Category: भिडियो

काठमाडौं । नेकपा एमालेबाट काठमाडौं महानगरपालिकाका मेयर उम्मेदवार केशव स्थापितले आफू निर्वाचित भएपछि ‘सगुन’का नाममा समय बर्बाद नपार्ने बताएका छन् ।

अन्तर्राष्ट्रिय श्रमिक दिवसका अवसरमा जिफन्टले काठमाडौंमा आयोजना गरेको कार्यक्रममा बोल्दै उम्मेदवार स्थापितले अघिल्ला मेयर विद्यासुन्दर शाक्यतर्फ लक्षित गर्दै ‘केइकेई’ मान्छेले ६ महिनासम्म सगुनमा समय बर्बाद गरेको बताए ।

‘मैले केइकेई मान्छेलाई देख्या छु, ६ महिनासम्म कहाँ भन्या त ‘सगुन’ खान रैछ’, उनले भने, ‘सगुन खान भन्या छ, साँझ परेपछि चुस्स लाछ, फोन गरेको स्वीच अफ भन्छ । यस्तो पनि मेयर हुन्छ ?’

सगुनका नाममा अण्डा र माछा खाएर ठूल्ठूला कुरा गरेर समय खर्च गरेको पनि उनले बताए । ‘जैले पनि सगुन भन्या छ, अण्डा खाछ, माछा खाछ । ठूल्ठूला कुरा गर्‍या छ’, उनले थपे ।

तर आफू भने त्यस विषयमा सचेत रहेको स्थापितले बताए । आफू निर्वाचित भएपछि एकदिन सगुनका लागि छुट्याएको पनि उनले बताए । उनले भने, ‘हुँदैन जितेको भोलिपल्ट ६ देखि १२ बजेसम्म एकदिन हुन्छ । जति आउने हो, आउनुपर्‍यो । त्यसपछि अघिल्लो दिन मेरो आमाजस्तो दिदी हुनुहुन्छ उहाँलाई ढोग लाउनु, जान्छु र अनि यहाँ बस्ने ।’

आफू उपहारको धेरै सौखिन नरहेको पनि उनले सुनाए । ‘मलाई अण्डा दियो भने अर्कोलाई दिइहाल्ने, फेरि खायो भने त मरिहाल्छ नि । अरु पनि खाने बानी लाग्छ नि, होस त पुर्‍याउनुपर्‍यो । खानेबानी ठीक हुँदैन क्या’, उनले भने, ‘उपहार लिएपछि त अरु पनि लिने बानी लाग्छ नि, उपहार नल्याउने खानेकुरा ल्याए हुन्छ, बिस्कुट ल्याए हुन्छ, झोल पदार्थ नल्याउनुहाेस् एकदम प्रस्ट ।’

त्यो दिन १२ बजेपछि सगुन कार्यक्रम सिद्धिने र भोलिदेखि काम गर्ने उनले बताए ।

काठमाडौं । निर्वाचन आयोगले देशभरका निर्वाचन अधिकृतको कार्यालयबाट उम्मेदवारलाई निर्वाचन चिह्न प्रदान गरेको छ ।

शुक्रवार साँझ प्रकाशित अन्तिम नामावलीअनुसार उम्मेदवारलाई निर्वाचन चिह्न प्रदान गरिएको आयोगका प्रवक्ता शालिग्राम शर्मा पौडेलले जानकारी दिए ।

वैशाख ११ र १२ गते उम्मेदवारी मनोनयन दर्ता गराएर मनोनयन फिर्ता नलिएका उम्मेदवारलाई निर्वाचन चिह्न प्रदान गरिएको उनको भनाई छ ।

राष्ट्रिय मान्यता प्राप्त छ वटा राजनीतिक दलका उम्मेदवारलाई मतपत्रको क्रमसङ्ख्या १ देखि ६ सम्म कायम निर्वाचन चिह्न प्रदान गरिएको छ ।

यस्तै राष्ट्रिय मान्यता प्राप्त नगरेका तर आयोगमा दर्ता भएका दलका उम्मेदवारलाई सम्बन्धित पार्टीको निर्वाचन चिह्न र स्वतन्त्र उम्मेदवारलाई मतपत्रमा रहेको चिह्नबाट छान्न लगाइएको छ भने स्वतन्त्र उम्मेदवारका लागि भ्यागुतो, गुलाबको फूल, भूइँकटहरदेखि खसीको टाउको लौरी जस्ता निर्वाचन चिन्ह प्रदान गरिएको छ ।

निर्वाचनका लागि ९५ हजार २५३ पुरुष र ५७ हजार ९६७ महिला गरी कूल एक लाख ५३ हजार २२० जनाको उम्मेदवारी परेकोमा ८ हजार उम्मेदवारले नाम फिर्ता लिएको पनि आयोगका प्रवक्ता पौडेलले जानकारी दिए ।

७५३ स्थानीय तहका प्रमुख, उपप्रमुख, अध्यक्ष र उपाध्यक्ष, ६ हजार ७४३ वडाध्यक्ष, सोही सङ्ख्यामा महिला सदस्य र दलित महिला सदस्य तथा १३ हजार ४८३ सदस्य गरी कूल ३५ हजार २२१ सदस्यका लागि वैशाख ३० गते निर्वाचन हुँदै छ ।

काठमाडौं । काठमाडौंको मेयर पदका प्रत्याशीहरुलाई बिहिबार काठमाडौंको नेसनल कलेजमा अन्तरक्रियाका लागि निम्त्याइएको थियो । तर, प्रत्याशीहरुमाथि अतिरञ्जित र व्यक्तिगत लाञ्छनायुक्त आरोपले विषयवस्तु डाइभर्ट भयो र सिंगै कार्यक्रमको माहोल विथोलियो ।

मेयरका दुई उम्मेदवार केशव स्थापित र बालेन शाहमाथि एक छात्राले गम्भीर आरोप लगाएकी थिइन् । उनको आरोपमा स्थापित आक्रामक रुपमा प्रस्तुत भए जथाभावि बोल्न पुगे । बालेनले भने शान्त प्रतिवाद गरे ।

आरोप लगाउने छात्रा भावना राउत विवेकशील नेपालीकी पूर्वकार्यकर्ता हुन् । प्रश्नका रुपमा उनले स्थापितमाथि यसरी प्रहार गरेकी थिइन् :

‘हामीले विगतमा यस्तो गर्‍यौं, उस्तो गर्‍यौं भन्नुभयो । तर विगतमा हेर्दा दुईजना महिलाले तपाईंमाथि यौन दुव्र्यवहारको आरोप लगाएका छन् । तपाईंले मेयर जितेको अवस्थामा म तपाईंको अफिस गएँ भने सुरक्षित हुन्छु कि हुन्न ? तपाईंकै उपमेयर सुनीताजी तपाईंबाट सुरक्षित हुनुहुन्छ कि हुनुहुन्न ?’

त्यसपछि न्यायाधीसको शैलीमा उनले भनिन्, ‘अपराध भएको हो भने सबैका अगाडि स्वीकार्ने क्षमता राख्नुहोस् । यदि तपाईंलाई हामी सबैको भोट चाहिन्छ भने ‘एक्सप्लानेसन’ दिनैपर्छ । तपाईंले गरेको गल्ति होइन, अपराध हो । यदि होइन भने प्रमाणसहित आउनुस् । हो भने यो कुर्सी छोडेर जानुस् ।’

भावनाको यस्तो प्रस्तुतिले स्थापित उत्तेजित बने ।

बसिरहेको कुर्सीबाट जर्याकजुरुक उठ्दै उनले भने, ‘तपाईंलाई यो प्रश्न सोध्ने हक छैन । म जत्तिको मान्छेलाई यस्तो आरोप लगाउन कुनै प्रमाण छ ? छ भने देखाउनुस् । नत्र पत्रिका पढेको भरमा जे पनि आरोप लगाउन पाउनुहुन्न ।’

उनले आवेशमा आउँदै थपे, ‘यु आर नाइस लेडी । तर थुतुनो ठीक छैन तपाईंको ।’

स्थापितले संयम गुमाएपछि विद्यार्थीहरुले सम्झाउने प्रयास गरेका थिए ।

रिस शान्त गर्न आग्रह गर्दा उनले भने, ‘केशव स्थापित रिसको भाँडो हो । नरिसाउनु भन्न पाइन्छ ? म एग्रेसिभ नै छु । कराँते खेल्या हो ।’

आफूमाथि आरोप लगाउने महिला कांग्रेस उम्मेदवार सिर्जना सिंहबाट परिचालित रहेको स्थापितले संकेत गरे ।

उनले भने, ‘यदि मैले केही गरेको भए एफएममा प्रोग्राम सञ्चालन गर्ने त्यत्रो सोसल कन्ट्याक्ट भएको मान्छेले थप्पड हान्दैन ? २५ वर्षसम्म दबाएर बस्छ ? सिर्जनाजी र उहाँ सँगै बसेको फेसबुकमै राखिएको छ । त्यसको भोलिपल्टदेखि खेल सुरु भयो । आई फायर्ड एन्ड सि इज नाउ हायर्ड । उहाँको डकुमेन्ट निकालौं ? म निकाल्दिउँ । यु क्यान्ट हियर । यु क्यान्ट विलिभ । यो महिलाले यतिसम्म गरेको रहेछ भनेर… ।’

स्थापितको यो जवाफमा साझा विवेकशीलकी मेयर प्रत्याशी समिक्षा बास्कोटाले हस्तक्षेप गरिन् ।

उनले भनिन्, ‘केशवजीले प्रमाण छ भन्नुभयो । म कानूनको विद्यार्थी हुँ । यदि यो चुनावको फन्डाजस्तो मात्र लाग्छ भने चरित्रहत्यामा मुद्दा हाल्न सक्नुहुन्छ । यहाँसित प्रमाण पनि रहेछ । यदि यहाँ चाहनुहुन्छ भने तपाईंको मर्यादामा आँच पुर्याएको भनेर मुद्दा हाल्दिनुस् । कानूनी दायराबाट यो सेटल हुन्छ । त्यसपछि कसैले पनि उठाउँदैन । तर तपाईंले महिलामाथि सभ्य भएरै बोल्नुपर्छ ।’

अब आरोप खेप्ने पालो आयो बालेनको । उनै भावनाले स्थापितपछि बालेनलाई निशाना बनाइन् । उनले बालेनका र्‍यापहरूले महिलाको अपमान भएको दावी गरिन् । उनको यस्तो दावीलाई उनै विवेकशील-साझाकी समिक्षाले साथ दिइन् ।

भावनाले बालेनलाई लक्ष्यित गर्दै भनिन्, ‘बालेनजी, तपाईंको गीतहरु सुनेको छु । तपाईंको र्‍यापहरुले महिलालाई कुन दर्जामा राखेको छ भन्ने हेरेको छु । सबै भोटरसँग तपाईंले माफी माग्ने कि नमाग्ने ?’

बालेनले उनलाई र्‍याप ब्याटलको कल्चर बुझ्न आग्रह गरे ।

उनले भने, ‘अमेरिकामा जस्तो प्राक्टिस छ, त्यही कपि गर्दा त्यस्तो भएको हो । तर, हाम्रो गीतहरुमा त्यस्तो केही छैन । मैले ‘अनलर्न’ गर्ने भनेर स्टाटस कहीँ पनि लेखेको छैन । मैले त्यो चिज कहीँ पनि ‘लर्न’ गरेको छैन । त्यो गीत अर्कै विधा हो ।’

भावनाले उनलाई प्रतिप्रश्न गर्दै सोधिन्, ‘तपाईंको र्‍याप तपाईंले लेखेको हो कि होइन ? भोलि मेनिफेस्टो पनि मैले लेखेको होइन भन्नुहोला, कसरी पत्याउने ?’

बालेनले फेरि शान्त जवाफ दिए, ‘भारतीय सिनेमा कविरसिंह हिट भयो । त्यसमा महिलाविरुद्धका सेन्टिमेन्ट धेरै थिए । त्यो विधा नै त्यस्तै हो । अमेरिकन र्‍याप ब्याटल हेर्नुभयो भने बुझ्नुहुन्छ । यसमा यतिसम्मको सहनशीलता चाहिन्छ कि जुनसुकै लेभलमा गिरेर, उठेर वा हिँडेर होस आफ्नो अपोनेन्टलाई परास्त गर्न खोजिन्छ । मलाई पछि मन नलागेर छोडेको हुँ । यसमा अनलर्न गर्ने कुरा केही छैन ।’

बालेनको उक्त जवाफलाई विवेकशीलकी नेतृ समिक्षाले प्रतिवाद गरिन् ।

उनले भनिन्, ‘सरी टु से । तपाईं अमेरिकाको र्‍याप ब्याटल हेर्नुस् कि नेपालको र्‍याप ब्याटल हेर्नुस् । महिलाको संवेदनशील इस्यूमा बोल्दा विचार पुर्याउनुपर्छ । महिलामाथि प्रश्न उठाउन पाइँदैन ।’

बालेनले उनैलाई प्रश्न गरे, ‘आजभन्दा आठ वर्ष अगाडि किन यो प्रश्न उठाइएन त मलाई ? म यहीँ थिएँ त ।’

सहभागीहरुले उनको समर्थनमा ताली बजाए ।

सिमरा । ५ वर्षअघि शिक्षकको जागिर छाडेर जितपुर सिमरा उपमहानगरपालिकाको उम्मेदवार बन्दा सरस्वती चौधरीसँग राजनीति र प्रशासनिक कुनै अनुभव थिएन ।

थारु समुदायकी युवा महिला सरस्वतीलाई एमालेले जातीय र भेगीय सन्तुलन मिलाउन शिक्षकबाट राजीनामा गराएर उपमेयरको उम्मेदवार बनाएको थियो । मेयरका उम्मेदवार डा. कृष्ण पौडेल जति चर्चामा थिए उनको चर्चा चाहिँ चुनाव जितेपछि मात्र भयो ।

पाँच वर्षपछि सरस्वतीको भूमिकामात्र फेरिएको छैन, जिम्मेवारी पनि अझ माथि पुगेको छ । मधेस प्रदेशका तीनवटा उपमहानगरपालिका र एउटा महानगरपालिकामध्ये मेयरको उम्मेदवार बन्ने एकमात्र महिला बनेकी छन् सरस्वती चौधरी । मधेसमा महिलालाई नेतृत्वमा स्वीकार गर्न सकस भइरहेका बेला सरस्वतीको उम्मेदवारी आम मधेसी महिलाका लागि अवसर बनेको छ ।

पाँच वर्षको बीचमा सरस्वतीले कामबाट जनताको मन जितिन् कि जित्न सकिनन् भन्ने त चुनावी परिणामपछि मात्रै थाहा हुन्छ । तर, उनको बारेमा जितपुर सिमराका जनताले अहिलेसम्म नकारात्मक टिप्पणी गरेका छैनन्, बरु उपमेयरको रुपमा उनले आफ्नो नेतृत्व क्षमतासँगै जिम्मेवारी पनि परिपक्व बनाएको भनिरहेका छन् ।

उपमेयर जित्दै गर्दा सामान्य शिक्षिकाको भूमिकामा रहेकी सरस्वती अहिले मुलुककै सबैभन्दा ठूलो दल नेकपा एमालेको केन्द्रीय कमिटी सदस्यको हैसियतमा पुगेकी छन् । न्यायिक समितिको प्रमुख समेत भएर उपमेयरको भूमिकामा उनले विशेषगरी मधेसका महिलालाई न्याय दिलाउन भूमिका निर्वाह गरिन् । आधाभन्दा बढी महिला मतदाताबीच उनको यो भूमिका अहिले चर्चामा छ ।

अघिल्लोपटक उनी नयाँ थिइन् तर चुनाव त्रिपक्षीय थियो । यसपटक उनी अनुभवी भइन् चुनावपनि चुनौतिपूर्ण छ । पाँच दलीय गठबन्धनबाट मेयरको उम्मेदवार बनेका माओवादीका राजन पौडेल यसअघि तेस्रो भएका थिए । यसपटक चौधरी र पौडेलबीच मुख्य प्रतिस्पर्धा छ ।

उपमेयरमा एमालेबाट साबिकको पिपरा गाविसमा दुईपटक अध्यक्ष निर्वाचित भएका लोकप्रिय नेता भोला अधिकारी छन् भने गठबन्धनबाट कांग्रेसको विद्यार्थी नेतृ मेघा शाही उम्मेदवार छिन् । मेयर र उपमेयरमा गठबन्धन गरेका दलहरु वडा तहमा भने एक्ला एक्लै लड्दैछन् । कांग्रेसमा मेयर माओवादीलाई दिइएकोमा असन्तुष्टि छ ।

अघिल्लो कार्यकाल सरस्वतीका लागि चुनौतीपूर्ण रह्यो । मेयरको कमजोर निर्णय क्षमता र कार्यपालिकामा बहुमत विपक्षीको हुँदा पनि उनले मेयरको भन्दा राम्रो नेतृत्वदायी भूमिका निर्वाह गरिन् । करीव १५ वर्षको शिक्षण पेशा र ५ वर्षको उपमेयरको भूमिकाले उनलाई परिपक्व नेताका रुपमा जनतामा स्थापित गर्न भने सफल भएको छ ।

कोरोना संक्रमणको पहिलो लहरका बेला कोही बाहिर निस्कन नसक्दा उपमेयर चौधरी आफैं फ्रन्टलाइनमा उत्रे उद्धार, राहत तथा घरघरमा स्वास्थ्य सामग्री पुर्याउन जान्थिन् । उनको त्यो भूमिका पनि अहिले उपमहानगरपालिकाको मेयरको उम्मेदवार बन्दै गर्दा मतदाताले स्मरण गरेका छन् । थारु र मधेसी समुदायको सघन बसोबास रहेको ठाउँमा त्यो समुदायबाट सरस्वतीमात्र उम्मेदवार बनेको फाइदा पनि एमालेले लिन खोजेका छ ।

के भन्छिन् सरस्वती ?

२०७४ सालमा म उपमेयर निर्वाचित हुँदा अनुभव थिएन । पहिलो उपमहानगरपालिका र पहिलो जनप्रतिनिधिका रुपमा जे जति काम गर्न सकियो त्यसको अनुभवले आज मलाई कन्फिडेन्स बढाएको छ । आज म आफैं निर्णय गर्न सक्ने भएकी छु ।

सुशासनसहितको उमहानगर नगरपालिका बनाउँछु । जितपुर सिमराको विकासको जग बसाएका छौं,अब म आफैं यसको नेतृत्व गरेर हराभरा र राम्रो नगर बनाउँछु । पुर्वाधार विकासको सन्दर्भमा मैले धेरै कुरा सिकेँ,अब विज्ञहरूसहितको टिम बनाएर काम गर्ने हो ।

यहाँ मधेसका महिलाहरू अधिकारविहीन छन् । मेरो उम्मेदवारी महिलाको सबलीकरण र सशक्तिकरणको लागि पनि हो । अरु कुनै पार्टीले मधेसमा महिलालाई प्रमुख पदको उम्मेदवार नै बनाउँदैनन् । नेकपा एमालेले महिलालाई नेतृत्वमा ल्याउँन चाहेको छ ।

सुशासन र पारदर्शिताको सन्दर्भमा महिलाको नेतृत्व आवश्यक छ । मेरोबारेमा नगरबासीलाई थाहा छ । मैले चुनौतिलाई अवसरमा बदल्न सक्छु भन्ने विश्वास छ । उपमेयर कस्तो काम गर्ने मान्छे भन्ने थाहा छ । महिला भएर पनि पुरुष बराबर काम गर्न सक्छ भन्ने स्थापित गर्नुछ ।

अहिले हाम्रो पार्टीविरुद्ध पाँच वटा दलको गठबन्धनबाट उम्मेदवार बन्नुभएको छ । गठबन्धन उहाँहरुका आफ्नो नीति र सिद्धान्तविपरित हामीलाई हराउनमा बनेको होला तर एमाले एक्लै लड्न तयार छ र सक्षम छ । निर्वाचनमा हारजित आफ्नो ठाउँमा छ तर पहिले नै हार मानेर गठबन्धन गर्नु भनेको पराजय स्वीकार गरिसकेको हो ।

हिजो दुई नम्बर सिटमा बसेर जे जति काम गरेँ अब एक नम्बर सिटमा बसेर पूरा गर्न मलाई जनताले जिताउनेछन् भन्ने विश्वास छ ।

चौतारा । माओवादी कार्यकर्ताबीचको झडपका कारण चौतारा साँगाचोकगढी निर्वाचन कार्यालय तनावग्रस्त भएको छ । तोडफोड र झडपका कारण उम्मेदवारी मनोनयन प्रक्रियासमेत अवरुद्ध भएको छ ।

चौतारा साँगाचोकगढी वडा नम्बर १ र १४ को वडाध्यक्ष नेकपा एकीकृत समाजवादीलाई दिएपछि माओवादी कार्यकर्ता आक्रोशित भएर तोडफोडमा उत्रिएका हुन् ।

माओवादीकै दुई पक्षबीच झडपका क्रममा निर्वाचन कार्यालयका झ्यालको सिसाहरु फुटेका छन् ।

माओवादी मेयरका उम्मेदवार कृष्णप्रसाद सापकोटालगायतका नेताहरुलाई सुरक्षा दिएर राखिएको छ । झडप नियन्त्रण गर्न प्रहरीले अश्रुग्यास प्रयोग गरेको छ । ३० मत पनि नभएको नेकपा एसलाई वडाध्यक्ष दिइएको भन्दै माओवादी कार्यकर्ताहरु झडपमा उत्रिएका थिए । झडपका कारण एमालेका उम्मेदवारले मनोनयन गर्न पाएका छैनन् ।

यसैबीच चौतारा साँगाचोकगढीका मेयर अमानसिंह तामाङले माओवादीबाट टिकट नपाएपछि स्वतन्त्र उम्मेदवारी दर्ता गराएका छन् ।

काठमाडौं । सत्तारुढ गठबन्धनको तर्फबाट काठमाडौं महानगरपालिकाको मेयरकी उम्मेदवार कांग्रेस नेतृ सिर्जना सिंहले काठमाडौं महानगरले पहिलो महिला नेतृत्व पाउन लागेको बताएकी छिन् ।

उम्मेदवारी दर्तालगत्तै पत्रकारहरूसँग कुराकानी गर्दै सिंहले देशकै राजधानी सहरमा पहिलो महिला मेयर निर्वाचित हुन लागेको विषयले सबैमा उत्साह बढेको बताइन् । ‘जित निश्चित नै छ । काठमाडौं महानगरले पहिलो महिला मेयर पाउँदैछ’, सिंहले भनिन् ।

आफू मेयर भएपछि काठमाडौंलाई व्यवस्थित सहर बनाउने भन्दै सिंहले ट्राफिक समस्यादेखि खानेपानी र सरसफाइको समस्या समाधानमा विशेष ध्यान दिने बताइन् । त्यस्तै कामकाजी महिला बालबच्चाहरूको हेरचाहका लागि महानगरका विभिन्न स्थानमा सामुदायिक शिशु स्याहार केन्द्र स्थापना गर्ने उद्घोष पनि सिंहले गरिन् ।

‘काम गरेर घर चलाउनुपर्ने महिलाका बच्चाहरू हेर्दिने डे केयर सेण्टरहरु बनाउँछु । अहिले बच्चाको स्याहार गर्न नै हजारौँ रुपैयाँ खर्च गर्नुपर्ने अवस्था छ, त्यो हटाउँछु’, सिंहले भनिन् ।

उनले आफू गणेशमान र मंगलादेवीको बुहारी तथा प्रकाशमान सिंहको श्रीमती भएको तथ्य नलुकेको भन्दै आफ्नो राजनीतिक योगदान पनि कम नरहेको बताइन् ।

‘प्रकाशमानजीलाई नचिन्दै प्रजातन्त्रका लागि आन्दोलन गरेर हनुमान ढोकामा जेल जीवन बिताएको मान्छे हुँ । म राजनीतिमै थिए मात्र राजनीतिक पदमा थिइनँ । अब पदमा पुगेर जनताको सेवा गर्दै छु’, सिंहले भनिन् ।

पोखरा । महानगरपालिकाका वडाहरूमा भागबण्डा नमिलेको र अन्य चार गाउँपालिकामा पनि कुरा नमिलेपछि कास्की कांग्रेसले केन्द्रबाट तालमेल भएको मेयर पदबाहेक पोखराका वडामा एक्लै चुनाव लड्ने निर्णय गरेको छ ।

दिनभर भागबण्डाका लागि छलफल भए पनि कुरा मिलेको छैन । अर्कोतिर कांग्रेस नेताहरूलाई गठबन्धन नगर्न भन्दै कार्यकर्ताले चार घण्टा भन्दा थुनेपछि अन्तिममा मैत्रीपूर्ण प्रतिस्पर्धा गर्ने निर्णय जिल्ला सभापति किशोरदत्त बरालले सुनाएका थिए ।

जिल्ला कार्यालयमा ताला लगाएका कार्यकर्ताले नेताहरू बसिरहेकै ठाउँमा गएर घेराउ र नाराबाजी गरेका थिए ।

सभापतिले वडाहरूमा मित्रवत् प्रतिस्पर्धा गर्ने निर्णय सुनाएपछि कार्यकर्ताले खुसीयाली मनाएका छन् ।

अब पोखरामा मेयर र उपमेयरमा मात्र तालमेल हुने बताइएको छ ।

काठमाडौं । जनता समाजवादी पार्टी (जसपा) नेपालले भ्रष्टाचार मुक्त बनाऔँ, विकास र समृद्धिको अभियान अघि बढाऔँ भन्ने नारा दिएर स्थानीय तह केन्द्रित घोषणापत्र सार्वजनिक गरेको छ ।

आइतबार काठमाडौंमा पत्रकार सम्मेलन गर्दै जसपाले घोषणापत्र सार्वजनिक गरेको हो । निर्वाचनले स्थानीय लोकतन्त्र, स्वायत्तता, स्वशासनको प्रत्याभूति तथा प्रभावकारी सेवा सुविधा प्रदान गर्न उल्लेखनीय योगदान गर्ने जसपाको विश्वास छ ।

जसपाले वडा र पालिका कार्यालयहरूलाई सेवाग्राहीमैत्री बनाइने, जनतालाई छिटो, छरितो सेवा सुविधा प्रदान गरिने भ्रष्टाचारमा शून्य सहनशीलता कायम गर्ने र सरकारी कर्मचारी, राजनीतिक नेतृत्वले भ्रष्ट्राचार गरेमा, प्रमाण भेटिएमा तुरुन्त कानुनी कारबाही गरिने जनाएको छ ।

त्यस्तै प्रत्येक वडामा ५० र नगरपालिकामा ५०० जना युवालाई रोजगारी दिने र माध्यमिक तहसम्मको शिक्षा व्यवहारिक रूपमै निःशुल्क र गुणस्तरीय बनाउने घोषणापत्रमा उल्लेख गरिएको जसपा नेता अशोक राईले जानकारी दिए । त्यस्तै स्थानीय तहको करको दायरालाई बढाएर करको दरलाई कम पार्ने योजना जसपाको रहेको उनले बताए ।

पत्रकार सम्मेलनमा जसपा अध्यक्ष उपेन्द्र यादवले सामाजिक सुरक्षालाई प्रभावकारी बनाउने र गाउँ गाउँमा स्वस्थकर पिउने पानी, फोहर मैला व्यवस्थापनका विषय र विपत व्यवस्थापन समितिलाई पार्टीले प्राथमिकताका साथ राखिएको बताए ।

त्यस्तै जसपाका सङ्घीय परिषद् अध्यक्ष डा बाबुराम भट्टराईलेले मास्टरप्लान बनाएर नै विकासको योजनालाई अघि बढाउने प्रतिबद्धता जनाए । लोकतन्त्रलाई जनताको घरदैलोमा पुराउने र तल्लो तहबाटै विकास गर्ने योजना आफूहरूको रहेको उनको भनाई छ ।

जसपाले मधेसी, तारु, मुस्लिम, आदिबासी जनजाति, खस, सीमान्तकृत, अल्पसंख्यक तथा लोपोन्मुख जाति, शिल्पी÷दलित, दुर्गमबासी, महिला, लैङ्गिक अल्पसंख्यक आदिको सम्मानजनक सहभागिता गर्ने प्रतिबद्धता जनाएको छ ।

आधुनिक शौचालय सुविधा नपुगेका घर–परिवारलाई शौचालय निर्माण गर्न रु १० हजारको अनुदान दिनेलगायतका योजना जसपाको घोषणापत्रमा उल्लेख छ ।

काठमाडौं । निर्वाचन आयोगले स्थानीय तहको उम्मेदवारी दर्ताको सम्पूर्ण तयारी पुरा भएको जनाएको छ ।

शनिवार काठमाडौंमा पत्रकार सम्मेलन गर्दै आयोगले उम्मेदवारी दर्ताको सम्पूर्ण तयारी पुरा भएको र दुई दिनको समयमा आफ्नो अनुकूल समय मिलाई सम्बन्धित निर्वाचन अधिकृतको कार्यालयमा गई उम्मेदवारहरूले आ–आफ्नो मनोनयन दर्ता गर्न आग्रह गरेको हो ।

आयोगले आइतबार र सोमबार स्थानीय तहको निर्वाचनका लागि उम्मेदवारी दर्ताको समय तोकेको छ । कतिपय स्थानमा राजनीतिक दलका उम्मेदवारलाई गोला प्रथाद्वारा उम्मेदवार मनोनयन दर्ता गर्ने दिन तोकिएको भन्ने सूचना आयोगमा प्राप्त भएकाले यस विषयमा गम्भीर ध्यानाकर्षण भएको आयोगले जनाएको छ ।

पत्रकार सम्मेलनमा आयोगका प्रमुख निर्वाचन आयुक्त दिनेश थपलियाले आयोगले निर्वाचनको तयारी सम्पन्न गरेको र अव उम्मेदवारी, मतदान, मतगणना र नतिजा प्रकाशनतर्फ आयोग उन्मुख रहेको जानकारी दिए ।

उनले यातायातको सुविधा नभएको ठाउँमा १९ गतेभित्र मतपत्र पठाइसकिने बताए । थपलियाले ७७ जिल्लाका ७७ किसिमका मतपत्र हुने तथा भक्तपुर जिल्लाका चार नगरपालिका र ६ महानगरको मतपत्र १७ गते उम्मेदवारको अन्तिम नामावली प्रकाशित भइसकेपछि छाप्न पठाइने जानकारी दिए ।

उम्मेदवारको अन्तिम नामावली प्रकाशन भएपछि बढीमा १५ दिन प्रचारप्रसारको समय दिन सकिने भएपछि सो अवधि घटाउनुपर्ने राय आएकाले ११ दिन दिइने उनले बताए । त्यस्तै उनले एउटा पार्टीबाट चुनाव जितेका व्यक्ति अर्को पार्टीमा गएमा वा पार्टीले कारबाही गरेको पत्र दिएमा १५ दिनमा हटाउने व्यवस्था रहेको उल्लेख गरे ।

त्यस्तै प्रमुख निर्वाचन आयुक्त थपलियाले निर्वाचन आचारसंहितालाई प्रभावकारी रूपमा कार्यान्वयन गराउने र आचारसंहिता विपरीत कार्य गर्नेलाई कारबाही गर्ने बताए । उनले उम्मेदवारी दर्ता गर्ने सन्दर्भमा दुई पार्टीको भेट नहुने गरी मिलाउन भनिएको बताए । स्थानीय तहको निर्वाचन वैशाख ३० गते हुँदै छ ।

काठमाडौं । नेकपा एमालेले ६ वटा महानगरपालिका र ११ वटा उपमहानगरपालिकाका मेयर तथा उपमेयरका उम्मेदवारहरुको निर्णय वैशाख १० गते गर्ने भएको छ ।

केन्द्रीय सचिवालयको विहीबारको बैठकमा प्रदेशबाट सिफारिस भएर आएका नामहरूबारे छलफल भए पनि निर्णयका लागि अर्को बैठक वैशाख १० गते बोलाइएको प्रचार विभाग प्रमुख पृथ्वीसुब्बा गुरुङले बताए ।