काठमाडौं । नेकपा एकीकृत समाजवादीले वामदेव गौतमलाई पार्टीको तेस्रो वरियतासहित समग्र केन्द्रीय विभागहरुको संयोजन गर्ने जिम्मेवारी दिएको छ।
आज बसेको सचिवालय बैठकले तीन जनालाई पोलिटब्यूरो र ९ जनालाई केन्द्रीय सदस्य बनाउने निर्णय गरेको प्रवक्ता प्रकाश ज्वालाले बताए।
गौतमलाई अध्यक्ष माधव नेपाल र झलनाथ खनालपछिको तेस्रो वरियता दिएको छ।
काठमाडौं । जसपाका नेता राजेन्द्र श्रेष्ठले उपेन्द्र यादवको अधिनायकवादी शैलीकै कारणले जसपा नेपाल ६ टुक्रा भएको टिप्पणी गरेका छन्।
राष्ट्रिय मुक्त पार्टीसँग कार्यगत एकता घोषणा सभामा बोल्दै उपेन्द्र यादवको एक्लै हिँड्ने शैलीको कारणले पार्टी नटिकेको जिकिर गरे।
उनले भने, ‘सहकार्य गर्दै जाँदा एकताको आधार तयार हुन्छ। त्यसैले हामीले सहकार्यबाट सुरु गरेका हौँ। त्यसलाई मोर्चाबन्दी गर्दै अहिले हामीले राजेन्द्र महतोसँग सहकार्य थालेका हौँ। यो कुरा ठिक हो। यो विगतको अनुभवको शिक्षा पनि हो।’
उनले बाबुराम भट्टराई, उपेन्द्र यादव र महन्थ ठाकुरबीच विगतमा हतारिएर एकता गर्दा टिक्न नसकेको पनि सुनाए।
काठमाडौं । प्रधानमन्त्री केपी शर्मा ओलीसँग चालु आर्थिक वर्षमा गरिने मुख्य काम र हासिल हुने उपलब्धिका लागि उपप्रधानमन्त्रीद्वय, मन्त्रीहरु र मुख्यसचिवबीच आज कार्यसम्पादन सम्झौता भएको छ ।
प्रधानमन्त्री तथा मन्त्रिपरिषद्को कार्यालय, सिंहदरबारमा मन्त्रालयगत वार्षिक प्रगति समीक्षाका साथै अगामी कार्यक्रमको कार्यसम्पादन सम्झौतामा हस्ताक्षर भई आदानप्रदान भएको हो ।
‘समृद्ध नेपाल, सुखी नेपाली’को राष्ट्रिय आकाङ्क्षा पूरा गर्न थालिएका पूर्वाधार निर्माण तथा सेवा प्रवाहमा सुधारका कार्यहरु तोकिएको समयमा सम्पन्न गर्न कार्यसम्पादन सम्झौताको अभ्यास प्रधानमन्त्री ओलीको विगतको कार्यकालमा आरम्भ गरिएको हो ।
प्रधानमन्त्रीसँग मन्त्रीहरुले कार्यसम्पादन सम्झौता गरेपछि मन्त्रीहरुले सम्बन्धित सचिवहरुसँग कार्यसम्पादन सम्झौता गर्नुपर्नेछ ।
काठमाडौं । पुनर्गठित नेपाल सद्भावना पार्टीका अध्यक्ष अनिल कुमार झाले समृद्ध मधेश र अधिकार सम्पन्न मधेशी समुदाय भन्ने पार्टीको स्थापित मान्यताका लागी क्रियाशिल हुने बताएका छन् ।
लामो समयदेखि निष्क्रिय रहेको पार्टीलाई पुनर्गठित गरेपछि बिहीबार काठमाडौंमा पत्रकार सम्मेलन गर्दै झाले नेपाल भित्र समृद्ध मधेश र अधिकार सम्पन्न मधेशी समुदाय भन्ने पार्टीको स्थापित सैद्धान्तिक मान्यताका लागी क्रियाशिल र संघर्षरत रहने बताएका हुन् ।
उनले आफ्नो नेतृत्वमा गरिएको पुर्नगठनलाई निर्वाचन आयोगले औपचारिक रुपमा मान्यता प्रदान गरेको जानकारी समेत दिए । अब पछि परेका समूदायको पहिचान, पहुँच, प्रतिनिधित्व, प्रदेश र प्राकृतिक श्रोत एवं राजस्वको बाँडफाँडमा समान अधिकारका लागी अर्थात मजबुत संघीयता र अर्थपूर्ण समावेशीकरणकोपक्षमा संघर्षरत रहने झाले बताए ।
अध्यक्ष झाले संघियता कार्यान्वयनमा प्रदेश सरकारहरुले देखाईरहेको उदासिनता र केन्द्र सरकारको उपेक्षाभाव पार्टीको चिन्ता रहेको धारणा राखे ।
उहाले मधेशी केन्द्रीत दलको मोर्चामा रहने वा छुटै कार्यक्रमलाई अघि बढाउने भन्ने बारेमा पार्टीभित्र छलफल गरिने उल्लेख गरे । हाल पुनर्गठित नेपाल सद्भावना पार्टीमा आफ्नो नेतृत्वमा ९१ सदस्यीय कार्यसमिति गठन भएको उहाले जानकारी दिए ।
पुनर्गठित नेपाल सद्भावना पार्टीले सुकुम्बासी समस्या लगायत कुनै पनि समस्याको बहानामा भइरहेको मधेशको भूमि बितरण कार्यलाई अबिलम्ब रोक्न सरकारसँग माग गरेको छ भने मधेश लगायत देश भरका किसानले भोगीरहको रासायनिक मलको कमीको समस्याको अबिलम्ब समाधानको लागी केन्द्र र प्रदेश सरकारहरुसँग माग गरेको छ ।
अध्यक्ष झाले नेपाल सद्भावना पार्टीको ३६ वर्षको यात्रा पार गर्दै बर्तमान स्वरुप पुनः ग्रहण गर्दासम्म यसबीचमा गरिएका सबै प्रकारका कार्यहरुको स्वामित्व ग्रहण गर्ने बताए ।
काठमाडौं । राप्रपाका ध्रुवबहादुर प्रधानले नैतिकताको आधारमा राज्य व्यवस्था तथा सुशासन समितिका सभापति रामहरि खतिवडाले राजीनामा दिएर संसद्को गरिमा बढेको बताएका छन्।
प्रतिनिधि सभाको बैठकमा बोल्दै उनले कसैले नियतवस् गरेको हो भने राजीनामा दिएर पुग्छ कि पुग्दैन ? भन्दै प्रश्न गरे।
उनले भने, ‘नैतिकताको आधारमा राज्य व्यवस्था तथा सुशासन समितिका सभापतिले राजीनामा दिनुभएको छ। राजीनामा दिएकै आधारमा सबै कुरा सम्पन्न हुन्छ कि हुँदैनरु नियमवस् कुनै प्रलोवनमा गरिएका कुरा भए नैतिकता देखिएर राजीनामा दिएर पुग्ने हो कि होइन ? नियतवस् गल्ती गर्ने व्यक्ति सजायको भागी भएन भने यो प्रक्रियामा जति पनि सांसदहरू हुनुहुन्छ कुनै न कुनै कारणवस् राजीनामा दिने अवस्था आउँछ।’
उनले भिजिट भिसा प्रकरणमा आफूहरूले सकारात्मक सोचका साथ छानबिन समिति माग गरेको बताए। आफूहरूको मागअनुसार छानबिन गर्न संसदीय समिति नबनेसम्म संसद् बहिष्कार गरिरहने पनि बताए।
काठमाडौं । रास्वपाकी सांसद चन्दा कार्कीले नैतिकता जागेर राज्य व्यवस्था तथा सुशासन समितिका सभापति रामहरि खतिवडाले पदबाट राजीनामा दिएको भएपनि गृहमन्त्री रमेश लेखकको नैतिकता जगाउन नसकेको बताएकी छन्।
प्रतिनिधि सभाको बैठकलाई बोल्दै गृहमन्त्रीले अदालतमा समेत हस्तक्षेप गरेको आरोप लगाइन्।
उनले भनिन्, ‘मानव तस्करीको विषय मात्रै होइन न्यायालयमा हस्तक्षेप भएको कुरा पनि पूर्वन्यायाधीश सुशीला कार्कीको अभिव्यक्ति सार्वजनिक नै छ। रुपन्देही जिल्ला अदालतमा रवि लामिछानेको निवेदनको पेसी चढेको दिन गृहमन्त्रीकै कार्यकक्षमा उजुरी तयार पारेको र त्यसको प्रतिलिपि उहाँकै सचिवालयबाट पठाइएको सूचनाहरू आइरहेका छन्। जुन दिन पेसी चढेको छ उही दिन योजनाबद्ध उजुरी परेपछि स्वतन्त्र न्याय कसरी सम्भव हुन्छ।’
उनले प्रधानमन्त्रीको अभिव्यक्ति सुनेर जनता दिग्भ्रमित भएको टिप्पणी गरिन्। उनले भनिन्, ‘उहाँले केही दिनअघि भन्नुभएको थियो अदालतमा आफ्नै पार्टीका कार्यकर्तालाई न्यायाधीश बनाउँछौँ। र निर्णय बफादारीमा हुन्छ। आज त्यही प्रधानमन्त्रीले अदालतको फैसलाको जिम्मा सरकारले लिन सक्दैन भन्नुभएको छ।’
काठमाडौं । नेपाली कांग्रेसका सभापति शेरबहादुर देउवाले सूचना प्रविधिले जनतालाई छिटो, सजिलो र पारदर्शी ढंगले सेवा दिन उल्लेखनीय भूमिका खेलिरहेको बताएका छन्।
नेपाली कांग्रेस सूचना, सञ्चार तथा प्रचार विभागद्वारा आयोजित कार्यक्रमलाई सम्बोधन गर्दै मोबाइल, इन्टरनेट, कम्प्युटर र सामाजिक सञ्जालको माध्यमबाट हरेक दिन करोडौँ मानिसहरू डिजिटल प्लेटफर्महरूमा जोडिरहेको बताए।
उनले भने, ‘डिजिटल प्लेटफर्महरू- शिक्षा, स्वास्थ्य, बैङ्किङ, हवाई, सरकारी सेवा लगायतका विभिन्न क्षेत्रमा प्रयोग भइरहेका छन् । हामीले यसको प्रयोग शिक्षा, स्वास्थ्य, कृषि, पूर्वाधार, रोजगारी तथा सार्वजनिक सेवा प्रवाहमा जिम्मेवार र प्रभावकारी रूपमा गर्न आवश्यक छ । सूचना प्रविधिले जनतालाई छिटो, सजिलो र पारदर्शी ढंगले सेवा दिन उल्लेखनीय भूमिका खेलिरहेको छ ।’
घर–घरमा इन्टरनेटको पहुँच, मोबाइल बैङ्किङ, अनलाइन फाराम, डिजिटल स्वास्थ्य सेवा तथा डिजिटल शिक्षा सबै प्रविधिमैत्री योजनाहरूले जनताको जीवनशैली सरल, समावेशी र सम्मानजनक बनाउँदै लगेको बताए।
उनले भने, ‘नेपाली कांग्रेस नेतृत्वको सरकारको अग्रसरतामा जारी भएका दूरसञ्चार सम्बन्धी नीति, ऐन र नियमहरूले आज नेपालका टाढाका बस्तीहरू र सबै नागरिकलाई प्रविधिको पहुँचमा ल्याएको छ । यसका अतिरिक्त प्रविधिको क्षेत्रमा धेरै कामहरू अझै गर्न बाँकी नै छन् । हामी सबैले यसको सकारात्मक प्रयोग गरेर व्यक्तिगत, सामाजिक र राष्ट्रिय विकासमा टेवा पुर्याउन सक्छौँ । सचेत, जिम्मेवार र नैतिक प्रयोग नै डिजिटल भविष्यको आधार हो ।’
नेपाली कांग्रेस, सधैँ नवप्रवर्तन र प्रविधि मार्फत सामाजिक रूपान्तरणको पक्षमा उभिँदै आएको बताए।
काठमाडौं । प्रधानमन्त्री केपी ओलीले कांग्रेस एमालेको समीकरण ०८४ को चुनावसम्म जाने बताएका छन्। प्रतिनिधि सभाको बैठकमा बोल्दै मुलुकमा राजनीतिक र नीतिगत स्थिरता कायम गरौं र बिग्रेको अर्थतन्त्रलाई सही बाटोमा फर्काऔं भनेर संसद्का दुई प्रमुख दलहरु मिलेर सरकार बनाएको बताए।
उनले भने, ‘विपक्षमा रहेका दलहरुलाई स्थिरता कति अप्रिय लागेको हो ? प्रमुख दल कांग्रेस र एमाले मात्रैको संसद्मा भारी बहुमत छ, त्यसमाथि अन्य दलहरु समेत यस सरकारमा सहभागि छन्। सरकार बनाउने संसद्को गणितले हो। बलियो संसदीय गणितको जगमा उभिएको सरकार आजै ढल्छ, भोलि नै ढल्छ भनेर अस्थिरताका लागि हल्ला पिटिरहनेजस्तो अस्थिरताको यो पक्षपोषण केका लागि? देशका लागि, राजनीति र नीतिगत स्थिरताका लागि त यो पक्कै होइन, र हुन सक्दैन । म सबैलाई स्पष्ट पार्न चाहन्छु, अस्थिरताको जतिसुकै चाहना राखे पनि आगामी ०८४ सालको निर्वाचनसम्म यही राजनीतिक समीकरण अगाडि बढ्छ ।’
लोकतन्त्रका लागि लड्ने र जेलनेल सहितको यातना भोगेको स्मरण गर्दै यो प्रणाली ज्यान सरह प्रिय रहेको पनि बताए। उनले थपे, ‘अङ्ग्रेजी साहित्यमा एउटा प्रसिद्ध कथा छ– सोलोमनको न्याय ! दुई महिलाले एउटै बच्चालाई आफ्नो छोरो भएको दाबी गर्छन् । दावी–प्रतिदावीबाट हैरान सोलोमनले सबैलाई अचम्मित पार्ने फैसला सुनाउँछन्– यो बच्चालाई ठाडो चिरेर दुवै महिलाहरुलाई आधा–आधा दिनू ! तीमध्ये एउटी महिला आधा भए पनि ठीकै छ भन्छिन्, तर अर्की आत्तिँदै र रुँदै भन्छिन्, ‘भो ! मलाई चाहिएन । बच्चा उसैलाई देऊ, तर मर्न नदेऊ !’ त्यसपछि न्यायमूर्ति सोलोमनले तिनै महिला साँचो आमा भएको थाहा पाउँछन् र बच्चा उसैलाई दिन्छन् ।’
काठमाडौं । प्रधानमन्त्री केपी ओलीले रवि लामिछानेमाथि सहकारी ठगी प्रकरणमा कारबाही प्रक्रिया अघि बढाउँदा राजनीतिक प्रतिशोध राखेको जबरजस्त भाष्य बनाउन खोजेको भन्दै असन्तुष्टि जनाएका छन्।
प्रतिनिधि सभाको बैठकमा बोल्दै उनले पूर्वमन्त्री, सासद, मेयरलगायत अन्य व्यक्तिहरुलाई पनि अदालतले थुनामा पठाएको बताए।
उनले भने, ‘लाखौं जनताले सहकारीमा गरेको वचत हिनामिना गर्ने सयौं व्यक्तिमाथि न्यायालयमा मुद्दा चलेको छ । अदालतले मुद्दा हेरिरहेको छ । पूर्वमन्त्री, पूर्वसांसद्, वहालवाला मेयर लगायत विभिन्न ओहोदामा रहिसकेका दर्जनौं व्यक्तिहरुलाई अदालतले थुनामा पठाएको छ । तर अदालतले पुर्पक्षका लागि थुनामा पठाएका कुनै एक व्यक्तिमाथि ‘राजनीतिक प्रतिशोध’ भएको भन्ने जबर्जस्त भाष्य बनाउन खोजिएको छ । एउटा व्यक्तिमाथि प्रतिशोध भएको हो भने थुनामा रहेका अन्य व्यक्तिमाथि के भएको हो ? त्यो चाहिँ कानुनी कारवाही हो ? अर्बौं रुपैयाँ अपचलन गरेको आरोपमा थुनामा रहेका सयौं मध्ये कुनकुन व्यक्तिमाथि ‘प्रतिशोध’ भएको हो ? कुनकुन व्यक्तिमाथिको थुना जायज हो ?’
भीडद्वारा न्यायको हत्या गरेर अभियोगमुक्त हुन खोज्नेहरुबाट समयले यसको जवाफ सधैं माग्ने भन्दै त्यस्ताका पछि लागेर कुद्ने भीड अचम्मको मात्र होइन दयालाग्दो पनि टिप्पणी गरे।
उनले भने, ‘यस्ता कुरालाई लिएर लगातार संसद् अवरुद्ध गरी विस्मयकारी, भावनात्मक र हानीकारक उत्तेजनाको एकालापमा मुलुकलाई लैजानु कदापि उचित हुँदैन । स्वतन्त्र न्यायालयले गर्ने निर्णय सरकार अनुकूल वा प्रतिकूल जेसुकै भए पनि त्यसमा सरकारको हात हुँदैन । संसद्, सरकार, न्यायालय लगायत आफ्नो काम गर्नु पर्ने लोकतान्त्रिक प्रणालीका सबैजसो अंगहरुलाई पेशेवर ‘मास म्यानुपुलेसन’को आक्रमणबाट वचाउनु पर्छ । लोकतान्त्रिक शक्तिहरुले यो काम गर्नै पर्छ ।’
भिजिट भिसामा विदेश गएर उतैको नागरिकता लिएर, उताको नागरिकता नत्यागी नेपाल फर्केर मन्त्रीसम्म भएका प्रमाणित अभियुक्तहरु र भिजिट भिसामा गएर उतै दुईदुई पटक बिहे गरिसकेका व्यक्तिहरुले समेत अन्तर्राष्ट्रिय विमानस्थलमा प्लेन चढ्ने सबै नागरिकलाई ‘बेचिएको’ भन्ने भाष्य स्थापित गर्न खोजिरहेको बताए।
उनले थपे, ‘यसका पछाडी मुलुक र नागरिकको हित जोडिएको छैन, यसले इमोसनल ब्ल्याकमेलिङ मार्फत आफ्नो स्वार्थको रोटी सेक्ने प्रवृत्ति मात्र उजागर गरेको छ ।’
प्रधानमन्त्रीले भने–सहकारी ठगीमा धेरै जनप्रतिनिधि र नेता कार्यकर्ता जेलमा छन्, रविलाई प्रतिशोध साँधिएको हो भने अरुलाई के गरेको भन्ने ? सयौं व्यक्तिमाथि पूर्वमन्त्री,पूर्व सांसद,मेयर लगायत विभिन्न ओहोदा रहेका दर्जनौं व्यक्तिमाथि मुद्दा चलेको छ । अदालतले पुर्पक्षका लागि थुनामा पठाएका एकजनामाथि प्रतिशोध साँधेको भनेर जबर्जस्त भाष्य बनाउन खोजिएको छ । त्यसो भए अरुमाथि के भएको हो त?सत्तापक्षका मानिस पनि थुनिएका सरकारले भनेरै हो त ?
अर्कोतिर भिजिट भिसाको बारेमा देशको बदनाम गराउन खोजिएको छ । भिजिट भिसामा गएर उतैको नागरिकता लिएर,नेपालमा आएर नागरिकता पुनः प्राप्त नगरी मन्त्रीसम्म भएका प्रमाणित अभियुक्त र भिजिट भिसामै गएर उतै २ पटक विहे गरेकाले समेत अन्तर्राष्ट्रिय विमानस्थलबाट प्लेन चढने सबै मानिस बेचिए भन्ने ढंगले इमोशनल ब्ल्याकमेलमार्फत स्वार्थको रोटी सेक्दैछन् । भिडद्धारा न्यायको हत्या गरेर अभियोगमुक्त हुन खोज्ने यस्ताका पछि लागेर कुद्ने भिड अचम्ममात्र होइन दयालाग्दो छ ।संसद,सरकार,न्यायलयलगायत सबै अंगलाई पेशेवेर मास म्यानिपुलेसनको आक्रमणबाट बचाउनुपर्छ ।
काठमाडौं । राष्ट्रिय प्रजातन्त्र पार्टी (राप्रपा) निकट राष्ट्रिय प्रजातान्त्रिक युवा संगठनको काठमाडौं जिल्ला अधिवेशनमा झडप निम्तिएपछि अध्यक्ष राजेन्द्र लिङदेन आक्रोशित बनेका छन् । उनले असन्तुष्ट पक्षका युवाहरूलाई बाहुबली प्रदर्शन नगर्न कडा चेतावनी दिए ।
चाबहिलको एक पार्टी प्यालेसमा आयोजित अधिवेशनमा संस्थापन निकट र धवलशम्शेर राणा निकट युवाहरुबीच झडप भएको हो । अध्यक्ष राजेन्द्र लिङदेन कार्यक्रम स्थलमा आइसकेपछि हात हालाहाल भएको थियो । त्यसपछि लिङदेनले मञ्चबाटै सम्झाउन खोजे ।
उनले भने, ‘कृपया सबै अनुशासित भएर बस्नुस् । के विषयमा चित्त बुझेको छैन, त्यो विषयमा छलफल अवश्य हुन्छ । पार्टीमा अधिवेशन प्रारम्भ हुँदा नै डिस्टर्व गर्ने काम ठिक होइन । यदि अधिवेशन हुन नदिने र बाहुबली प्रदर्शन गर्ने प्रयास कसैले गर्छ भने टुलुटुलु हेरेर बसिँदैन ।’
लिङदेनले पार्टीको भविष्यसँग युवाहरूको भविष्य जोडिएको भन्दै गम्भीर बन्न निर्देशित गरे ।
उनले भने, ‘तपाईँ युवाहरू नै पार्टीको भविष्य हो । पार्टीको भविष्यसँग तपाईँ हाम्रो भविष्य गाँसिएको छ । तपाईँहरू कसैको केटा होइन । हतियार होइन । मेरो आग्रह छ कसैलाई प्रक्रियामा चित्त बुझेको छ भने बन्द सत्रमा छलफल हुन्छ । प्रक्रियामा छलफल हुन्छ । चित्त नबुझेको कुराहरू छलफलबाट टुंगो लाग्छ । सहमति हुन नसके मतदान हुन्छ । तर गुण्डागर्दी र बाहुबली चल्दैन । त्यो काममा अग्रसर नहुन म आग्रह गर्छु ।’
काठमाडौं । नेकपा एमालेका मुख्य सचेतक महेश बर्तौँलाले रास्वपा र राप्रपाले संसद्को मूल्य मान्यतालाई समाप्त पार्न खोजेको आरोप लगाएका छन्।
प्रतिनिधि सभाको बैठकपछि बोल्दै विपक्षीबाट आवाज उठेपछि सरकारले भिजिट भिसा प्रकरणमा उच्च स्तरीय छानबिन समिति गठन गरिसकेको बताए।
उनले भने, ‘संसदीय लोकतन्त्रको विरुद्ध गतिविधि गर्ने शृङ्खला लगातार जारी राख्नुभएको छ। यो व्यवहार आपत्तिजनक र खेदजनक छ। संसद्को मूल बैठक बहिस्कार गर्नुहुन्छ। तर यही सदनले दिएको बिजनेसमा संसदीय समितिमा काम गरिराख्नुभएको छ।’
उनले रास्वपा र राप्रपाका सांसदहरूले संसद् बहिस्कार गरेको नाटक गरिरहेको टिप्पणी गरे। उनले जनता भ्रमबाट मुक्त भइसकेको भन्दै यो व्यवहार करेक्सन गर्न आग्रह गरे।
काठमाडौं । नेपाली कांग्रेसका सांसद एनपी साउदले विभिन्न समयमा गठन भएका आयोगहरूले गरेको सिफारिस तत्काल लागू गरी कञ्चनपुरका आरक्षपीडितहरूको समस्या समाधान गर्न सरकारसँग माग गरेका छन् ।
प्रतिनिधिसभाको बैठकमा बोल्दै उनले गृहजिल्ला कञ्चनपुरका आरक्षपीडितहरूको समस्या समाधानका लागि गठन गरिएका आयोगहरूको सिफारिस तत्काल लागू गर्न माग गरे ।
उनले भने, ‘अहिले आरक्षपीडितहरू आमरण अनसन बसेको अवस्था छ । आरक्षपीडित समस्याले दशकौँदेखि जंगलमा बसोबास गरिरहेका पीडित र तिनका बालबालिकाको शिक्षा, स्वास्थ्यसमेत दृष्टिगत गरी आफैँले गठन गरेका आयोगका सिफारिस तत्काल लागू गरी सरकारले समस्या समाधान गरोस् ।’
शुक्लाफाँटा राष्ट्रिय निकुञ्ज र कोशी टप्पु वन्यजन्तु आरक्षपीडितहरूको समस्या समाधानका लागि अहिलेसम्म राज्यले करोडौँ खर्च गरेर विभिन्न राजनीतिक, प्रशासनिक र अर्धन्यायिक आयोगहरू गठन गरिसकेको उनले बताए ।
उनले थपे, ‘३४ आयोग बनिसकेका छन् । कराडौँ खर्च भइसकेको छ । सबै आयोगले लगभग सहमतिमा निर्णयहरू सिफारिस गर्ने गर्दछन् । आरक्षपीडित समस्या वास्तविक छ। जग्गा मुआब्जा आरक्ष विस्तार गरेका कारणले सुकुम्बासी भएका आरक्षपीडितहरूलाई उपलब्ध गराउनुपर्छ ।
जग्गा उपलब्ध गराउन नसकिए आर्थिक सहयोग पनि पुर्याउनपर्छ भनेर सबै आयोगले सिफारिस गरेकाे बताए ।
पूर्वप्रधानमन्त्री सुशील कोइरालाको कार्यकालमा तत्कालीन वनमन्त्री महेश आचार्यबाट गठित अर्धन्यायिक आयोगले निश्चित मापदण्ड निर्धारण गर्दै संख्या यकिन गरी सम्भव पीडितहरूलाई जग्गा र नपुगलाई आर्थिक मुआब्जा उपलब्ध गराउन रकमसमेत यकिन गरी अर्थमन्त्रालयबाट सहमति लिएर मन्त्रिपरिषद्बाट समेत पास गरेको स्मरण गराए ।
उनले भने, ‘क्षतिपूर्ति कम भएको भन्ने पीडितहरूको गुनासो र आफैँले गठन गरेका सबै आयोगहरूको जग्गा र क्षतिपूर्ति उपलब्ध गराउनुपर्ने सिफारिसलाई सरकारले लामो समयदेखि वेवास्ता गर्दै आएको छ ।’
काठमाडौं । नेकपा माओवादी केन्द्रका सांसद अमनलाल मोदीले सांसदमै अनसन बस्ने चेतावनी दिएका छन् ।
प्रतिनिधिसभाको बैठकमा बोल्दै पटक-पटक आफूले उठाएको विषयको माग सम्बोधन नभएको बताए ।
उनले भने, ‘हुलाकी सडक कटहरीको खण्ड निर्माण हुन थालेको १० वर्ष हुन थालिसक्यो । आजसम्म बनेको छैन । जनताले सडकमा धान रोपाइँ गर्दैछन् । सरकारलाई रुलिङ हुनुपर्यो । एउटै कुरा मैले कतिचोटी उठाउनुपर्ने ? सभामुखबाट रुलिङ भएन भने म तपाईँको अघि अनसन बस्छु ।’
काठमाडौं । रास्वपाका शिशिर खनालले भ्रष्टाचार र बिचौलियाको संरक्षण गर्ने सरकारले मुलुक र लोकतन्त्रलाई दुर्घटनातर्फ लाने जिकिर गरेका छन् । प्रतिनिधिसभाको बैठकमा बोल्दै आफूहरूले भिजिट भिसा प्रकरणको कुरा उठाए पनि आवाजलाई निस्तेज पार्ने प्रयास भइरहेको बताए ।
उनले भने, ‘केही दिनअघि गृह मन्त्रालयका कर्मचारीले घुस लिइरहेको सूचना प्रहरीकहाँ पुग्छ । तर, गृहमन्त्रीलाई अप्ठ्यारो पर्छ भनेर छानबिन अघि बढ्दैन । लोकतन्त्र मास्न खोज्नेहरू आफू अनुकूलको कानून बनाउँछन् । न्यायपालिकाको स्वतन्त्रतालाई कुण्ठित पार्छन् । कार्यकारी अधिकार बलियो बनाउँछन् र मिडियामाथि अधिकार जमाउन खोज्छन् ।’
उनले आफूहरूले भिजिट भिसा प्रकरणको कुरा उठाउँदै गर्दा लिचीबारीदेखि कुलिङ पिरियडमाथि बदमासीसम्मको कुरा आउँदा समेत कारबाही नभएको भन्दै आपत्ति जनाए ।
Steven Levitsky र Daniel Ziblatt द्वारा लिखित “How Democracies Die” भन्ने पुस्तकमा लेखक भन्छन्
“आज लोकतन्त्र माथि सबैभन्दा ठुलो खतरा सैन्य “कु” होइन – निर्वाचित नेताहरू हुन् जसले बिस्तारै विधिको शासनलाई भत्काउँछन्।”
उनीहरू भन्छन् लोकतन्त्रलाई खतरा बढ्दै गरेको चार वटा सङ्केतहरू हुन्छन्
१. लोकतान्त्रिक प्रक्रिया र नियमहरूलाई नमान्ने: संविधानलाई कमजोर पार्ने: संविधानका प्रावधानहरूलाई बेवास्ता गर्ने वा त्यसको मर्यादा घटाउने।
२. राजनीतिक विरोधीहरूको वैधानिकतालाई अस्वीकार गर्ने: विपक्षीहरूलाई वैध नमान्ने।राजनीतिक प्रतिद्वन्द्वीहरूलाई दुस्मनको रूपमा चित्रण गर्ने। असहमतिलाई अवैध ठहर्याउने।असहयोग गर्यो भन्ने । छलफल नगर्ने ।
३. हिंसालाई सहन वा प्रोत्साहन गर्ने: हिंसात्मक कार्यहरूलाई मौन समर्थन गर्ने वा उक्साउने।
४. नागरिक स्वतन्त्रतालाई नियन्त्रण गर्न तत्परता: प्रेस स्वतन्त्रता वा प्रदर्शन गर्ने अधिकारमाथि प्रहार गर्ने ।
यो सँगै जब भ्रष्टाचार र बिचौलिया को संरक्षण गर्ने सरकार रहन्छ, त्यसले मुलुक र लोकतन्त्रलाई दुर्घटनामा लग्दछ। हामी दुई महिना भन्दा लामो समय देखि “भिजिट भिसा” को नाम मा भइरहेको मानव तस्करीका विरुद्ध उच्चस्तरीय स्वतन्त्र छानबिन समिति माग गरेर आन्दोलित भइराख्दा, “लिचीबारी” बेच्ने अडियो टेप आयो, पासपोर्टको छपाइमा भागबन्डा भएको खबर बाहिरियो, कुलिंङ पिरियडको बदमासी को जिम्मेवारी लिनु पर्ने निष्कर्ष निस्कियो। र पनि संसद् मौन छ र उल्टै विपक्षीको आवाज लाई निस्तेज पार्न प्रयास हुन्छ । केही दिन अगाडि एयरपोर्टको अध्यागमन मा गृह मन्त्रालयका कर्मचारी ले अझै घुस लिइरहेको सूचना प्रहरी का पुग्छ तर गृह मन्त्रीलाई अप्ठेरो पर्छ भनेर छानबिन अगाडि बढ्दैन ।
लोकतन्त्र मास्न खोज्नेहरू:
• आफू अनुकूलका निर्वाचन कानुन बनाउँछन्।
• न्यायपालिका को स्वतन्त्रलाई कुण्ठित पार्छन् ।
• कार्यकारी अधिकार बलियो बनाउँछन्।
• मिडिया माथि नियन्त्रण गर्न खोज्छन्।
र पनि प्रधानमन्त्री ज्यू भन्नु हुन्छ लोकतन्त्र विरोधी शक्ति हरू संसद् अवरुद्ध गरिराखेका छन्।
प्रधानमन्त्री ज्यूलाई मेरो अनुरोध “How Democracies Die” एक पटक पढनुहोस , अनि आफू र आफ्नो सरकारले ले एक वर्ष देखि गरेका कामगरुसँग मूल्याङ्कन गर्नुहोला ।
हामी त सु-शासन होस, छानबिन होस, भ्रष्टाचारी हरू मन्त्रीको पदमा बहाल नरुहुन भन्ने चाहन्छौ। तपाई के चाहनुहुन्छ?
हाम्रो आन्दोलन जारी छ।
काठमाडौं । नेकपा एमालेका उपमहासचिव प्रदीप ज्ञवालीले मदन-आश्रित स्मृति प्रतिष्ठान अध्यक्ष पदको शपथ लिएका छन् ।
नवनिर्वाचित अध्यक्ष ज्ञवाली प्रधानमन्त्री एवं पार्टी अध्यक्ष तथा प्रतिष्ठानको प्रमुख संरक्षक केपी शर्मा ओलीसमक्ष शपथ लिएका हुन् ।
पार्टी कार्यालय आयोजित कार्यक्रममा अध्यक्ष ज्ञवालीसहित उपाध्यक्ष रामेश्वर फुयाँल, सचिव मधु तिम्सिना र कोषाध्यक्ष सरोज दाहालले पनि शपथ लिए ।
शपथ लिएपछि प्रतिष्ठानले मदन-आश्रितको योगदानलाई समाजमा स्थापित गर्नको लागि ३१ वर्षदेखि काम गर्दै आइरहेको बताए ।
उनले भने, ‘उहाँहरूको विचारलाई स्थापित गर्ने अनेकौँ बाटाहरू छन्, त्यसबारेमा प्रतिष्ठानले ३१ वर्षदेखि काम गर्दै आइरहेको छ । हामी आजै बैठक बसेर प्रतिष्ठानलाई कसरी अघि बढाउने भन्नेबारे छलफल गर्नेछौँ ।’
उनले प्रतिष्ठान चार वटा काममा केन्द्रित हुने बताए ।
उनले थपे, ‘वैचारिक कामलाई अगाडि बढाउने सिलसिलामा एमालेको केन्द्रीय स्कुल विभाग र मदन आश्रित प्रतिष्ठानको विषयमा समझदारी भएको छ । त्यहाँको एउटा भवनलाई पार्टीले जबज स्कुल चलाउने गरी पुनर्निर्माण भएको छ । विधान महाधिवेशन लगत्तै हामीले नियमित रूपमा स्कुल सञ्चालन गर्छाैं । वैचारिक क्षेत्रमा योग्य उत्तराधिकारी, नेता कार्यकर्ताहरू तयार गर्ने हिसाबले प्रयोग हुन्छ ।’
काठमाडौं । गृहमन्त्री रमेश लेखकले आमाको स्वघोषणाले सन्तानलाई नागरिकता उपलब्ध गराउने मुल ध्येयका साथ नागरिकता सम्बन्धी कानूनलाई संशोधन अघि बढाइएको बताएका छन् ।
सोमबार सिंहदरबारमा बसेको राष्ट्रियसभा अन्तर्गतको विधायन व्यवस्थापन समितिमा नेपाल नागरिकता (दोस्रो संशोधन) विधेयक, २०८१ उपर सैद्धान्तिक छलफलका क्रममा गृहमन्त्री लेखकले सन्तानको आमा नै पहिलो संरक्षक हुने गरेको बताउँदै आमालाई नै जिम्मेवार बनाइएको जानकारी दिए ।
बुबाको पत्ता छैन अथवा म ल्याउन सक्दैन भनेर भनेको अवस्थामा आमाले स्वघोषणा गरेको अवस्थामा त्यसको सन्तानलाई नागरिकता उपलब्ध गराउने गरि विधेयक ल्याइएको उनले बताए ।
गृहमन्त्री लेखकले आमाको स्वघोषणा गलत सिद्ध भएमा नागरिकताका बारेमा प्रश्न गर्ने र सजायको व्यवस्था समेत गरिएको बताए ।
आमाको थर राखेर नागरिकता लिदा सम्पतीको हकमा प्रतिकुलता ल्याउन सकिन्छ कि भन्ने सांसदहरुको आशंकामा गृहमन्त्री लेखकले आमाकै थरबाट नागरिकता बनाएकै कारण पैतृक सम्पतीबाट बञ्चित हुनुपर्ने अवस्था नआउने स्पष्ट पारे ।
त्यस्तै, उनले ब्रिटिस गोर्खाका सन्तानहरुले बंशजको आधारमा नागरिकता पाउने विषय संवेदनशील रहेको भन्दै यसमा संविधानमा नै संशोधन गर्नुपर्ने होकी भन्ने आफ्नो धारणा रहेको जिकिर गरे ।
त्यसैगरी अंगीकृत नेपाली नागरिकता प्राप्ति सम्वन्धी व्यवस्थामा बाबुको आधारमा विदेशको नागरिकता नलिएको भन्ने नागरिकता प्राप्त गर्ने व्यक्तिले मात्र स्वघोषणा गर्ने व्यवस्था भएकोमा निजको आमाले समेत स्वघोषणा गर्नुपर्ने व्यवस्था गरिएको मन्त्री लेखकले जानकारी दिए ।
काठमाडौं । प्रधानमन्त्री एवं एमाले अध्यक्ष केपी शर्मा ओलीले मदन भण्डारी फाउन्डेसनका पदाधिकारीको अभिव्यक्तिप्रति असन्तुष्टि जनाएका छन् । यो फाउन्डेसन पार्टीको हितसँग जोडिएको भए पनि अब कसरी जान्छ हेर्नुपर्ने उनले टिप्पणी गरे ।
आज मदन आश्रित स्मृति प्रतिष्ठान शपथ कार्यक्रमलाई सम्बोधन गर्दै ओलीले मदन भण्डारी फाउन्डेसनबारे टिकाटिप्पणी गरेका हुन् । उनले यो फाउन्डेसन पार्टीले बनाएको नभएर अर्को ढंगले बनाइएको स्पष्ट पारे ।
उनले भने, ‘मदन आश्रित स्मृति दिवस मनाउन नपाइने, मदन आश्रितलाई श्रद्धाञ्जली दिन नपाइने, जन्मदिन मनाउन नपाइने स्थिति भएपछि, पर्सि जन्मदिन आज विकृतिपूर्ण लेखहरू लेखेर प्रकाशित हुने भएपछि हामीले एउटा संस्था बनाउनुपर्यो । पार्टीप्रति, आन्दोलनप्रति निष्ठासाथ जन्मेको हो फाउन्डेसन । यति हो कि मदनका विचारसँग असहमत भएर पाखण्डी व्यवहार देखाउनेहरूको ग्रीपमा नगएको मात्र हो ।’
ओलीले थपे, ‘त्यो पार्टीको पक्षमा र आन्दोलनको नै बनेको संस्था हो । तर, त्यसको आगामी दिनमा के हुन्छ, कसरी अगाडि जान्छ हेर्नुपर्ने अवस्था बनेको छ । पदाधिकारहीहरूका अभिव्यक्ति…. चक्रपथ भन्ने अनलाइनको प्रस्तुति आदि हेर्दा त्यो कसरी जाने हो भन्ने अन्योल छ ।’
काठमाडौं । प्रतिनिधिसभा अन्तर्गतको कृषि, सहकारी तथा प्राकृतिक स्रोत समितिले भाद्रको पहिलो साता काठमाडौंमा ‘हिन्दू कुश हिमालय संसदीय सम्मेलन’ आयोजना गर्ने भएको छ ।
समितिले सोमबार सिंहदरबारमा पत्रकार सम्मेलन गर्दै वन, परराष्ट्र, राष्ट्रिय योजना आयोगको समन्वय र अन्तर्राष्ट्रिय एकीकृत पर्वतीय विकास केन्द्र (इसिमोड)को प्राविधिक सहयोगमा आगामी भाद्र २ र ३ गते काठमाडौंमा हिन्दू कुश हिमालय संसदीय सम्मेलन आयोजना गर्न लागिएको जनाएको हो ।
राष्ट्रपति रामचन्द्र पौडेलबाट उद्घाटन हुने सम्मेलनमा नेपालका साथै भारत, चीन, बंगलादेश, भूटान, म्यानमार र पाकिस्तानका प्रतिनिधिहरुको सहभागीता रहने समितका सदस्य सांसद वीरबहादुर बलायरले जानकारी दिए ।
सम्मेलनमा क्रममा जलवायु परिवर्तन, वातावरण प्रदुषण र जैविक विविधताका विषयमा छलफल हुने उनले बताए ।
हिन्दू कुश क्षेत्रमा जैविक विविधताको क्षति, वायु प्रदूषण, तीव्र आर्थिक तथा सामाजिक परिवर्तनले मानव जीवनमा पारेको गम्भीर असरहरु बारे ज्ञान आदान–प्रदान गर्न आयोजना लागेको सम्मेलन निकै महत्वपूर्ण हुने समितिले जनाएको छ ।
वातावरणमा आइरहेको परिवर्तनले हिमालय क्षेत्रमा परिरहेको प्रभावका विषयमा सम्मेलनमा छलफल हुने समिति सभापति कुशुमदेवी थापाले जानकारी दिए ।
रुपन्देही। राष्ट्रिय मानवअधिकार आयोगका प्रतिनिधिले राष्ट्रिय स्वतन्त्र पार्टीका सभापति रवि लामिछानेलाई राखिएको भैरहवा कारागारको अनुगमन गरेका छन् । अनुगमनपछि मानवअधिकार प्रतिनिधिहरूले कारागारभित्र आधारभूत सुविधाहरुको अभाव रहेको टिप्पणी गरे ।
राष्ट्रिय मानवअधिकार आयोगकी प्रवक्ता लिली थापाले क्षमताभन्दा अत्यधिक संख्यामा कैदी बन्दी राखिनु नै मुख्य समस्या भएको बताइन् । कारागारभित्र पर्याप्त शौचालय नरहेको र भएका शौचालयको अवस्था पनि राम्रो नभएको उल्लेख गरिन् ।
रविलाई राखिएको ब्लकभित्र राम्ररी हावा पास हुने अवस्था नदेखिएको उनको भनाइ छ ।
थापाले भनिन्, ‘उहाँ बस्ने कोठामा पंखा छ । तर झ्यालहरू टालिएको रहेछ । जेल प्रशासनले सुरक्षाका लागि टालिएको भन्नुभयो । हाम्रो आग्रहपछि त्यसलाई खोल्न तयार हुनुभएको छ ’
उनले कोठाभित्र एसी नदेखेको बताइन् । थापाले रविलाई स्थानान्तरणका लागि अनुमति नदिइएकोप्रति आयोगको गम्भीर ध्यानाकर्षण भएको उल्लेख गरिन् । ‘अदालतले भनिसक्दा पनि उहाँलाई जेल सार्न दिइएको रहेनछ । यस विषयमा कारागार व्यवस्थापन विभागसँग कुरा गर्छौँ,’ उनले भनिन् ।
कारागारमा पत्रपत्रिका नआउने भएकाले रविसमेत त्यो सुविधाबाट वञ्चित रहेको थापाले जानकारी दिइन् ।
इन्सेककी प्रतिनिधि रिमा बिसीले कोठाभित्र दुईवटा पंखा रहेको बताइन् ।
‘एउटा ठूलो फलामको पंखा र अर्को स्ट्यान्ड पंखा छ । झ्यालहरू चाहिँ खोलिएको छैन । नजिकै घरहरू भएको र सर्पदंशको डर भएकाले झ्यालहरू बन्द गरिएको प्रशासनले बताएको छ । तर हामीले मोटो जाली वा डन्डी राखेर भए पनि झ्याल खोल्न भन्यौ । उहाँहरूले स्वीकार्नुभएको छ,’ उनले भनिन् ।
रुपन्देही । १७ वर्ष खाडी मुलुकमा बसेर फर्केका लोकप्रसाद काफ्लेलाई नेपालमै टिकाउन ज्योतिष जर्नादन न्यौपाने र सुन्दर भण्डारीले नयाँ योजना बनाए । पूजा सामग्रीको व्यवसायसमेत गरेका उनीहरुलाई नेपालीले प्रयोग गरिरहेको जनैसमेत भारतबाट ल्याएर बेच्नुपरेको पीडाले सताइरहेको थियो ।
भारत तथा चीनबाट आउने जनैमा कुनै शास्त्रीय विधि पूरा गरिएको हुँदैन र यहाँजस्तै ५४ सरा भएको पनि हुँदैन तर खुद्रा पसलमा रहेका यस्ता जनै किन्नुपर्ने बाध्यता रहेको छ ।
आफन्तसमेत रहेका काफ्लेलाई स्वदेशमै राख्नका लागि उनीहरुले कम लगानीमा संचालन हुने उद्योग संचालनको प्रस्ताव गरे ।
एकछिन त काफ्लेलाई विश्वास लागेको थिएन तर लगानी पनि कम लाग्ने र यसको संभावना पनि राम्रो भएको बजार मूल्यांकन पछि न्यौपाने र भण्डारीको योजनामा सहकार्य गर्न तयार भएका हुन् काफ्ले ।
‘विदेशमा खुरुखुरु तलब त बुझ्न पाइन्छ तर त्यहाँको पीडा असैह्य हुन्छ’ काफ्ले भने, ‘उहाँहरुको प्रस्तावले मेरो मन मोडियो, म विदेश छाडेर यही काम थालेको हुँ, निकै सन्तुष्ट छु, पहिलो त परिवारसँग बस्न पाइयो अर्को बाहिरबाट आयातित वस्तुलाई रोक्ने अभियान थालियो र केही रोजगारी पनि दिन सकियो ।’
यहीँ योजनाका साथ सुरु भएको संस्कार जनै उद्योगको उत्पादन अहिले यहाँ मात्रै नभएर विभिन्न देशहरुमा पुग्न थालेको छ ।
नेपालमा हरेक वर्ष करोडौँ जनै खपत भए पनि यसको ठूलो हिस्सा भारत र चीनबाट आयात हुने गरेको छ। अब यस निर्भरता घटाउने लक्ष्यका साथ बुटवलमा सञ्चालित संस्कार जनै उद्योगले स्वदेशमै उत्पादन विस्तार गर्दै निर्यातसम्मको यात्रा सुरु गरेको छ ।
हरि ऊँ पूजा सामग्री उद्योगले सञ्चालन गर्ने यस उद्योगमा शास्त्रीय विधिअनुसार पूर्ण सरा र शिखासहितको ५४ सरे जनै तथा रक्षाबन्धन उत्पादन हुन्छ। पण्डित जनार्दन न्यौपानेका अनुसार, विदेशी जनैको आयात रोक्ने, धर्मसंस्कृतिको संरक्षण गर्ने र स्वदेशमै रोजगारी सिर्जना गर्ने उद्देश्यका साथ उद्योग सञ्चालनमा ल्याइएको हो ।
जनै लगाउँदा संस्कार समेत झल्किनुपर्छ भन्ने मान्यताका साथमा उद्योग स्थापना गरिएको उनले बताए । जनैपूर्णिमामा मात्र नभएर पितृ कार्य र अन्य पूजाआजामा समेत जनैको माग अत्यधिक हुने भएकाले नेपाली बजारको माग पूरा गर्न कठिन रहेको पनि न्यौपानेको भनाई छ ।
’जनै मन्त्रँदा सप्तऋषिलाई तर्पण दिई प्रत्येक डोरामा हुने नौ सराका तन्तुदेवताहरु र शिखामा ब्रह्मा, विष्णु, महेश र जगत्जननीको पूजा गरी गायत्री मन्त्रद्वारा मन्त्रित गरिन्छ,’ न्यौपानेले भने ।
चार वर्षअघि २५ लाखको लगानीमा सुरु भएको उद्योगले वार्षिक १५ लाखभन्दा बढी जनै उत्पादन गर्छ। नेपालमा मात्रै नभई युरोप, अमेरिका लगायतका मुलुकमा रहेका नेपाली समुदायका लागि पनि जनै निर्यात हुँदै आएको छ ।
उद्योगका व्यवस्थापक लोकनाथ काफ्लेका अनुसार, अहिले १२५ जनाले प्रत्यक्ष रोजगारी पाएका छन् । उनले जनै उत्पादनका लागि केही कच्चा पदार्थ भारतबाट ल्याए पनि उत्पादन र गुणस्तर भने पूर्ण रूपमा नेपाली संस्कारअनुसार भएको बताए। अर्का सञ्चालक सुन्दर भण्डारीका अनुसार, बाहिरबाट आउने जनैमा नेपालमा पालन हुने विधि र संस्कारको अभाव हुन्छ, त्यसैले स्वदेशी जनैको प्रयोग आवश्यक छ ।
नेपालमा वार्षिक करिब ५ करोड जनैको माग भए पनि अहिले स्वदेशमा केवल १ करोड मात्र उत्पादन हुने तथ्याङ्क छ। उद्योगका सञ्चालकहरूका अनुसार, यदि सबै नेपालीले नेपाली जनै प्रयोग गर्न सुरु गरे भने यस क्षेत्रमा पूर्ण आत्मनिर्भरता हासिल गर्न सकिन्छ र ठूलो मात्रामा वैदेशिक मुद्रा बचत हुनेछ ।
हिन्दू धर्मालम्बी समक्ष संस्कारसहितको जनै पुर्याउन र आयातित जनैलाई प्रतिस्थापना गर्ने उद्देश्यसहित उद्योगले शास्त्रीय विधि परम्पराअनुसार पूर्ण सरा र शिखा भएको जनै र रक्षाबन्धन उत्पादनगरी नेपाली र विदेशमा रहेका नेपालीसम्म पुर्याउन थालेको हो ।
उद्योगका बजार व्यवस्थापक लोकप्रसाद काफ्लेले भने ‘नेपाली बजारमा बिक्री भइरहेका धेरैजसो जनै अहिले सांस्कार र विधिसम्मत छैनन्’, काफ्लेले भने, ‘आयातित जनैलाई रोक्ने र नेपालीले हातबाट शिखा पारेका जनै नेपालीमा पु¥याउन हामी लागेका छौं ।’
चारैतिरबाट माग बढेकाले उद्योगमा अहिले लगानी र उत्पादन क्षमता दुवै बढाइएको हो । उद्योगका जनै अमेरिका, अष्ट्रेलिया, भारत, यूएई, क्यानडा, जापानलगायत आधा दर्जन देशमा जान थालिसकेको छ । उद्योगका सञ्चालक तथा ज्योतिषी न्यौपानेले विस्तारै उद्योगले सबै आयात प्रतिस्थापन गर्ने लक्ष्य लिएको बताए ।
जनै परमात्मा यज्ञपुरुषको आराधनाको साधान हो । त्यसैले यसलाई देववाणी नाम अति प्राचीन संस्कृत भाषामा अज्ञोपवित भनिएको छ । जनै निर्माणका क्रममा शुद्ध कपासको सुत्र संकलन गरी पवित्रिकृत र एकरूपता कायम गरिएको हुन्छ । यो वर्षको जनैपूर्णिमा शनिबार परेको छ ।
तागाधारीले किन लगाउँछन् जनै ? कसरी बनाइन्छ जनै ? यस्तो छन् विज्ञका सुझावः
नेपाली भाषाभाषीहरूले भन्ने गरेको जनै परमात्मा यज्ञपुरुषको आराधनाको साधन हो। त्यसैले यत्लासई देववाणी नामक अति प्राचीन संस्कृत भाषामा यज्ञोपवीत भनिएको हो । संस्कार यज्ञोपवीत नामकृत यी जनैको निर्माण प्रक्रियामा शास्त्रोक्त विधिको शुद्धतालाई सर्वोपरि महत्त्व दिइएको छ ।
यी जनै निर्माणका क्रममा शुद्ध कपासको सूत्र संकलन गरी पवित्रीकृत स्थानमा शुद्ध आचरण विधिसम्मत पद्धतिअनुसार पवित्र धागोलाई भूःशब्द उच्चारण गरी बाटिन्छ र त्यसपछि तेब्य्राएर एकरुपता कायम गरिएको भने प्रत्येक तन्तुको टुप्पामा ब्रह्मग्रन्थि अर्थात् शिखा बनाइएको छ। यसरी नवतन्तु (नौसरा) संयुक्त विधिसम्मत यज्ञोपवीत तमार गरिन्छ। मी यज्ञोपवीतको शुद्धतामा विश्वस्त हुन ज्योतिष न्यौपानेले आग्रह गरेका छन् ।
यज्ञोपवीत विशेष परिस्थिति तथा समयको अन्तरालमा फेनुपर्दछ । हरेक सुतक र आशौचबाट उम्केको दिन यज्ञोपवीत अनिवार्य रुपम फेर्नुपर्दछ । यसबाहेक नयाँ जनै लगाएको चार महिना व्यतीत भएको छ भने पनि अनिवार्य रुपमा फेर्नुपर्छ । यसरी नै धार्मिक पितकार्य यज्ञ अनुष्ठान आदि र श्राद्धकर्म गर्नुभन्दा अगाडि जनै फेर्न अनिवार्य हुन्छ ।
जनैको कुनै सरा चुँडेमा वा कारणवश शरीरबाट बारिर खसेमा पनि नयाँ जनै फेर्नपर्दछ । एकपटक शरीरबाट खसेको जनै फेरि धारण गर्नु हुँदैन । अनजानमा वा जानीबुभो कुनै अशुद्ध निषिद्ध कर्म गरिएको भए जानकारी भएपछि जनै फेर्नुपर्छ। आशौच नलाग्ने मृतकको शवयात्रा (मलामी) मा सहभागी भएर फर्केपछि पनि जनै फेर्नुपर्दछ ।
जनै फेर्दा गनुपर्ने विधिः
सर्वप्रथम नयाँ जनैलाई शुद्ध जलले पखाल्नुपर्छ। त्यसपछि जल आचमन गरेर पचालेको जनै दायाँ हातमा लिई १० पटक गायत्रीमन्त्र अभिमन्त्रित गर्नुपर्दछ । पढेलेखेका विद्वान्ले त संकल्पसमेत लिनुपर्दछ । यसपछि मात्र तल उल्लेख गरिएको बज्ञोपवीत परम् पवित्रं मन्त्र उच्चारण गरी नूतन बज्ञोपवीत धारण गर्नुपर्दछ ।
नूतन यज्ञोपवीत धारण गरिसकेपछि यथाशक्ति गायत्री मन्त्र जप गर्नुपर्दछ। ज्ञातव्य–नेपाली परम्पराअनुसार ऋषितर्पणीमा विधिवत रुपमा अभिमन्त्रित जनैहरू वर्षभरका लागि धारण गर्न सकिन्छ । यदि ऋषितर्पणीमा विधिवत् रुपमा अभिमन्त्रित गरिएको जनै होइन भने तत्काल सम्पूर्ण विधि पूरा गरेर मात्र धारण गर्नुपर्छ ।
त्यसैगरी, जीर्ण वा पुरानो यज्ञोपवीत हटाउने तरिका पनि अलग्यै छ । नतन यज्ञोपवीत धारण गरिसकेपछि स्वभावत जीर्ण पुरानो यज्ञोपवीतलाई शिरतर्फबाट हटाउनु पर्दछ भनिएको छ। कतैकतै पाउतिरबाट निकाल्नुपर्छ भन्ने पनि उल्लेख भएको पाइन्छ ।
एतावद्विनपर्यन्त ब्रहमत्वं धारितं मया ।
जीर्णत्वातत्परित्यागे मच्छसूत्र यथा सुखम् ।।
काठमाडौं । राष्ट्रिय स्वतन्त्र पार्टीले विदेशमा रहेका नेपाली नागरिकहरुको मताधिकारको व्यवस्थाका लागि सरकारको ध्यानाकर्षण गराउन अभियान सञ्चालन गर्ने निर्णय गरेको छ ।
पार्टी कार्यालय वनस्थलीमा शुक्रबार बसेको रास्वपा केन्द्रीय समितिको बैठकले विदेशमा रहेका नेपाली नागरिकहरुका लागि मताधिकारको व्यवस्था गर्न सरकार र सम्बन्धित निकायहरुको गम्भीर ध्यानाकर्षण गराउन अभियान सञ्चालन गर्ने निर्णय गरेको प्रवक्ता मनिष झाले जानकारी दिए ।
त्यस्तै, बैठकले पार्टी सभापति रवि लामिछानेमाथि राजनीतिक प्रतिशोध साध्ने काम भएकाले त्यसबिरुद्ध जनताको हस्ताक्षर अभियानलाई देशव्यापी रुपमा प्रभावकारी बनाउने निर्णय गरेको छ ।
यसका लागि केन्द्रीय समितिको तर्फबाट संगठन निर्माणका हरेक गतिविधि सँगसँगै प्रभावकारी बनाइने समेत निर्णय भएको उनले बताए ।
बैठकले हज कमिटीको अध्यक्षमा नियुक्ति हुँदा पार्टीको केन्द्रीय सदस्यबाट राजीनामा दिएका पार्टीका संस्थापक केन्द्रीय सदस्य इश्रामुल्ला मियालाई केन्द्रीय सदस्यको जिम्मेवारी पुनः दिने निर्णय गरेको छ ।
त्यसैगरि बैठकले पार्टीले सम्पादन गर्नुपर्ने विभिन्न रणनीतिक कार्यहरू सम्पादन गर्नका लागि रणनीतिक समूहहरू गठन गर्ने निर्णय गरेको छ भने पार्टीको संगठन वडादेखि जिल्ला हुँदै प्रदेश र केन्द्रसम्म सशक्त बनाउन र आवश्यक सबलीकरणका लागि केन्द्रीय समितिका सबै सदस्यहरू तथा केन्द्रीय विभागका सबै सदस्यहरूलाई जिल्ला जिल्लामा परिचालन गर्ने निर्णय भएको प्रवक्ता झाले बताए ।
काठमाडौं । नेकपा एसका अध्यक्ष माधवकुमार नेपालले पार्टीका सम्मानित नेता एवं पूर्वप्रधानमन्त्री झलनाथ खनाललक्षित फेरि अर्को टिप्पणी गरेका छन् ।
राजधानीमा आयोजित पार्टीनिकट उद्योगी व्यवसायीको कार्यक्रममा नेपालले पार्टीको निर्णय पार्टीको पक्षमा पार्टीको प्रतिष्ठा बढाउन, पार्टीको हितको रक्षा गर्न, अनुशासनको पालना गर्नका लागि भएको प्रष्ट्याए ।
एमाले फुटाउनुको औचित्य पुष्टि नभएको खनालको भनाइ लक्षित गर्दै नेपालले भने, ‘मिडियामा जाने पार्टीको बदख्वाइँ गर्ने, मिडियामा जाने विद्रोहको औचित्य छैन भन्ने । किन आउनुपर्यो विद्रोह ठिक लागेन भने ? केपी ओलीजीको सेवा गरेर बसे भइहाल्थ्यो नि !’
उनले आफूहरू एमालेबाट छुट्टिने आँट गरेर ठिक गरेको जिकिर गरे ।
नेपालले थपे, ‘ हामीले ठिक गर्यौं, आँट गर्यौं । र, पहिलो गाँसमा ढुंगो हैन, सुनको सिक्का पायौं । संविधान मिच्ने, उल्लंघन गर्ने गलत परम्परा बसाल्ने काम भइरहेको थियो । यसको विरुद्ध विद्रोह गर्यौं, खुलेआम सडकमा आयौं, अदालत पनि गयौं, मुद्दा पनि दियौं राजनीतिक लडाइँ पनि लड्यौं । सबै लडाइँमा जित्यौं ।’
धनगढी । नेकपा (एमाले) सुदूरपश्चिम इन्चार्ज तथा सचिव लेखराज भट्टले पार्टी अध्यक्ष केपी शर्मा ओलीको नेतृत्वलाई छिटो बुझ्न कठिन हुने बताएका छन् ।
प्रेस चौतरी नेपाल सुदुरपश्चिम प्रदेशको बैठक तथा प्रशिक्षणलाई सम्बोधन गर्दै उस्तो उनले ओलीको दृष्टिकोण गहिरो, दीर्घकालीन र राष्ट्रिय हितमा केन्द्रित रहेको भन्दै त्यसलाई सबैले तुरुन्त बुझ्न नसक्ने जिकिर गरे ।
‘नेतृत्वको रक्षा गर्नु भनेको विचारको रक्षा गर्नु हो । ओलीज्यूलाई छोटो समयमा पढ्न सकिँदैन । म पनि उहाँलाई पढ्दैछु’, भट्टको भनाइ थियो ।
उनले ओलीलाई बुझ्न अध्ययन, अनुसन्धान गर्नुपर्ने बताए ।
‘उहाँ कतिखेर के कदम चाल्नु हुन्छ भन्ने हामीले बुझ्न सक्दैनौं, चालेपछि बल्ल थाहा हुन्छ । एउटा संघर्ष, इतिहास निर्माणबाट आउनुभएको छ ।’
नेकपाकालको अन्तरसंघर्षमा ओलीलाई कारबाही गरिसकेपछि अब पार्टी बन्छ त ? भन्ने प्रश्नबीच पार्टी बन्छ भन्ने आत्मविश्वास साथ आफूले ओलीलाई साथ दिएको भट्टले बताए ।
उनले ओलीको सोच विशाल भएको उल्लेख गर्दै भने, ‘महाकाली किनारबाट उहाँले मेची किनार देख्नुहुन्छ । म नारायणीसम्म देख्छु, कसैले चिसापानीसम्म । त्यसैले उहाँको दृष्टि र कदम बुझ्न समय लाग्छ ।’
सुदूरपश्चिमका विभिन्न जिल्लामा पार्टी सुदृढीकरण अभियान चलाइरहेका भट्टले कार्यकर्ताहरूलाई पार्टी नेतृत्वप्रति दृढ विश्वास राख्न पनि आग्रह गरेका छन् ।
काठमाडौं । राष्ट्रिय प्रजातन्त्र पार्टीको संस्थापनपक्षीय भेला सकिएको छ । भेलापछि सञ्चारकर्मीलाई प्रतिक्रिया दिँदै उपाध्यक्ष बुद्धिमान तामाङले यो गुट भेला नभएर चिया खाने मेलो मात्र भएको दावी गरे ।
उनले भने, ‘यो बैठक नै होइन । उपाध्यक्ष हेमजङ गुरुङले चिया खान बोलाउनु भएर साथीभाइ जम्मा भएका हौं । यो कुनै गुट भेला होइन ।’
संस्थापनइतर पक्षका नेताहरुलाई किन नबोलाइएको त ? भन्ने प्रश्नमा उनले स्पष्ट जवाफ दिन सकेनन् ।
तामाङले भने, ‘त्यस्तो होइन । बोलाइयो कि बोलाइएन भनेर हामीले साध्ने कुरा भएन । हिजो उपाध्यक्षले चिया खान आउनु भन्नुभयो । पछि अध्यक्ष पनि आउनुहुन्छ भन्नुभयो । ठिक छ भनेँ ।’
अध्यक्षले विधान विपरित कारवाही गरिरहेको असन्तुष्ट पक्षको आरोपलाई उनले इन्कार गरे । ‘सबै मिलेर सभापतिलाई अल्पमतमा पारे भयो नि त ? उनीहरुले बहुमत बनाए भयो,’ तामाङले चुनौति दिए ।
असन्तुष्ट पक्ष बसेको वैठकलाई अन्यथा नलिएको उनले बताए ।
काठमाडौं । नेपाल शिक्षक महासंघले राष्ट्रिय समितिको पूर्ण प्रत्यक्ष बैठक बोलाएको छ। आज बसेको महासंघको बैठकले भदौ ३ र ४ गते बस्ने गरी बैठक बोलाएको अध्यक्ष लक्ष्मी किशोर सुवेदीले बताए।
उनका अनुसार सरकारले सहमति कार्यान्वयन नगरेको भदौको दोस्रो सातादेखि आन्दोलन गर्ने निर्णय पनि बैठकले गरेको छ।
उनले भने, ‘आन्दोलनको कार्यक्रम आन्दोलन परिचाल समितिले खाका तयार गर्छ। र राष्ट्रिय समितिले पारित गरेपछि दोस्रो साताको सुरुबाटै गर्नेगरी सार्वजनिक गर्छौँ।
उनले अहिले बाहिर चर्चामा रहेको विषयहरु भएको सहमति र शिक्षकहरुको पक्षमा आउने नदेखिएको पनि बताए।
काठमाडौं । कमेडी च्याम्पियन ३ मा विजेता बनेका कमेडियन सुनील खड्काले कार पुरस्कार आज प्राप्त गरेका छन् । अघिल्लो वर्ष असारमा उनले कमेडी च्याम्पियनको उपाधि जितेका थिए ।
सुनीललाई कमेडी च्याम्पियनका सञ्चालक विशाल भन्डारीले आज एक कार्यक्रमबीच कार हस्तान्तरण गरे । करिब ४० लाख रुपैयाँ मूल्यको नेटा कार खड्काले प्राप्त गरेका छन् । उनले विषय परिस्थितिमा पनि आफूलाई कार दिएकोमा भण्डारीप्रति आभार प्रकट गरे ।
भण्डारीले आफू जतिसुकै अप्ठेरो परे पनि साथी, सहकर्मी र विजेतालाई अप्ठेरोमा पार्न नचाहेको बताए ।
कमेडी च्याम्पियनका सञ्चालक भण्डारी अहिले आर्थिक झमेलामा छन् । आफूलाई पार्टनरले धोका दिएको र मुद्दामामलामा अल्झाएको उनको गुनासो छ ।
काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टीका सबै नेताका छोराछोरी अब विदेश पढ्न जान नपाउने निर्णय गर्ने तयारी भइरहेको बताएका छन्।
अखिल क्रान्तिकारीले आयोजना गरेको शैक्षिक संवाद कार्यक्रममा बोल्दै आफ्नो छोराछोरी पनि विदेश पढ्न नगएको बताए।
प्रचण्डले भने, ‘अहिले पनि हामीले पार्टी केन्द्रका सबै नेताहरूले आफ्ना छोराछोरीलाई सार्वजनिक विद्यालय वा त्यस्ता कलेजमा पढाउने, विदेश नपठाउनेबारे हाम्रो छलफल भएर निर्णयतिर हामी गइरहेका छौं।’
उनले वश्वविद्यालयमा राजनीतिक भागबन्डा रोकेर मेरिटोक्रेसी आफूले स्थापित गरेको भएपनि कांग्रेस एमालेले अहिले भर्तीकेन्द्र बनाइएको पनि आरोप लगाए।
काठमाडौं । नेसपा नयाँ शक्तिका अध्यक्ष डा. बाबुराम भट्टराईले रास्वपा सभापति रवि लामिछानेलाई भेटेका छन्।
लुम्बिनी प्रदेश स्तरीय २ दिने विस्तारित बैठकमा भाग लिन जाने क्रममा भैरहवा कारागार पुगेर भेट गरेका हुन्।
भेटेपछि उनले भने, ‘उहाँमाथि अन्तिम फैसला भइसकेको छैन। न्यायिक हिरासतमा हुनुहुन्छ। कोही मान्छे भाग्छ थप अपराज गर्छ भन्ने लाग्दा न्यायिक हिरासतमा राख्ने हो। तर जनताको प्रतिनिधि भएको व्यक्ति भागेर जाँदैन। त्यसैले बाहिर जमानतमा रहेर मुद्दा फेस गर्ने व्यवस्था गर्नुपर्थ्यो भन्ने मेरो बुझाइ हो।’
उनले मुद्दाको विषयमा अदालतले फैसला गर्ने भएपनि वैकल्पिक राजनीतिक सोच राख्ने भएकाले भेट्न आएको बताए।
जनप्रतिनिधिलाई थुनामा राख्दा जनतालाई अन्याय हुने बताए। उनले थपे, ‘मैले टोपबहादुर रायमाझीको पनि कि सांसद पद खारेज गरेर चुनाव गर्नुपर्छ। त्यसैले बढी राजनीतिक ढङ्गले अन्याय हुन हुँदैन।’
उनले रविलाई पत्रपत्रिका समेत पढ्न नदिने गरेको पाइएको बताए। उनले भने, ‘उहाँलाई ल्याएर दिँदो पनि रहेनछ, त्यो त हामी पन्चायतकालमा बस्दा पनि साथीहरूले ल्याएर दिन्थे, पढ्ने गर्यौँ। मैले प्रहरीलाई सोधेँ उहाँहरूले आदेश छैन भन्नुभयो, कमसेकम सूचनाबाट वञ्चित गर्न हुँदैनथ्यो। राखेको ठाउँ पनि उचित लागेन, माथि सम्बन्धित ठाउँमा पनि भन्छु।’
काठमाडौं । सञ्चार तथा सूचना प्रविधिमन्त्री पृथ्वीसुब्बा गुरुङले अनलाइन सञ्चारमाध्यमको दर्तासम्बन्धी नयाँ व्यवस्थालाई स्वीकार गरेर अघि बढ्नुपर्ने बताएका छन् ।
बुधबार संसद भवन नयाँ बानेश्वरमा सञ्चारकर्मीसँग कुरा गर्दै गुरुङले संसदले नै पास गरेर कानून बनिसकेको अवस्थामा अनलाइन सञ्चारमाध्यमको दर्ता प्रक्रिया जिल्ला प्रशासन कार्यालयमार्फत हुने व्यवस्थालाई सबैले मान्नुपर्ने बताए ।
नयाँ व्यवस्था सदनबाट पास हुँदा आफूलाई समेत जानकारी नभएको भन्दै गुरुङले केही नेपाल ऐन संशोधन गर्ने विषय सञ्चार मन्त्रालयको नभई कानून मन्त्रालयको भएको जिकिर गरे ।
सरकारले हालै केही नेपाल ऐन संशोधनमार्फत छापाखाना तथा प्रकाशनसम्बन्धी ऐन, २०४८ मा नयाँ व्यवस्था थप गरेसँगै अनलाइन सञ्चारमाध्यमको दर्ता प्रक्रिया जिल्ला प्रशासन कार्यालयमार्फत हुने भएको छ ।
काठमाडौं । नेपाली कांग्रेसका महामन्त्री विश्वप्रकाश शर्माले रास्वपाले रवि लामिछानेको पक्षमा चलाएको हस्ताक्षर अभियानप्रति आपत्ति जनाएका छन्। प्रतिनिधि सभाको बैठकमा बोल्दै अदालतलाई दबाब दिनको लागि हस्ताक्षर अभियान चलाएको आशयले बोले।
रास्वपा सभापति रवि लामिछानेलाई कटाक्ष गर्दै भने, ‘केरे केरे अदालतको आदेश मान्दिनँ रे, तिम्रो पिताजीको शासन हो ? केरे केरे कसलाई दबाब दिन खोजेको ? हस्ताक्षरमार्फत यो देशमा अदालतहरूमा वा कसलाई दबाब दिन खोजेको ? एक अदालत होइन हरेक नागरिकले सुन्न जरुरी छ।’
उनले सर्वोच्च अदालतले पनि जिल्ला र उच्च अदालतको आदेश दोषी देखेरै सदन गरेको जिकिर गरे।
उनले थपे, ‘कास्की, चितवन, रुपन्देही, काठमाडौं अदालतले कसुर नगरेको भन्न सक्ने अवस्था छैन। तर, अहिले धरौटी त लिन्छौँ पछि ठहर गरेबमोजिम हुन्छ, मिति निर्दोष भन्ने देखिएन। अनि उच्च अदालतले भन्छ तिमीले दोष गरेको भन्ने कुराहरू बढी छन् त्यसैले बाहिर राख्ने अवस्था छैन।’
काठमाडौं । नेपाली कांग्रेसका सांसद सञ्जय गौतमले सरकारविरुद्ध सत्याग्रह बस्ने चेतावनी दिएका छन् । प्रतिनिधि सभाको बैठकमा बोल्दै बर्दियाको आयोजना सुटुक्क पार्टी सभापति शेरबहादुर देउवाको गृह जिल्ला डडेलधुरा पु¥याइएको भन्दै सत्याग्रहको बस्ने घोषणा पनि गरे ।
उनले भने, ‘अन्याय भयो सभामुख महोदय, सरकार सुन्दा पनि सुन्दैन, देख्दा पनि देखेन । बर्दियामा भएको बबई भादा ओरही नदी नियन्त्रण आयोजना बर्दियाबाट सुटुक्क डडेलधुरा पु¥याइयो ।’
उनले आफूले पटक पटक भनेपनि सरकारले नसुनेको दुखेसो पोखे ।
उनले थपे, ‘मैले बारम्बार सदनमा भनेँ, तर सरकार सुन्दैन, यो के गर्न खोजेको ? सरकारले मेरो कुरा सुनोस् । होइन भने आफ्नै सरकारका विरुद्धमा आफ्नै सांसद पुनः सत्याग्रहको रूपमा उभिन्छु। म घोषणा पनि गर्न चाहन्छु ।’
काठमाडौं । नेकपा एमालेका सांसद गोकुल बास्कोटाले लोकप्रियतावादले समाज भड्काएर जनताका सपनाको डकैती गर्न खोजिरहेको टिप्पणी गरेका छन् ।
प्रतिनिधि सभाको बैठकमा बोल्दै केही व्यक्तिहरूले अहिले समाजलाई भड्काउने काम गरिरहेको आरोप लगाए ।
बास्कोटाले भने, ‘केही असन्तुष्टिहरूमा टेकेर, तथ्यलाई भ्रमको पर्दाले छेकेर असन्तुष्टि, आरोप प्रत्यारोप, छटपटी आक्रोश देशको पछिल्लो बिम्ब भएको छ । यो व्यवस्थाले राजनीतिक दलको परिकल्पना गर्दछ । जहाँ लोकतन्त्र फल्ने र फुल्ने गर्छ । अहिले क्रान्ति र प्रगतिप्रतिको विश्वास धर्मराउँने र क्रमशः घृणावाद र लोकप्रियतावाद फस्टाउने र यसले चलाखीपूर्ण ढङ्गले जनताका सपनाहरूको चोरी गर्न खोजेको छ । डकैती गर्न खोजेको छ ।’
दुई चार महिनायता शासन प्रणालीका कमजोरी, सरकारका कार्यशैली र काममा देखिएका ढिलासुस्तीले निराशाका आधारमा पुरानाहरूको काम छैन भन्ने नयाँ भाष्य सिर्जना खोजिएको बताए ।
सांसद बास्कोटाले हावाको तालमा कुद्ने बानी जनप्रतिनिधिमा पनि देखिएको भन्दै कानून बनाउने ठाउँमा भएकाहरुले कागको पछि दौडिन नहुने बताए । वहुविवाह सम्बन्धी कानून आउन लाग्यो भन्ने हल्लाको पछि लागिएको भन्दै उनले परिवारसँग सम्बन्धि अलग्गै कानून आवश्यक रहेको बताए । उनले वहुविवाह गर्नेलाई कुनै सार्वजनिक पदमा जान नसक्ने कानून बनाउन आफ्नो प्रस्ताव रहेको समेत बताए ।
काठमाडौं । नेकपा माओवादी केन्द्रका सांसद अमनलाल मोदीले केपी ओली नेतृत्वको सरकार काण्डै काण्ड र भ्रष्टाचारमा डुबेको आरोप लगाएका छन्।
प्रतिनिधि सभाको बोल्दै हाजिरी जवाफमा सबैभन्दा बढी सेटिङमा चल्ने सरकार कुन हो ? भन्दा पनि अहिलेको सरकार पर्ने बताए।
आकस्मिक समयमा सांसद मोदीले सरकारको आलोचना गरेपछि सभामुख देवराज घिमिरेले त्यो विषयहरू राख्न नमिल्ने बताए। उनले आकस्मिक समयमा राख्ने विषय भएको भन्दै थपे, ‘कुलिङ पिरियड, मन्त्रीहरूको आर्थिक काण्ड, भिजिट भिसालगायतको कुरा होस्।’
उनले यति भनेपछि सभामुखले यो नीतिगत विषय भएको भन्दै बस्न भने।
काठमाडौं । राप्रपाकी सांसद रोशन कार्कीले रास्वपा र आफ्नो पार्टीले सदनमा लामो समयदेखि विरोध गर्दा पनि सरकारले वेवास्ता गरेको भन्दै आपत्ति जनाएकी छन्। प्रतिनिधि सभाको बैठकमा बोल्दै उनले पूर्वसभामुख सुवास नेम्वाङलाई सम्झिइन्।
उनले भनिन्, ‘उहाँले संसदीय व्यवस्थाबारे जानकारी दिँदा भन्नुभएको थियो। सदनमा एक जना मात्रै उठेपनि सभामुखले त्यसको समाधान गरेर सदन चलाउनुपर्छ। हामी लामो समयदेखि भिजिट भिसा प्रकरणलाई लिएर आन्दोलनरत छौँ।’
उनले सरकार संसद्प्रति उत्तरदायी हो कि संसद् सरकारप्रति उत्तरदायी होरु भन्दै प्रश्न गरिन्।
उनले भनिन्, ‘हामी भिजिट भिसाको विरोधी होइनौँ। तर, भिजिट भिसाको नाममा नेपालीहरूलाई मार्ने काम भएको छ त्यसको विरोध गरेका हौँ। यो प्रकरणमा ५० हजारदेखि एक लाख बुझ्ने सरकार र सरकारको गृहमन्त्रीको मुटु काम्दैन। आफ्नो दाजुभाइ दिदिबहिनीहरुको लास देख्दा पनि।’
काठमाडौं । कोशी प्रदेशको मोरङ, सुनसरी र झापामा संगठित रूपमा बिजुलीको ट्रान्सफर्मर चोरी गर्ने गिरोहलाई कोशी प्रदेश प्रहरी कार्यालयको प्रादेशिक अपराध अनुसन्धान समूहले पक्राउ गरेको छ ।
कोशी प्रदेश प्रहरी कार्यालयले मंगलबार विराटनगरमा पत्रकार सम्मेलन गर्दै संगठित र छुट्टाछुट्टै समूहमा रहेका उनीहरूले ०८१ माघ १५ गतेयता झापा, मोरङ र सुनसरीको विभिन्न स्थानहरुबाट २२ वटा ट्रान्सफर्मर चोरी गरेको जानकारी गराएको छ ।
कोशी प्रदेश प्रहरी प्रमुख प्रहरी नायब महानिरीक्षक (डीआईजी) ईश्वर कार्कीले लगातार र संगठित रूपमा ट्रान्सफर्मर चोरी हुन थालेपछि प्रादेशिक अपराध अनुसन्धान समूह तथा सम्बन्धित जिल्ला प्रहरी कार्यालयका ३५ जना प्रहरी अनुसन्धानमा परिचालित गरेर चोरीमा संलग्नलाई पक्राउ गर्न सफल भएको बताए ।
ट्रान्सफर्मर हुने तामा र तेलका कारण मुख्यतः चोरी गर्ने गरिएको पाइएको र सो चोरी गर्ने ७ जनासहित तामा किन्ने ५ जना गरी १२ जनालाई पक्राउ गरिएको कार्कीले जानकारी दिए ।
पक्राउ पर्नेमा मोरङ ग्रामथानका अर्जुनकुमार माझी, इरज माझी, मोरङ बेलबारीका अर्जुन चौधरी, रंजित तामाङ, सुनसरी दुहबीका अनुज विश्वास, प्रयागकुमार खाँ चौधरी र भारतका आल मियाँ बिहारी छन् ।
यसैगरी चोरीको सामान खरिद गर्ने विराटनगरका लक्ष्य प्रधान, कृष्ण गोपाल ताम्राकार, दुहबीका योगेश अग्रवाल, कपिल भट्ट, सुनसरी इटहरीका सिताराम राई रहेका छन् । उनीहरूको घर र डेराबाट प्रहरीले करिब ३६८ किलो तामा, चोरी गर्न प्रयोग गरिएका औजार, चोरीमा प्रयोग गरिएका मोटरसाइकल र पिकअप गाडी बरामद गरेको छ ।