन्त्री तथा केपी ओली नेतृत्वको नेकपाका प्रवक्ता प्रदीप ज्ञवालीले पार्टी विभाजन नभई केन्द्रीय कमिटीको विस्तार मात्र भएकाे बताएका छन् ।

बालुवाटारमा बसेको केन्द्रीय कमिटीको निर्णय सुनाउने क्रममा प्रवक्त ज्ञवालीले भने, ‘ प्रधानमन्त्री ओलीको तर्फबाट पार्टी विभाजित भएको छैन । कमिटीको विस्तारका लागि साथीहरू थपिनुभएको छ । नेकपा एकताबद्ध छ ।’ बैठकमा कुनै पनि नेतालाई कारबाही नगरिएको उनले बताए ।

प्रधानमन्त्री ओलीमाथि षड्यन्त्रपूर्वक अविश्वासको प्रस्ताव तयारी गरेपछि बाध्य भएर संसद विघटन गर्नुपरेको ज्ञवालीको आशय थियो ।

‘एकाबिहानै दौडेर एउटा प्रयोजनका निम्ति प्रयोग गरिएको हस्ताक्षरलाई कपी पेस्ट गरी टाँसेर ओलीमाथि अविश्वास प्रस्ताव तयारी किन गर्नुपर्दथ्यो’ ज्ञवालीले भने, ‘उहाँले हाम्रो पार्टीलाई केही कुराले पनि एक बनाउन नसकेपछि निर्वाचनले एकता गर्छ भन्ने सन्देश दिनुभएको छ ।’

बैठकले नारायणकाजी श्रेष्ठलाई प्रवक्ता पदबाट हटाएर ज्ञवालीलाई जिम्मेवारी दिएको थियो । यो प्रसंगमा ज्ञवालीले भने, ‘पार्टी प्रवक्ताको काम पार्टीका आधिकारिक विचारहरूको सम्प्रेषण गर्ने हो । आफ्ना निजी आकांक्षा बुझाइलाई व्यक्त गर्ने होइन । त्यसकारण पार्टी अध्यक्षले मलाई आधिकारिक कुरा सम्प्रेषण गर्न प्रवक्ताको जिम्मेवारी दिनुभएको हो ।’

प्रधानमन्त्री ओलीले प्रतिनिधिसभा विघटन गर्नु संविधानविपरीत नभएको ज्ञवालीको आशय थियो ।

उनले भने, ‘पार्टी र संसदलाई देश र जनताको एजेण्डामा हैन, कोभिड १९ मा हैन, अरु प्राकृतिक विपत्तिमा परेका जनताका पीडामा हैन, राष्ट्रिय स्वाभिमानको, राष्ट्रियता सुदृढीकरणको एजेण्डामा हैन केही नेताहरूको कहिल्यै पनि सन्तुष्ट नहुने आकांक्षाहरूको बन्धक जस्तो बनाएर अगाडि बढ्नै नसक्ने स्थिति सिर्जना गरिसकेपछि प्रतिनिधिसभाकोे ६४ प्रतिशत सदस्यहरूको समर्थन प्राप्त दलका नेता र प्रमको हैसियतले उहाँले सभा विघटन गरेको जानकारी गराउनुभयो ।’

सरकारलाई काम गर्न नदिन चार वर्षअगाडिकै परिस्थितिको पुनरावृत्ति प्रचण्ड पक्षले गर्न लागेको ज्ञवालीको आरोप थियो ।

बैठकमा गरिएको निर्णयबारे बोल्दै उनले थपे, ‘ सरकारले गरेको राम्रो काम र पार्टीका विचार लिएर जनताको बीचमा जाने निर्णय भएको छ । लोकतन्त्र, राष्ट्रियता र सामाजिक आर्थिक रुपान्तरण समृद्धिको मुख्य एजेण्डालाई स्थापित गर्ने गरी सिंगो पार्टी पंक्तिलाई परिचालित हुन अध्यक्षले निर्देशन दिनुभएको छ । ’

कमिटीको अर्को बैठक ९ गते दिउँसो एक बजे बस्ने तय भएको उनले बताए । अर्को बैठक निर्वाचन केन्द्रित हुने कुरामा तय भएको ज्ञवालीले जानकारी दिए ।

‘महासचिव र माइन्युट विना बैठक हुन्छ ?’

प्रवक्ताकाे जिम्मेवारी पाएका ज्ञवालीले अर्को प्रचण्ड–माधव पक्षले बसेको बैठक आधिकारिक रुपमा मान्य नहुने बताए । पार्टीको अध्यक्ष, महासचिव र माइन्युट विना बैठक नहुने उनको जिकिर थियो ।

‘पार्टीको अध्यक्ष, महासचिव, माइन्युट विना पनि बैठक बस्छ र ? त्यो बैठकको निर्णय वैधानिकता हुने कुरा पनि भएन । पार्टीको मौजुदा विधानले महासचिवले सूचना जारी गर्नुपर्छ भन्छ। महासचिवले बैठकको एजेण्डा र सूचना तया गर्नुपर्छ,’ उनले भने ।

एकल अध्यक्षको निर्णयलाई मान्यता दिन मिल्छ भन्ने प्रश्नमा उनले भने, ‘उहाँलाई त बोलाएकै हो । किन आउनु भएन थाहा भएन ।’ यद्यपि, पार्टीमा ओली पहिलो अध्यक्षको हैसियतमा भएको हुँदा पहिलो अध्यक्ष र महासचिवसहितको बैठक मान्य हुने उनले बताए ।

लोकतान्त्रिक दल निर्वाचनबाट पन्छिन्न

विघटन भएको संसद नब्युँतने र सबै दल निर्वाचनको तयारीमा भित्रभित्रै जुटेको प्रवक्ता ज्ञवालीको आशय थियो । उनले भने, ‘कुनै पनि लोकतान्त्रिक दल निर्वाचनबाट पन्छिन्न । निर्वाचनका लागि तयारी भित्रभित्रै गर्न थालिसकेका छन् ।’

कुराकानीका क्रममा सरकारले यो बीचमा गरेका कामहरूबाट आफूहरू सन्तुष्ट रहेको ज्ञवालीले बताए । हामीले केही समयअघि मात्र एकैसाथ ३९६ वटा पालिकामा न्यूनतम ५ देखि १५ शय्या अस्पतालको शिलान्यास गर्‍यौं। यो काम विगतमा कुनै सरकारले गरेका थिएनन् ।’

काठमाडौं । नेकपाको प्रचण्ड-माधव नेपाल पक्षले पार्टीका पहिलो वरियताका अध्यक्ष केपी शर्मा ओलीलाई अनुशासनको कारबाही गरी अध्यक्षबाट हटाउने प्रस्ताव केन्द्रीय कमिटी बैठकमा औपचारिक रुपमा लगेको छ ।

बबरमहलस्थित कार्की पार्टी प्यालेसमा भइरहेको बैठकमा ओलीमाथि अनुशासनको कारबाही गर्ने प्रस्ताव पेश भएको हो । आजको बैठकको एजेण्डामा अनुशासनको कारबाहीपछिको नेतृत्व चयन पनि समावेश भएको छ ।

बैठकले ओलीको ठाउँमा माधव नेपाललाई अध्यक्ष चयन गर्ने तयारी छ । पार्टीका अध्यक्ष प्रचण्डसहित वरिष्ठ नेताहरुले पार्टीको आन्तरिक समस्याका बारेमा बैठकलाई जानकारी गराउने कार्यसूची छ ।